حكاية المخـلّـط

[Salah eddin]

السلام عليكم و رحمة الله و بركاته
ناس الخير صحيتو ... وش راكم ؟ ... وش احوالكم ؟ الحمد لله .. ياااتل قولو الحمد اس و خلونا طرانكيل ههه
ياسيدي كيما راكم عارفين و موالفين ... ما نظلوش نعاودو فالهدرة ... ها شوية ...
و يا سيدي ... هذي حكاية..... نزهاو بيها شوية
بسم الله ...
هذا واحد ق لينا منا برك هه ... يقولولو " المخلط " ... شني مش سماه المخلط ...ق تفاهمو عليه الجماعة و ولاو يعيطولو المخلط ههه... المهم يا سيدكش المخلط هذا ... ساكن في فيلاج ما فيه والو ... الفيلاج هذاك ...فيه زوج حوايج ... فيه ضيقة الروح مريحة في الظل ... و فيه حاشاكم كلب مديقوتي ... و فيه المخلط صاحبنا ساكن ثما ... المهم راني نقولك حية وخلاص الفيلاج ذاك ... و المخلط هذا فيه اوبصيون زينة .... الرياضيات.....الرياضايات ما تحشيهالوش طول ...ياكلها ماكلة ... يتقدى بيها و يتعشى بيها ... كاسكروط قاع فيه جذور و لوغاريتم . ههه ... راكم عارفين ..
من قوة فهامتو ... عاد ال x هذاك كي يتلاقى بالمخلط يتجمل يولي I ههه ... من الخلعة ههه
...
المهم المخلط صاحبنا ... لحق للباك ... عقبو باك "مات" وقيلا ...المهم جابو بمعدل زين خيرات ... و دارولو حاجة زينة كي بعثوه يقرا في الخارج .. منحة زعما ... المهم ...راح المخلط للخارج و قرا شوية و تعلم و كذا ... المهم و هو وقيلا بعثوه لهولندا ... المهم يا سيدكش ... و هو في هولندا ... هاهو شافهم عندهم واحد اللعبة يلعبوها زينة ياسر ثما ...
و هذي اللعبة هي زعما الواحد يطلع في برج ولا جسر العلي " الارتفاع " تاعو 100 ميترة ... و يربط روحو بأستيكا "مطاط" طولها 99 ميترة ... و يرمي روحو ... يلحق قرب للأرض و الآستيكا تجبدو الفوق ... يعني حسابات قاع ...
يلوح روحو السيد الي يلعب ... ..اووووب ... يلحق للأرض يعاود يطلع ....و هكذا ...
...
المخلط صاحبنا عجباتو اللقطة ... و قالك و الله ق ندي الفكرة و نجربها في بلادي على الاقل يلعبو بيها وليدات الفيلاج ههه حـڤـا فيه ق ضيقة الروح الفيلاج هذاك هههه
...
المدار يا سيدي ..... المخلط دبّر التيكي ... و العودة الى الوطن الحبيب .... هو مع لي لحق ... الحية الاولى لي شافها تستنى فيه ... الكلب الميدقوتي هذاك ههه ... و القبار ... و السمش ثما ق لاهية ههه ... فاتحة الكونت مش تزعق ههه ناوية صح ههه
...
المهم ... ريح شوية و قالك و الله نطبق الفكرة هذيك تاع اللعبة و نركبها هنا في الفيلاج باه يزهاو بيها الذريرية " الاولاد " ...
ايا راح للمدينة .... و راح لواحد الحانوت تاع فيراي باه يشري من عندو لاستيك محسوبشي ...
المهم هو مع لي دخل للحانوت ... ناض مولى الحانوت بيه الفرحة كي شاف المخلط ... المهم سلم عليه و كذا ..
المخلط استعجب كي شاف السيد فرح بيه سقساه .. " ااالحاج ق الخير ؟ ... تعرفني ؟ "
قالو لا نتا ما نعرفكش بصح نعرف بويك يا حسرااه ...المهم قسر معاه شوية ...
قالو وش تحوس يا وليدي ... المخلط قالو ما ذابيك تعطيني 99 ميترة تاع استيك من المتين ناخوك رااني نحتاجو في عفسة هاك...
الحاج ريقل الآسيتك كيما قالو صاحبنا و عطاهلو و تفرقو على عافية ربي ...
...
المخلط راح للفيلاج ... ريقل بلاصة عالية ب 100 ميترة و عول يجرب اللعبة ....
المهم دار حساباتو ...طلع ...هبط ...كذا ....منا.....ملهيه ... .. و خلاص ... كملها و الحساب حـڤا حاجتو المخلط هههه
المهم فراها قاع .....بقالو يجربها برك ههه

