مشكلتي انصحوني

الحالة
مغلق ولا يسمح بالمزيد من الردود.

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم
انا شابة مخطوبة و عاقدة قراني على شاب محترم و خدام بعيد.الحمدلله نحبوا بعضانا و والدينا راضيين علينا و لله الحمد.انا ندرس في العام الاخير تع دراستي.مشكلتي مع زوجي هي الغيرة تعو الكبيييييرة جدا لدرجة انوا يقولي متتبسميش برا و منحبش حتى حد يشوفك من عايلة تعك و لو بالخمار بلا منحكيو على امر تع الخرجة اي مكانش الا للدراسة و الطريق المحتمة جدااا و بوالديا اما على امور الفايس اي باينة لا ننشر لا نعلق غير نهز قرايتي و كيما يقول نتزوجوا تنحيه و يقولي كي نتزوجوا راني نحطك في دار و منخلي حتى حد يشوفك يمكن تقولوا اني نزود فيها لكن والله هكذا و انا تفهمت الامر تع الغيرة تعوا و قلت معليش لانوا بعيد عليا يخاف عليا وووو لكنوا زيادة على غيرة تعوا وليت نحس روحي مخنوقة بأوامر تعوا تع ديري و مديريش و اخرتها عيطلي لقاني نتفرج في حلقة و انا من نوع الي ميتفرجش حلقات هذي اول مرة و انا نعرفوا بلي قادر يقولي لا متتفرجيش رغم ذلك محبيتش نكذب عليه و قتلوا هو راح شاف عليها في نت و رجع قالي حبسيها متتفرجيهاش انا غاضتني روحي على اساس انا يعني منعرفش صلاحي للدرجة هذا تع اني طفلة صغيرة يتبعني في ادق تفاصيل و قتلوا مش من حقك تقولي حبسيها و انت مسمعتش من عندي على اساس انا نتفرجها لانها قصة اجتماعية قالي كي قتلك حبسيها متخشنيش راسك و متعانديش .....المهم انا الي يقلقني مش الحلقة لكن عقليتوا الصعيبة و الديكتاتورية ...حبيت تقولولي اذا راني انا الغالطة و نظلم فيه او هو المتمادي في تصرفاتوا دلوني على الصواب لانوا هو يشوف فيا انا الغالطة و اناثاني نشوف فيه هو الغالط و شكرا
 


السلام عليكم و رحمة الله و بركاته
...
في البداية دعيني المح الا ان هناك فرقا بين من يريد حلا لمشكلة ... و من يريد ان يفرغ ما في جعبته من ضغوط
الاول لديه عقدة تستدعي حلا .. و الثاني حله فقط في افراغ ما في قلبه و صدره
...
اما بالنسبة لحالتك يا اختاه ... فأرى ان غيرة الخطيب عليكِ لديها جانبان
جانب طبيعي و اخر مبالغ فيه ...
طبيعي ان يطلب منكِ عدم التبسم في الشارع لان ذلك يلفت النظر
و طبيعي ان يطلب منكِ عدم الخروج و عدم العمل لان هذا شأنه و من حقه قول ذلك
لكن نقطة الخلاف اين ؟ ...
منحبش حتى حد يشوفك من عايلة تعك و لو بالخمار
هنا ... كلمة " عايلة " من المقصود بها ؟؟
اهم ابناء عمك و خالك ؟؟ ام اخوتك و اسرتك ؟؟
اذا كانو الاوائل فمعه حق
اما اذا كان يقصد الصنف الثاني ... فهنا الامر مبالغ فيه جدا جدا ... هنا الامر اصبح قضية يجب ان تعالج
...
اما عن رأيي ... فأظن أن غيرته مبالغ فيه فقط لبعدك عنه .. او لانه في فترة " تجريبية " ان صح القول
لذلك ... مادام انك ذكرت في بداية كلامك ...ان السيد محترم و كذا
اظن انه من الاحسن لك مسايرة الاوضاع كما هي ... و الصبر على ما تكرهين
فعسى ان تكرهي شيئا و هو خير لك
و الله يجمع بينكم بالخير
و السلام عليكم




