مشكلتي أمي ..إرجعي يا أمي

الحالة
مغلق ولا يسمح بالمزيد من الردود.

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم ورحمة الله تعالى وبركاته
صحا فطوركم اخوتي واخواتي ان شاء الله تكونوا بخير وعلى خير
اليوم خاوتي وخواتاتي جيت نحكيلكم قصة .هاد القصح من حياتي الخاصة .لعل وعسى قلبي يرتاح قليلا من العبئ الثقيل الذي احمله ..
أمي ..أمي حية ترزق والحمد الله يا رب ..لكن يا اخوتي امي ليست معنا ..أمي تركتنا منذ زمن ..
قصة امي لا أدري لعلها سحر او شيء ..
امي كانت انسانة عادية تحبنا ..كانت تعمل ..في المؤسسة التي كنت ادرس بها .وبحكم انها كبرت قلتها ماما علاه ماتهزيش التقاعد وهي كانت كل مرة تحكي مع ابي وتقولو وجظلي الدوسي تاع التقاعد 4 سنوات ..وهي تتقووولو لكن فهاديك السنة انا اصريت انها تهز التقاعد ويا ريتني ماتدخلت لانو راني نحس روحي انا سبب فالحالة الي وصلت ليها .فالعام اللي هزت فيه ماما التقاعد بدات الحالة الصحية تاعها تتدهور بدات تنقص تنقص حتى ولات جلد على عظم ..ادينها لأطباء كامل ولكن ماعنظها حتى مرض ..ومع مرور الأيام ولات كانها ماهيش عايشة معانا .ديما بالها مشغول وتخمم انا قلت بلاك من الخدمة والدار ماولمتهاش كي قعدت فيالدار ..لكن يا اخوتي ماما ولات ماتحبناش ..ماتحكيش معانا خلاص .ماتسقسيش علينا وماتحوسي علينا ..كأننا أيتام ..صدقوني اني نكتب والدموع في عينيا ..ولات ديما مسبوطة .ديمة متكية فالسرير ماتحكيش خلاص معانا كانها في عالم آخر ..تتكلم ساعات فقط مع الوالد ..صدقوني انا ساعات نفقد اعصابي ونولي نعيط عليها بدون قصد ونقولها علاه راكي مسبوطة اشغلي روحك بشيء ما ديري شي .اتفرجي تلفزيون اقراي قرآن استغفري وشهدي .لكن دون جدوى كانني اتكلم مع حجر ..اصعب ما فيوالحياة انو ربي يبليك في والديك ..كانني بدون أم ..صدقوني عييت نلقى حل باه تولي كيما كانت ..وانا قلبي عيا من هاد الحالة حاب يشوف ماما كيما كانت بكري تتهلى فينا وتسقسي علينا وتضحك معانا وتفرح معانا وترجع صحتها كيما كانت ..
اديناها للراقي لكن دون جدوى لا يوجد حل ..
دعواتكم باه ربي يفرج عليا وعلى والديا وعايلتي ..صدقوني اصعب حاجة تشوف يماك حية وتحس روحك يتيم ..
سامحوني طولت عليكم .في امان الله
 
السلام عليكم ورحمة الله وبركاته
الله يشفي أمك يا رب وترجع كيما كانت من قبل
حاولوا تستفسرو منها وش كاين وشبيها فوش راهي تفكر بلاك عندها مشكل ملقاتش لمن تحكيه ماعرف
شوفو واحد منكم يتقرب منها ويستفسر
 
السلام عليكم
صح فطورك اختي
وربي يشفيها في هذا الشهر المبارك
يا اختي بلاك برك مقدرتش تتعود على
حياة التقاعد ،بصح قلتي انتي هي لي كانت حابة تتقاعد
ممكن تكون فترة وتجوز عليها ، حاولي انتي تساعديها باش تعمر
وقتها بين قراءة القران و تصلي في الجامع صلاة التراويح مثلا ، واديها تزور الاقارب نتاعكم عمري لها وقتها بابسط الامور باش متلقاش وقت تفكر فيه في الحاجة لي ضارتها و بلاك تنسى و ترجع كيما كانت

دعواتي لامك الغالية بالشفاء و نوصيك حاجة اصبري معاها قد المستطاع واعتبريها طفلة ،الطفل يحتاج عناية كبيرة وحب كبير وهكاك امك تهلي فيها مام تحسي حنانتها غايبة عليك .

 
كان الله في عونكي اختاه ورزقك القوة والشجاعة وفرج عنكي وعن عائلتكي يا رب
ضعي ثقتك في الله وحاولي انكم تخرجوها من العالم اللي راها فيها ربي يكون معاكم ويعطيكم القوة ..
 
وعليكم السلام
اذا ما نفعش الطب العلمي شوفو الطب النبوي من القرىن يعني الرقية او تشوف طبيب نفسي
لانو ممكن الام نتاعك عندها ازمة نفسية نتاع تقاعد بزااف اللي تصرالهم هذي الامور لانهم مكانوش محددين خطة معينة للتقاعد يعني
يحسب انو رايح يدوم في روتين العمل من بعد يخرج للحياة ويخرج لكمية كبيرة من الوقت يصرالو شوك
ربي يشافي الوالدة البكي ماهوش رايح ينفع لكن الصح هو انكم تتحركو بالوالدة هنا ولهيه وربي يفرج سلام
 
السلآم عليكم

ربي يشافيها و يعافيها و يرجعها احسن من الي كانت

جربوا الرقية حننونتي ارقولها الما و مدولها تشرب وتقربي من أمك بالشوية بالاك كااش ما راه عندها كوني عونا لها
ربي يفرج عليكم اختي
 
السلام عليكم
نتوما حاولوا تخلقو لها جو فالدار يخليها تفرح
و نظن سبابها هو التقاعد ممكن بطلت الهدمة وكما قال الأخ حكيم مكانتش موجدة خطة مقبل
و كذلك ممكن موالفة يوميا تتلاقى مع حباباتها فالخدمة ومبعد صابت روحها وحدها وهاذ الشي أثر عليها
علاهاذيك أو شي صارحها هدر معاها سقسيها وشبيك و بكي لها ثاني
ثانيا : شاركها شويا من وقتك خرجها ولا عيط لكاش خالة ولا عمة تجي تونسها
ثالثا:
ديفوا ريح معاها مثلا و شغل المكرو وحط برنامج مفيد برنامج إيجابي برنامج يخلي طاقة الإنسان عالية
كأبسط مثال برنامج خواطر لأحمد الشڨيري ولا برامج مصطفى حسني
دير روحك نتا راك تبع وهي راهي تسمع معاك
و كذلك جيبولها طبيب نفسي
ومتعيطش عليها لأنو هنا وين يبان البر الحقيقي بالوالدين
أنا الأم نتاعي كانت عندها حالة مشابهة مي مش ڨاع هاكا
هي كانت تسكت مخليتهاش مام ديفوا تتقلق مني كنسقسيها ونهدر معاها و بعد فترة ولليوم ولات تحب بزاف تريح معايا
وربي فرج ياأخ
سلام
 
الإنسان حينما يتقدم به العمر تجيه وساوس داخليه بلا اسباب ولا مسببات انما هي حالة نفسيه حينما يكون ليس قادرا على العطاء كما كان فغياب الاهتمام به تجعله غير مهتم بأي كان وتلك تعزى للوساوس التي تنتابه .. كثيرا من الناس مروا بتلك الحاله .. نسأل الله لوالدتك الشفاء العاجل ...
 
Salam 3alykom
Akhi rabi ychafi pmak w nchlh trja3 kima Kant
W ana ngolk haja akhi l7al lwahid doha ll3omra
Blk s7our wla haja
Hta ana Khalti Kant mrida 10 snin w Kant ghir jld 3la 3dam w dawat bzzzf w raht 3and ra9i bzzzzzf w mkan walo
W dinaha l 3omra ryht 3adi w lhamdolilah
Kolchi b maktoub rabi sob7ano
W alah ychafiha w rabi ykoun m3akom
 
آآه يا ربي والله نقرا في كلامك وقلبي يتقسم على النص
سورتو حنان الأم ووجودها بجانبك مايعوضو والو والله، صوتها برك كأنو مسكن لكل جروح الانسان
لا حول ولا قوة إلا بالله
المهم نوافق كامل الخاوة واش قالو بالاخص الاخت سنايا والاخ حكيم، جربو الرقية خاطر ساعات كاين
رقاة مايديروش خدمتهم على أكمل وجه يعني جربو مع راقي ثاني وثالث وشوفو ترا يمكن أسباب سحر
ويمكن حالة نفسية كيما قالك الاخ حكيم جربو اديوها عند طبيب نفسي هو يعرف حالتها ويعرف كيفاه ينطقها
ويعرف كيفاه يكتشف سبب هاد الحالة بالاضافة أنكم ماتخليوهاش وحدها كيما قاتلك الاخت سنايا احكيو معاها
حتى ولو ماتسمعش او ماتردش احكي معاها على واش يصرا معاك يوم كامل اعتني بيها واوقفي عليها وحسسيها بعطفك وحنانك عليها
واذا قريتي القرآن اقرايه بصوت عالي قدامها، المهم ماتخليوهاش وحدها خاطر الوحدة ماش مليحة ليها
حتى وماكانش تفاعل معاكم من عندها بصح وهكاك وماتخليوهاش وحدها
وربي يفرج ان شاء الله عليكم وربي يشفيهالكم يارب رانا في رمضان وايام مباركة كتريلها الدعاء من عندك
والدعاء من عندنا وان شاء الله ربي يفرج عليها وأي تحسن في حالتها طمنينا عليها
ربي يحفظهالكم ويخليهالكم ان شاء الله
تحياتي

 
السلام عليكم

أختي لو أنتم في بنات فالدار بزاف ممكن تخدموا وتخلوها تقعد بزاف وتخمم فأمور بزاف ربما تدخلها وساوس تولي تفكر وتمرض مع روحها وتقلق

ربما يكون هذا سبب ننصحك لو كنتو بزاف بنات كيما قلتلك متخلوهاش تقعد وأنتم تخدموا كلش لا خلوها تشغل نفسها بأعمال حسسوها بلي راكم تحتاجوها سقسوها فأمور

مثلا وين نحط هادي كيفاش ندير هادي مام أنتي علابالك قوليلها ماما فكريني نسيت علميني هادي

ولا ماما تعيشي ديري ديك الحاجة أعطوها خدمة كل يوم هكا تخدم نفسها خير من كيما عقلها يبقى يخدم فأمور تمرضها ربما

 
السلام عليكم ورحمة الله وبركاته
وصح رمضانكم
اللهم ازل الباس عن عبادك الضعفاء
اولا انت لا دخل لك في ماحدث لامك وخير مافعلته الحاحك على تقاعدها وان دل على شيء فلحبك لها
بخصوص الحالة النفسية أستبعدها بنسبة كبيرة ... فمن خلال وصفك اي حالة لامراة تعمل في مؤسسة تربوية ان تغفل اولادها وزوجها صحتها .
بخصوص الأطباء لم يكشفوا عن مرض نتمنى ذلك وعافانا الله واياكم من الامراض ومع ذلك غيروا وجهتكم الى اطباء آخرين . وفي هذه الحالة المرض ايضا لا يمنع من التقرب من الاولاد والزوج .. ومايحدث لامك مامن مرض يسبب كل ما وصفته جملة واحدة .
بخصوص انكم رقيتموها .. غيروا راقي اخر واخر يكون موثوقا ويرقي رقية ششرعية ومتمكن من الرقية . وفي رايي أمك لازمها رقية وسارعوا بها . والشفاء بيد الله.. ولن يصيبها الا ماكتب الله لها .
ركزوا على الرقية في هذه الحالة
ويسر الله امركم وفى امكم .. دعواتنا لها في صلاتنا .
 
اديها لطبيب نفسي اختي يتابع حالتها و ربي يشفيها ان شاء الله
 
اتمنى من صاحب او صاحبة الموضوع ان يتصل بي على الخاص ...ربما هناك ترابط وتشابه بين قصته و ما مررت به انا مع أمى ... لكن انا هاذ المرحلة كانت ،2008 رغم اختلاف الاسباب ...نحن الان فى مرحلة متقدمة للأسف ..
.اتمنى له التوفيق و نشاء الله تولى الأم كما كانت .....
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top