مشكلتي الخطبة

[مشكلتي]

السلام عليكم
انا فتاة ومشكلتي هي ان هناك شاب يريد التقدم لخطبتي وكانت واسطة بيننا واتصلت بوالدتي وزوجها واتصل بأبي وحدثه عن الشاب
المهم ابي يثق في صديقه ولا نعرف عنه وعن اهله الا الخير ..فقال لا مانع
وتواصل هذا الشاب مع ابي ولكن المشكل انه ولايته بعيدة عن ولايتنا فاتفقا انه نتواصلو قبل ..
وانا ضد هذي الفكرة اصلا
يعني اني نتحدث بالهاتف وابعث صور قبل الرؤية ...يعني حسب رأيهم اذا ماتفقناش هاتفيا او متقبلناش بعض في الصور
تحبس لحكاية قبل احسن ما يتنقل لمسافات ..
انا لم اقتنع بالفكرة ولكن تقريبا وضعت امام الامر الواقع ..
ارسلو صوري ورقم الهاتف واتصل
انا كنت متخيلة انه على الأكثر راح يتحدث ساعة اثنين يعني لنتفق على اهم النقاط والشروط
ومن بعدها نحدد واذا ممكن يوجد قبول وتوافق في العقليات ام لا
ولكم المشكلة الشاب أصبح يتصل كل يوم ولو انا فتحت المجال لتصل صباحا ومساء الا اني لا ارد ..
صح انه يوجد توافق في الكثير من المواضيع التي ناقشناها سواء الدينية او الاجتماعية
ولكن كثرة الحديث جعلته يسترسل وانا فتاة محافظة في هذا الجانب بعيدة كل البعد على العلاقات
يعني قلت بما انه اخذ رقمي من الوالد راح يكون الحديث رسمي ويحترم ثقة ابي فيه ..
ولكن على حسب رأيي لم يكن كذلك ...
تحدثنا 4 مرات في كل مرة ساعتين
وانا التي في كل مرة اقول خلاص واتحجج لننهي الاتصال و الا الحديث يطول ..
لم يكن هناك تجاوزات ولكن انا اصلا لست راضية بالحديث بالهاتف
ولكن هناك امور لم استحسنهامثال عن الأمور التي لم احبذها:
انا كنت أحدثه دون ان اذكر اسمه مثلا فمرة قال متعرفيش اسمي حاب نسمع اسمي منك
او اذا لم ارد يبعث راكي من صباح في بالي ونخمم فيك ..راكي بخير

انا اعتبر هذي تجاوزات حنا اصلا ماشي مخطوبين فمفهمتش اذا المجتمع رجع متفتح اوانا لي معقدة بزيادة .
مدابيا رجال واعيين وناضجين يعطوني رأيهم
او نساء ملتزمات يقدرو ينصحوني
انا حاليا رافضة اني نزيد نتحدث في الهاتف وخلاص حابة نرفض الخطبة من اجل هذا الموضوع
فهل برأيكم هذا معيار كافي؟؟

 

[Hakan]

السلام عليكم :
هذا تخلاط أختي الكريمة مع احترامي للوالد نتاعك ،نضن لوكان جا عندك خوك مستحيل يقبل بهذا التعارف ،هذا زواج و الرؤية الشرعية ناس راهم في امريكا يجي يدير الرؤية الشرعية نتاعوا ويروح وهذي الحكاية دارها صاحبي لانتيم ،مكانش منها كامل بعيد وهاذ الاسباب لانو راهو راجل يقدر في يتنقل في ليلة يجي يشوف ويروح ،هذا لعب ذراري .
وراني لحد الآن ما دخلتش معاك في موضوع الحلال الحرام لانو ولو يوافق ابوك و اعمامك واخوالك ،يبقى الضابط الشرعي مكانش ،لانو باش تتحدثي مع الزوج نتاعك لازم يحضروا الشرووط ومن ضمنها صيغة الزواج ( زوجتك موكلتي ) كي يقولها باباك ثم تقدري تهدري معاه .
هذا عبث و ماعندو حتى علاقة بالدين ولا بااشرع و لا بااعرف نتاعنا ،ربي يوفقك و يهدينا ويهديكم الخير .

 

[ذات الشيم]

حياك الله اختي الفاضلة..

أولا أسأل أن يتمم لك أمر زواجك إن كان فيه خير لك في دينك ودنياك..

ثانيا، هذه فعلا تجاوزات لم يأت بها الشرع بالعكس حذرنا كل الحذر من انو ننجرو وراء الانفتاح ومسمى " التعارف" وتنتهك الحرمات..

الدين باين .. رؤية شرعية .. خطبة.. عقد .. بدون ما نزيدو ولا نقصو
وتقدري تتعرفي على خطيبك عبر الرؤية الشرعية مع تسقسو عليه تكفي واهل العلم قالو ممكن حتى تكرري الرؤية الشرعية اذا كنتي محتاجة تزيدي تعرفي عليه امور طبعا مع حضور احد محارمك..

ومكانش منها يقلك منقدرش نتزوج بيك بدون تعارف وإلا علاش كاينة صلاة الاستخارة مادام تعرفيه ويعرفك في " علاقة غير شرعية " بين قوسين ..

لذلك اختي انصحك تقطعي العلاقة به الان قوليلو خلاص اظن تعارفنا بما يكفي تقدر تتقدم وبلوكيه ..
وماراكي معقدة ما والو راكي في الطريق الصحيح واياك ان تتجاهلي اشارات قلبك لانها تكون صادقة في اغلب الأحيان ..

 

[أم إسراء]

أوافق جدا الأخ hakan في كل وش قال..
فمن البداية التساهلات هذي رح تديك لبعيد و زيد الحديث الطويل هذا بلا علاقة رسمية ماعندو ولا معنى.. في الصح.
ولو نقولو صرات و فاتت.. وبعثوا الصورة تاعك و جاتك صورته و كان توافق.. لازم تطالبو باتمام الاجراءات و مش المشي في طريق حرام (ما تنساقيش خلف انه ابي علابالو و هو من اعطاه رقمي.. الممنوع ممنوع أختي الكريمة و غير جائز هذا).
**أنصحك أولا صلي استخارة في أمرك.. و اقطعي الاتصال به.. و قولي لمن وصلكم لبعض او عن طريق وليك.. اذا أردت التمام في الخطبة و الفاتحة رح نحكيو تحت طابع الحلال..
و نقولك أختي مادام حسيتي أنه الأمر غالط فالأمر غالط صح اياك و التهاون في أمور هكا.
و ربي يقدملك اللي فيه الخير

 

[هواري بومدين.]

السلام عليكم نوافق الاخ @Hakan فلي قاله
اختي الكريمة من المفروض هاد الشخص يجي لداركم و يحكي مع باباك و تتفاهمو و لكن هادي نتاع الهاتف و تشوفو بعضكم فالهاتف هادي اول مرة نسمع بيهااا (كيما يقولو بالعامية هادي زعاقة ماشي خطبة ) انا نعطيك نصيحة من اخ لاخته ديري استخارة و لي فيها الخير ربي يجيبهاا
و ادا ربي كملكم و جمعكم مع بعض الف مبروك سبقاا
السلام عليكم .

 

[ام أمينة]

السلام عليكم
والدك تصرّف بحسن نية لما أعطى رقمك لثقته بصديقه لكن القرار هذا كان متسرع قليلا
كان لازم يستشيرك و يأخذ رأيك أولا و يحط هو حدود واضحة قبل أي تواصل بينكما
أنا أحترم رأيك و راحتك النفسية هي الأساس قبل كل شيئ لأنك أنتِ اللي راح تعيشي هذا القرار مش هو
أنا من رأيي لا تقبلي ( طبعا صلي صلاة الإستخارة و ما تعرفي المكتوب )
أنا صادفت الكثير من الناس يجو من بعيد و يديرو الرؤية الشرعية و الخطبة الرسمية
و يعاودو يرجعو مرة أخرى للتفاهم عن الصداق و مستلزمات العرس و تحديد موعد الفاتحة و العقد و العرس يعني في زيارة وحدة يقضو شحال من حاجة بدلا ما يروحو و يرجعو عدة مرات ( مثال بنت خالي من العاصمة و زوجها من تبسة )
ربي يقدرلك الخير ... ( تحاوري مع أهلك و قولي لهم ما يقلقك و ضعي النقاط على الحروف )

 

[إلياس]

صراحة استخيري الله عزوجل ثم اتكلي على الله عزوجل ، و اوافق الجماعة فيما قالوا لك

 

[فادي محمد]

والدك لم يحسن التعامل مع قضيتك كان عليه أن يطلب من الشاب جلب وتتم الخطوبة والتعارف لمدة زمنية معينة لكن انصحك بما أن الشاب متعلق بك أن يتقدم لهطبتك وإن لم يفعل ذلك لا تكلميه مرة اخرى

 

[habib2]

غير تتزوج وتندم