دبدوبات اللمة (تحديات الرشاقة)

[فيتامين سي]

السلام عليكم و رحمة الله و بركاته

كيف الحال دبدوبات اللمة :Love::Love:
ان شاء الله راكم ملاح ..راكم في سبات و لا نضتو
ههههه انا راني في سبات
المهم المهم مرحبا بيكم معايا في هذا الموضوع لي عبارة عن تحديات لنفيخات اللمة
......درتو هنا باش يكون بناتي فقط

قبل كلشي راح نخليلكم فرصة للبنات لي حابين ينضمو لينا معليهم غير يكتبو الاسم تاعهم باش نعرف شحال نكونو فيه و اكييييد فرصة باش توزنو رواحكم
المشاركة الاولية هكدا

فيتامين سي .مشاركة----> الوزن /الطول
مرحبا بيكم بطبوطات ...

 

[أم الأولاد]

وعليكم السلام فكرة رائعة
راح تفيدكم في انقاص الوزن باذن الله
منيش من دبدوبات كون راني شاركت معكن
بالتوفيق ان شاءالله اختي

 

[فيتامين سي]

وعليكم السلام فكرة رائعة
راح تفيدكم في انقاص الوزن باذن الله
منيش من دبدوبات كون راني شاركت معكن
بالتوفيق ان شاءالله اختي

باذن الله حبيبتي
هههه معليش المهم التشجيع
انا تاني مكنتش من الدبدوبات و درك راني من الباندات ههههه
باذن الله غاليتي

 

[❤️كلي أمل❤️]

السلام عليكم
فكرة مليحة اختي سي ههههه
لازم نكتو الوزن والطول ههههه

 

[السلطانة]

وعليكم السلام ورحمة الله وبركاته فكرة طيبة
ان شاءالله البنات والسيدات يتفاعلن معها



واش نخاف من السمنة بعد الزواج توسوست وقلت كون نغفل على روحي نروح فيها
بعد 8 اشهر زواج وصلت ل 69 كيلو ! علما انو وزني عمرو زاد فوق 62 كيلو مع طولي 1.60
قالولي هرمونات ماهرمونات الصراحة خفت نغفل نروح فيها .قلت الحل بيدي واحد ميدبر عليا .
عملت ريجيم وطيحت شوي كيلوات والحمد لله مع الرياضة من اليوتيوب وشرب لترين من الماء يوميا
بعدها بشهرين حملت و وبعد الولادة
خرجتلي شوي كرش وزاد وزني ل 75 كيلو
بعد 6 اشهر بعد الولادة قررت اني نبدى في انقاص وزني وبحثت وبحثت وشفت تجارب الاخوات حتى لقيت الحل

جربت مشروب القرفة والزنجبيل ساعدني بزاف
في حرق الدهون
مازالني بيه وليت نداوم على هذا المشروب يوميا من دون حرمان من الاكل لكن مع التخفيف في وجبة العشاء وتناولها باكرا وبعد لعشا حاجة منزيد ناكلها من غير الماء لي مخلط بالخلطة
قرفة مسحوقة وزنجبيل مسحوق مغرف مغرف يتنقعو نصف ساعة في ماء دافي ويتشربو قبل وبعد الاكل
في شهر لاحظت بطني بدات تدخل
كملت معاها وزدت بحثت لقيتو انو القرفة اعواد افضل والزنجبيل قطع افضل
فوليت نحط عودين قرفة مع قطعة زنجبيل في قرعة ماء ونخليهم يتنقعو ونشربهم
في النهار نشرب ليتر ماء ومرات ليترين
في البداية كنت نخلط الخلطة مع مغرف عسل حر لأنو طعمها شوي يجي صعيب لكني والفتها بعد ذلك
وليت نشربها عادي
وجربت مرة خلطة اخرى لي هي 30 فص ثوم +شرايح ليمون مقطعين رقاق حوالي 3 حبات نديرهم في قدرة يهزو الغلية ونحيهم
نضيفلهم الكسبر اخضر
ونخبيهم في قرعة زجاجية وكل يوم نشرب فنجال منهم بعد كل وجبة

جربتها لمدة اسبوع جابت نتيجة لكن طعمها ماش مليح مكملتش بيها ورجعت لخلطة القرفة

ربي يعينكم ان شاءالله اخوات
وهذا الموضوع كتبتو باه تستفادو منو
تجربتي بعد الولادة لانقاص الوزن

 

[السلطانة]

السلام عليكم
فكرة مليحة اختي سي ههههه
لازم نكتو الوزن والطول ههههه

اهلا اختي
باه الوحدة تنقص الوزن تاعها
لازمها قبل اي شي تقنع روحها بلي راهي سمينة
تخزر مع روحها في المراية وتشوف وتقول انا سمينة مثلا في بطني وبقية جسمي
وتقول كي نلبس سروال ميجينيش مليح لانو كرشي خارجة
وفستان ميجينيش مليح لانو جسمي ماش معدول وووووو
لازم اول خطوة انو الوحدة تقنع روحها بلي انو جسمها بحاجة لباه ينقص
ومنها تقرر باه تبدى الريجيم تتحدى نفسها قبل اي شي

 

[السلطانة]

تجربة خالتي :

كانت شابة طاي مانكان وبعد الزواج رجعت قنطار وزيادة
كيما قاتلي هي جيت نفطن لروحي سقسيت اول سؤال انا علاه وليت قد هك ؟ وكيفاه ووقتاه ؟ وعلاه مقتوليش اكي سمنتي ولازم تنقصي ؟وانا واش راني ناكل ونخلط ؟ واش هي العادات لي خلاتني نسمن ؟
ودارت تحدي في مدة عام خالتي رجعت 57 كيلو !

لازم الارادة

 

[❤️كلي أمل❤️]

مشكورة حبيبتي ام ياسين على النصيحة
ولكن الحمد لله أنا مارنيش دبدوبة ههههههه
أنا وزني 67 وطولي 1,70
وصلت 70 كيلو بصح مع رجيم والرياضة نقصت
وزني والحمد لله

 

[السلطانة]

مشكورة حبيبتي ام ياسين على النصيحة
ولكن الحمد لله أنا مارنيش دبدوبة ههههههه
أنا وزني 67 وطولي 1,70
وصلت 70 كيلو بصح مع رجيم والرياضة نقصت
وزني والحمد لله

اوكي اختي
اذا ممكن تعاوني خياتك وتكتبي الريجيم تاعك لي تبعتيه

يعني اي وحدة جربت ريجيم وفادها تقدر تثري الموضوع بالتجارب تاعها باه الاخوات يستفادو منها
وكل وحدة شافت الموضوع وحشمت تدخل وتشارك نقولها السمنة ماشي عيب
العيب انو كي تبقاي بنفس التفكير ومتحبيش تغيري تفكيرك
ونكرر انو الارادة هي كل شي
نتمناو برك تفاعل مع الموضوع ومتحشموناش ولاتلعبوها كامل عضوة ماوزنها زايد في المنتدى

 

[فيتامين سي]

السلام عليكم
فكرة مليحة اختي سي ههههه
لازم نكتو الوزن والطول ههههه

و عليكم السلام
شكرا ليك حبوبة..لا ماشي لازم المهم توزني روحك باش تعرفي واش هو التحدي لي نفعك و واش هو النظام لي عجبك
وزني روحك و عقلي عليه برك ليك انت فقط
ممكن من بعد فقط تحطيلنا هكدا نقصت كغ يعني الكمية لي نقصتيها
اسعدني مرورك غاليتي

 

[sanaya]

مساؤو با خياتي
عجبني صح موضوعك فيتامين سي
دونك أنا حافظت على 45 كيلو مدة تمان سنوات
ساعات يطلع ل47 ساعات يهبط 43 في حال المرض طبعا
الطول متوسط
ومنيش رقيقة بزاف حسب الطول والميزان
في فترة الحمل طلعت حتى 60 كلغ
ومبعد هبطت ل 45 مجددا
المهم حابة نقولكم أول شيء للجفاظ على الوزن هو العمل الدؤوب
و تانيا الرياضة مع العلم أني لا أواظب على الرياضة ولكن رياضتي المفضلة هي الرقص
هادي تجربتي
و شكرا فيتامين سي
تشاو

 

[فيتامين سي]

مرحبا بيكم بنات
@sanaya @أم ياسمينdz @عبير الغرام @نجمة البحر20
اهم حاجة قبل التحديات ندو نصائج من بعضانا و نعرفو كل وحدة كفاش تحافظ على صحتها و نتعلمو معاهم ..
بالنسبة للتحديات حتى نلمو دباديب و نبدو
انا تاني كنت 54 54 54 من بعد لاسباب طلعت كما الصاروخ لل سر
اول سبب كان زعاف او كما نقولو باش منخممش ناكل و من بعد جسمي والف كمية كبيرة تاع الاكل و رجعت منتحركش بزاف

نشارجي الهاتف تاعي لي نخدم بيه مليح و نرجعلكم غالياتي
انتظرونا في اول تحدي باذن الله
الجائزة كبيرة بزاف و لي هي عبارة عن جسم مليح و تلبسي لي تبغي و الاهم تربحو صحتكم
تحياتي ليكم كااامل