 
كم تغضبني نساء مثلك ضعيفات شخصية
أأنت حمل وديع أم أرنب يا أختي مع احترامي
لقد طمس شخصيتك وهو يتحكم فيك عن بعد مثل لعبة الكترونية
ما هذا الذي أقرأه
أنت مازلت في بيت أبيك ولا يحق له التحكم فيك
فمن اول مرة لو وجدك حاسمة ولم تفتحي له عين التحكم فيك ...
لا يحق له نهائيا التحكم فيك مالم تدخلي اليه اسألي أهل الشرع في هذا
أما بخصوصه فأنت من جعلته بهذه الصورة للاسف
لو كان هذا الشخص نفسه مع امرأة أخرى لما فعل هذا ابدا ولقال لها معك حق
ما هذا بنات الناس مزالت في بيوتها وهم يتحكمون فيها
هذه وقاحة ليست بعدها وقاحة
العب دور الرجل مع امك ساعدها في البيت
مع اختك ساعدها في دروسها
مع ابوك ساعده في اعباء المصاريف
لكن .... لكن ...ان تلعب الرجولة في بنات الناس وهم مازالو في بيت والديهم معززين مكرمين فهذا خطأ خطأ
آه آآآه يغضبني وضع مثل هذا

أختي الكريمة غيري من تصرفاتك وقوي شخصيتك واسألي الشرع
ولا تصغي اليه
صلة الرحم ...صلي رحمك وبحجابك انت امام الله صافية
محتاجة تخرجي اخرجي لا تستشيريه استشيري والدك والدك يا عبد ربي ڤدامك وانت تستشيري شخصا ممكن يصبح زوجك ممكن لا


.....
ما نزيدش كثر تقلقت
ربي يهنيك ختي
انت هي مفتاح مشكلتك
 
رايي من راي الاخ حلم كبير انت ختي ولفتيه هاك ماشي من حقه يتحكم فيك لهاد الدرجة، في بعض الامور عنده الحق والبعض لا لي يوصل حتى يتحكم في واش تتفرجي نو اما الفيسبوك نظن مكانش راجل يقبل مرته دير فيسبوك وانا منهم كان عندي وكي تزوجت قالي حبسيه حبسته صح يغير ويحاسب بصح ماشي لهاد الدرجة، هدري معاه فهميه قوليله ماشي انت لي تشدني لوكان نبغي ندير كاش حاجة والله ماتجيب خبري فهميه قوليله انا بنت ناس ومڨمنة ونعرف نحترم روحي بلاما يجي اي واحد يروريني ولا يربيني من جديد..
وممكن تكون غيرة وتوسويس بسبب البعد او كاش حد يعمرله راسه تاع راك بعيد هاد شيرة دير رايها واحتمال كبير يتبدل بعد الزواج عرفناهم كثر من هاك وتبدلو مبعد هدا ادا عرفتي كيفاش تتصرفي ماتبقايش تتقبلي اي حاجة يديرها عندك شخصية وعندك كيان في حدود المعقول..
الله يوفقكم ويدهديه لك ويكون لك نعم الزوج ان شاء الله..
 
سقسيني انا على هذي النوعية من الرجال
اسود الخطوبة زعما
المهم يااختي واش نقلك سيي العبيلو على المورال كاش نهار من النهارات
وشوفي واش يدير ومن بعد ربي يرحمها
 
