عنوان آخر يحمل عبارة "البهلول المنغولي" ..

[Tama Aliche]

السلام عليكم ورحمة الله و بركاته

بعد الموضوع اللي كتبتو في قسم مجتمع اللمة العام الذي يحمل عنوان "الطفل أيوب يشبه صغيري الذي فقدته " ..
الرابط من هنا

الموضوع '"الطفل أيوب يشبه صغيري الذي فقدته .."'

2 جويلية 2025

السلام عليكم و رحمة الله ​

​

"الطفل أيوب يشبه صغيري الذي فقدته .."​

كان في يوم من الأيام الجميلة ، أن صادفت روحا كالملاك ، ولأنني أعشق أمثاله لا يمكن أن لا يلفت انتباهي طفل مثله ، لكن هذا الطفل كان مميزا لدرجة أن كلا منا تعلق بالآخر تعلقا جميلا في تلك اللحظات التي لن تنسى أبدا بالنسبة لي ، فهي أجمل الذكريات و أطيب الأرواح التي لا تزال خالدة ..

من تكون يا طفلي الصغير ..؟ لدرجة أنك جعلتني أفتقدك كل يوم ، و أتأمل من يشبهك لربما يكون مواساة لي ، كيف كان جالسا بحضن والدته...​

• Tama Aliche
• المشاركات: 16
• المنتدى: مجتمع اللمة العام

• 
• 

باش اللي ما زال ما طلش على الموضوع يطل عليه ، خاطرش راها قصة صراتلي مع فئة مميزة من المجتمع و كملتها هنا باش نحكي على
(الناس اللي تحاول ترجع كل حاجة نقية ضحك و نعتبر هذا الشي تنمر..)


نحكيو على هذاك الطفل اللي يسموه "منغولي" ،



وهذا مصطلح قديم و مش مقبول للي راهم يعانوا من "متلازمة داون" .. وكي ما نعرفوا هذو اللي اجتمع فيهم كامل الجمال الروحي تقدر تعرفهم من خلال ملامح وجههم فمثلا :

•تلقى عينيهم مائلة و اللي تشبه لملامح الأشخاص المنغوليين ، بصح هذا المصطلح معندوش علاقة علاقة ب "منغوليا" ولا العرق المنغولي باش شي عباد ولا نقول هوايش مسطح راسهم يفهموا مليح .. يخلونا البراءة تعيش كيما خلقها ربي ، بعيدة على الخماج تاعهم ، و يستعملوا المصطلح المناسب للحالة هذي "متلازمة داون" ..

نوصفوهم



هذو الأطفال اللي عندهم متلازمة داون تقدر تلقى فيهم :

•اللي عينيه مايلة لفوق .
•راس صغير و رقبة قصيرة .
•لسان كبير وخارج لبرى .
•يديهم قصيرة ( يعجبوني كيوت ) .
•النمو تاعهم متأخر وصعيب باش تعلمهم .
..
​

البهول المنغولي ​

مجتمع تاعنا كي يحب يوصف واحد جايح ولا حابس من راسو يقولو "يااااا وحد المنغولي " ، هذي قلنا معلييييش يا سيدي ، نرفع راية تسلل واضح يا بوووووونجاااااااح ( راه ديما يلعب على التسلل ، ويزيد يطلع حواجبو و يضارب هههه ايا فكرتكم شوية فالبالون ، بيناتنا برك 1 2 3 فيفا لالجيري )

نكملوا .. خلاص نكت ، خلاص ضحك ، ديجا راني زعفانة موضوع يستحق قوة زعاف كبيرة

الاستغلال




مع الأسف واش راني نشوف ، و قدام عينيا شفتها كاين واحد من متلازمة داون ، كيفاش يتمسخرو بيه و يخلوه ينطق برك ، يا ريت كون جاو يعرفو لقيمة هذاك الطفل اللي مهما كبر يبقى طفل في عقلو و قلبو ، تلقاهم يضحكو عليه بالقهقهات كي يهدر و يبانلهم بلي هذا واش يليق بيه ، هذا واش شفت قدامي ، بصح ما كنتش نتخيل أنه يجي نهار البعض بل بزاف من الناس يصوروا هذو الأطفال كيفاش يهدروا و يعلموهم مصطلحات خامجة ، و باش يربحوا شوية مشاهدات ولا معلابليش واش يقصدوا من أفعالهم ..