 

[السلطانة]

صح اختي
فيتامين سي
الدهون في الجسم اي تبدى تتشكل بالشوي والوحدة متفيقلهاش حتان تفيق على حقيقة مرة وتلقى وزنها زاد
المرأة تتعرض لعوامل بزاف تخليها تسمن
واولها الاكل في كل وقت
عادة الاكل في الليل هي الكارثية بحيث انو الجسم يخبي هاذاك الاكل وكي ترقد معندو وين يروح ويتخبى في الجسم
بعد الولادة تاني كيما حكيتلكم انا الجسم قادر يزيد وكون تغفل الوحدة راح تزيد بزاف طبعا وترجع صعيبة باه تنقص وعلابيها لازم تبذل مجهود
في انتظارك اختي وفي انتظار منضمات جديدات للموضوع

 

[فيتامين سي]

صح اختي
فيتامين سي
الدهون في الجسم اي تبدى تتشكل بالشوي والوحدة متفيقلهاش حتان تفيق على حقيقة مرة وتلقى وزنها زاد
المرأة تتعرض لعوامل بزاف تخليها تسمن
واولها الاكل في كل وقت
عادة الاكل في الليل هي الكارثية بحيث انو الجسم يخبي هاذاك الاكل وكي ترقد معندو وين يروح ويتخبى في الجسم
بعد الولادة تاني كيما حكيتلكم انا الجسم قادر يزيد وكون تغفل الوحدة راح تزيد بزاف طبعا وترجع صعيبة باه تنقص وعلابيها لازم تبذل مجهود
في انتظارك اختي وفي انتظار منضمات جديدات للموضوع

هذيك هي البداية متلاحضيش غير نهار تطفر و الدهون تتراكم ..الحاجة لي لاحظتها تنجمي تاكلي 1000 سعرة حرارية في 5 دقايق بصح مستحيل تنقسيها في 10 دقايق
صح الاكل بلا حساب و الحلويات اكيييد المعجنات و الزيادة هذيك حاجة تانية اكثرهم يسمنو ..و تخمي كفاش ننقص
شكرا حنونة
في انتضار البنات
انا طولي 1متر و 65 و وزني ههههههه راني البطبوطة فيكم بعد مكنت 54 ..واع المهم راه فوق 70 مع طولي لازم نكون في بين 54 لل 64 يعني عندي منقص شحومات
نشوف شكون حابين ينضمو
بطابيط انظمو انظمو

 

[سجينة الصمت]

السلام عليكم
انا قبل مانتخطب كنت 70كلغ وماشية ونزيد درت كل شي باه ننقص وماقدرتش
وضرك بعد زواج راني 57 كلغ ومافهمتش كيفاه نقصت بلا ماندير والو
شكرا على الموضوع
انا لكان ديرلي موضوع كيفاه نزيد شويا كيلوات عقدوني ناس بكلمة واش بيك شينتي هكا وحنا قلنا بعد زواج تولي بختة هههههه

 

[آمِيْرَتُه]

السلام عليكم
بالتوفيق طوبيزات اللمة
تهنيت من السمنة خاطيني راني من جماعة الصومال هههه

 

[الحلم الوردي]

بالتوفيق لكن
ههههههههههههه دوماج انا وزني عادي في 56 تالمو طولي 1,60
ماعندي حتى ريجيم
يعطيك الصحة حنونة:kiss:
في المتابعة

 

[GI Joe]

1m60--ana m stress ta3 l bac mahazit la taille kima haba, chfit smana 9abl bac 2013 wzent 72
kont nassia rohi had snin bin 65- 72 suurtout wa9t les exams
mochkel ta3i l makla les gateau nmouut "la patisserie f saif kol youm recette djdida
mais fi aout chrit roba hh madjatech guedi decidit tedkhol kerchi w jamais la nzid nossel l 72 hadik
bdit tbc( hawssou 3lih sur internet) prgm sportif mlih fih 12semaines ana dert chhar bark w habesst yaaa ndamti koun kemelt prc ban resultat n9osst 2kilo w t3adlet la taille welit nban 9al bzef
mba3da mrodht et tt w zid f la residence welit nakol n importe quoi w l moral habet dima ngrignoti w doka les exam kiifkif thani

 

[GI Joe]

aalmohim doka mn project nechbe3 chikoula bach nrevisi mlih, mba3da nrepreni tbc w nzid nechri kech robe baahia taille 9al meni dirli l guelb

bn courage lia w likoom

 

[فيتامين سي]

وين راهم طبيزات دزاير
معليش معليش شجعونا برك