السلام عليكم
والله كنت خارجة لأني متعبة وكلشي ومن بعد قابلتني مشكلتك قلت نشوفها ونخرج
أنا صراحة يا أختي كذلك مع رأي الاخ حلم كبير ولو ليس بنسبة 100 بالمائة ولكن أؤيد رأيه بنسبة كبيرة
شوفي أختي الغيرة هي أجمل ما في علاقة الزوجين ولكن الغيرة المرضية هادي راهي رايحة تولي جحيم من بعد
اذا كان صح يغير خاطر صدقيني نعرف رجال كانو يغيرو من آباء خطيباتهم تقدري تتخيليها هادي؟؟
يعني خطيب يقول لخطيبتو مانحبكش تهدري مع باباك نغير عليك وهي تبعو تقولك صح نهمو من بعد كي تزوجو تعرفي واش قالها؟
قالها نحبك تنحي الخيمار، على هادي كيما قال حكيم يمكن يلعب فيها تاني، اذا كان يلعب فيها وينعت في رجولتو ولا كان منو بالصح
في كلتا الحالتين لازم تبينيلو حدودو ربما انا ماشي ضد انك تسقسيه كي تعودي خارجة خاطر درتو فاتحة وولا راجلك على سنة الله ورسوله
ولكن هذا من باب الاحترام ماش من باب التسلط، كيما قالها الأخ حتى الآن راكي في دار باباك وهاداك لي عايشة عندو ماش راجل؟ وماش قادر
يتحمل مسؤوليتك ونتي مرأة باه يجي هادا عرفك من عام ولا عامين يلعبها خايف عليك كتر من باباك؟ مادام مازال ماتزوجتيش راكي تحت حماية
باباك وتديري واش يقولك واذا شاورتي راجلك من باب الاحترام، كيما مواقع التواصل نقولو معليش ربما خاف عليك من الفتنة ولا حاجة خلاف
بصح نتي حطيتي حاجة تتفرجيها مرة في الفال كيما مسلسل ولا فيلم رايح يزيد يتحكم في عينيك واش تتفرجي؟ ماراكيش فاسقة لدرجة تتفرجي
فيلم ولا مسلسل مخل بالحياء راكي واعية وراكي شريكة حياتو لازم يعرف الانسان هادا لي خيرها كيفاه، وهادي يسميوها غيرة الشك
يعني لدرجة يغير يولي يشك في كلشي وقادرة تلحق حتى للمرض، صح الراجل لازم يوجه مرتو بصح تاني وينهي الثقة؟ اذا كان يعسك في
كلشي وحتى في واش تتفرجي هنا كارثة، شوفي اختي حاولي تهدري معاه وتفهميه بلي نتي بنت عايلة وتحتاجي راجل يزيد يكمل معاك
نحو الطريق الصحيح ماش يبقى يعسك يعني يوجهك برك ويخليك تكملي خاطر عندو ثقة فيك اتحدثي معاه وشوفي رايو ساع
وشوفي اذا قادر يتقبل النقاش والحوار ولا من النوع لي يفكر بلي الراجل يقدر حتى يرمي مرتو من الطاقة واحد مايسالو ومن النوع لي يفرض
رايو بدون نقاش والقرار اكيد يرجع ليك اختي، وزيدي صلي صلاة استخارة استشيري فيها ربي سبحانو
وربي يفرج عليك ان شاء الله ويهنيك
تحياتي
 
kifeeeh khalitih yossel l le point ta3 interdit tetfardji?? w l khardja raki fi dar babak ya l okht mich daro !! w mazal mich issmou 3la hsseb ma fhamt !!
essemhili raki ghaalta f hadja men lewel, diri f balek hadi mich ghira!! ana 3andi l ghira 3andha hlawa chwia w 3andha houdouuud mais had l Mr waalou habek khatem fi sob3o,, bla ma na3refkom mais je supose ki tahedro 3la hyatkom men ba3d howa li ydecidi gdeh wlad w howa li ydecidi win dar w howa kolech !!! noooon w nti rayek win?? chakhssiytek ta9edri t3adli fiha sah w tna9ssi men l ahlam ta3ek sah 3la djel li thebih, mais mathatmiheeech, prc 3am 3amin wala 10 snin tweli djism bila roh, tellment howa maykhalilekch forsa bach tkouni nti kolech mharmo 3lik!!!
rani nchouf fikom probleme kbiir ydepassi l hob w zwedj w kolech !! mouch mehtarmek ka 3abd !! diktatouur haki goltiha matkhalich rohek hakda, nti li ta3erfih donc choufi la 9ader yetbedel koun teferdhi rohek, sinon bye bye madamek fi dar babak prc chi 3bed 3andhom hadi fhola bech yessaref fi mraa !!!
rabi m3ek w essemhili vraiment la hadja ma3edjbatekch​
 
سﻻم من الرحمن وبعد:كثرة الكﻻم قبل القران تفتح أبواب الشيطان هذا كل ما في اﻻمر
أما بعد الزواج فكل شيء يتغير سلي مجرب فتصبح الغيرة على قدر الملح في الطعام
سﻻم
 
سﻻم من الرحمن وبعد:كثرة الكﻻم قبل القران تفتح أبواب الشيطان هذا كل ما في اﻻمر
أما بعد الزواج فكل شيء يتغير سلي مجرب فتصبح الغيرة على قدر الملح في الطعام
سﻻم