اللي يحيرني كنت نقول بلي هذه الفئة مالقاتش حماية من طرف الدولة ، لكن وصل الأمر بالأهل اللي عندهم أطفال من هذه الفئة يديرولهم مقاطع يصوروها و بزاااف مهينة و توجع القلب ، باش تلحق تصور طفل هكذاك بالبراءة هذيك كامل اللي عطاهالو ربي و تخليه يشطح قدام الكاميرا ، هنا سأجلس قليلا كي لا أغضب..

و

اللي تغيضني بزاااف و نقلق منها أنهم وصلوا يجيبو طفلة و طفل من متلازمة داون على أساس زوج و زوجة و يقعدوا يديرو بيهم محتوى هااابط بزاااف ، يعلموه هو كيفاش يدابزها و يضارب معاها و هي تزعف و من بعد يجي يراضيها قدام الكاميرا سيداتي سادتي ( وباش ونقولكم بلي الطفلة هنا تكون واعرة أكثر من الطفل علابلك تقدر تضربو ترقدو نورمال ، ومن هنا نوجه تحية كبيييرة للبناااات نقولهم تعلموا منهم .. )



يا ناااس ، النفس اللي كانت في هذاك الطفل البريء ربي يرحمه ، اللي لعبت معاه و لعب معايا و حبينا بعض ، عرفت كيفاش نعيش معاه اللحظة ، خليتو يدير كلش ، يضربني و يديلي التلفون تاعي ، كان يحاول يهدر معاي مليح بصح هذاك واش يعرف يهدر ، من غير اسمو و شوية كلمات قدر يتعلمهم فالمركز .. عطيتو قلبي حبيتو صح ومزال عايش في فيا لداخل


نقولها لينا كااامل





ما زال ما قدرناش نعرفوا بلي عندهم مواهب بزاف تقدر تتطور بالاهتمام و التقدير ، كي نعطوهم أهمية كيما أي طفل و إنسان ، لكن حنا ما نقدروش نحققوا هذا الشي لأنه بطبعنا "أشخاص متنمرون".


إلى هنا نقولك يا صاحبة القلب الكبير ، يا أيتها الأم ، يا أيها الأب لهذه البراءة ، إذا كان هذا ابنك ، ولا بنتك ، إذا كان هذا خوك ولا اختك ، إذا كان هذا ولد حومتك ولا بنت حومتك ، إذا كان لقيتهم صدفة ولا تعرف واحد منهم

نقولكم كامل من هذا المنبر :


الجمال اللي في أرواحهم خلوه يغمر هذا العالم ، حبوهم ، يحتاجوا رعاية و وقفة ، إذا كانت عقولهم أصغر من أعمارهم فنذكركم بلي يبقى عندهم قلب كما حنا ..

إضافة للآباء

اللي رزقهم ربي بطفل و لا طفلة من متلازمة داون ، و لا للناس اللي شي نهار تزوجوا و رزقهم ربي بذرية هكذا نقولك "لا تحزن ..راهم ملايكة" ،
وما تقولش بلي ربي رزقك بطفل ناقص عقل ، و تزيد تسميه للناس وتقولهم بلي عندك

"طفل منغول"

.. راهم الجنة اللي ما شفناهاش ، راهم ريحة النقاء و الصفاء ، خاطرش كاين بزاف آباء يشوفوهم أنهم تعب و حاجة ثقيييلة على حياتهم ، لكن كي تشوف للوقت تاعنا تلقا طفل ولا طفلة بعقل كامل صعاب للتربية و كي يكبرو يخرج منهم الأسوأ ..

