خطبوها........بصاح ويييييييييين؟

[اعيش راضية]

السلام عليكم و رحمة الله و بركاته
كيراكم مع البرد و الشتا و الثلوجi-o:
ان شاء الله راكم ملاح:shiny:
ندخل في الموضوع
هدي يومين كنت في تموشنت و جاية في الكار
المهم كي العادة انا وخالتي راقدين ما جايبين خبر للدنيا:shay: مي اسمعنا شوية فوضى قلنا نوضوا بالاك كاش ما كاين
بدينا نشوفوا في واحد لا scene وحد العجوزة كبيرة مع ولدها و بجنبهم طفلة صغيرة شابة
بدات العجوزة تشوف فيها هي و ولدها قتلوها بالتبرGيg
العجوزة و باعلى صوتها:عجبتيني يا بنتي و ولدي هبل عليك
الولد:واه يما شاابة بزاف
الطفلة ميتة بالحشمة
العجوزة :تتزوجي بولدي بوليسي و شباب ما خصاه والو
الولد:تتزوجني باينة باغي تراطي هاد لوكازيون
الطفلة خلااااااااااص حمرة ما نجمتش
العجوزة:لوكان تقولي واه دوركا ندوك لدارنا
و تنفجر هديك البنت و تنوض:علاه انا سايبة تهدروا فيا و طلعوا في اصواتكم و تحشموا فيا قدام الناس
انا بنت عندي دار و مالين ماشي بهادي الطريقة تنبشوا فيا
و ينوضوا وحد الرجال:واه واه مسكينة تبهدلوا فيها الا عينكم في الخير شاورها بالسياسة و فهموها
العجوزة: يا خي بنات دوركا تحبلهم الخير يقلبوه شر
ّ
ّ
ّ
دوركا قولولي رايكم
البنات سؤال ليكم
هل انت موافقة انو يتعرفوا عليك بهذه الطريقة و قدام الناس كاملين؟
و لو تعرضتي لهذا الموقف واش يكون رد فعلك؟
و ليكم يا الرجال
تقدر تعمل كيما دار هذا الراجل و يماه؟؟؟

انا عن نفسي ما نحبش هذي الطريقة و الحمد لله ما كنتش في بلاصتها لوكان قتلتها ههههه
و في الاخير
سلااااااااااااااام​

 

[إنسانة ما]

وعليكم السلام ورحمة الله
أضحك الله سنكِ أختي .. هاذي أغرب خطبة سمعت بيها ..
كان من المفروض تجيها بلعقل بينها وبينها وتقولها يا بنتي عجبتيني وحبيت نقدم نخطبك وش رايك؟؟
بصح واحد شاف وحدة ما يعرف أصلها ولا فصلها ولا هي متزوجة ولا لا، يروح طول يقولها حاب نتزوجك!!! ولا آتيراهم الزين برك .. تحيري كيفاه يخممو
مازال نسمعو أكثر ..

​

 

[أم نعمة]

السلام عليكم تعرفي هادو كانو يجيبو بيها لوقت خاترش كون عينهم تسقسيها يماه غيبشوية وين تسكن وصايي بصح كاين شي ناس الله يستر ما يخافوش من ربي الله يهدينا

 

[كمايا]

وعليكم السلام ورحمة الله تعالى وبركاته


يا ختي واش هذا شافوها سايبة

والله ماتسوا الطريقة هذي وزيد هوا يزيد يهدر

ربي يهديهم شي من عباد

هذي الطريقة مرفوضة من الجدور

مشكورة اختي على الطرح

 

[***سوسن الجزائرية]

ماشي خدمة هادي قاع تبهدل فيها قدام الناس املا باينين هديك لافاميل مايحشموش.
ومكانش طفلة تقبل هد الظاهرة.
واخيرا...الموضوع ديالك باهي بزاف يعطيك الصحة.
​

 

[sahiko hamza]

