:: ..لي جورني تاع وحد لي جون دزيرين !!!.. ::

[aMiNa-K]

السلام عليكم و رحمة الله و بركاته
مساء الخير لمة.. ان شاء الله تكونو انتيك و بيا

--------------------------

بزاف لي جان تاوعنا حياتهم كامل مايخموش على لافونير تاعهم.. حتى يلحقو ل certain age يفيقو لرواحتيهم و يقولو يا ندامة.. و لا يقولو الله غالب مالحقناش :glare:

القراية مايكملوهاش.. و يقولك وش نديرو بيها.. القاريين هاد الوقت راهم شادين الحيوط.. و يتبعو المقولة اللي تقول : اللي قرا قرا بكري

و من بعد للبطالة ديراكت.. يحكمو الحيوط و لي جورني تاوعهم يتعاودو
*المنوض ماشي قبل ال 11 تاع النهار.. غير ينوض ينوض بالعياط.. حطولي حليــــــــب.. و من بعد يلبس الحوايج المخيرين عندو.. يبيكي شعرو.. ويعبق الحالة بالريحة.. تاع اختو بيانسور .. و يجيبها في الزنقة.. بيانسور قدام الليسيات و السيام.. و يقابر هدي رايحة و هدي جاية.. بيانسور مع لي كومونتار :cursing:
و من نيمرو تاع هادي لنيميرو تاع لخرى.. و راكم علابالكم كيفاش الحب مسكين راهو يتمرمد في الجزائر :crying:

*و من بعد يولي للدار.. يعمرها و يعاود يخبطها برقدة حتى لمور العصر..(لاسياست لازم يطبق السنة).. بصح ينوض قبل المغرب بشوية :thumbdown:

*و موراها ديركت للزنقة.. يلعب مع صحابو.. يلعبو ماتش.. دومين.. كارطة
بسلامتهم يعرفو يجوزو الوقت :thumbdown:
و يدخل للدار قريب الفجر.. و ديركت للرقاد و ماينوضش قبل ال11 تاع النهار

*و هكدا هكدا.. لي جورني كامل يتعاودو.. و يجوزو اعوام و هوما هكدا :cursing:

**الام مسكينة.. تعيا تنصح ياوليدي يا وليدي..يقولها راني كبير و نعرف مادبروش عليا :glare:..المسكينة هكداك و تبقى تنصح فيه.. بصح شغل راهي تهدر مع حيط :bored:

**الوالد مسكين كيف كيف.. مرات يهدر بالعقل..و مرات يدبرلو خدمة بصح الولد يتكبر على الخدمة.. يقول مانخدمش اي خدمة..(بيانسو يحوس على المدخول بزاف و التعب قليل).. و مرات يداوس مع وليدو و كاين اللي حتى يحاوزو ولادهم و يقول خلي الزنقة تربيه.. مي اسكو الشارع يسقم البنادم؟

**و تجوز عوام و عوام.. هنا الشاب يلقى روحو خلاص بدا يكبر.. راح الحال و يبدا يحسب
لازم يستبيت.. و لازم خدمة دايمة و لازم دار .. يصيب روحو لازم عوام باش يفريها..هنا يقبل باي خدمة يولي يقول يا ندامة لوكان غير يولي الوقت للور.. و كي يسقسوه علاش وصلت روحك لهاد الحال.. يقول الله غالب مالحقناش.. مايستعرفش مامبا بلي كان دايها غير لعب :angry:

--------------------------

في رايكم

* كاين بزاف شباب من هاد النوعية.. علاش ولاو هكدا؟

* علاش يحبسو القراية و من بعد يقولو لوكان غير قرينا؟

* و وعلاش يتكبرو على الخدمة؟ .. و من بعد يقولك مكانش خدمة؟

* الغلطة منين جات؟.. من الوالدين ماعرفوش يربو؟.. و لا من المخالطة؟.. و لا من الشارع؟.. و لا منين؟

هيا جاوبوني.. :glare:

​

 

[Moha le sage]

لي عودة ....................................