إذا من هنا نقولكم هذا هو "الولد الصالح"اللي تقدر تخليه موراك إن شاء الله

حافظوا عليهم راهم أمانة بين يدينا كامل ..




كانت معاكم "Tama Aliche"

( الصحافية الساخرة )







​

 

[إلياس]

موضوعك ممتاز لكن طويل دمت مبدعة في سماء المنتدى دمت قلما مميزا

 

[ام أمينة]

أطفال متلازمة داون ماشي مجرد حالات نمُر عليها مرور الكرام نقدرو نسموهم متلازمة الحب لأنها أرواح فيها نور يحتاجون منا بيئة تشجعهم و تعليم يراعيهم و كلمة طيبة تبني فيهم الثقة
المعلم اللي يفهمهم يغير حياتهم و المجتمع اللي يحتضنهم يعلم البشرية معنى الإنسانية الحقيقية

مشكورة على هذا الموضوع المميز و المليئ بالأحاسيس

 

[أم إسراء]

و يبقى أطفال هذه الفئة محببين جدا إلى قلبي.
مجتمعنا مجتمع ناقصو الوعي و التربية و الأخلاق، كما قلتي سواء عائلات الأطفال او الأشخاص من متلازمة داون، أو المجتمع ككل، لهذا يجب الوقوف على حالهم و حمايتهم من تجار المشاهدات. و كل من يفسد طباعهم و يعلمهم السوء سواء قولا او فعلا.
يعطيك الصحة اختي على كلماتك و اهتمامك بهذه الفئة في كتاباتك

 

[أبو عاتكة]

هذه الفئة لها تركيز عاطفي كبير عكسنا تماما وعكس الهوايش اللي معتكفين ليل نهار في الشوارع بدون نفع

تخيلي من يومين دخل احد الاقارب المستشفى باصابة مميتة لكنه نجى والحمد لله ولما كنت نمشي في الحي كنت التقي بالناس واحد يسقسي واحد معلابالوش بيك واحد يتكبر عليك المهم ثم التقيت بصدام وهو من هذه الفئة الطيبة وكان الوحيد اللي استفسر عن حال ابن عمي وقالي واشراه ريح ولا مازال وهو صغير وفي وسط كائنات كبيرة مجتمعة الا ان نقاء تفكيره وكيما قلت تركيزهم العاطفي الكبير جعله يتذكر الحدث وبادر في الواجب قبل الجميع جعلني بعد ان مضيت في سبيلي اقول سبحان الله ما اطيبه.

هذا صدام يعاني يوميا من التنمر والتقلاق والازعاج ديما يقلقوه ويحاولو يخرجوه من الهدوء في المقابل هم يستمتعو ويضحكوا وهو يصرخ و يغضب وانا علابالي بيهم حابين يسمعوا منو كلام النابي و البذيء لانو مثل صدام ميقولوش الكلام السيء لكن هوايشنا وحتى وهم كبار سن وشيوخة حابينو يقولها

بالمناسبة هم للاسف مناعتهم ضعيفة ويتعرضون لاجهاد كبير في الشارع شفت واحد ديما يقوم بمرافقة صدام الى المسجد لكن في الظهر والعصر في حرارة وشمس قاسية نشوف فيه مسكين النفس رايحة وهو دهشان وتاركو وراه بعشرين متر اثناء العودة حكمتو خطرة قلتلو حرام عليك راه ضعيف مسكين اديه فقط في المغرب او العشاء بدا السيد يفتيلي وقالي ندير في الخير قلتلو لالا انت راك تفوت في وقتلك وباه ينحلك ضيقة الروح في الطريق.

المهم تبقى معاناة هؤلاء مع عينات من شعبنا العظيم متواصلة.