ما فيها والو
غالطيـــــــــــــــــــــــــــــــــــــــن
عندها الحق كي ناضت فيهم ...
​

 

[اسماء16]

ولله صراحة ختي هدي مراهيش كامل طريقة تخطب فيها العجوز عيب كبير هدي
انا عن نفسي نحسها تمسخيرة قدام الناس او ازتهزاء ببنات ناس
ربي يهدي العجاير الي كيما هدو عندبالهم لبنات سابو

​

 

[hollahop girl]

mlih ki nadet fihom
3lah mateb3ouhach l darhom w khatbouha meltem w la habo ybahdloha 7ram 3lihom
hadi ga3 mchi 3a9liya

 

[AWDIESL]

هههه أنا هادي مانسميهاش خطبة ....
تبانلي الواحدة لي تعرف الأصول و التقاليد تاعنا ماديرش هكدا ....ياخي الطفلة ماشي سلعة راهي تشري فيها
باين على العجوزة و ولدها كاش عصابة خخخخخ
+
حتى ادا كانت حابة تخطب ماشي بهاد الطريقة
و بهاد الجاست راهي بينت المعدن تاعها هي ووليدها
وفي عوض ماتكسب الطفلة ضيعتها بجاست ....انا راني حايرة كيفاش عجوزة حابة تخطب دير هكدا ..!!!!!!!

شكرا
​

 

[همة نحو القمة]

ّ[/font]
ّ
ّ
دوركا قولولي رايكم
البنات سؤال ليكم
هل انت موافقة انو يتعرفوا عليك بهذه الطريقة و قدام الناس كاملين؟
و لو تعرضتي لهذا الموقف واش يكون رد فعلك؟
و ليكم يا الرجال
تقدر تعمل كيما دار هذا الراجل و يماه؟؟؟

انا عن نفسي ما نحبش هذي الطريقة و الحمد لله ما كنتش في بلاصتها لوكان قتلتها ههههه
و في الاخير
سلااااااااااااااام[/center]

س1/ اكــــــــيــــــــد لا مسكينة البنت التبهديلة اللي داتها كبيرة بزاااااااااف بصح نستعرف بيها

انا ديفوندات على روحها مش هكدا وصلت بيهم الجراة انو يعملولها هكدا وزعمى الراجل بوليسي

س2/ خـــــــاطيني

ايه والله تستاهل ماي اللاغالب هادو ناس جاهلين وش تحبي

 

[تاج الجزائر]

وعليكم السلام ورحمة الله وبركاته

رانا الحمد لله مع البرد والشتا رانا مدفيين رواحنا مليح واللاgريب دايرة حالة فينا :sad:

موضوعك قتلني بالضحك هاكا الخطوبة ولا خليني :shiny:

لوكان يديرها واحد معايا في الكار نقيس روحي من التاقة ولا ندخل راسي في لرض كي نعامة بالحشمة :cursing:

تبهديلة طريقة كيما هاكا وقدام الناس هادوا ناس بلاعقل كيفه كي يماه لو كان صابو تكونوا نتوما شهود والسائق هو القاضي ويكملوا تم تم :glare:

مشكورة ختي على الموضوع ومزية لي ما دارولكش نتي وبغاتك لولدها الزاوج اذا عندها :shiny:
​

 

[ماكانش]

أهلا بيك ختي
الزواج مكاتيب ههههه
مانعرف وين الراجل يلقى مرتو في سوق في مدرة في سبيطار في منتدى مانعرف هههه
مي الطريقة ألي لازم تكون باهية ومنظمة
كان قادر يتبعها ولا تروحلها غير الوالدة تاعو وتشوف بلاك راهي مخطوبة ...
يعطيك الصحة​

 

[كاترين]

