قعدة مرحة وشرحة مع اعضاء والمشرفين المحبوبين في اللمة

[Jagwar]

جيت ندير اسئلة قبل مانروح :tears:

وين رايحة ها يعطيك عصيدة :scared:

شكون هنا هادا جاgوار ايا مرحبا بيك خويا منور القعدة :yahoo:

و بيك يعيشك اختى يو آر ويلكوم:shiny:

و نبدى بالاسئلة تعرفوني خفيفة ظريفة :yaw:

قوليها و عاوديها ههههه

بسم الله :shay:

و لا حول و لا قوة الا بالله

بما اني مشجعة ريالية واش تدير كي نقولك فيف الريال :tongue_3: هوهوهو ؟؟

بما أنى مشجع برشلونى كتالونى نجاوب و نقولك 5-0 :tongue_1:

قداه مرة درت آكسيدون بالطوموبيل تاعك :cursing: ؟؟ { اذا عندك طوموبيل :thumb_up2: هههه }

و الله آكسيدون ماشى كبيرة بزاف يعنى 3 مرات برك
مرة كنت مروح من الباردة (تابعة ولاية قالمة)
مرة فى طريق مطار عنابة رابح بيطاط
و آخر مرة كانت فى كورتاج (عرس) فى طريق برحال ولاية عنابة
بصح الحمد لله خرجت فيهم سلامات :shiny: (أنا 7 أرواح):yaw:

قداه من مرة بكيت و ضحكت في نفس الوقت :lolo:؟؟

نهار رجع بابا من الحج تالمون لى توحشتو بزاف نبكى و نضحك من الفرحة :laugh:

قالك كريستيانو راح يبيعوه :crying_1: هادا في صالح الريال ولا لا :um_sh: ؟؟

و الله انتوما أدرى باللاعبين تاعكم :shiny:
ممكن يكون مفيد للريال من حيث اللعب الجماعى للفريق
و ممكن يكون سلبى على خاطر الريال يعتمد على الاسلوب الفردى

قولوليلي برك واش معجبكم في ميسي:surrender: ؟؟

مممممممم سؤال وجيه و عجيب فى نفس الوقت
تقدرى انتى تقوليلنا واش عجبك فى منتدى اللمة و علاش سجلتى فيه :shiny:؟
و اسكو سمعتى المعلق التونسى هذاك لى يقول يوززززع واش قال فى ميسى ؟
قال عليه حتى الفريق المنافس يستمتع بالشيء لى يقدمو ميسى :like_1:

كثرت من اسئلة الرياضة نفوتو للحياة اليومية :heh:

على راحتك اختى شوفى واش يساعدك حتى اسئلة سياسية رانى هنا :lol:

ممم واش هي اول حاجة تديرها كي تنوض الصباح :huh: ؟؟

نقعد 3 سوايع و انا نتكسل و نتعوج و نروح يمين شمال و نعاود نطيح فى الفراش:lol:

واش هو طموحك في الحياة:sheer: ؟؟

طموحاتى كبيرة و هي انى نكون الأفضل بين الجميع و المحبوب بين الجميع :luve_1:

قداه اصغر معدل جبتو كي كنت تقرى :music_whistling: { صراحة يا ايها البرصاوي :like_1: ههه } ؟؟
جو بونس جبت 8 فى الـ BEF :bored:

واش يعنيلك :

القذافي :cursing: شبعة ضحك :lol:
زين العابدين :schmoll: بن على هرب :laugh:
حسني اللامبارك شارون الثانى :sneaky2:
الحياة :showoff: ؟ امتحان من رب العالمين :islam_slat2:
الام :yahoo: ؟ نعمة من عند الله عز و جل
الهدوء :ans_flw: ؟ طريق النجاح
لويزة حنون :um_sh: ؟ عرة الجزائر

في رأيك مغني اسكو هو صح مريض :crying_1: ولا يتمارض :surrender: ولا ضربوه بعين:laugh: ؟؟
مغنى مسكين جر عليه سعدان ، و راه ضيع روحو على جال المنتخب
و فى الىخير خرج صفر اليدين :sad:

آخر مرة بكيت فيها :tears: ؟؟

كى سمعت بلى الوالدة تاعى حكمتها لاتونسيون :tears:
ربى يشفيها و يحميها و يرعاها

واش رأيك في la_safa لي هي انا :heh: احم احم ههه ؟؟

مممممم هي بالنسبة لي أختى و احسن من ميسى ومن برشلونة :shay:
باختصار شديد la_safa هي ملح سكر اللمة :re_gards:

عجبوك الاسئلة ولا لا :tongue_1: ؟؟

ما شاء الله روععععععة :thumb_up2:

حقا تعرف تطيب ولالا :like_1:؟؟

علاش يعنى ما علابالكش بلى نخدم فى فاست فوود :like_1:؟
بيان سور نعرف نطيب الفريت أومليت و نعرف نطيب البوراك
و نعرف نطيب المحجوبة و البيتزا و الكالدى و الكيش و نعرف اكثر منك :tongue_3:

هيا كثرت سلاموووووو

و عليكم السلام و رحمة الله تعالى و بركاته
يعطيك الصحة la_safa دمك شربات كيما يقول المصرى :shiny:
​

ــــــــــــــــــــــــــــــــــــ
ــــــــــــــــــــــــــــــــــــ



​

 

[زهرة الندى]

اووووووووووووووو مكانش منها _o:


وانا نقول وعلاه السيد ضاب النح هههههه


يااااه راكـ هنا ..


يا عقيــــــــــــــــــــد راك منوووووووووور القعــــــــــــــــــــدة


واستعــــــــــــد للقصـــف خخخخخ​

 

[زهرة الندى]

الســـــــــــــــــلام عليكم

جبتلك سؤال واحد واسمحلي اذا سقساوك من قبل لاني ماقريتش الردود i-o:ههههه
من هو العقيد Jagwar
خلاف مول القهوة هدي عارفينها i-o:خخخخ

ماسبب اختياركـ لهذا الإســم ؟؟

وكان اسمك ميسي بومب وعلاه بدلتو ؟؟

ما أجمـــــل وأسعـــد موقف مر عليك في حياتكـ ؟؟

ما اسوء موقف مــــر عليــــكـ ؟؟

من هم أعز أصدقائك هنــا في اللمــة ؟

كم لديــك صديق يعني خارج اللمــة ؟ وعلى أي اساس تختار أصدقائكـ ؟



أكيـــــــــــــــــد ليا العودة ماصدقت وحكمتك :like_1:ههههه​

 

[Jagwar]

Jagwar
مرحبا بيك

و بيك يعيشك اختى - ميغسى :smile:

المهم راهي ضيفاتك الاخت راجية الجنة تسما انا نسقسي برك
نبداو

على بركة الله

باسم الله

و لا حول و لا قوة الا بالله

انت منينك " من اي ولاية "؟؟؟؟

من مدينة عنابة من وسط المدينة قرب البحر
بالتحديد من حي Valmascort :shiny:

واش رايك في اهل اللمة ؟؟؟؟؟

بصراحة فيهم و عليهم
يعنى كاين الذهب و كاين الفضة و كاين النحاس و القصدير :laugh:

شكون هو العضو لي تعجبك مواضيعو بزاااااف ؟؟؟؟؟

ملامح كاتب
موح لوساج
شرطية اللمة
مفاهيم الخجل
راجية الجنة

كيفاش تعرفت على منتدى اللمة الجزائرية ؟؟؟؟؟

تعرفت عليه صدفة وين كنت نحوس على كتاب المصحف الرقمى فى المنتديات الاسلامية لقيتو فى منتدى اللمة
و عجبتنى و سنييت كونترا هنا :thumb_up2:

واش رايك في هذا الوقت او الجيل " الموضة و الحركات و الهدات " ؟؟؟؟؟؟

جيل جوتابل
جيل مجلجل
جيل يحشم
جيل النيفو طايح فى التقاشر
جيل حدث و لا حرج

من اي انواع الذكور انت " تاع قراية ولا تاع زهو ولا تاع الحركات "؟؟؟؟؟؟؟؟

و الله تقدرى تجمعى المواصفات لى موجودة فى حياتنا كامل
يعنى وين تحطينى تلقاينا ما نراطى والو :laugh:

واش حوالك مع لقراية و شحال كانو المعدلات تاوعك هذا العام " اذا كنت تقرا "؟؟؟؟؟؟؟؟

لالا اختى القراية عندى شحال ما تلاقيتش بيها :shiny:
أنا حبست تقريب فى الـ 2005/2006
و رانى نخدم و الحمد لله
و المعدلات كنت نقرى مليح مى العام لاخر هردتها بسبب الظروف
لى مريت بيها هذاك الوقت :sadwalk:

واش رايك في sissina gilina " تقدر ما تجاوبش "؟؟؟؟؟؟؟؟

بصراحة اختى أنا ما نعرفكش مليح على خاطر كنت غايب
فترة طويلة على المنتدى ، بصح من المعاملة تاع الاعضاء معاك
ومن المواضيع و الردود تاعك باين عليك شخصية رائعة
و شرف لي أنى تحدثت معاك :re_gards:

راني عييت من لكتيبة ههههه

ههههه مالا واش نقول أنا لكلاvـى راه يستغيث من الالم :shiny:

لي عودة

ان شاء الله اختى و مرحبا بيك فى كل وقت
و نشكرك مرة ثانية على الاسئلة الخفيفة
تحياتى ليك و نشوفك على خير :thumb_up2:

***************************************​

ــــــــــــــــــــــــــــــــــــــ
ــــــــــــــــــــــــــــــــــــــ
​

 

[Jagwar]

اووووووووووووووو مكانش منها _o:


وانا نقول وعلاه السيد ضاب النح هههههه


يااااه راكـ هنا ..


يا عقيــــــــــــــــــــد راك منوووووووووور القعــــــــــــــــــــدة


واستعــــــــــــد للقصـــف خخخخخ​

هههههه أهلا بيك ندوشة
هاي جاتك فرصة الانتقام :shiny:
آيا نروح نشوف القصف تاعك هاو قالك ممنوع الدردشة :cra_zy:
أستر يا رب ... :shiny:


​

 

[Jagwar]

الســـــــــــــــــلام عليكم

و عليكم السلام و رحمة الله و بركاته

مرحبا بيك اختى
​

جبتلك سؤال واحد واسمحلي اذا سقساوك من قبل لاني ماقريتش الردود i-o:ههههه

و لا يهمك رانى ببغاء حتى انا نحب نعاود كلشى :shiny:

من هو العقيد Jagwar

العقيد جغوار من مواليد نوفمبر 1986 بمدينة بعنابة الخلابة
اسم الشهرة جاغوار و ميسى بومب سابق و اسمه الحقيقى أسامة (ماشى بن لادن):shiny:

خلاف مول القهوة هدي عارفينها i-o:خخخخ

ياو قتلك ما تهدريش على القهوة رانى نخدم بلا روجيستر كوميرس i-o:

ماسبب اختياركـ لهذا الإســم ؟؟

جاغوار هي شركة سيارات معروفة و رمزها هو الفهد و هو اسرع مخلوق على وجه الارض
و أنا ثانى أسرع مخلوق على وجه الارض :shiny: على هاذيك سميت روحى جاغوار :showoff:

وكان اسمك ميسي بومب وعلاه بدلتو ؟؟

لا لى لشيء سوى لرغبة فى نفسى :shiny:

ما أجمـــــل وأسعـــد موقف مر عليك في حياتكـ ؟؟

أجمل موقف أنى تعرفت على نصفى الثانى فى الحياة

ما اسوء موقف مــــر عليــــكـ ؟؟

أسوء موقف ان نصفى الثانى غادرنى بسرعة و بلا رجعة :sadwalk:

من هم أعز أصدقائك هنــا في اللمــة ؟

اييييييي لازمنى كالكولاتريس باش نبدأ نحسب
أولا و على رأس القائمة
كاين شخص عزيز بزاف على قلبى ما نقدرش نذكر أسمو لسبب معين
و من بعد كاين بزاف و القائمة طويلة نخاف نظلم لى ننساهم
المهم ما تخافيش انتى و لقروب تاع القهوة راكم فى الحسبة و من الاوائل ثانى:sheer:

كم لديــك صديق يعني خارج اللمــة ؟ وعلى أي اساس تختار أصدقائكـ ؟

لوكان نقعد نهار كامل نعد فيهم ما نقدرش نكملهم
و الله بزاف بزاف عندى صحاب تخيلى حتى من خارج الولاية تاعى
و بالنسبة لأساس اختيار الصداقة بالنسبة لي ما نقدرش نعمل صداقة مبنية على
اساس معين
يعنى لى يضحك فى وجهى برك نديرو صديق و اخ و ما نحبش نعرف حتى عليه
شكون هو بالتحديد.


