اختي هذا الرجل كذاب لا تصدقيه

[وصال]

السلام عليكم ورحمة الله تعالى وبركاته​

توحشتكم وتوحشت نكتب مواضيع في منتدى واش راك تهدر ​

اليوم جبتلكم واحد الموضوع يقيسني انا وانت وانت يقيسنا كامل وللاسف الشديد حاجة يديروها بزاف لولاد ولكن المالوغ انهم يعطو المواعظ ويسبوا بنات الناس ومكانش نهار جزت على موضوع وملقيتش سبان ومعاير في حق لبنات ​

ولاد بيناتنا متزعفوش علينا بصح هادي هي الحقيقة المرة ​

جايزة طريق نلقى جان يتبلى في واحدة واش يقوللها ​

" الله يبارك ...... " وكلام ماشي مليح ​

شفت فيها لقيتها بنت ايه صح شااااااااااااابة بصح ماشي الله يبارك عارفين علاه ؟​

سروال مزيييييييييييييييييير وشعر مكريبي و....و......
يرحم في باباك كيفاه هادي تشوفها الله يبارك ​

:scared::scared::scared:​

وزيد والله بنت فاميليا
ياعيييييييييني على بنت الفاميليا​

بووووه هادي بنت فاميليا كيفاه راك تحكم
قولي بيناتنا ماشي عيب عليك تخليها تشوف في روحها على حق راك خدمت خدمة الشيطان وعاونتوا وسهلتلوا المهمة ولا راني غالطة ؟(حاشة البعض لي ميستهلوش لكن لوكان نعد النسبة راه لي يستهلوا كثر من لي ميستهلوش)​

اسمعي انت يالي راكي تسمعي في الكلام المعسول صوا في الشارع صوا في التلفون​

واقيلة امنت روحك بلي راكي ملكة الجمال ​

واقيلة امنت روحك بلي بنت فاميليا ​

صدقيني كذاب وكذاب وكذاب وزيد عشرين مرة كذاب ​

قدامك يولي عنترة بن شداد يتخالفوا رجليك يولي ابليس ينعتك باقبح الصفات واقسى الكلمات​

بيناتنا قوليلي شكون لي يدصروها بزاف لي تدير الماكياج وتخرج لوحة بيكاسوا ومناظر ربيعية ولا لي تلبس الحجاب وتستر روحها ما يبان منها ولا شئ ​

شكون لي عرضة لعدم الاحترام لي تطلق العنان للكلام ولي يجي تحكيلوا قصة حياتها ولا لي ساكتة على قد السؤال الجواب؟​

قولولي يارجال واش رايكم في بنت كيما هادي ​

شكون هي بنت الفاميليا في نظركم ​

حبذا لو تعطيونا المعايير ​

ولينا منفهموا والوا كلشي بالمقلوب ​

اذا عادت البنت لي تحكي مع فلان وفلان بنت فاميليا اذن شكون لي مش بنت فاميليا؟ ​

ماذا بينا تفهمونا ​

وصال​

 

[ماكانش]

أهلا بيك وصال
يعطيك الصحة على الموضوع الباهي
والله كيما قلتي طلعولهم الشان، والمشكل يصدقو مسكينات
يقلها راكي كذا وكذا وهيا تبالها صح
لنو الطفلة بطبيعتها تصدق لكذب، لوكان ماجاتش تصدق لكذب رانا ماناش واصلين للدرجة هذي ...

بنت الفميلة تتغير من وقت لوقت
في وقتنا هذا انا نشوف فيها هي البنت المستورة، الحشامة، ألي صحاباتها كامل محترمات مستورات، ماتحكيش مع لولاد، حاكمة قدرها، متربية ....

