اليوم و كيما العادة لما تحيرني بعض السلوكات الغريبة نحب نحكيها معاكم يا حبابي و نعرف رايكم فيها
اليوم و انا راجعة من الخدمة في العشية كانت السخانة نوعا ما و اليوم كان عندي بزاف شغل يعني خرجت عيانة قلت نزرب شوية باش نلحق للدار بكري و نريح قبل ما يبدا الشغل في الكوزينة (القدر المحتوم) هههههه
هاذو جماعة يمشيو من ورايا و يتكلمو مع بعضاهم
واحد قال راكو تشوفو كيفاش راهي البلاد مخلطة ؟؟؟ و زادو دخلو غير الكعَب رجعت الدزاير تقولشي قهوة موح !!!
نطق صاحبه قاله و الله غير صح اولاد البلاد ماراهمش يبانو وسط الجدد اللي دخلو و كان يقصد les nouveaux débarqués وما حبيتش نسمع الثالث واش كان يقول أنا حيرني كلامهم و خصوصا انه اللهجة ديالهم غريبة على المنطقة يعني اكيد ماشي اولادها
ومن باب الفضول حبيت نكتشفهم مي بلا ما نمرgها هههههه
نقصت شوية في لاvيتاس و خليتهم يسبقوني
و جيبها للضحك
كانو ثلاثة .... واحد لابس سروال و عامل فيه ثنية من التحت قد السْخَط و يسَحب في رجليه تسحاب .... و الثاني لابس جوكينغ الناس يرقدو بيها برك وهو خارج يدور بيها ... و الثالث لابس الكلاسيك و داير كاسكيطة و يعذب في الgارو في هاديك السخانة و لابس سحابة في رجليه حاشاكم و الله تحسب عنده سمانا ما رماش عليهم طاسة ماء
بقيت نتوحد في الخالق اللي خلق و فرق
ماشي ضحكت على لبستهم حاشى لله كل واحد يعيش قيسه بصح باش ينتقد الغاشي و هو ماشي غاشي هادي اللي توجع
قتلهم في قلبي روحو يا اولادي و الله رحٌْمو على اللي خلاكم شيدتو بناءات فوضوية على أرض البلدية
و رحٌْمو على القانون الجزائري اللي بعد 6 شهور مدلكم لاغيزيدونس و رجعتو انتوما القدامى و تشوفو فينا جدد على المنطقة اللي انزادو فيها جدادنا و اباءنا و احنا بعدهم
ماشي عيب اننا لظروف ما نرحلو من منطقة لمنطقة و هاذي بلادنا و من حقنا كاملين بصح ماشي غير نخرج نتقشر تم تم و نتسلخ من جلدي و نقول أنا باباها و لخرين حبو يتبناوها
واش رايكم يا ناس الطيبة في هاذ الشريحة من الناس ؟؟؟ و يادرا لوكان تتلاقاوهم كيفاش تتعاملو معاهم؟؟؟
آخر تعديل بواسطة المشرف:
