- إنضم
- 26 جوان 2011
- المشاركات
- 1,778
- نقاط التفاعل
- 5,166
- النقاط
- 111
- العمر
- 29
- محل الإقامة
- sidi bel abbes
- الجنس
- ذكر
السلام عليكم و رحمة الله و بركاته
صح صيامكم
كاين لي راه فايق و كاين لي راه ناعس غالبو رمضان
الله يقويكم مابقاش قد اللي فات :p
المهم ندخل صلب الموضوع
هذا الأسبوع قمت بسفر نحو الشرق أنا أحد أفراد العائلة بالتحديد إلى ولاية قسنطينة لأجل بعض الأعمال
مدينة جميلة وأناس طيبيين ما شاء الله تحياتي لكل إخواني اللماويين القاطنين بها
وفور عودتي منها يعني خرجنا منها في منتصف النهار راجع إلى ولايتي قمت بأخذ المقود بدل الشخص اللي كان معي لأنه كان تعبان
(مرحلة الذهاب كلفتنا تقريبا 7 ساعات دون توقف وبدون إحتساب الدوران داخل المدينة إلخ...)
المهم قلتله أنت ارتاح وأنا راح نكمل السياقة
أنا بيانسور فرحت :d
شفتو واحد داير رخصة السياقة و معندوش سيارة؟ (أنا هو :p )
المهم رخصتي جديدة قريب تقفل عامين لكن كنت نسوق بدون علامة 80
الآن لحقنا الصح
أحنا غير قربنا لمدينة البليدة و كان وقت الإفطار يعني كانت الساعة 8.05 هاك
وكيما عارفين كاين باراج يعني من ولاية البليدة حتى لسيدي بلعباس غير باراجات في الطريق
أنا غير وصلت شفت السيارات كامل حابسين
أخاااااااااااه توخضت قلت سور رادار هذا حكمهم
ديجا أنا عندي رخصة جديدة و منقولكمش شحال كنت نمشي في الطريق
(حفاظا على شعور المشاهدين وحتى لا نروج لهذه الحالات ههه)
اللي يحسن عوني فقط السائقين في الطريق اللي مثلي هههه
الكل يحوس يوصل بكري أ
نا كنت داير في حسابي على الأقل نوصل 11 تاع الليل لولايتي
المهم نرجع لكلامي
قلتلكم أنا غير شفت السيارات السكر التالي في الجسم تاعي شاد بيه صحيحتي طاح ههه قلت راح تخلاص عليا اهنا
لا رخصة لا فطور لا جد ماليكم ههههههه يعني كلش راح نحطه هنا
يا خوتي و نلحق الباراج....... الدركي قالي سيري على اليمين :-o
أنا نوضت اللي كان معايا قلتله كاش حاجة عاوني أنت كبيير بالاك يحن فيا ههههه
جا عندي قالي السلام عليكم خويا إن شاء الله ماراكش مقلق
هههههه في ديك الدقيقة قلبي حبس قلت سيبون بقى 5 دقايق على الأذان راه يجيب بيا الوقت يعني باينة حكمني رادار و سحب رخصة السياقة فيها فيها وإذا شاف الرخصة يروح يشوف ال80 كاينة ولا لا ..
المهم شفت فيه قلتله لالا .. خزر فيا و في اللي معايا و قالي طفي المحرك وانزل من السيارة انت والشخص اللي معاك و تبعني
قلتله علاش واش كاين مادرنا والو حنا ؟؟
قالي واش بيك أنت المغرب راح يأذن وتقولي واش كاين حاب تقعد بلا فطور وديجا على حساب الماتريكول (رقم السيارة ) مازال باقيلكم 4 ساعات طريق
أنا هنا فتاجأت كيما تقول بن غبريط هههههه الخوف كامل والعطش راح لكرشي رجع جوع :d و بقيت نضحك (الضحكة الباردة إيه هههه)
ولما نزلنا بقيت نشوف السيارات لي كانو حابسين بقيت نصحح مليح حتى شفت الناس جالسين برا السيارات قاعدين يستناو الآذان باه يفطروا
لكن بقيت مدهوش يعني منين جابو الفطور ولا الدرك الوطني راهم دايرين الزردة ؟ :thumb_up02:
أنا زدت شويا حتى شفت جماعة من الشباب يمروا على الناس ويعطوهم الإفطار
لأكتشف أنهم جماعة كشافة متطوعين في الطرقات يعني شباب فيهم خير يخمموا في المسافرين وقاموا بإعداد وجبات خفيفة حتى يتسنى للجميع الإفطار بإرتياح دون قلق
وفي نفس الوقت الحد من السرعة في الطريق والتي تؤدي إلى الحوادث خصوصا في هذا الوقت من الشهر الفضيل
يعني مبادرة جميلة وأنا حبيت نحيي هؤلاء الشباب على هذه النية الطيبة والمساعدات اللي قامو بيها بلا ماننسى الدركي اللي عرضني نفطر معاه
(مزيا ما فاقش بلي جديد في السياقة لوكان درك ماراني نشكر فيه العكس نقطع فيه ههههههه)
ربما أحد منكم مر بهذه التجربة في الطريق في هذا الشهر الكريم لما كان مسافر
لهذا استحسنت الفكرة و عجبتني و حبيت نجدد شكري لتفانيهم في خدمة إخوانهم المسافرين .
ربما أحدكم أحبابي كان معهم أو أحد أقاربكم أو أصدقائكم لذا حبيت نقولكم و نقولهم
جعلها الله في ميزان حسناتكم
أنقذتم الكثير من الأرواح بهذه الطريقة
هي بسيطة في أعينكم ولكنها كبيرة في أعيننا
جزاكم الله كل خير وتقبل الله منا ومنكم صالح الأعمال
سيبون حكايتي خلاصت تقدروا تروحوا هههه
عجبتكم الدراما ياك :yahoo01:
تحياتي للجميع و صح فطوركم
سوقوا بحذر ماديروش كيفي :smile02: :p
:regards01: :regards01: :regards01: :regards01:
