°~خُبزٌ في الفرنٍ كالقُطنِ~°

[Soumia hadj mohammed]

السلااااااااام عليكم ورحمة الله وبركاته
صح صيامكم لي زاغشيتاكت تع المطبخ

اليوم تعلمت من والدة صدقيتي / جزاها الله خيرا / وحد الخبز وواش من خبز ماشاء الله ، البارح كي داراته لنا فالفطور اول مرة يعجبني خبز الفرن بهد القدر

خفيف بزااف ياودي ريشة تع حمامة مزيودة

كاين وحد العضو نعزو بزاف كان يقلنا راك طيبو ومتعرضوناش ، هاسيدي راك من لي زانفيتي @حلم كبير وصح صيامك
​

بسم الله على بركة الله

نحتاجو حبة بطاطا مقشرة ومقطعة
فرينة
زيت زيتون
ملح
ملعقة كبيرة خميرة الخبز
ملعقة كبيرة سكر
قليل من الماء / حسب الحاجة ، مش شرط ديري الماء /

ـــــــــــــــــــــ
نص حبة طماطم متوسطة
زيت زيتون
زيتون
زعتـــــر

نغلو البطاطا في شويا ماء من دون ملح وكي طيب نحوها نخلوها تبرد شويا
نحط البطاطا بيها بالماء تعها في وعاء ونبدا نهرسها بالشوكة مليح
كي تبرد شويا يعني تولي دافية نضيف الخميرة والسكر ونخلطوها ثم نضيف الفرينة وفوق الفرينة الملح ونص كاس شاي من زيت الزيتون ونخلط باليد اذا جاتك ناشفة زيدي شووويا ماء برك
قوام العجينة يكون شويا يتلصق نشكلهاا مثل كرة ونغطيها ونخلوها تخمر
كي تخمر شيحي برك شويا فرينة به ماتلصقش فيدك كي تهبطيها وقسميها على 2
رشي مكان العمل بشويا فرينة وحطي فيه نص العجينة شكليها مثل كرة ثم مدديها شويا من الاطراف به تشبه الحربوش
ضعيها فالصينة وبعد نص دقيقة بداي تفرديها بيدك

انا وحدة شرطتها بالموس
الثانية درتلها قطع طماطم وزيتون وزعتر وزيت زيتون
ونخلوهم يخمرو
ثم نسخت الفرن على 260د وكي يسخن ندخلوهم
الفرن يكون شاعل من الفوق والتحت
وردو بالكم راهي ما تدتش فالطياب ههه تالمو خفيفوس


جربوها وردولي الخبريوس

وهد الزوم سبييالمو ل @بنقابي افتخر / هي موالفة بالتزمزيم في اكلاتها خخخ

طرونش @أم ياسمينdz واحد ما يتوشيه

واخيرا تحية للغالية @سكون الفجر والغالية @عآشقة الجنـة لي توحشت اطباقي

​

ملاحظة : ماتغفلوش عليها راهي تلطع فيسع وتطيب فيسع
ونظن السر في ذلك حبة الباطاطا مع الخميرة
وثان الباب تعها يجي ابيض يممم /ديرو الريجيم ديرو شويا /


​

 

[صانعة الإبتسامة]

يعطيك الصحة الله يبارك
خرج رووووعة
مرسي سوسو ربي يحفظك على الوصفة

 

[Soumia hadj mohammed]

ملاحظة نسيتها : لا يحتاج الى الدلك ، المهم تلمي العجينة مليح
افرحوا يامن تعبتو وداعا للتعب

 

[السلطانة]

وعليكم السلام ورحمة الله وبركاته
ياودي علاه تديري فيا هكا
روعة روعة ماشاء الله عجبتني فكرة العجينة
وتقديم ولااروع كالعادة فنانة ياسمية
تسلم يديك

 

[faith8]

السلام عيكم ماشاء الله خرجلك هايل باين بنين موالفة نديرو وصفة مشابهة بالزيتون برك
بصحتكم و تسلم الايدي اخية ♥

 

[Soumia hadj mohammed]

يعطيك الصحة الله يبارك
خرج رووووعة
مرسي سوسو ربي يحفظك على الوصفة

الله يسلمك ويبارك فيك شوشو
عفوا
امين ويحفظك
نتمنى تجربيها
ها صحا سحورك ا سيدي

 