يعطيك الصحة يا شيخ
و الله كلامك حكمة

 
السلام عليكم...
عجبت لأمر النساء من بنات جنسي فإن لم يغر وصفته بالدياثة وان غار واكثر اتهمته بالافراط؟؟
اولا قلتِ( عاقدة) يعني هذا زوجك وحسب ظني له أمرك وليس خطيباً فقط ...
التمسي في غيرته اعذاراً منها انه زوج بدون زوجته..حبيب بعيد عن حبيبته..لو لم يحبك وينويك لحلاله لما قصدك وعقد قرانك اصلا ولما احتمل ما احتمل وما سيحتمل حتى تكونين في بيته..
بعض الغيرة مستحبة وتعجبني لانها تُريك مكانتك في قلب زوجك وانك محل اهتمامه والمشاكل التي ذكرتها بعضا منها بسيطة ويومية لا تحتاج لثورة غضب منكما ..واظنك بنفس حالته النفسية لذا ارفقا ببعضكما مادمتما اصبحتما زوجين وحدثيني ان بقيت تلكم الغيرة بنفس درجتها بعد الزواج ، ستتحول بعض الامور وتطرأ أخرى جديدة تبين لك معنى الغيرة الحقيقية..
اصبحتٍ متزوجة فكوني اكثر وعياً وحولي غيرته الى مايفيدكما في علاقتكما؛ لا تسمعي لمن يرونك مازلت شابة ويحق لكِ عيش حياة المراهقة و....و.. كوني رقيبة نفسك والله رقيبك فانتِ ملك لاحدهم ..
لما تروون ان استكانة المرأة لاوامر زوجها وتلبية رغباته والتي تكون في حقيقتها موازية لما قرره الشرع والدين مهانة وضعف؟؟
لا للإكراه ولا للتفريط والمغالاة أي نعم لكن في بعض المواقف تهولون الأمور...
اذكر اياما للخطوبة ناقشت نفس الامر مع ابنة عمي حول خروجي عن امر خطيبي او رضوخي له في بعض المسائل فقلت ان اذهب برفقة اخي او والدي لاي مكان فهذا ليس من شأنه لان لدي محرم لكن عليّ احترامه ووضع حدود لخرجاتي كان اذهب مع امي لحفلة زفاف اقاربي وقد ارى ما لم يسمح لي برأيتهم او كان اخرج للاسواق والحفلات مع صديقاتي؟؟. ، ثم ابن عمي وابن خالي ماشأني بهم؟ لست خطيبة ولا زوجة لأي منهم ولو خطبوا لفعلوا نفس الأمر لخطيباتهم...
الحدود التي تضعها المراة لعلاقاتها ليست قيودا بقدر ماهي صيانة لعرض وشرف وحماية وتحصين لنفسها من الزلل والفتن، امراة مسلمة وجب عليها فهم دينها وان كان لتلك الحدود ضرر نفسي لها فلاداعي لتكمل شيئاً ليست مقتنعة به ولتجرب ابواق الحرية لتتذوق معنى الدياثة اكرمكم الله بمعانيها...
رزقك الله راحة بال وسعادة دائمة وجمع شملكما وبارك لكما وبكما واصلح حالكما...
 
السلام عليكم
على حساب ما قريت لي كتبتيه غيرتو نرمال مي تاع التفراج في الحلقة هذي زاد فيها شوية مي حاجة اخرى نرمال تحمليه واذا قلقتي بزااف احكي معاه افهمي عليه كتر اكيد يشتيك يدير هكا و كيما نصحوك الاخوة في الردود سابقة ماعنديش اضافات اخرى يعطيهم صحة
و نقلك يا اختي ربي يهدي بالك و يوفقك في حياتك
في امان الله
 
اسمحي لي اقولج خطيبك خبل ولا طاعة لمخبول وبس ...
 
السلام عليكم أختي
أول شي راجلك ويغير عليك شي ملزوم ويقولك ما تهدريش مع رجال او ما عايلتك بصح على انفراد وبخمارك وين المشكل وماراحش تسلمي ربي ما قالناش إقطعوا صلة الرحم كاين شروط للمتزوجة تعرفيهم انت بلاما يقولك عليهم اسمحيلي نقولك هذا راه محى شخصيتك تماما هذي مش غيرة هءا مرض يتحكم فيك ختى فواش تتفرجي اسمحيلي غراف بزاف وانت شخصيتك وين هذا لما يديك راح يدفنك راح يختارلك لون حوايجك وواش تاكلي وماراحش طلي من الباب نهائيا راه باين وانت علاه عليك حقوقو كزوج في حدود الدين واجب عليك وبالسيف عليك معليناش اي شي يخص دين يقولولك طيعيه اما هذا مرض هذا يمحي فشخصيتك ويتحكم فيك كيما حاجة نتاعو لعبة نتاعو يكسرها يحرقها هو حر فيها يا أختي انا نقولك خمي مليح قبل ما تندمي أهدري معاه لأنو إذا فات فيه داك لعندوا خلاص تفرت هناك ممكن حتى أهلك يمنعك عليهم خاطر صعيب عقليتو واعرة بزاف إسمحيلي الزواج مش هاكا ولا الغيرة هكذا
خمي مليح هذا واش نقولك
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top