مافهمتش حاجة في ناس اللمة

[انا ناس ملاح]

السلام عليكم :regards02:
أزول :regards01:
باتا تليم ::-r
( يلي ما فهمش هدرتي فالاولة بالعربي و الثانية قبايلي و الثالثة مزابي )

المهم خاوتي رَآه عندي وحد الكيستيون محيرتني في المنتدى و ش معناتها اعجاب !؟ هاذيك الأيقونة اللي يحطوها تحت الموضوع ! آسكو هي صحصح تعني بلي رآك معجب بالكلام ولا راكم تحطوها هكاك برك !!!!
راني قاعدة نشوف في الغاشي كامل يحط في الإعجاب عالمليحة و الحايرة مافهمت والو الصراحة :s انا كنت فاهمة بلي الإعجاب يتحط غير كي تعجبنا حاجة او نقيمو كلام او نؤيد فكرة او نلفت انتباه العضو لردنا عليه ...الخ ،،، مش يجي واحد و يبدأ يكركر في ايدو من الموضوع الى اخر مشاركة و هو : اعجاب اعجاب اعجاب اعجاب اعجاب اعجاب اعجاب اعجاب اعجاب اعجاب اعجاب اعجاب اعجاب اعجاب..... الى مالانهاية :-o
انا ساعات يبعثولي اعجاب و حسب فهامتي نضن بلي الإعجاب راهو مؤسس على موضوعية :smile02: ! و بلي اللي حطو راهو قاصد يقيم كلامي و يثمنو لانه اعجب بالافكار او بالتوجيه او الطرح اونجينيرال بصح مالوروزمون كي نجي نرجع نشوف الموضوع نلقى السيد ولا السيدة راهم مخيطين الموضوع من اول مشاركة ! و حتى اللي ما يكتب والو في مشاركتو يحطولي اعجاب مافهمتش انا باش معجبين !!!
انا يضهرلي نحبسو هاذ العقلية و الإعجاب لازم يكون معبر على حالة الإعجاب صحصح مش خط الرمل نلوحوه وين جا يجي :graduation:
هاذا ما كان و صح سحوركم :love01:
اكيد واحد ما راح يحطلي اعجاب على هاذ الموضوع ههه حسبي الله و نعم الوكيل ههه :$

 

[Princesse Diyor]

رد: مافهمتش حاجة في ناس اللمة

ههههههه و الله عند الحق اختي نحييك على شجاعتك


بارك الله فيك

صح سحورك
​

 

[انا ناس ملاح]

رد: مافهمتش حاجة في ناس اللمة

هههه منال صحيتي حنونة الحمد لله راكي شايفة كيما راني شايفة إذن انا معجبة بردك و لذلك حطيتلك اعجاب هههه هه

 

[باتنية و نص]

رد: مافهمتش حاجة في ناس اللمة

سلام عليكم
نشني لاباس هيشم ؟ وهاذي الرابعة بالشاوية
لاحظت ما شاء الله منذ دخولك للمنتدى ونتي تكلاشي وتقصفي لول
امزح فقط
فعلا عندك الحق وحاجة مليحة انك تطرقتي لهاذ الموضوع
نظن انو انا من النوع البخيل في وضع الاعجابات ^^
ربما منتعمدش هاذ الشي..لكن نحاول ديما نعطي المواضيع حقها من الردود ونحسس الكاتب انو مجهودو مراحش سدى
وكيما تفضلتي اسباب وضع الاعجاب تختلف من عضو لآخر
غير انك نسيتي نوعية اخرى..كاين لي يحط اعجابات لغرض تحفيز الاعضاء وتشجيعهم ..وهذا لاحظته عند اعضاء محترمين وفعالين في المنتدى..
مشكورة اختي وصحا فطورك
تقبلي مروري
تحياتي

 

[السلطانة]

رد: مافهمتش حاجة في ناس اللمة

صحا فطورك اختي
انا مثلا الاعجاب نستعلو كي نفوت نقرى اي موضوع ونجاوب عليه هاذا مفهومي للاعجاب
نظن كل واحد كيفاه يفسر الاعجاب كاين لي يستعملو انو يقيّم الموضوع والعضو وكاين لي يستعملو كي يعجبو الموضوع
وانا كيما قتلك نستعملو كي نقرى ونرد في اي موضوع سواء عجبني او معجبنيش
وفي الاخير يبقى وسيلة ايجابية للعضو في المنتدى

يعطيك الصحة تقبلي مروري

 

[انا ناس ملاح]

رد: مافهمتش حاجة في ناس اللمة

اهلا بالباتنية بنت الأوراس و اول رصاصة هههه لالا والله راني ناس ملاح ملي جيت وانا ناس ملاح عارفيني تع روحي و خاطيني القصف الغير مبرر ، معناه القصف المبرر ممكن يجي مني ساعات لحاجة في نفس يعقوب فقط و ليس لغاية في نفس يعقوب ، فهناك بون شاسع بين التعبيرين .
المهم يا بنت مصطفى بن بولعيد عندك الحق بالاك هناك دافع تحفيزي و مشكورين عليه بصح سامحيني ممكن كاين واحد زوج قاصد هاك بصح كاين جماعة تخيط تخياط

 

[ثَسْكُورْثْ نَثْدُوكْلِي]

رد: مافهمتش حاجة في ناس اللمة

سلام عليكم اختي ناس ملاح ^^ ربي يدوم الملاحة..

أزوول فلام.. وصح فطورك..

سي ايقونة الاعجاب هذي كل وحد كيفاه يستعملها واكيد كل واحد حر مع تفكيروا المهم بالنسبة ليا لست معك ^^ ورغم ذلك وضعت لموضوعك اعجاب... لان تلك الايقونة بالنسبة لي تعني لي اني قرات موضوعك او ردك هذي هي... ويبقى.تقييمي للموضوع او للردود سواءً اعجبني او لا فتوجد ايقونة تقيم كما يوجد الرد اضع فيه راي مهما كان سواءً ب هههه او بكلام..

يعني باختصار هذا مايعني لي الاعجاب (قرات موضوعك) ..

ونزيدلك كيما الفيسبووك ياك فيه جام هههه و مارك راه زادلنا تعابير اخرى تعاون الجامجامات وان شاء الله تلحق للمنتدى ونلقاو ايقونات اعجبني وماعجبنيش.. اضحكني... ابكاني..وغيرهم..


ايا ان شاء الله فهمتي وش تكلمت وكل واحد وراي وتفكيرو بالطبع..


كوني بخير وصح رمضانكم
سلام ​

 

[BLEU PEARL]

رد: مافهمتش حاجة في ناس اللمة

السلام عليكم
الإعجاب عندي مهم نحفز بيها الناس باه تبدع
ونحب الناس كي يحفزوني
عادي هنا كلنا خاوة باعجاب ولا بدونو
هدفنا التشجيع
التوجيه
والإستمرار
بالنسبة ليا كل عضو قريب مني ولا غريب دار رد دار موضوع نعملو اعجاب محبة خاطر
بالتوفيق
صح سحوركم​

 

[انا ناس ملاح]

رد: مافهمتش حاجة في ناس اللمة

نسيت يالباتنية و نص و خمسوعشرين نقلك بلي شكرا على الاظافة الجليلة و ساحفضها : نشني لاباس هيشم .

 

[انا ناس ملاح]

رد: مافهمتش حاجة في ناس اللمة

ازوووول ساراكوكو لالا انا عجبني ردّك و علابالك بلي كلامك ماهوش بعيد على اللي قلتو و هو انو هناك حالة لوضع الإعجاب حينما نريد لفت الانتباه الى رد و كذلك حينما ندخل موضوعا و نرد عليه فبطبيعة الحال سنسجل اعجاب فالاعجاب هنا لا يعني بالضرورة الموافقة على الطرح فقد اكون اختلف معك في الفكرة و لكن أسجل اعجابا لأنك جعلتني أرد على موضوعك و حركت فيا الملكة العقلية و هو بيت القصيد . معليش درت ديvياسيون بالعربية الفصحى راني مانعرفش نكتب بالدارجة نلقى روحي نكتب فصحى بلا مانفيق المهم سرسورة كلامك صواب و المهم راكي فاهمة وش نقصد بالتخياط .

 

[انا ناس ملاح]

رد: مافهمتش حاجة في ناس اللمة

لؤلؤة زرقاء يا بنت الورود جميل جدا التحفيز بارك الله فيك عالاقل انتي عندك دافع واضح و مبرر المشكل راهو في التخياط ! بالاك عندي مشكل في الخياطة حسبي الله و نعم الوكيل

 

[الحلم الوردي]

رد: مافهمتش حاجة في ناس اللمة

والله يا اختي كل واحد ووجهة نظرو
بون بالنسبة ليا
الإعجاب عندي مهم نحفز بيها الناس باه تبدع
اكيد حاجة مليحة كي تشجعي اي عضو
مام هو يولي عندو الثقة ويبقى توجور يجيب حاجة جديدة
هدفنا التشجيع
وحنا هنا للافادة والاستفادة
​

 

[انا ناس ملاح]

رد: مافهمتش حاجة في ناس اللمة

الحلم الوردي ربي يخلي ايامك كلها ورد و عنبر هيا لاباس الغاشي كامل طلع من رواد و هواة التحفيز ما علينا ، و مع ذلك انا ضد التخياط ههه

 

[Päs de ism]

رد: مافهمتش حاجة في ناس اللمة

اييه صح كانت عندي نفس الكاستيون هه

بالنسبة ليا لي يعجبني نتاع صح نحط و من كدبش عليك مرات نحط قصدا باه يقرا لي حطيتلوا الرد كي نكون متشوق باه نعرف رد العضو هاداك طبعا

و الباقيين كل واحد و كيفاه

 

[ضآحكة مستبشرة]

رد: مافهمتش حاجة في ناس اللمة

السلام عليكم
و الله عندك الحق احنا نحطوها للمليحة و القبيحة هههه
و كاين لي يستعمل غير الاعجاب و جامي تشوفلوا تعليق
كل واحد و كيفاش يستعملها
و انا في رايي عبارة عن اداة للتعبير عن اعجابنا بكلام الشخص او موضوعه
شكرا لكي ع الموضوع
بارك الله فيك

 

[أم لينة]

رد: مافهمتش حاجة في ناس اللمة

السلام عليكم .
انا نوضع اعجاب باه يعرف العضو اني قرأت موضوعه حتى و ان لم ارد .
شكرا .

 

[hadil2044]

رد: مافهمتش حاجة في ناس اللمة

كي يعجبني الموضوع وايضا ردود الاعضاء تكون جميلة
وكذلك لمن رد لي


​

 

[prince of love]

رد: مافهمتش حاجة في ناس اللمة

السلآم عليكم

انا نظن بلي عفسة مليحة نوعا ما على الأقل لتشجيع الاعضاء على المشاركة ​

 

[أميرة تقرت]

رد: مافهمتش حاجة في ناس اللمة

من وجهة نظري الاعجاب بالمشاركة يعني احترام صاحبها​

 

[همس الوُرود]

رد: مافهمتش حاجة في ناس اللمة

السلآم عليكم

هههههه

أنآ ديفوآ نحط إعجآب هكآك برك مآنقرآ مآ وآلو ونفوتهآ بإعجآب

ولآ نحط إعجآب إذآ قريت شيء عادي المهم يكون عادي مفيهش حاجة مش مليحة ~

أمآ إذآ لقيت حآجة متعجبش صح منديرش إعجآب

يعني أنا عاكستها وقت منلقاش حاجة تعجب منديرش إعجاب وقت نلقى أي حاجة عادية نطرزها ههههه

وديفوا ندير إعجاب مش على الكلام وإنما على الشخص بالذات مثلا صديقاتي فالمنتدى نفوت عليهم كي شغل قلتلها صاحيتي صافا وقيمتها هههه

و صح أختي يعني عندك الحق الإعجاب من المفروض يتحط غير على الأمر المهم​