أكيـــــــــــــــــد ليا العودة ماصدقت وحكمتك :like_1:ههههه

على الرحب و السعه اختى
فى اي وقت رانى فى الخدمة
تحياتى ليك و مرسى على القصف الجوى الخفيف :shiny:

​

ــــــــــــــــــــــــــــــــــــــــــــــ
ــــــــــــــــــــــــــــــــــــــــــــــ







​

 

[Sami_Dz]

شكرا جزييييييلا

 

[Jagwar]

شكرا جزييييييلا

يو آر ويلكوم خويا سامى و ناس سطيف بلاد الرجلة و النيف





​

 

[Jagwar]

لى عودة فى المساء ان شاء الله




​

 

[السلطانة]

او اهلا بالضيف
درك نخمل اسئلة ونرجع

​

 

[السلطانة]

​

​

راني رجعت وفي يدي الخير ولخمير ​

اولا نرحبو بيك اسامة ​

جبنالك معانا حبات قاطو ​

قبل منحطهم في كوزينة اللمة ​

قلت نجيب CUVETTE لخويا: ​

​

ثانيا الاسئلة: ​

​

​

1-كي كنت صغير​

هل كنت طاير او عاقل؟​

احكيلنا على اكثر الطوايش لي درتيها​

وهل كانو يصرفقوك ولالا وشحال من كف ديتي ههه؟؟؟؟​

​

​

2-قداش من كعبة سكر تحط في الكاس تاع القهوة ولالحليب؟​

​

3-كي كنت صغير واشهوم الكوميكات لي تفضلهم اعطينا اسماءهم؟​

​

4-واش اسمها الماكلة لي تحب تاكلها ؟​

​

5-شاركتي في مسابقة تيليفيزيونية​

وربحتي رحلة الى برشلونة​

خير 3أعضاء شباب تديهم معاك؟؟​

​

​

هيا احكم يدك بهاذو من مباعد نزيد نعاود​

نرجع​

تحياتي​

​

 

[sam_houssem]

وديما كي العادة والعوايد ندخلو على جال العزاز
بومبة جبتلك سؤال شوي باهي ومحيرني
قولي كون تعطيها للبحر
ايا تدخل تعوم وتجي خارج تلقاهم سرقولك قشك
وما تلقاش وش تلبس باه تستر روحك
وتلقى قدامك غير جبة وسيرفات تاع بنات
هيا قولي ويناها لي تسرقها باه تستر روحك
​

 

[Jagwar]

او اهلا بالضيف
درك نخمل اسئلة ونرجع

​

يا ميت اهلين و سهلين بالشرطة فى خدمة الشعب
رانى جيت نشوف واش جبتيلى معاك i-o:



​

 

[Jagwar]

​

​

راني رجعت وفي يدي الخير ولخمير

يو آر ويلكوم أختى شوشو

​

اولا نرحبو بيك اسامة

و بيك يعيشك أختى الغالية مرحبا بيك انتى تانى

​

جبنالك معانا حبات قاطو ​

قبل منحطهم في كوزينة اللمة ​

قلت نجيب CUVETTE لخويا: ​

كلك ذوق و كرم أختى شوشو
يعطيك الصحة مليح الواحد يقرمش و يجاوب على الاسئلة :shiny:

​

ثانيا الاسئلة:

على بركة الله

​

​

1-كي كنت صغير
​

هل كنت طاير او عاقل؟

هههه قولى كنت مجرم كنت سفاح كنت قاتل محترف هههه طاير شوية فيا أنا كى
كنت صغير والديا قريب تبراو منى من المشاكل لى كنت نعملها :shiny:

​

احكيلنا على اكثر الطوايش لي درتيها​

وهل كانو يصرفقوك ولالا وشحال من كف ديتي ههه؟؟؟؟

اييييي شحال هاذى لازملها كالكولاتريس
وحد المرة كى كنت صغير نشفى عليها عندى قولى وحد الـ 12 سنة هكذاك
سرقت لمفاتح تاع الطوموبيل تاع بابا ايكسبراس و ما فاقش بيا :yaw:
وخرجت بيها فى لوتوروت حذانا و رقدت الطوموبيل ما حبتش تنوض :crying:
آيا جبت معايا صحابى قاعدين ندزو فيها فى الطلعة و يخرج بابا للطريق :scared:
تعرفى متت قبل ما يوصل عندى ، مالا كى وصل عندى طلع فى الطوموبيل و
طلعنى معاه ، آيا وصلنا للدار و استر يا ستار من بابا الغدار :angry:
تعرفى حكمنى هز و اردخ هز و اردخ هز واردخ و الدم يجرى من كل بلاصة و
من بعد جبد السبتة يا شوشو واش نحكيلك ، و الله عذاب القبر يظهرلى و ماشى
كى العذاب لى خديتو من عند بابا بلا ما نحكيلك على الكفوف التى لا تعد و لا
تحصى :shiny: ، و هكذاك قعدت نسرق فيها و ندور بيها فى الكرطى تم حذانا ، رانى
قتلك كنت جرثومة كبير :shiny:.
و تانى كانو عندنا دجاجات فى الجردينة تاعنا كنت نغطسهم فى سيترنا تاع الماء و
نشوف شكون الدجاجة لى تموت الأولى :lol:

​

2-قداش من كعبة سكر تحط في الكاس تاع القهوة ولالحليب؟
2 كعبات و نص فى الحليب
و 2 فى القهوة :shiny:

​

3-كي كنت صغير واشهوم الكوميكات لي تفضلهم اعطينا اسماءهم؟

كنت نتفرج الكابتن ماجد و كى يخلاص الكوميك نخرج ندير اللقطات تاعو
و نعيط و نقفز كيفو و ديما طايح على راسى فى الارض :shiny:
و تانى كنت نتفرج جنغر و كنت نتفرج النمر المقنع و الفهد الوردى :lolo:
و كانت نتفرج السامط هذاك تاع سامى هاي التجارب العلمية و الكبسولة نادين :shiny:

​

4-واش اسمها الماكلة لي تحب تاكلها ؟

و من غيرها حبيبة القلب الشخشوخة :luve_1:
و تانى نحب المرقة تاع الزيتون و الدولمة و نحب لحوايج لى يطيبو فى الكوشة :luve_2:

​

5-شاركتي في مسابقة تيليفيزيونية​

وربحتي رحلة الى برشلونة​

خير 3أعضاء شباب تديهم معاك؟؟

بيان سور انتى بلاصتك راها مضمونة :sheer:
و تانى ندى معايا موح برصا شريكى :re_gards:
و تانى ما ننساش ندى معايا خويا الصغير بدرو يهبل على البرصا :luve_2:

​

هيا احكم يدك بهاذو من مباعد نزيد نعاود​

نرجع

Ok اختى شوشو و الله أسئلة فور مع التقرميش تاع البيستاش روعة :luve_2:
مرسى عليك

​

تحياتي

و لكى منى اجمل تحية
و رانى نستنى فيك كشما تعاودى ترجعى :shiny:
​

​

ــــــــــــــــــــــــــــــــــــ
ــــــــــــــــــــــــــــــــــــ





​

 

[هآجر]

كنت نتفرج الكابتن ماجد و كى يخلاص الكوميك نخرج ندير اللقطات تاعو
و نعيط و نقفز كيفو و ديما طايح على راسى فى الارض
و تانى كنت نتفرج جنغر و كنت نتفرج النمر المقنع و الفهد الوردى
و كانت نتفرج السامط هذاك تاع سامى هاي التجارب العلمية و الكبسولة نادين

والله يا مات زمان ككونا صغار ونية
فكرتيني في نادين كنت نتفرجها على 12.30 ههههههههههههه

 

[sam_houssem]

بومبة عندي سؤال اخر
ايا تكون راكب في الbus مشايخ مع روحك
حتى تركب وحدة وش نقولك
الله يبارك زين وطاي
وتبدا تشارشي فيك
وهاي ضحكتلك هاي غمزتلك
ليسونسيال شرات باهيين تاع ارواح احكي معايا
انت يعجبك الحال وتنوض من بلاصتك تجري باه تحكي معاها
وغير تلحق تحكي معاها الكلمة الاولى
تركبلك عيطة من المقطوعين
كي التزغريتة تاع بيونة
ايا وش راح تدير في هذيك الحالة
**
سؤال وحد اخر
تكون عندك حنونتك ولا خطيبتك ولا مرتك
خير لي تعجبك
وتشريلك كاش عفسة زعمة كادو
سروال تريكو كسكيطة
المهم حاجة سامطة خلاص وتقولك نحبك غدوة كي تجيني لابسها
وهي الحاجة هذي ماش مليحة خلاص
ولي يشوفك بيها يضحك
وش تدير تلبسها وتشبع تبهدايل وضحك ولا تلبس حاجة اخرى وتشبع تبهدايل من عند مولات الكادو
هيا من بعد نرجعلك​

 

[BARCA232]

السلام عليكم ورحمة الله تعالى وبركاته
يعني أحسنت الأختيار اختي راجية الجنة
وكيف لا وهو صديقي وأكثر من أخي أسامة
والله الانسان في الدنيا مجرد لحظات لاغير
يكتشف فيها الجميل والسيء
ومن بين ماأكتشفت في عالم النت والله أخ اعتبره جوهرة نادرة
وهو أسامة البرشلوني
حيث بعدما تواصلنا حديث وآراء في المنتدى
آن في يوما ما موعد الحديث عبر الهاتف
والله شرفني بالحديث الطيب والجميل معه
حيث سبحان الله مثلما كنت اتوقعه حديثا تقريبا مثل المنتدى
لاتغيير يوج
ومن ثم والله أصبحت لاأفارقه يوما الا وتحدثنا وفي يوم ما راح الرقم الشخصي لأسامة العلم لله كيف
وبدأت في حيرة خاصة انه أنقطع عن الللمة
وعليه حرت كيف الاستفسار عنه
حتى جاء اليوم الميمون ورأيته
هو بلحمه وشحمه
فلا أحب أن أطيل الكلام
أحبك أخي
ولي سؤال واحد فقط ماهو شعورك وأنت منتمي الى برشلونة؟
وآخر امينة أتمنى أن أراك في القريب العاجل؟؟
شكمرا لك أسامة
وشكرا للأخت التي اعطتنا مساحة للتعبير عن حبي لأخي وصديقي
أســـــــــــــــــــــامة
تحيا البرصااااااااااااااااااااااا
​

 

[Jagwar]

وديما كي العادة والعوايد ندخلو على جال العزاز

الله يعزك خويا حسام حبيب القلب و رفيق الدرب

بومبة جبتلك سؤال شوي باهي ومحيرني
قولي كون تعطيها للبحر
ايا تدخل تعوم وتجي خارج تلقاهم سرقولك قشك
وما تلقاش وش تلبس باه تستر روحك
وتلقى قدامك غير جبة وسيرفات تاع بنات
هيا قولي ويناها لي تسرقها باه تستر روحك

تصدق و تأمن بالله يا حسام غير صراتلنا ديجا من قبل عندها يجى 3 سنين
و حد المرة رحت انا و 3 صحابى لوحد لبلاصة فى لى روشى عندنا فى عنابة
اسمها Vivé ، آيا دخلو صحابى كل زعما يغرقو فيا :shiny: باسكو انا لى نحكمو
راس آ راس يشرب حتان يتقرع :like_1: آيا قتلك دخلو كامل مورايا و نساو القش و
لى بورتابل و التاويل و حتى قرعة ماء ما خلاوهاش ، لمزية و لحسن الحظ
خويا لكبير هو لى طلعنا للبحر تفاهمنا معاه ديجا يرجعلنا فى العشية يرجعنا :shiny:

درك نرجعو للسؤال تاعك خويا حسام سؤال محرج بصراحة
تخيل ميسى بومب لابس جيبة كيف تاع اسكوتلاندا :shiny:
هي بصراحة لا هاذى و لا هاذى يعنى نفضل نرجع كيما أنا للدار أحسن
مش ممكن نلبس جيبة و نمشى بيها قدام الناس و زيد أنا رانى نعوم بشورط
ماشى بالمايو :lol: يسمى مش راح يكون فيها احراج كبير و يقولو عليا مهبول :shay:
يعطيك الصحة خويا سامى السؤال هذا اول مرة يطرح فى ثاريخ المنتديات :shiny:

​

ـــــــــــــــــــــــــــــــــــــــ
ـــــــــــــــــــــــــــــــــــــــ




​

 

[Jagwar]

بومبة عندي سؤال اخر
ايا تكون راكب في الbus مشايخ مع روحك
حتى تركب وحدة وش نقولك
الله يبارك زين وطاي
وتبدا تشارشي فيك
وهاي ضحكتلك هاي غمزتلك
ليسونسيال شرات باهيين تاع ارواح احكي معايا
انت يعجبك الحال وتنوض من بلاصتك تجري باه تحكي معاها
وغير تلحق تحكي معاها الكلمة الاولى
تركبلك عيطة من المقطوعين
كي التزغريتة تاع بيونة
ايا وش راح تدير في هذيك الحالة

ههههه حسام اليوم مصمم و حالف يحرجنا قدام الاهل :shiny:
و الله يا طيح فى يدى يا الحو و تشوف الاسئلة تاعى :lol:

بون نرجعو للسؤال العجيب تاعك:shiny:
و الله يا حسام خويا آخر حاجة نخمم فيها هي الشتلة لى راك تحكى عليها
يعنى وحدة تمشى بالشرات و لا خزرات حنان و لا تحب تحكى باي طريقة
بالعكس رانى كونتر الشتلة هاذى 200%
و انا اصلا ما نركبش البيس بزاف غير خطرة فى الفال و شوف ربى
الحمد لله عندى الكركوبة تاعى نروح و نجى بيها و ما يبسبسولى ما نبسبسلهم:shiny:

**
سؤال وحد اخر
تكون عندك حنونتك ولا خطيبتك ولا مرتك
خير لي تعجبك
وتشريلك كاش عفسة زعمة كادو
سروال تريكو كسكيطة
المهم حاجة سامطة خلاص وتقولك نحبك غدوة كي تجيني لابسها
وهي الحاجة هذي ماش مليحة خلاص
ولي يشوفك بيها يضحك
وش تدير تلبسها وتشبع تبهدايل وضحك ولا تلبس حاجة اخرى وتشبع تبهدايل من عند مولات الكادو
هيا من بعد نرجعلك

اييييه راك جيت لقناة الصراحة يا حسام
أنا رانى بومبة و نقمبل ديراكت فى الوجه :shiny:
يعنى مرتى تجيبلى كادو كيما راح تقول أنت سروال و تريكو و ما يعجبنيش :schmoll:
نقوللها مرسى بوكو على الجاست نخلفهال كى تموتى نجيبلك كفن :lol: و اسمحيلى
ما نقدرش نلبس الشيفونة هاذى لى جبتيهالى
و ما تزعفيش حبيبتى هاي قبلة على جبهتك :shiny:

​

ـــــــــــــــــــــــــــــــــــــــــ
ـــــــــــــــــــــــــــــــــــــــــ



​

 

[sam_houssem]

هههههههههههه
والله وحدك يا بومبة
نزيد نفركت كاش اسئلة محرجة
حالف اليوم تنسى الكولور الزرقة
تكتب غير بالاحمر
وغير ما تحلمش تحكمني
خوك مايتعرضش خلاص
المهم
سؤال جديد
ايا تعجبك وحدة فووووور
وعندها صحبتها طايحة فيك
وانت سييت مع هذيك لي تعجبك مي ماحبتش تديها فيك
وبقا غير حل واحد تحكي مع صحبتها لي طايحة فيك وتضمن بلي تديها فيك
ايا تجي رايح تحكي مع صحبتها وهي تفرح وتقول بومبة بادلني الشعور وتبدا تعبرلك عن شعورها
وش راح دير تسكتها وتقوللها شوفيلي صحبتك
ولا تهرب وتنسى لي عاجباتك​