ّ
دوركا قولولي رايكم << bien sùùr'
البنات سؤال ليكم << تفضلي حنونة U_U
هل انت موافقة انو يتعرفوا عليك بهذه الطريقة و قدام الناس كاملين؟ لا طبعا ماشي موافقة انا اللي يحبني كاين دارنا و كاين والديا بسلامتهم ربي يخليهم..
و لو تعرضتي لهذا الموقف واش يكون رد فعلك؟ هههه يا نطير في وجه هاد العجوز يا نحكم روحي و نروح .. على حساب المورال.
و ليكم يا الرجال

انا عن نفسي ما نحبش هذي الطريقة و الحمد لله ما كنتش في بلاصتها لوكان قتلتها ههههه <<ههههههه رانا كيف كيف ختيتو
و في الاخير
سلااااااااااااااام

 

[homework]

مشكورة اختي على الموضوع
من طرائف الخطبة العجب والعجائب هذي تخطبت في الكارو وحدة في الطبيب وحد تحكيلي قالتلي عجوزتها راحت دير عملية في وحد العيادة خاصة كي كانت دير في الفحوصات عجبتها وحد الفرملية قالتلها قبل ماتدخل العملية اذا درت العملية و شفاني ربي نديك للوليدي و طبعا صار المكتوب وداتها لولدها
اما راي في طريقة الخطبة عادية لكن يتطلب السترة يعني تحكي معها بصوت خافة و يتناقشوا و اذا حدث تفاهم يقصدوا البيوت من أبوابها ماشي دور عليها الغاشي كامل راهم يتورنيوا في فيلم
هل انت موافقة انو يتعرفوا عليك بهذه الطريقة و قدام الناس كاملين؟ طريقة التعارف عادية لكن ماشي قدام أمة محمد كامل
و لو تعرضتي لهذا الموقف واش يكون رد فعلك؟ عادي نجاوب بضرفة اذا كانت الصفقة محرزة واذا كانت غير محرزة كلشي بالمكتوب

 

[souhila_95]

هل انت موافقة انو يتعرفوا عليك بهذه الطريقة و قدام الناس كاملين؟
والو بالتأكيد ..علاش معنديش ماليا يهدرو معاهم كلش بالشرع والتقاليد المتعارف عليها شفتني هذي المخلوقة لي هدرتي عليها
و لو تعرضتي لهذا الموقف واش يكون رد فعلك؟
هذيك الطفلة رهي ماتفشتش فيها مليح ..لوكان أنا تشوفي واش نمسخها (تروح هي وبنها في 60 داهية كيما يقولو المصاروة وطريق السد لي تدي ماترد لوحي 7 حجرات وراك كيما يقولو الجزائريين هههههه) مانيش قابلة ولوكان فيكم ذرة حياء ودين ماتهدروش قدام الناس ومايشرفنيش نزوج ابنك

 

[اعيش راضية]

مشكورين احبابي على ردودكم المنيرة و الطيبة كلكم زدتوا الموضوع رونق و جمال
و سامحوني ما عطيتش لكل رد حقه و اسفة
لكن كل ردودكم في القمة و كيما قلتوا في هاد الدنيا مادامك عايش مادامك تشوف
الله يجيب الخير و يهدينا اجمعين​

 

[bachboucha]

هكدا ولات الخطبة ف 2012 ؟؟؟؟ يا لطيف هكدا فضحة ماش خطبة ربي يهدي ما خلق عيش تشوف مباشر من مركز الاحداث​

 

[خوليتا]

أوووووه سبحان الله باينين هاذي لعجوزة و بنها جاهلين على هاذي مايعرفوش سياسة الحواار

 

[اعيش راضية]

ايه يا البنات هذي اخر صيحات 2012
ربي يهدينا و يهدي الناس اجمعين
العباد و لينا نتصرفوا تصرفات حتى العقل البشري ما يفهمهمش
مشكورين على المرور الطيب حبيباتي​

 

[amoulita@mosta]

سبحان الله ولا حولة ولا قوة الا بالله
هادي خطبة آخر زمن
عن نفسي انا مانقبلش هاد التبهديلة
الله يهدي ماخلق