تعقيب هل أنا ظالمة أيها الرجال؟

[مشكلتي]

السلام عليكم
أولا شكرا لكل الأعضاء شكرا عميقا لأني و جدت الجواب في ردودكم و قبل كل شيء أتمنى من الإدارة إغلاق الجزء الأول
مشكلتي - هل أنا ظالمة أيها الرجال؟
لأنني اكتفيت ووجدت الجواب
التعقيب الأول بشأن زوجي لأنني قرأت الكثير من كلمة بخيل بخيل الحقيقة القضية لها علاقة بأسرته كذلك
فأنا دوما هي المقلشة الأنيقة اللي دارها كبيرة وووو علما أنو عرايسهم كامل خدامات و كاين اللي عندها حتى أرض تبنيها مي جامي شافو فيهم مقلشات غير أنا
بون راجلي متأثر بعقلية أهلو خصوصا يماه ديما تقولو راني مقلشة راني الله الله و راني و راني علما أنو راجلي يحبني و يدافع عليا كظلموني على هاذيك توجور يشوفوني مقلشة و بحكم الغيرة
تخيلو سافرت كانو معانا عايلات اخرين قالولي هبطي تشري ونا الف فرانك معنديش في ساكي و الناس كامل فاتحين عيونهم على الطوموبيل
المهم
راجلي كبر في بيئة فقيرة ولكن ربي فتح عليه الحمد لله
الأهل تاعو بدافع الغيرة المنبوذة ديما جايبينها مورايا و ديما يخيلو لراجلي أنو أنا وحدة مقلشة الله الله و الحقيقة راهم يحكمو فيا من مظهري كاين اللي تبان شابة بأقل تكلفة و كاين اللي تصرف ملايين و لا تحسن اختيار الملابس
هكذا باش نكون عادلة القضية لها علاقة بأسرته و أنو متأثر بطريقة تفكيرهم تجاهي لأنو كنجي نهدر يقولي احمدي ربي نقولو أكيد نحمد ربي مي راهو عندك دوكا مش معندكش
المهم باختصار لأسرته دخل بالأمر
أنا الحقيقة كنت شايفاه على حق و تخيلت أنو الرجال كامل يخممو هاك و توقعت أنو كنكتب كامل راح تقولو عندو الحق ملازمش تشري لبسة ووو ولكن حتى واحد مقالش هاك المهم لحكاية و كفاه فقت أنو كاينة حاجة غالطة أنو خرجت مع وحدة نشري فراش لداري باسكو برد الحال بزاف أيا سافر خترة رقدت فالصالون خترة مع بناتي لقيت البرد لا يحتمل
أيا هي صاحبتي قلتلها يايما دوك يدير راجلي فيا حالة كملت دراهم فيه
قاتلي كفاه راجلك تبارك الله شهار و عندو و تقولي هاك و زيد على الأقل يعوضلك يرفهك حق مانتي صابرة على غيابو
أيا جيت نكتب قلت بالاك حكي نسوان و راهي غير تحرضني ضد راجلي مي لقيت أنو الغالب اعطاني نفس الرأي
حقيقة صادفت ردودا قاسية و أنا أكره التجريح و لكن معليش
أولا الأخت اللي قالت على العين عندك الحق ختيتو مي راني مجهولة واحد مايعرفني مصح بالنسبة للحرص على مشاعر الفقراء عندك الحق
وكامل قلتو مشاريع هو معندوش مشاريع يشري يشري يشري و برك و حنا لاهي سهل أحيانا غير نحب نتصدق و نحب بزاف نتصدق على المحتاجين نلقا معنديش اصلا واش نتصدق بيه
بون البيت الثاني اللي حكيت عليه هو بيت بعيد نجوزو فيه الويكاند كفكيف في منطقة أخرى
و الأخ اللي قال يبني للزوجة الثانية راهو يبني ليماه باسكو هبلاتو نحب نسكن وحدي زيد من اللي تزوجنا و رانا نعانيو في ويلات أمه علما أنو انا الوحيدة اللي قبلت تسكن معاها كامل هربو و سكنو وحدهم
أما لقضية الزوجة الثانية فهاذي مكاش منها و احتمال غير وارد اطلاقا نعرف علاقتي معاه مليح و ديجا كتزوجنا سقسوه علاه جبت وحدة صغيرة عليك بزاف قاللهم باش منكونش مضطر نعاود نتزوج باسكو لمرا تاعي تبان كبيرة عليا (كل واحد وعقليتو هنا و مكاش منها على فكرة اصلا كاين اللي صغيرة و تبان عجوزة بسبب كثرة استعمال المايكاب و العكس صحيح )
و اخر مرة تحدثنا على الزواج الثاني قالي مشكلتي مشبعتش من مارتي كفاه نتزوج عليها و متأكدة مئة بالمئة انو ميخممش هاك
يبقى للرد الذي أعجبني و الذي وجدت فيه الجواب
هو أنو الغلطة تاعي ولفتلو الاقتصاد و نا بديت نحرم روحي باسكو يقولي مسرفة ويدير مشاكل بسبة الدراهم
و لكن توجور الغلطة تاعي و غلطة بابا ثاني أوليو يخلص الطبيب لبنتي يروح يقولو كفاه متتحملش مسؤولية بنتك مي بابا سكت خايف نوليلو كاش نهار ونا منضاربش مع راجلي باسكو مش كما يكون راجلك كبير عليك و لا يكون كما نتي فالعمر علاخاتر كتكونو كفكيف مراح تخافي منو مي كيكون كبير عليك السلطة تكون زايدة و مش قادرة تحكي
المهم أنا بعد حديث مع صاحبتي قررت نفاتحو مي حبيت نتأكد قبل أنو منيش ظالماتو برك هذا مكان و شكرا لكم