هو مع لي طلع في البرج ... و ربط روحو بالاستيك هذيك ههه و الذر هذيك تشجع فيه و تسيبورتي ياله ياله هههه

اووب ... ايا سوطا " لاح روحو"...روح...روح ... روح ... اوووب ... و يجيبها على راسو طووول ... طاح مات المخلط
هههه

المهم جات لابوليس ... الحماية المدنية ... الدرك الوطني ..الكلب المديقوتي هذاك جا يشوف... صحابو من هولندا عولوا يجو ق ما طاڤوش... ... ههه المهم القاشي قاع جا يشوف كفاه مات المخلط ههه
كي شافو سبب الحادث وش لقاو ؟؟
ههه

لقاو الاستيكة فيها 100 مش 99 ميترة ... ههههه
مولى الحانوت زادلو ميترة تاع المعريفة هههـ
هههههههههههه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


ايا هذي هي حكاية المخلط
ان شاء الله تعجبكم
سلام عليكم


​

 

[Salah eddin]

جماعة ارواحو تضحك شوي !!
ههه
@حروف تائهة
@حمزةusma
@عمر عبد السلام
@ربي اغفرلي
@{هِشام}
@scorpion16
@Mårőųā Řāhïł
@باتنية و نص
@الحلم الوردي
@إنسانة ما
@زهور اليآسمين
@sقطر الندىs
@صدام بكل فخر
@Skor m@k
@madridista
@بنت سطيف
@يونس قاسم
@chirine zina
@ميلينا
@بشرى ملاك
@aYyÖub aDaM
@جيهان جوجو
@لؤلؤة قسنطينة
@امين احمد
@جلال عبدالمنعم
@theking
@saddek06000
@bassem1618
@BTCMADANI
@Hossam 01
@sanaya
@Soumia hadj mohammed
@ليليا مرام
@Ma$Ter
@ماجدة لربها ساجدة
@نعمات
@hakim story
@habchisalaheddin
@أم ياسمينdz
@Asseli Queen
@فيتامين سي
@omaridj27
@NOOR EL Huda
@salima77
@عآشقة الجنـة
@krimo65
@Mustapha Bita
@مكان وزمان
@طموحة
@امين احمد
@رضا الرحمان غايتي
@acher.dz
@الصراحة راحة
@محمد التبسي
@صمت المشاعر
@الامين محمد
@Twinkle Stars
@فتحي عاشق الجنه
@حلم كبير
@الصحافية الساخرة
@طيب الكلام
@عاشقة الإحسان ​

@الامين محمد @chirine zina

​

 

[يونس قاسم]

ههههههه مالقري نعرفها بصح كي تحكيها نرجع نضحك ههههه
مجنون صح

 

[Salah eddin]

ههههههه مالقري نعرفها بصح كي تحكيها نرجع نضحك ههههه
مجنون صح

الله يعزك خويا يونس ههه نتا راك نايلي ق لينا ههه
سي نورمال تعرفها ههه​

 

[حروف تائهة]

السلام عليكم
هههههههههههه ياخي مخلط ياخي ههههههههههههه
عجبتني تاع الx كي يولي I هههههه
بصح غاضني مسكين كان ناس ملاح هههههههه
بصح راك تحرض ضد الكرم خخخخخ
يعطيك الصحة خويا لكبير

 

[Salah eddin]

السلام عليكم
هههههههههههه ياخي مخلط ياخي ههههههههههههه
عجبتني تاع الx كي يولي I هههههه
بصح غاضني مسكين كان ناس ملاح هههههههه
بصح راك تحرض ضد الكرم خخخخخ
يعطيك الصحة خويا لكبير

اهلا زكية هههه
ااا المخلط خانتو حساباتو ههه
مش الكرم ههه المعريفة ههه المعريفة تضر ساعات
ههه
شكرا اختي الصغيرة​

 

[بشرى ملاك]

هههههههههههههههههههههههههههههه
يعطيك النو مسكين شفت المعرفة واش دير ههههههههههه مسكين

 

[Salah eddin]

هههههههههههههههههههههههههههههه
يعطيك النو مسكين شفت المعرفة واش دير ههههههههههه مسكين

هههه
المعريفة تقتل ساعات هههه
شكرا بشرى ههه​

 

