طعنوني

[توبة توتة]

ارواحو انصحوني واش ندير نبهوني واش ندير
طعنوني في ظهري و في نص قَلبـ♡ــيے. يا ناس يا عالم واش ندير
زوجي ليـّۓ عشرتنا دامت 4سنين عام سنة تشوكيت منو صّـْْ(☑)ـْْحّ صّـْْ(☑)ـْْحّ
ياو زوجي و اخ زوجي هدرو في اختي و في شرفها مالغري ختي خاطيتهم و متشوفهمش مررره هدرو فيها هدرة اخجل نفسي عند تذكرها
علجالاش هدرو فيها خطراكش صاحبهم خطب ختي وهوما مشتاوش وبداو يخرجو برا عليها في لهدرة لخامجة ليـّۓ متسواش و يبعثو خطيب ختي عليها في هدرة خامجة و هو دار كابتير ودزهم لختي وقاتلو بلي ه̷̷َـَْـُذآ كذب في كذب ليوم مقدرتش ختي وراحت حكات بابا كلش
وانا زوجي قالي ليوم محكمة بينتتا
ارواحو واش ندير انصحوني قَلبـ♡ــيے. راح يحبس وهو نحبو نموت عليه ليوم راني عفت روحي وعفت كلش
جاتني فكرة انتحار نقتل بني و نقتل روحي ونتهناو منهم وبعدها شهدت واستغفر
نحوس عل نصيحة
انصحوني

 

[ليليا مرام]

السلام عليكم أهلا وسهلا اختي
والله يا أختي امر مخجل أنو راجلك يهدر في أختك والله عيب فرضا يا سيدي شاف عليها هذا الشي مفروض يسترها هي أو مرا جاها مكتوبها يخليها تتزوج وعيب ورمي محصنة لو كذب عليها ويا ويلو من ربي وزيدي كيفاه يشوف فيك وهو هدر في اختك
ووعلاه قالك بيناتنا محكمة مفروض أنت تقوليهالو ماشي هو
الصراحة لو انا مانيش نحرض فيك مي لو انا وصل طعن فشرف أختي هو وخوه معناها انا ثاني يشوف فيا ذيك الشوفة
وهو ما حشمش من باباك من اختك انا راني حايرة واش نقولك الراجل هذا ولو عندك معاها عشرين سنة وصل لأهلك ما تخلعكش العشرة مارانيش نقولك اطلقي بصح با اختي ادي موقف الشي اللي دارو كبير
الله يهديه ويغفرلوا

 

[sami44]

هدا هو المجتمع يا اختي لازم تسايري الواقع والمكتوب
النميمة ماشي مليحة ومشكلنا نحن الجزائريين لا اقول الكل وانما الاغلبية ناكلو لحم خاوتنا وهم احياء
ان صح ما تقولين فليس من حقه قدف اختك الي هي نسيبته حتى ولو كانت غالطة ممكن ينصحها ما شي يكشفها
وبما انو اختك اشتكته لابوها غاضو الحال وقالك المحكمة بيناتنا ما تكسري راسك ما والو كل شيئ بالمكتوب حتى وانتي تحبينه هدا لا يعني شيئا امام قدر وضاء الله (قل لن يصيبنا الا ما كتب الله لنا)
انصحك بالاستغفار وكثرة الادكار والدعاء له بالهداية عسى ان يعود الى رشده
ربي يكون معاك ويرزقك من حيث لا تحتسبين

 

[أبو عاتكة]

وضع لا يحسد صاحبه عليه وهذه من ابتلاءات الحياة فالحياة ليست كل أوقاتها هادئة يكون الانسان جالس في حالوا يطيح عليه المشكل من حيث لا يدري حتى يخرج من عقلوا كاين مشاكل والله الانسان يبقى بلا عقل ولكن الانسان يحاول يتماسك ويسترجع لانو اذا كان الجميع وقع خطأ ميزيدش عليها الواحد ويخلق مشكل ثاني وثالث ورابع ويفتح ابواب الشر على نفسوا لانو الشيطان يستنى هاذي الفرص ليشتت العوائل ميتركش اثنين متفاهمين ساعة الا ويوقع بيناتهم بوسوسة غير متوقعة.
زوجك غلط وأخوه كذلك وغلطة كبيرة ياسر ماهيش صغيرة هذا واضح لا داعي لتكرار ماهي الغلطة ولماذا...الخ ماوقع وقع والرصاصة خرجت وجرحت وخلاص وكبرت الحكاية وعلم أبوك ولا ادري ما جرى بينهما وكيف سارت الامور وكيف هي الآن.
لكن لكن ما أوصيك به اذا كان هذا الانسان حاسس بأنوا غلط وتوضح لديك انو فيه جزء من نية باه يتراجع او يستعرف بالغلطة وفيه بذرة نتاع خير ولكن الشيطان غروا شيطان إنس او شيطان الجن كاين ناس تروح بلا ماتفيق مع الحكايات والشائعات يبقى يهدر بلاماهو فاهم هكذا فقط الهوا اللي جا يديه ممكن زوجك من هذا الصنف يعاود هدرة الناس بلا يقين فلا تغلقي باب الصلح بل كوني سباقة للصلح لانك الله غالب انت الان الوحيدة اللي في وجه المدفع من جيهة زوجك ومن جيهة عائلتك، الانفعال والاندفاع لا يأتي بنتيجة مثلما يكون التعقل والحكمة لانو ممكن الانسان يجي يتراجع على الخطأ فيلقى ناس تتهجم وتسب فيه وممكن تضرب فيه فوالله لن يتراجع وسيزيد في افكه وتعنته وممكن يضيف اشياء اخرى تفجر كل الوضع فالكلام بالعقل اقرب الى القلب اقرب الى الاستماع اقرب الى الاقتناع والتراجع عن الاخطاء، فحاولي حاولي تلقاي اي سبب للصلح وهذا لا يعني انك تبيني للزوج واخوه انو الامر ساهل عليك وانك تترجاي فيهم ومكّان والوا ولكن بالتي هي أحسن اجعلي الله بينك وبينهم واجعلي شرع ربي بينك وبينهم ودعيهم بين انفسهم وبين ربهم لعل الله يستجب لدعواتك ان كان خيرا لكِ ويصلح ما أفسده الشيطان بينكم.
يا أختي الكريمة هذا من حصاد ألسنتنا وتحدثنا عن الناس وانشغالنا بأمورهم وتركنا مصالحنا ربما تستغربين من حديث زوجك وأخوه عن أختك هذا الحديث الان وسط المجتمع الجزائري هو الشائع للاسف في القهاوي في المساجد في الاعراس في الجنازات في أماكن العمل الناس طايحة على بعضها بالتهم والتشهير والقذف والايذاء تيقني أن أختك هي واحدة من آلاف البنات اللي يتم تعريض شرفهم للاتهام والقذف يوميا بكل بساطة وما زوجك واخوه الا عينة من بقية المجتمع هو يهدر على أختك في نفس الوقت شخص آخر يهدر على أخته والآخر نفس الشيء هذا هو حصائد ألسنة الناس.
أختي الكريمة اذا كان هناك باب للصلح فاغتنميه اذا كان هذا الزوج لا خير فيه فالله أحكم الحاكمين كوني انتِ خيرا منه سيندم لا محال والله عزوجل لن يترك مظلوما أو محصنا متهوما لابد ربي يكشف الباطل ويبين الحق طال الزمن او قصر.
والوالد ربي يكون في عونوا مايلقاها لا من لا من ربي يقدروا على ماهو فيه.
وربي يهدي الزوج والاخ ويفيقوا لرواحهم ويتعقلوا.
وانتِ ربي يقدرك على تجاوز هذا الامتحان على خير.
والاخت ربي يكون معها هي وكل فتاة رميت في شرفها ظلما هي في كنف المولى القدير.
والله يفرجها عليكم هاذي اللي نقدروا نقولوهالك اختي الكريمة.