 

[همس الوُرود]

السلام عليكم أختي
علابالك بلي كي قريت موضوعك ضحكت هههه ..علاش لأنك تشبهيلي فجانب معين .. وإني حسييت انك رايحة تحسي كيما هاك
فالاول كنتي مقلقة وجيتي تحكي برك بلاما تقصدي انك تكوني ضد زوجك ومن جهة حبيتي تبيني انو هاي الفكرة غايضتني بلي كذا وكذا و انو انا منيش إنسانة مادية بش مايفهموكش بالغالط
فنفس الوقت غاضتك كي قريتي الردود انها كانت ضد شريك حياتك وهذا أمر يبين حرصك عليه وهذا أمر بزاف شباب فيك نظن.. لذلك نهنيك على طيبتك ومن جهة ثانية ننصحك انو مرة أخرى حاولي انو تلقاي الحلول وحدك مع زوجك خاصة وكيف تضيقلك صلي وادعي ربي ييسر لك حياتك ويقودك القرار الصحيح ويبينلك طريق الحق و ننصحك تانيت فالأخير انك تصلي صلاة استخارة اذا تفتحي مع زوجك الموضوع او لا واذا يسرلك ربي بعدها وحكيتي مع زوجك اكيد رايحة تتيسرلك كل الامور لأنه ماخاب من استخار الله...
ثاني شي حبيبتي بالنسبة لغلق الموضوع السابق لأنك لقيتي الحل فاكيد سيغلق ..
فالأخير نقولك ربي يهنيك حبيبتي فحياتك ?

 

[4algeria.com]

الاخوة وفو و كفو في الموضوع السابق
مشكلتي - هل أنا ظالمة أيها الرجال؟

و بما ان الزوج يتقبل الحوار و بما انه يحبك و بدافع عليك مع اهلك فأنت سيدة النساء
و ما عليك الا قليل من الكلام الجميل و مع الصبر و محاولة فتح الموضوع بطريقة هادئة
و اذا رفض تغلقي الموضوع في وقته و اختاري وقتاخر مناسب في جو جميل وبكلمات هادئة
و ان شاء الله ستصلين للحل

مع العلم انه كما ذكر البعض سابقا ممكن جدا انه غرق في ديون...
و انصحكان تجعليه يكسب ثقتك ليفتح لك صدره. و هذا لكي يقوم به عليك ان تتفادي العبارات المشابهة لعبارة "انت تخلص مليح و تستصغر فيا لبسة، انت تخلص 50مليون و تعطيني برك 2ملاين في الشهر..."
مثل هذه العبارات تجعله يكون عاتم و يخفي عليك اي شيء اخر...