[cosette]

هههههههه
الله يفرحك ..
يعطيك الصحة

 

[Salah eddin]

هههههههه
الله يفرحك ..
يعطيك الصحة

شكرا اختي زهور
بارك الله فيك​

 

[حلم كبير]

السلام عليكم خويا صلاح واش حوالك نشالله عال العال
ههههه هذا اللي في قصتك ورينا عواقب المعريفة قد تؤدي الى موت محتم ههههه
والله يا الكلب اللي جا يتفرج خيال واسع الله يبارك عليك ههههه
طريقة السرد راااااااائعة
بارك الله فيك وجزيت خيرا كثيرا على توساع الخواطر اللي راك تدير فيه هنا
بارك الله فيك ​

 

[Salah eddin]

السلام عليكم خويا صلاح واش حوالك نشالله عال العال
ههههه هذا اللي في قصتك ورينا عواقب المعريفة قد تؤدي الى موت محتم ههههه
والله يا الكلب اللي جا يتفرج خيال واسع الله يبارك عليك ههههه
طريقة السرد راااااااائعة
بارك الله فيك وجزيت خيرا كثيرا على توساع الخواطر اللي راك تدير فيه هنا
بارك الله فيك ​

اهلا خويا حليم
الحمد لله رانا بخير
ههه و من المعريفة ما قتل عس روحك ااشيخ ههه
و الكلب هذاك الديقوطاج جا يشوف ههه
حقيقة حكاياتي الصح فيها مش النهاية فقط ... انما الجزئيات لها دور كبير
شكرا خويا حليم
يسعدني مرورك على حكاياتي​

 

[❤️كلي أمل❤️]

ههههههههههه
مسكين زعما جا يدير الخير هههههه
المعريفة واش دير يااااه ههه
يعطيك الصحة صلاح كي العادة حكاياتك كامل فوووور ولله هههههه

 

[Salah eddin]

ههههههههههه
مسكين زعما جا يدير الخير هههههه
المعريفة واش دير يااااه ههه
يعطيك الصحة صلاح كي العادة حكاياتك كامل فوووور ولله هههههه

اهلا عبير ...
هايه ههه المعريفة تقتل ساعات ههه
شكرا عبير على مرورك الجميل و على الاطراء
بارك الله فيك ههه​

 

[dahman kz]

ههههههههههه راح فيها لمخلط
ومات بسبة لمعريفة مسكين ههههههه
والله غير هايلة يعطيك الصحة

 

[dahman kz]

وساعة ساعة تفكر خوك فلاشارة
راني نحب نضحك ا صلاح هههه

 

[طيب الكلام]

هههه هايلة يعطيك الصحة خويا صلاح . عجبتني طريقة السرد والله غير موهوب ماشاء الله
الراجل دار فيه بليزير زعما . المعريفة عندها جانب سلبي ساعات ههه
في انتظار جديدك خويا صلاح ماطولش علينا والله غير طلعتلي المورال . بارك الله فيك

 

[Salah eddin]

وساعة ساعة تفكر خوك فلاشارة
راني نحب نضحك ا صلاح هههه

شكرا على مرورك خويا دحمان ههه
يعطيك الصحة
الاشارات راني ندير فيهم بصح ساعات ما يلحقوش ههه
المرة الجاية نشالله نديرلك اشارة سبيسيال
ههه
​

 

[Salah eddin]

هههه هايلة يعطيك الصحة خويا صلاح . عجبتني طريقة السرد والله غير موهوب ماشاء الله
الراجل دار فيه بليزير زعما . المعريفة عندها جانب سلبي ساعات ههه
في انتظار جديدك خويا صلاح ماطولش علينا والله غير طلعتلي المورال . بارك الله فيك

اهلا اختي مروة
شكرا جزيلا على مرورك الجميل و على اطرائك
و ردي بالك من المعريفة ههه
تحوسي يطلعلك المورال ساعة و اضربي دورة على ركن النكت ههه
تلقاي كاش حكاية طلعي بيها المورال
ههه
شكرا اختي​

 

[لؤلؤة قسنطينة]

ههههههه والله كيما قال يونس القصة نعرفها بصح والله ضحكت هههه
طريقة سردك مميزة وتخلي الانسان يكمل القصة للنهاية ويتفاعل معاها
سورتو تاع الإيكس يولي إي ههههه والله خيال واسع يعطيك الصحة
المهم راني ندور بلعقل بين المواضيع تاعك القديمة هههه
تحياتي​