يامات زمان ، و دوكـ ، شوفو العجب ،،

لآ شَيْـئَ مُهـمْ

:: عضو مُتميز ::
إنضم
4 جوان 2013
المشاركات
643
نقاط التفاعل
1,674
النقاط
106
محل الإقامة
الغرب الجزائري
الجنس
أنثى

do.php


السلآم عليكم و رحمة الله و بركاته


وش راكم اولادي بناتي اخواتي الشقيقات اخوتي في الله صديقاتي الحبوبات اصدقائي النشيطين

ان شاء الله بخيــــــــــــــــــــــــــر ^^

( ملاحظة بركـ ، هاذ الموضوع كتبتو من مدة ظويلة شوي ، يعني مش منقول :up:)


المهم ، كامل نحبو نسافرو في العطلة ...شعارنا الفاكونس اندار بش نحوسو ياك


انا نتفكر بكري كي كنت كبيرة قصدي كنت صغيرة ..كانت العائلة الي عندها لوطو راهي جد غنية

و كامل افرادها زواخين

احم كان الوالد نهار يقول النهار الفلاني نروحو للبحر ...كامل يفرحو

لدرجة انهم يديرو زردة و يعرضو الجوارين بش ياكلو الطعام

كامل الغاشي يعرف بلي يا ودي هاذو راهم رايحين للبحر ^^ >> مخلوعين الله غالب <<

بون نهار يقولك باباك رانا رايحين للبحر ...شهر من قبل و نتا توجد

فالنهار تولي تقول ندي هاذ السروال و نلعب البالون

و فالليل ما ت**** وحدك مي تبات مع اللعاب نتاعك >> حاشاكم <<

المهم هاهو جا النهار الي نروحو فيه كامل العايلة فرحانة لدرجة انك تحسب راهم رايحين لماريكان

و الحاجة الاكيدة لازم كامل يروحو و الله يجعل كاين 20 راس معنتها 20 راس تشوفو داخل فاللوطو



حصريا ما يجري داخل السيارة او كما نسميها بالعامية اللوطو :


طراااااااااااااااخ

( هاذ الطفل بلع (غلق ) الباب زعما )

اول حاجة و قبل ما يدور راسو راهي الصفعة تكلمت فيه من عند الزعيم الاب .. ( داير عمامة زعما)

الاب : يا *** ما تعرفش تبلع الباب فاني

الاخ قاعد قدام رجلين الوالدة من جيهة مقعد السيارة : ما عندوش باب في دارهم واقيل

الابن قاعد في الخلف فالوسط: ما عليش كي نرجعو فكرني بش نعلمك كي تبلع الباب

الاخ الاكبر قاعد في الخلف من جيهة التاقة ( النافذة ) حاط يديه على فمو و يضحك غي بالشوي باه ما تتكلمش فيه الصفعة

الابنة قاعدة فوق الطابلو نتاع اللوطو من الامام : سااابق لا تتردد لاحق الفوز مؤكد لا لن يهزم ابدا من يسعى ....

الرضيعة في حجر امها : وععععععع وعععععع وععععععع


الام : اش اش اش صايي صايي ....و نتوما دوك رايحين نحوسو و لا ندابزو ؟؟ .. يلا هك غي خلوني في داري خير لي

الابن الي بلع الباب يكلم الطفل الي قاعد عند رجلين امو : ما كان ما دخلك ..اقضب لوطوتك و العب بيها و لا نقولك ارواح نعلمك كي تلعب

و يدور للاخر الي كان يضحك ... : ما تضحكش بزاف لا يطيحو سنانك ما نقبلوش العجايز فاللوطو

و يكمل مع الي من جيهتو : الها في روحك لا نضربك ضربة وحدة تخرجك مالتاقة تصيب روحك فالدار

الاب يخزر فيه : واقيلا خاصك صفعة اخرى ...؟


...


الام : شغل البوست و لا ما تقوليش ما كاش ؟

الاب : لالا كاين كيفاش هاذي ما كاش .....

تشش شش ششتششش

اوه الاذاعة راهي مبلعة واقيل و يخزر في الام بنص عين

الام: ........

الاب دور راسو للتاقة :: اففففففف

الام : ما تقولي لا افف لا آآفف لا اييف ..هاذي كي نرجعو للدار نتفاهمو عليها

الاب : ..


الاخ : عجابتك كسكيطتي ( قبعة )

الابن : ها ؟؟

الاخ : قلتلك مليحة كسكيطتي ؟

الابن : ها ؟؟

الاخ: الكسكيطة عجباتك ؟؟

الابن : ها ؟؟

الاخ : ما تسمعش و لا تلعب فيها ؟؟

الابن : شحال تعطيني لو كان نقولك رايي ؟

الاخ : زيدو في روحك ما خاصنيش

يدور للاخ الزاوج

: وش رايك في كسكيطتي مليحة ؟

الابن : ها ؟؟

الاخ : الكسكيطة شابة عجباتك ؟؟

الابن : شا راك تقول سباقيطي ؟؟

الاخ : شربت القهوة الصباح ؟؟

الابن : واه( نعم )

الاخ : باه شربتها ؟

الابن : الكسرى نتاع البارح علاه ؟

الاخ : انا قلت بالاك كليت التبن

بعد مدة

الابن : ياااااا شريت كسكيطة ؟؟

: صباح الخير

: صباح النور ...بصح قولي من وين جبتها ؟؟

: صاحبي سلفهالي

: شكون ؟؟

: ما تعرفوش

: شكون

: قدور........ياااو قلتلك ما تعرفوش ب السيف ياو


....


اف و اخيـــــــــــرا وصلت عائلة المزرعة السعيدة للبحر هع

وصلو 8 نتاع الصباح . من فم و هوماا يعومو لحتى جوعو

بيانسور ياكلو و يرجعو يعومو

كي ولات ال3 نتاع العشي

الاب : قدور قويدر قادوري قادوراني خاجية خيرة

>> اسماوات و صايي نتوم علاه راكم تحوسو <<

هيااااااا خفو رانا رايحين


...



فالطريق

الام : فوت فوت خلينا نشرو الخضرة و شوية فاكية

الاخ : شوف شوف من فم >> يهدر مع خوه <<

الان : هات هات يا الشيخ هنا ما نعيوكش

يكلم خوه : البصل و البطاطا ما نستحقوهمش حطهم في لامار >> صندوق السيارة <<

و هاذو خليهم هنا


داخل السيارة ، هجوم على الطماطم الدلاع البطيخ العنب التين الموز

يلا الطريق فيها 6 سوايع معنتها 6 سوايع و هوما يعلفو


و نهار يوصلو

الاخ : و الله غير عيينا اليوم

الابن : مالصباح ما كليت والو

الاب : حطينا العشا خلينا بش نروحو نرقدو


...........

اما دوك يا عجبا

الطفل بالهراوة بش يخلي ذاك الميكرو و يروح معاك للبحر

يركب فاللوطو يرقد و يقولك كي توصلو نوضوني

الطفلة تهدر فالبورطابل مع المجهول

نهار يوصلو

الاخ ما تشوفوش قاع ..تلقاه يمشي فالشط مرة على مرة يصور روحو بش يحط الفوطو فالفيس بوك

الطفلة قاعدة فالكرسي دايرة الكيتمان و تسمع للغنا

اما الاب راقد على كرشو ( البطن ) و يشمس

و الوالدة تشوف فالبحر و تطرطق فالشوينغوم > العلك <



توتة توتة خلصت الحتوتة ...ايا تشاو تشاو


عجباتك ما عجباتكش قريت ما قريتش

الفايدة هي الرد

بيسك كاين الرادار الي نحكمو ما يردش مالشعر نجبد

في امان الله
 
آخر تعديل بواسطة المشرف:
رد: يامات زمان ، و دوكـ ، شوفو العجب ،،

الام : فوت فوت خلينا نشرو الخضرة و شوية فاكية
هذي ماما ديما ديرها كي نخرجو وذرك انا عدت نديرها هههههه
ياخي نساء الجزائر عقليه وحده
الحمد الله مزال في دارنا كي نخرجو نقصرو وخواتو الذراري مدابزين وبابا يحلف فيهم ههه
اان شاء الله ماتنتقلش عدوة العولمه لجميع العائلات الجزائريه
شكرا على القصه المشوقه
 
رد: يامات زمان ، و دوكـ ، شوفو العجب ،،

هههههههههههههههههههه
بارك الله فيك على القصه الممتعه
والله كاين منها
هذى هي العائلات الجزائريه​
 
رد: يامات زمان ، و دوكـ ، شوفو العجب ،،

ام احلى هادي

اي مليح ،، الاطفال بطوايشهم تحلى القعدهـ
صحيتي بزااف ، ربي يحفظكـ

سماح الدزيرية

و فيكـ باركـ الله ، اي هذي العايلة الجزايرية
يعطيكـ الصصحة =)
 
رد: يامات زمان ، و دوكـ ، شوفو العجب ،،

ههههههههه
يعطيك الصحة قصة واقعة صح عندنا
نسناو منك الجديد خالة
تحياااااااااتي

 
رد: يامات زمان ، و دوكـ ، شوفو العجب ،،

-

ههههههه ضحكتيني من قلبي
جهد كبيييير يعطيك الصحة اختي لعزيزة
يكرم بختم التميز+ يوضع ضمن الفهرس.
 
رد: يامات زمان ، و دوكـ ، شوفو العجب ،،

هههههههههههههه
مشكورة على القصة
هذا واقع العائلة الجزائرية
 
رد: يامات زمان ، و دوكـ ، شوفو العجب ،،

اسراء بنت دزاير
صصحيتي بزاااف بنتي ، ربي يدوم عليكـ الضضحكة

آميرهـ
العفوووووووو ، ربي يحفظكـ

المستشآآر
الشكر لكـ ، بوركـ فيكـ
 
  • أعجبني
التفاعلات: Pyar
رد: يامات زمان ، و دوكـ ، شوفو العجب ،،

هههههههههه قصة جميلة

شكراااا لك يا خالة موضوع حساس

يعبر عن واقعنا الحالي الذي هو يزداد

بؤسا ان صح التعبير

جازك الله بخير دمتي في رعاية الله و حفظه
 
رد: يامات زمان ، و دوكـ ، شوفو العجب ،،

هههههههههه قصة جميلة

شكراااا لك يا خالة موضوع حساس

يعبر عن واقعنا الحالي الذي هو يزداد

بؤسا ان صح التعبير

جازك الله بخير دمتي في رعاية الله و حفظه


عندكـ الصصح ، و السبب التكنولوجيا اللي داتنا عقولنا
صحيت ، ربي يحفظكـ





 
رد: يامات زمان ، و دوكـ ، شوفو العجب ،،

hhhhhhhhhhhhh wlh la nichaine
hna mazal kimahak
 
رد: يامات زمان ، و دوكـ ، شوفو العجب ،،

ههههههههههههههههههههههههههههههههههههه
ههههههههههههههههههههههههههههههههههههههههههه
هههههههههههههههههههههههههههههههههههههههههههههههه
ياطيك الصحة والله ما قدرت نسكت حتا قاع الدار حارو فبا يما بابا خاوتي........
والله رووووعة جيبينا خطرة على الخطرة كيما هاك mdr²²²
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top