يعطيك الصحة وصال
+
تقييم​

 

[عرفتك]

الرجال كي يحبو يقلولك راكي مليحة يقلوها حتى ولو تكوني فرطاسة راهم يحبو غير رواحهم

 

[أسماء الغالية]

صدقيني كذاب وكذاب وكذاب وزيد عشرين مرة كذاب​

ههههههههههههههه اه ياوحد لكذاااااااب
كي عاد يكذب معناها رانا باشعين وحدة ماهي مليحة ولى واش

 

[أم راضية ~_]

صحيتي وصالوو
عندك الحق اللي تستر روحها و ماعينهاش يدصروها و يرميولها في الكلام كوني هانية واحد ما يغلط معاها بصح هاديك الي تموت وتسمع هادوك التعليقات تستهل هي حبت
وقلييييل وين نلقاو بنات مستورين وليجان يخلطو فيهم
الحمد الله الذي فضل علينا الحمد لله

 

[Jeune Sghir Mc]

الحلابين فقط
.
.
.
يفسدون آلفتيات اليوم

.
.
.
.
.
.
ثم يبحثون ..
... عن ﺯوجات [ﺻﺂلحآت]
ﻓي ﻣستقبل حيآتهم...!

غفلوآ عن آلقاعدة القرآنيه :
-̴--̴-̴--̴-̴-
[ الخبيثون للخبيثات والطيبون للطيبات ]









مي بيناتنا اختي
la plupart تاع لبنات
يحبو هاذاك لي يتبعهم ويتبلاهم ويطلعلهم الشان ويحلبهم والي يكذب عليهم
مي وليد الفاميليا لي حاكم قدرو ليه ومول النية الصافية والي يمشي مسلس

مانعرف كيفاه يشوفو ليه
معقد بالاك



'مام هنا فالمنتدى كاينة بزاااااف







صحيتوووووو

​

 

[hiba14]

السلام عليكم
يعطيك الصحة على الكلام اللي قلتيه في الموضوع و نزيدك لامود تاع دروك و الله ماهم يقولوها بنت فاميلا دروك خرجوها نورمال يطيحلها في وجها و يبخس فيها و هي تضحك وجه البخس هادو هوما اللي طيحو علينا البق ولينا قاع نبانو كيفكيف
بصح نقولك انا عندي اللي يدير هاك حتى هو ماشي بنادم ماشي غي هي الطيور على اشكالها تقع

 

[محبة الورد]

السلام علييكم اختي
والله صح عندك الحق منصدقوهمش وديجا لي ناوييك لحلال يعرف الباب تع داركم
مي ختي انا تعلمت منحكمش على اخلاق البنت من لباسها لاني شفت بنات الله يبارك حجاب وكامل وكيما يقولوا تحت السواهي دواهي
وشفت بنات صح ماراهمش دايرين حجاب يعني سيفيليزي مي والله لوكان تضربي علييها طلة غير عاقلة والحياء وكامل
انا مرة شفت وحدة تقرى فالليسي جلباب وكامل من بعدة كنت انا ولبنات نمشوا موراها شفنا لعجب
ابان انا هكذا تعلمت منحكمش على الطفلة من لباسها
وتقبلي مروري ​

 

[مابقاش بزاف.Dz]

درك الي تلبس نورمال و لا لي دير حجاب شرعي و لا لي تلبس جلباب و لا غيرها قع يتبلاوا فيهم

 

[ђĩหđǿĉħǻ]

الله يهدي الجميع

و كيما قال الاخ



BRAHIM.BARçA211
اللي ماصل ماصل حب بنت و لا ولد مش غير البنت حتى الولد
اييه و الله وصلنا للوقت اللي يخلع


​

 

[adel-mz]

[center]بنت الفاميليا هي لي تخاف ربي في والديها وخاوتها وفاميلتها وترفع راسهم ومطيحش بيهم ماهي ني لبسة ني حجاب ني والوا ،بارك الله فيك[/center]

 

[adelskikda]

الحلابين فقط
.
.
.
يفسدون آلفتيات اليوم

.
.
.
.
.
.
ثم يبحثون ..
... عن ﺯوجات [ﺻﺂلحآت]
ﻓي ﻣستقبل حيآتهم...!

غفلوآ عن آلقاعدة القرآنيه :
-̴--̴-̴--̴-̴-
[ الخبيثون للخبيثات والطيبون للطيبات ]









مي بيناتنا اختي
la plupart تاع لبنات
يحبو هاذاك لي يتبعهم ويتبلاهم ويطلعلهم الشان ويحلبهم والي يكذب عليهم
مي وليد الفاميليا لي حاكم قدرو ليه ومول النية الصافية والي يمشي مسلس

مانعرف كيفاه يشوفو ليه
معقد بالاك



'مام هنا فالمنتدى كاينة بزاااااف







صحيتوووووو

​

والله عطيتهم كلش ماعندي مانزيد نقول انا فالوقت هدا ربي يهدي من خلق

 

[fofabriyanka]

بنت فاميليا متصدقش هذا لكلام تفكر فى ربها و تفكر فى خوها و باباها و دير فى بالها انه الشيطان يزين الاعمال لاصحاب القلوب الغير المؤمنة وقتاش تصدقى الراجل لما يجيك لدار و يتقدملك للزواج .مازال الشيطان يحاول يبعدنا عن ديننا واحنا غافلين لوقتاش؟؟؟ لما نحاسبوا رواحنا...

 

[dahbito]

وعليكم السلام اختي
صراحة والله غير موضوع رائع وطرحه صائب
واش تحبي الراجل بطبعو كذاب والمراة بطبعها نية وكاين العكس
ةتاني ماشي كامل الراجال كذابين راني على فئة معينة
الله يصلح احوالنا
شكرا على الطرح
تحياتي

 

[lebien]

سلام عليكم و رحمة الله و براكاته.
بعد غياب لي عت مجددا بهادا التعليق او هدا اول موضوع نقراه بعد هاد الغيبة.
الله يحفظك اختي رانا النشوفوا لعجب فالطرقان او لو كان نقلك ( ختي النوميروا الله يحفظك) كاش ما تفهمي اقلك اختي منبعد اعطيني النوميروا او منبعد الله يحفضك واشنواااااا هادا وين رانا ؟؟؟؟؟؟؟؟؟ و الله ما فهمت او نتوما يا ليجان فهمونا .شكرا علي الموضوع اختي الكريمة و حفظ الله لك هاده الانامل .سلام

 

[صـ كحرفـ محفور ـامتة]

كلامك منطقي وجميل......
بصح في هذا الوقت البنات كامل في هذا المشكل....
ماتقولي محجبة ولا خلاف
>>أنا محجبة ولله الحمد..... نلبس حجاب عريض و طابلية فوقو عريضة و ما سلكتش>من الذكور ومن هدرة البنات....في بالهم هوما الطفلة اللي ما تصاحبش تكون فيها حاجة..............!


المهم:
ربي يستر علينا وعلى بنات الناس ويهدي اللي خرج على الطريق

 

[كمايا]

للاسف هذوللي حكيتي عليهم علابالك علاش يعجبهم الحال؟


باسكو اصلهم يديرو هكذاك باش يعلقو عليهم

ومسكينة للي تدير هكذاك ماعندهاش ثقة في نفسها

تحب واحد اكثر منها ضعيف الثقة بالنفس يطلعلها المورال بالكلمات التافهين هذوك

لانو فعلا الرجل للي يلطش البنت فالطريق يبقى يلحق وراها ويخربط عليها

صراحة بدون تعليق

شويا المستوى راهو طايح

وتبقى الفتاة المحترمة المتحجبة الحجاب تع بكري ماش تع درك

هيا الثمينة يشوفو معاها بصح مايتجرؤوش يلوحولها لكلام كي للي يلوح الماكلة للكلب حاشاكم

واعتذر على التعبير لكن هذه هي الحقيقة

 

[sali-sali]

شكرا اختي على الموضوع
والله لي تكون عندها ثقة في روحها ومحتارمة نفسها ماتعمرش راسها بكلام ناس الشارع
تخليه ينبح حتى يمل
والمشكل ماهوش في الحجاب كاينين لي محجبات وهاردينها وكاين بلا حجاب ولاباس بيهم
لكن مهما كان فالحجاب سترة للبنت
والبنت نتاع الصح تحكم دارهم خير ماتخرج ماتكسر راسها يكون خروجها للضرورة فقط

​