 

[H@teM]

كاين بزاف شباب من هاد النوعية.. علاش ولاو هكدا؟
على خاطر مخهم فارغ مليان غير بلحوايج الفارغة ويحوس على الساجي
حاب يقعد باباه ه و لي يصرف عليه
علاش يحبسو القراية و من بعد يقولو لوكان غير قرينا؟
قالك لي ميلحقش يقول اخ سيش *التمر لي مش مليح *
هو مقدرش يكمل على خاطر عقلوا حابس ملقى حتى مبرر قال ها لكلام
* و وعلاش يتكبرو على الخدمة؟ .. و من بعد يقولك مكانش خدمة؟
هوتاعينا ميقبلش خدام عادي لازملوا يولي مدير ولا كاش حاجة كبيرة
على قرايتوا السمحة
الغلطة منين جات؟..
الوالدين حشاهم من عقلوا لي مخروب فيه والتهيؤات لي واهم بيها روحوا
واخيرا مشكورة اختي على الموضوع الرائع دمت بامتيازك

 

[Silent Hill]

:: . :ّ بسم الله ّّ: . ::
:ّ ما شاء الله ّّ:
ربـ،ـي لقد مسـ،ـ،ـني الضـ،ـ،ـر:closedeyes: فإرحمـ،ـ،ـني
خوفا قبـ،ـ،ـ،ـل ان يكون طمعا منـ،ـ،ـي
خلوها على ربي
وكيما جات جات :،)
مشكوره على الطرح
جزاكي الله كل الخير
في رعاية الرحمان
‘ــــرمضًان كريمــــ’
ــــروحي غزةــــ
تحياتي و احترامي و تقديري
ـــــسلامــــــــــــ

و اسف على الازعاج و الله
تقبلـــــــــو ا خالص الحب
Silent Hill
‏ζشيم الروζ
وراء كل امرأة رجل عظيم و ان لم تكن لكان أعظم
Catch Me If You C`an
الـمــм.ş.ήـــ3yit saber wallah ma 9additchـاسنجر​

 

[02asma02]

موضوع شباب يعطيك الصحخة انا نظن الغلطة من الشارع و صحبة السووووء

 

[طارق القبطان]

صح كاين بزاف شباب كيما هكذا بصح وين راه الحل في رايك

 

[aMiNa-K]

لي عودة ....................................

اوكي​

 

[aMiNa-K]

كاين بزاف شباب من هاد النوعية.. علاش ولاو هكدا؟
على خاطر مخهم فارغ مليان غير بلحوايج الفارغة ويحوس على الساجي
حاب يقعد باباه هو لي يصرف عليه
علاش يحبسو القراية و من بعد يقولو لوكان غير قرينا؟
قالك لي ميلحقش يقول اخ سيش *التمر لي مش مليح *
هو مقدرش يكمل على خاطر عقلوا حابس ملقى حتى مبرر قال ها لكلام
* و وعلاش يتكبرو على الخدمة؟ .. و من بعد يقولك مكانش خدمة؟
هوتاعينا ميقبلش خدام عادي لازملوا يولي مدير ولا كاش حاجة كبيرة
على قرايتوا السمحة
الغلطة منين جات؟..
الوالدين حشاهم من عقلوا لي مخروب فيه والتهيؤات لي واهم بيها روحوا
واخيرا مشكورة اختي على الموضوع الرائع دمت بامتيازك

الغلطة من الوالدين برك !!.. نشوفو بزاف والدين ما شاء الله عليهم.. بصح ولادهم معوجين
الوالدين يقدرو يكونو غالطين و يقدرو يكون ضحايا مساكن.. مانلوموهمش وحدهم

شكرا لك على المرور​

 

[aMiNa-K]

:: . :ّ بسم الله ّّ: . ::

:ّ ما شاء الله ّّ:
ربـ،ـي لقد مسـ،ـ،ـني الضـ،ـ،ـر:closedeyes: فإرحمـ،ـ،ـني
خوفا قبـ،ـ،ـ،ـل ان يكون طمعا منـ،ـ،ـي
خلوها على ربي
وكيما جات جات :،)
مشكوره على الطرح
جزاكي الله كل الخير
في رعاية الرحمان
‘ــــرمضًان كريمــــ’
ــــروحي غزةــــ
تحياتي و احترامي و تقديري
ـــــسلامــــــــــــ

و اسف على الازعاج و الله
تقبلـــــــــو ا خالص الحب
silent hill
‏ζشيم الروζ
وراء كل امرأة رجل عظيم و ان لم تكن لكان أعظم
catch me if you c`an

الـمــм.ş.ήـــ3yit saber wallah ma 9additchـاسنجر​

مشكور اخي على المرور​

 

[السوفي حمة]

طرح مميز من أخت مميزة
لكن أنا عشت وضعية كيما هذي مع قريب ليا هو وليد عمي تخرج مهندس إعلام آلي، باباه (عمي) خلاه مريح شهر ومن بعد قاله من اليوم خلاص تروح تجيب الخبزة نتاعك وتخدم على روحك دبر راسك
سي المهندس راح يحوس على خدمة وملقاش وقال لباباه ملقيتش وعمي راح دبرلو خدمة في شانطي نتاع بناء، وقالوا تخدم تاكل متخدمش ياكلك الشر والجوع والولد مسكين بدا يخدم وفي نفس الوقت بقى يحوس على خدمة ويجري حتى وين جابها أستاذ في التكوين المهني والعام هذا ترقى مدير فرع.
علاه حكيت الحكاية هذي باش نقول حتى الوالدين عندهم دور، لازم يزيرو على أولادهم ويخلوهم يحوسو على خدمة ذراع وخدمة النهار ما فيها عار، وعندنا في الوادي والله العظيم طالب جامعي سنة أخيرة في الطب يخدم في الصيف يقلع البطاطا، لأننا تربينا هكذا متستناش باباك يصرف عليك ومام يكون ملياردير لازم تعرق باش تدي السوارد.
​

 

[aMiNa-K]

موضوع شباب يعطيك الصحخة انا نظن الغلطة من الشارع و صحبة السووووء

الله يسلمك اختي

صح الشارع و صحبة السوء تدي للهلاك.. بصح ماننساوش بلي ربي عطالنا عقل نخمو بيه.. نعرفو نميزو بين الصح و الغلط و لا لالا؟
​

 

[طارق القبطان]

طرح مميز من أخت مميزة

لكن أنا عشت وضعية كيما هذي مع قريب ليا هو وليد عمي تخرج مهندس إعلام آلي، باباه (عمي) خلاه مريح شهر ومن بعد قاله من اليوم خلاص تروح تجيب الخبزة نتاعك وتخدم على روحك دبر راسك
سي المهندس راح يحوس على خدمة وملقاش وقال لباباه ملقيتش وعمي راح دبرلو خدمة في شانطي نتاع بناء، وقالوا تخدم تاكل متخدمش ياكلك الشر والجوع والولد مسكين بدا يخدم وفي نفس الوقت بقى يحوس على خدمة ويجري حتى وين جابها أستاذ في التكوين المهني والعام هذا ترقى مدير فرع.
علاه حكيت الحكاية هذي باش نقول حتى الوالدين عندهم دور، لازم يزيرو على أولادهم ويخلوهم يحوسو على خدمة ذراع وخدمة النهار ما فيها عار، وعندنا في الوادي والله العظيم طالب جامعي سنة أخيرة في الطب يخدم في الصيف يقلع البطاطا، لأننا تربينا هكذا متستناش باباك يصرف عليك ومام يكون ملياردير لازم تعرق باش تدي السوارد. ​

صح عندك الحق خويا السوفي
الخدمة ماهيش عيب
بصح هذي تصلح غير ديباناج برك
كون تطول معاها راح تمل وتولي تتركها على خاطر مايبان فيها والوا
ماهيش تاع افونير
ونزيدك حاجة كاين بلايص وين المجتمع والمحيط يلعب دور في هذا
يعني كي يعود واحد خدام في الشونطي ولا قهوة او ماشابه ذلك
يشوفو فه شوفة خاطية خلاص .
​

 

[aMiNa-K]

صح كاين بزاف شباب كيما هكذا بصح وين راه الحل في رايك

اهلا خويا طارق

مااااااااااعنديش حلول pour le moment
هاد النوع من الشباب بالنسبة ليا ظاهرة غريبة.. ماعلاباليش كيفاش يمشي السيستام عندهم في راسهم​

 

[السوفي حمة]

صح عندك الحق خويا السوفي
الخدمة ماهيش عيب
بصح هذي تصلح غير ديباناج برك
كون تطول معاها راح تمل وتولي تتركها على خاطر مايبان فيها والوا
ماهيش تاع افونير
ونزيدك حاجة كاين بلايص وين المجتمع والمحيط يلعب دور في هذا
يعني كي يعود واحد خدام في الشونطي ولا قهوة او ماشابه ذلك
يشوفو فه شوفة خاطية خلاص .
​

المجتمع نتاعنا أصلا مجتمع جاهل وهو سبب كبير في وضعية هؤلاء الشباب، عوض أننا نشجعهم على العمل الشريف مهما كان، رانا نعملو العكس من خلال نظرتنا الدونية لبعض الأعمال،
ولازم ثاني نفرقوا بين الشهادة والوظيفة لأننا مقبلين على انفتاح وين مهيش الشهادة وحدها تضمن الخدمة لكن لازم تكون معاها الكفاءة والقدرات الفردية لكل واحد منا، كيما راهو موجود في الدول الأخرى، ومثال على ذلك مصر ممكن تلقي واحد عنده شهادة طبيب وهو يقود في سيارة أجرة،
لكن نقول مجتمعنا مازال يعتمد على المظاهر فقط
وعلى هذا الشباب مسكين مازال يروح في الرجلين
لأنه يرضى يحرق ويخدم أي مهنة في الخارج يرفض يخدمها في بلاده نتيجة نظرة المجتمع الجاهل.
​

 

[aMiNa-K]

طرح مميز من أخت مميزة

لكن أنا عشت وضعية كيما هذي مع قريب ليا هو وليد عمي تخرج مهندس إعلام آلي، باباه (عمي) خلاه مريح شهر ومن بعد قاله من اليوم خلاص تروح تجيب الخبزة نتاعك وتخدم على روحك دبر راسك
سي المهندس راح يحوس على خدمة وملقاش وقال لباباه ملقيتش وعمي راح دبرلو خدمة في شانطي نتاع بناء، وقالوا تخدم تاكل متخدمش ياكلك الشر والجوع والولد مسكين بدا يخدم وفي نفس الوقت بقى يحوس على خدمة ويجري حتى وين جابها أستاذ في التكوين المهني والعام هذا ترقى مدير فرع.
علاه حكيت الحكاية هذي باش نقول حتى الوالدين عندهم دور، لازم يزيرو على أولادهم ويخلوهم يحوسو على خدمة ذراع وخدمة النهار ما فيها عار، وعندنا في الوادي والله العظيم طالب جامعي سنة أخيرة في الطب يخدم في الصيف يقلع البطاطا، لأننا تربينا هكذا متستناش باباك يصرف عليك ومام يكون ملياردير لازم تعرق باش تدي السوارد. ​

اهلا خويا حمة

انعم ايه الوالدين عندهم دور.. كاين والدين يزيرو على ولادهم.. و كاين اللي هوما هلكوهم.. الولد كي يكون صغير يقولك خلي وليدي مازالو صغير.. يبطل القرايا و يقعد في الدار و زيد والديه يفششوه.. هنا بالسيف الولد يتعوج .. و كي يخرج للدنيا وحدو مايلقاش روحو

و كاين والدين.. كما القريب ديالك ..بصح اسكو كامل الشباب كما القريب ديالك.. ماشكيتش
كاين اللي يجيبولهم الخدمة حتى لعندهم و يتشرط عليها.. و الوالد كي يزعف يحاوزو من الدار الطفل يروح يبات في الزنقة و مايخدمش.. و اللي ديفوا تكمل عليها الام.. تبدا تبكي و تقول وليدي وليدي.. هنا الاب بالسيف يخرج يحوس على وليدو و يرجعو للدار

(ماترخي الخيط بزاف.. ماتطلقو كامل)

و كاين و كاين و كاين
لازم الوالدين يعرفو كيفاش يسيرو

بارك الله فيك خويا على المرور​

 

[aMiNa-K]

صح عندك الحق خويا السوفي

الخدمة ماهيش عيب
بصح هذي تصلح غير ديباناج برك
كون تطول معاها راح تمل وتولي تتركها على خاطر مايبان فيها والوا
ماهيش تاع افونير
ونزيدك حاجة كاين بلايص وين المجتمع والمحيط يلعب دور في هذا
يعني كي يعود واحد خدام في الشونطي ولا قهوة او ماشابه ذلك
يشوفو فه شوفة خاطية خلاص .​

ايه خويا طارق عندك الحق
بصح ديباني روحك خير و لا تحكم حيط خير؟
(اتسبب يا عبدي و انا نعينك)

الواحد يديباني روحو بخدمة تاع شنطي و لا قهوة ماعليش الخدمة مافيهاش عيب.. و في النفس الوقت راهو يناvيgي في خدمة وحدخرة

و المجتمع تاعنا مجتمع فاسد.. مايرحم مايخلي رحمة ربي تنزل​

 

[أمين حاجي]

بارك الله فيك على الموضوع القيم
الغلطة عمرها ماجات من عند الوالدين شكون الي يقبل يمرمد وليدو
عندبالك صح الواحد مايقبلش يفرح بوليدو ويتباهى بيه
الغلطة فيه هة الي قبل بالزنقة و لصحاب (الصاحب ساحب)
و الله أعلم
اللهم أهدني و أهدي جميع شباب المسلمين
​

 

[** غزال الصحراء **]

و الله باين سوجي مليح مي راني خارج أمينة

اني نولي مبعد شويا و نديرو تقييم و طلة مليحة

تحياتي .
​

 

[Lonely Girl]

هههه سي فري اغلبية لي جان هاذا هو الجورني تاعهم ماكلة ورقاد وتكحال للبنات الراي الفاسد مديهم للهاويه يتقلشو عالخدمة منعرف وش يحبو يولو ويقلك
معنديش زهر
انا في رايي المربي مربي وهي في الحقيقة المجتمع يلعب دور بصح اذا كانو والديه مربينو وينهيوه من صغرو مش يخلوه حتى يكبر عالعوج ويبداو ينصحوه زعمة
امبوسيبل يسقم
مشكوره امونة مميزة كعادتك حبيبتي
​

 

[** غزال الصحراء **]

عدنا و العود أحمد أمينة ! ايه هاذي هي حالة معظم شبابنا ليوم و نسيتي خطوة في لخر كي

يلقى الحال فات يبدا يخمم في الحرgة لبلاد النور كيما هو حسبها !!! المهم السؤال تاع لخر

بغيت نقول بلي السبب الرئيسي هو المخالطة الشينة و الله أنا نعرف ناس فقراء و مام باباهم

يضربهم و مخلطة عليهم مي ولدهم جاي جونتي و يقرى مليح و فور 10/10 ,, و العكس

عندي جاري باباه حاجة هاربة و قاع.. دراهم ما تخصش يعني عايشين لاكلاص

مي و الله صاريلو كيما لي جان لي حكيتي عليهم و كثر يعرف غير يحكي في التيليفون و بزيادة

مريض بالكاشيات رقاو عليه و ما تريقلش واش راح نقولك ربي يكون الخير و خلاص .
​