جربي تربحيه بطرق ذكية لتكوني انت المحاسبة له و لما لا تساعديه و تصبحي نصفه الثاني بمعنى الكلمة

و يبقى الجلوس الى الطاولة هو الحل
و حتى ان لم تجدي الحل فأنت في عائلة ميسورة و أحسن من الكثير من العائلات فأشكري الله على نعمه

بالتوفيق​

 

[يوسےفے]

الله يفرجها عليك و على كل مومن
..و نعتذر اذا خرجت منا كلمة خاطيه في موضوعك السابق، ربي يوفقك و ربي يصلح حال زوجك ان شاء الله ...الله يهنيكم.

 

[وۣۗهۣۗہۣۗم]

لا تنسي حمد الله عزيزتي على كل حال ماعسانا سوى ان نسال الله لكم السعادة و هدوء النفس ودوام المحبة والاخلاص

 

[لؤلؤة قسنطينة]

السلام عليكم ورحمة الله وبركاته
أولا أختي الكريمة، كيما قالو الإخوة والأخوات ربي يهنيك خاطر حنا مهما نهدرو نتي أدرى بزوجك وبحالك
ثانيا نتمنى ماتتقلقيش من ردودنا لأنو رانا جاوبنا حسب المشكلة وتفاعلنا معاك، لو ما تقلقنا عليك وما تأثرنا بحالتك مانتفاعلو هكاك
خاطر أول مرة ماذكرتيش الأهل والتدخل تاعهم تكلمتي على الزوج تاعك فقط وبلي المشكل الوحيد فيه على هادي تكررت
كلمة بخيل في الردود، نتمنى ما تزعفيش منا أختي
أما فيما يخص بقية المشكلة، تقريبا نفس واش قتلك في ردي السابق، وقتلك بلي راجلك إما راهو يسمع لشخص من برا يقولو
الأمور لي تخص زوجتك ليست ضرورية، وإلا هو نفسو يشوف بلي راهو موفر كلشي والأشياء لي تطلبيها تفاهات
لكن في النهاية كيما قتلك نتي أدرى بزوجك، ومهما واش هدرنا فيه في ردودنا السابقة مايعنيش أنو انسان سيء ولا نحرضو فيك عليه
بالعكس مادابينا حياتكم تتحسن وتوصلي لواش حابة وترتاحي ماديا ونفسيا، خاطر حسب المستوى المادي يمكنكم تعيشو
حياة أفضل، خاطر لو يتغير الاجر فقط تاع الزوج تاعك ردودنا رايحة تختلف 180 درجة، ورايحين نقولوك أصبري وماعندكش حق
على كل حال إذا حبيتي تغيري حياتك اتكلمي مع زوجك بعقلانية كيما قتلك وربي يهنيكم ويفرج عليكم ويرزقكم كل خير
بالتوفيق ان شاء الله حبيبتي
​

 

[أبو إبراهيم .]

المستغرب في موضوعك هو توجيه السؤال للرجال وكأن كل الرجال يخلصو 50 مليون في الشهر

هناك من لا يخطر حتى على باله هذا المبلغ ، حتى في خواطر الذهن لا يجد 50 مليون في الشهر ، بل هناك من يحلم أن يتقاضى عشر هذا المبلغ 5 ملايين في الشهر بالنسبة له حلم كبير

كان المفروض أن تقولي هل أنا ظالمة أيها الأغنياء ؟ هذا هو العنوان المناسب لموضوعك

وربي يبارك لزوجك ويحفظه من العين الحاسدة ، وأهم شيء أن يستثمر الإنسان ما رزقه الله به في طاعته وفي كسب رضاه وليحرص على الصدقات الجارية التي تنفعه بعد موته