[Soumia hadj mohammed]

يتصفح هذا الموضوع: 6 (الأعضاء: 3، الزوار: 3)

• رؤوف المستقبل ب
• faith8
• Soumia hadj mohammed

 

[Soumia hadj mohammed]

وعليكم السلام ورحمة الله وبركاته
ياودي علاه تديري فيا هكا
روعة روعة ماشاء الله عجبتني فكرة العجينة
وتقديم ولااروع كالعادة فنانة ياسمية
تسلم يديك

ياودي وها نا شادرت فيك ها حودجي بغيتك ق تجربيها وتفرحي بيها
ياودي غير سكتي مشي روعة برك روعات هه ماشاء الله
يا حي قاتلو فنانة اسحبي تصريحك يعودو يقتلوني فاللمة ورانا فرمضان هه />>>تمزح هده الطفلة /
الله يسلمك ام ياسمين
تحياتي /فرحت بطلتك/

 

[*amani*]

السلام عليكم
اممم تبارك الله يشهي وباين عليه خفيف وبنين....سلمت اناملك وبصحتكم

 

[Hakan]

مليح خيز يشهي على شكل بيتزا
بصح الخبز مش تع ريجيم بارك الله فيك ​

 

[ضآحكة مستبشرة]

السللم عليكم حبيبتي سمية
بسم الله مشاء الله رووووعة
حتى انا عجبني لدرجة كبيرة
يعطيك الصحة على الوصفة و الطريقة بلاك تجربة في رمضان
بارك الله فيك
و بصحتكم ^^

 

[زهور الأمل]

جميل ما قدمت يداك حنونة
تتهنو فيه
​

 

[البحر الهادي]

بارك الله فيك
روووعةةةة

 

[HAMZA USMA]

وصفة مميزة وموضوع رائع
شكرا لك على المجهود
واصل ​

 

[سكون الفجر]

ما شاء الله لا قوة إلا بالله، والله شكل الخبز تحفة
شكله يفتح النفس وخارج عن المألوف
تسلمي غاليتي على مشاركتنا هذه الوصفة المميزة
بصحتكم​

 

[Soumia hadj mohammed]

السلام عيكم ماشاء الله خرجلك هايل باين بنين موالفة نديرو وصفة مشابهة بالزيتون برك
بصحتكم و تسلم الايدي اخية ♥

وعليك السلام ورحمة الله
ايه حتى انا موالفة نديره بزيت الزيتون وشحال من مرة درت خبز الفرن لكن مثل هدا يعني نتيجة مختلفة تماما
لي عجبني فيخ الخفة
الله يسلمك حبيبتي اهلا بك وصح صيامك

 

[Soumia hadj mohammed]

السلام عليكم
اممم تبارك الله يشهي وباين عليه خفيف وبنين....سلمت اناملك وبصحتكم

وعليك السلام ورحمة الله
ربي يبارك فيك ختي
صح خفيف بزاف
الله يسلمك ، صح صيامك اماني

 

[Soumia hadj mohammed]

مليح خيز يشهي على شكل بيتزا
بصح الخبز مش تع ريجيم بارك الله فيك ​

على شكل فوكاسيا يا البومبة
وكي مش تع ريجيم شكون لي راه مسمنا
عن تجربة / كي ننقص من الخبز فالاكل انا تان ننقص فالحجم الجسمي خخ/
صح صيامك

 

[Soumia hadj mohammed]

السللم عليكم حبيبتي سمية
بسم الله مشاء الله رووووعة
حتى انا عجبني لدرجة كبيرة
يعطيك الصحة على الوصفة و الطريقة بلاك تجربة في رمضان
بارك الله فيك
و بصحتكم ^^

وعليك السلام والرحمة حبيبوتي اسوم
الله يسلمك ، وكي تجربيه وينجحلك رح يعجبك اكثر
ياودي راكي غير دوري فاللمة كي تجي 6 تع لعشية روحي للكوزينة ديريه راو ميشدكش يا الحادقة
وفيك بارك الله
يسلمك ، بالتوفيق

 

[Soumia hadj mohammed]

جميل ما قدمت يداك حنونة
تتهنو فيه
​

الله يسلمك ختيتو
اهلين فيكي