ثقافة لي كادو عندنا الجزايريين ....

[ماكانش]

السلام عليكم ورحمة الله وبركاته
واش راكم خاوتي لاباس بخير الحمد لله
اليوم نحكيو على ثقافة ليكادو عندنا الجزايريين ...
أيا الصباح رحت للبلدية حبيت نخرج نقامي جدد 2012 حبيت
نعاود لاكارت ناسيونال غسلوهالي بالما هههه
أيا وصلت لقيت الغاشي رحت لوحدة نعرفها لثم، ماتخدمش النقامي خلاص تخدم لي فيش فاميليال بصح قلت نحشموها كي العادة ...
أيا رحتلها وكي شافتني تبسمتلها التبسيمة الصفرة تاع أي باينة على واه راني مقابلك هنا ههههه
نطقت واش حبيت النقامي ؟؟؟ والناس تسمع بهدلت بيا هههههه
قلتلها هيه ، قاتلي دقيقة نكمل واحد الخدمة برك ونروح، قلتلها ماعليهش
في عقلك
أيا وأنا قاعد هكذاك سمعتها تحكي مع صاحبتها قالتلها وينو الستيلو تاعي ؟؟؟
قالتلها صحبتها راهو عند فوزية هزاتو قبيل ؟؟؟
قالتلها لالا يا لخرى لالا هذاك راهو كادو غير جيبيهولي
قالتلها ماعليهش تكمل بيه برك، ونجيبهولك
نطقت لالا لالا راهو كادو واش بيك هذا
وناضت راح تجيبو، انا بقيت نستنى في الكادو هذا، أيا كي جاباتو شفتو خلعت ؟؟؟
هذا هوا الكادو ألي درتي عليه حالة وعزيز ووو
والله ياخاوتي هذوك الستيلوات تاع ألفين فرنك ألي فيهم البوطو هذاك من فوق يتحل ويتقفل، وكي تلعب بيه بزاف يفسد ههههه
ولونو صفر ومقشر شوي، ولا فيه بانتورة مانعرف هههههه
وباين ماتشراش مع حاجة ساعة ولا ، ماكانش ساعة صفرا باللون تاع الستيلو هذاك ههههه
اها هذا مايتسماش كادون ياختي هذا ستيلو برك ههههه
قريب سقسيتها نقلها هذا هوا الكادو ألي تحكي عله ولا عطاوك أديباني برك بيه حتى يجيبولك الكادو تاعك هههه
وعييت نتخيل هذي ولا هذا وجه البخص ألي جابلها ستيلو صفر وقاللها كادو ؟؟؟ ههههههه
الله غالب حنا الجزايريين ماعندناش ثقافة تاع لي كادو، ومانفهموش لليكادو ومانعرفوش نديرو لي كادو
عندنا 4 كادوات يدورو في لعراس تاعنا ويتعاودو في حياتنا كامل
لعراس تاعنا أي باين زوج كادوات يدورو برك
إما ساعة تاع حيط، وإما سارفيس كيسان تاع فناجل ولا حليب ههههه
عييت نفهم مايحبوش يكسرو ريسانهم يخممو، ولا رخاس هذ لحوايج
هههههه
في عرس كامل قادر تلقى 12 نكادو سوايع تاع حيط ، والباقي دي سارفيس هههههه
ولا واحد يحب يدير كادو لواحد إما يجيبلو قرعة ريحة، ولا يجيبلو ساعة تاع يد برك ههههه
وساعات يبدلو يجيبو باطة فيها ستيلو وساعة ، المهم الساعة فيها فيها هههههه
ولا كي يزيد مزيود جديد، كامل يديو كادو زاورة حمرة فيها كوميك
ههههههه
انا عييت نفهم ، واقيلا مايحبوش يكسرو ريسانهم خلاص
قالك ازوج فلان جيبلو ساعة وفوت ههه ...​

ونتوما واش رايكم في لحكاية والثقافة هذي ...​

ملاحظة:​

ماتقولوليش يهم الجاست برك، مايهمش الكادو ههههه
هذي كي يكون كادو صح، بصح الساعة والستيلو ماشي كادوات عندي هههه
ثانيا:
تهنيت من لي كادو
السلافي نديرلو كادو مصحف وقرعة مسك وراني تهنيت هههههههه

​

الموضوع حصري فقط على منتدى واش راك تهدر
اللمة الجزائرية​

الكاتب :
مـاكـانــش​

 

[حالمة بالجنة]

السلاآآم عليكم
والله عقلية ليكادو كااينة بزااف
أنا جاتني بطاقة معايدة من الجزيرة للأطفال نذكر هههههه لما كنت صغيرة
خواتي هاد ليام لقيتهم ملونين فيها والله غاضتني..تبانلي هاد العقلية تمشي في الدم =)
و صح ديما تجيك قرعة ريحة ولا كثرت زعما ساعة
انا في البيام ما نكدبش لحد الآن بقاولي الروايح
اللي يجي يجيب ريحة =)
تقتلك لما يجيبولك صابون ههههه ولا شامبوان هههه
و في العراآآس ونذكر خاصة في تع خوالي لما نتجمعوا ونحلوا لي كادو
والله تلقى 5 ولا 6 كيف كيف ههههه خاصة السوايع
وزيد تلقى نفس اللون ههههه
أنا خاصة نحب نهدي كتب
يمكن واحد ما تعجبوش لكن فيهاآ فايدة
والمصحف أفضل هدية..الحسنات اللي تجنيها من هذه الهدية لا تنقطع حتى بعد مماتك
وشووكرن لك على الموضوع الباهي
=)
​

 

[زئبق]

الكيسان تاع عشرةالاف نسيتهم اساعة وين تبان راهي كادو وعليه الكلام لوكان غير بالفرحة معليش ايجيبو لكادو ويندمو وخصوصا لمعجبهمش العرس يبداو يقولو خصارة لكادو برك
​

 

[mira.21]

وعليكم السلام
اولا كلشي مبروك الاشراف والله درك وين شفتها
مالافار تاع ستيلو هدي اي باينا لمرا مشتاقه برك ما كادو ما والو كاش واحد يدير كادو ستيلو صفر ههههههه
وكيما قلتي لحوايج هدو راهم دخلو فديكسيونير تاعنا يعني كادو يا ساعة يا ريحة وفالعرس سارفيس وفالزيادة زاورة ههههه
بويسك هدو هوما ليكادو لي كاينين و+ رخاس هههه
يعطيك الصحة سفيان

 

[secret de coeur]

وعليكم السلام
اهلاا مشرفنا
ممم هي صح عقلية لي كادو خاطية في لالجيري
راهم لا علاقة باللباقة ههه
مي الساعة تجيني حاجة مليحة ( ساعة تاع اليد)
اما تاع الحيط هاديك الي تسوى 400 دج دراهما خير منها خخخ
معليش مهم يتفكروك ..ها تا حنا تاني مش ساهلين كون يجي هكاك
نقولو جاي يديه فارغين ... ياخي ليزالجيريان عقلية سبيسالi-o:

مرسي ع الموضوع
​

 

[آمِيْرَتُه]

السلام عليك

هههه فكرتني بوحد الستيلوا عطاهلي واحد يقرا معايا مازلني محتفظة بيه من 5 سنوات كون تشوفه تبكي عليه رايح قاع فيها
هذي هيا لعقلية سيرتو نتاع الشيرات
​

 

[السلطانة]

وعليكم السلام
موضوع منيح كتير :shiny:
يعطيك الصحة سفيان

وي والله كلام في محلو
راك نسيتي كوم كادو
الvاز تاع النوار
ولا زوج قلوب حمر لاصقين في بعضاهم ههههه
والالبوم تاع لي فوطو كي يدي واحد السيزيام يجيبوهولو
نسيتي هادوك الدباديب لي يجيبهوم نهار البوناني هههه
والكيسان لي مغروسة فيهم شمعة دارو بيهم حالة وحد الوقت
ولا لي كادر هههههه

او ليزالجيران ولي كادو تاعهم البيزار
عجب تاع لعجب
تقبل مروري
:crying::crying:​

 

[النورس]

ولا كي يزيد مزيود جديد، كامل يديو كادو زاورة حمرة فيها كوميك

:lol:
​

 

[أم راضية ~_]

وعليكم السلام
هههههههههه موضوعك يهبل هههههههه
ايييه ليكادو بالنسبة ليا لغز انا ما نقدرش ندير كادو حتى نعرف مليح اللي رح نديهولو
لوكان نقولك في عيد ميلادي قالي بابا واش نشيرلك قتلو جيبلي زوج كيلو باذنجان :scared: :scared: !علاخاطر نحبو بزاااف
في راي المهم في الكادو يكون عملي و شباب وانا نحب اللي يجيبلي ساعة تاع اليد دايرة كولكسيون عندي واقيلا 7 سوايع :shiny:
ههههه تفكرت واحد لحكاية قالك واحد تزوج و دار عرس جابولو كامل سرفيس تاع الما
قالهم لوكان تفاهمتو ودرتولي سيتيرنة :shiny::shiny::shiny:

 

[أم راضية ~_]

نسييت التقييم

 

[ماكانش]

السلاآآم عليكم

والله عقلية ليكادو كااينة بزااف
أنا جاتني بطاقة معايدة من الجزيرة للأطفال نذكر هههههه لما كنت صغيرة
خواتي هاد ليام لقيتهم ملونين فيها والله غاضتني..تبانلي هاد العقلية تمشي في الدم =)
و صح ديما تجيك قرعة ريحة ولا كثرت زعما ساعة
انا في البيام ما نكدبش لحد الآن بقاولي الروايح
اللي يجي يجيب ريحة =)
تقتلك لما يجيبولك صابون ههههه ولا شامبوان هههه
و في العراآآس ونذكر خاصة في تع خوالي لما نتجمعوا ونحلوا لي كادو
والله تلقى 5 ولا 6 كيف كيف ههههه خاصة السوايع
وزيد تلقى نفس اللون ههههه
أنا خاصة نحب نهدي كتب
يمكن واحد ما تعجبوش لكن فيهاآ فايدة
والمصحف أفضل هدية..الحسنات اللي تجنيها من هذه الهدية لا تنقطع حتى بعد مماتك
وشووكرن لك على الموضوع الباهي
=)​

أهلا بيك حالمة بالجنة
هههههههههه
شتي كيفاش، مايكسروش ريسانهم جيب ساعة وهي فرات ههههههه
انا جامي جابولي كادو في حياتي كامل هههه
بصح كيما قلتي بنة لي كادو وحدها وخاصة الدايمين ألي مايخلصوش كي الريحة هههه
يعطيك الصحة ​

 

[سما 2011]

لي كادو حاجة لازمة .. ..سيتا دير ... ماشي باش نعبروا على مكانة والقدر تاع هذاك الشخص مي حاجة تاع مجاملات برك....
مرسي على الموضوع

 

[مارينا]

هههههههههههههههههه
والله الموضوع تاعك فور خويا سفيان
واش تحب تدير هذه هي السلعة ما كانش التجديد خلاص
جامي تلقاه خمم في حاجة اخرى تلقاه يا اما ليكادوا لي حكيت عليهم تقول هذا واش كاين في الحوانت
ولكان حشم زعما زعما يمد دريهمات وفرات
انا نهدر الحق وربي قبل ما واحد يجيب كادوا نقول غير ما تعييش روحك عندي ساعة
وعندي الروايح والسارفيس ما عندي واش ندير بيهههههههههه هات دراهم خير ليك لكان ما تعرفش تجيب حاجة اخرى مميزة انا ندبر راسي
بصح والله تبقى بلا راس صح يعني صح كاين غير هاد ليكادوا يشروهم ؟؟؟
يبقى السؤال مطروح
تقبل مروري اخ سفيان

 

[sali-sali]

حنا يطبقو المهم جاست
وتاني قالك الحجرة من عند الحبيب تفاحة
بصح كل واحد وكيفاه ماش الكل مايعرفش يشري كادو
ههههه منين هكدا نولي نشرط لي يجيبلي كادو انا نخير يا ذهب يا نكبرها ونقول لوطو
بصح انت ماقلتلناش انت كي تشري كادو واش تشري؟؟
​

 

[روائ]

مليح الموضوع
مزالو يومنو بحاجة اسمها ستيلو وساعة تاع حيط الحق فرشة:cra_zy:
هنا في بلادنا يحبو يمدو كادو غالي برستيج وفوخ وزوخ كي يكون عرس تاع طفلة يمدولها كادو ذهب ولا حاجة فوق 300:shiny::shiny::shiny:
اما الراجل من مليون وطلع:re_gards::re_gards: راهي غير زوخات فرات
انا جامي هدالي واحد ستيلو ديما قرعة ريحة منكذبش عليكم لا اكثر ولا اقلi-o:i-o:

 

[كبرياء دمعة]

ههههههه و الله صح موضوع بزاف شباب
انا منين نشفى لعمرى جبت السيزيام جابولى بيجامة زدت جبت البيام زادوا جابولى بيجامة و زدت جبت الباك كيف كيف بيجامات اشكال و الوان تغسلهم خطرة يحولوا رانى قريب نحل حانوت تاع البيجامات ههههه
صح و الله ما عندنا حتى ثقافة تاع لى كادوا و ضرك ولاوا مالين العرس كى ما يعجبهمش كاش كادوا يخبوه و يرجعوه فى عرس مالين هاداك الكادوا ما يبدلوش مامبا لغلاف هههه

ميييييرسى خويا يعطيك الصحة ايا انت اللول اللى نمدلوا تقييم​

 

[hiba14]

السلام عليكم
اواه هاديك الملاحظة نلعب روحي ما قريتهاش انا مع المهم كادو ما نكدبش عليك و الله و جي تشوف واحد البوات عندي ملمدة فيها اي حاجة نعتبرها كادو فيها حتى الكاغط تاع حبة الحلوى و الشيكولا نعتبرهم كادو و حتى لي ساشي اللي يجيبولي فيه الكادو عندي انا كادو
و نزيدك حاجة واحد العام كان عندنا موت في الدار وكان قريب نهار اللي زدت فيه كنت ناسية قاع صحبتي تفكرتني و جابتلي قرعة ديودورو تاع 150 دج اللي انا نقعد هكاك و مانشريهمش بصح زاد فيا النص و لدروك ديك القرعة راها عندي في 10 سنين نعجبك نعيش بين الاطلال
علابالي طولت عليك بصح بغيت نفهمك شاني فاهمة
في لامان

 

[روائ]

ههههههه و الله صح موضوع بزاف شباب​

انا منين نشفى لعمرى جبت السيزيام جابولى بيجامة زدت جبت البيام زادوا جابولى بيجامة و زدت جبت الباك كيف كيف بيجامات اشكال و الوان تغسلهم خطرة يحولوا رانى قريب نحل حانوت تاع البيجامات ههههه
صح و الله ما عندنا حتى ثقافة تاع لى كادوا و ضرك ولاوا مالين العرس كى ما يعجبهمش كاش كادوا يخبوه و يرجعوه فى عرس مالين هاداك الكادوا ما يبدلوش مامبا لغلاف هههه​

ميييييرسى خويا يعطيك الصحة ايا انت اللول اللى نمدلوا تقييم
هههههههههههه اختي عاودي بيهم السوق​

..........................

 

[ماكانش]

الكيسان تاع عشرةالاف نسيتهم اساعة وين تبان راهي كادو وعليه الكلام لوكان غير بالفرحة معليش ايجيبو لكادو ويندمو وخصوصا لمعجبهمش العرس يبداو يقولو خصارة لكادو برك​

أهلا بيك زئبق
ههههههههه
مليحة تاع خسارة الكادو برك هههههه
وزعما ماعلابالهمش بلي بزاف ألي خممو في الساعة كيفهم ؟؟؟
يعطيك الصحة
​

 

[ماكانش]

وعليكم السلام
اولا كلشي مبروك الاشراف والله درك وين شفتها
مالافار تاع ستيلو هدي اي باينا لمرا مشتاقه برك ما كادو ما والو كاش واحد يدير كادو ستيلو صفر ههههههه
وكيما قلتي لحوايج هدو راهم دخلو فديكسيونير تاعنا يعني كادو يا ساعة يا ريحة وفالعرس سارفيس وفالزيادة زاورة ههههه
بويسك هدو هوما ليكادو لي كاينين و+ رخاس هههه
يعطيك الصحة سفيان

أهلا بيك ميرا
هههههههههههه
صافي راكي معايا في العقلية هذي ؟؟؟ ههههه
وهذا واش كاين ورخاس هههههه
واقيلا شوي الزاورة غالية عليهم ههههههه

يعطيك الصحة ميرا

وربي بارك فيك​