قولولي برك ، يصرا هدا الشي معاكم ولا انا برك ؟؟؟؟؟؟؟؟

[ب.سمية]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

المرة الجاية مين يعيطو ردي عليهم وقارعي لا طفل ولا طفلة لا طفل خشني صوتك و العبيها راجل انا دايمن تنفع معايا حتى نسمع طيط طيط طيييط

 

[خفيفة الروح]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم
و الله صح انا تسرالي و يقولولي راني غالط ومباعدا يعاودو يقولوا عبتنا لفوا
علابالكم نموت بالضحك و نكوبي
ههههههههههههههههههههههههه

 

[أم أُنٌَيسة]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

مام بنات كاين لي مقودين في ريوسهم يبهدلوووو تاني ههههه
كاينة لي تعط وتقولي انا خياطة ونتا عطيتلي نمروك !! مالغري لا علاقة انا بموضوع الخياطة نهائيا
وانا جارتك فلانة وووو شفتك مع فلان وفلانة وووووو يعني ...مش غي لولاد لي يدراقيو ف تلفون
مرسي شيما هههه موضوع في بلاصتو

علابالي اخي الكريم لهدا وجهت كلامي لكلا الجنسين ، مالقينا واش نقولوا
لا شكر على واجب ان شاء الله تعالى يارب
بارك الله فيك و جزاكي خيرا لمرورك العطر و كلامك الطيب الغالي
تحياتي احترامي و تقديري
:regards01::regards01::regards01:

​

مرحبا غاليتي
موضوع في الصميم يفش شوي الغل لي فينا ههه بيناتنا كنت نقرا ونضحك تشوفي لعجب تع الصح
للصراحة انا اكثر بني ادم في الكرة الارضية نكره نحكي في التلفون على هك كان تليفوني بلا شريحة تسمى نستعملو غير برامج لعب قراية هك ...
وبعد صبت خواتاتي يسكنو بعاد مكسرين لي راسي ديري ديري وحنا كي نحتاجوك:s ولا كي نخرج من الدار تحب ماما تطمن عليا قنعووني فوق من قلبي هههه
جربتو ايامات وكرهت حياتي اولا انا منرفدش على رقم منعرفوش هه عاودو لبنات هبلوني ونتي ونتي مترفديش ساعات وحدة تدير رقم جديد ولا رقم راجلها تعيط بيه
متعرضتش لمعاكسات هك صراحة :down: بصح لبنات صحاباتي وخواتي هوما لي مزعجات بعض الشي تبا يا ناس انا منحبش نحكي في التليفون هه:smile02:
درك برطابلي سيلونس باه منرفدش (شريرة انا)
للعلم بالاك اطول مكالمة درتها في حياتي 10 دقايق ههههه:yahoo01:
تحيااااااتي
نقاء..:love01:
​

ربي يدوم الضحكة ان شاء الله يارب و يزيد حبيبة ، ترحب بيكي الجنة ان شاء الله
عندك الحق والله يا اختي
و لكي مني اسمى التحايا و ماشاء الله عاشت الاسامي
بارك الله فيكي و جزاكي خيرا لمروركي العطر و كلامكي الطيب الغاليين
:regards01::regards01::love01::love01:

​

عانيت من هاد المشكلة وقت فات وحتى واحد غلط قصدي انا غلطت فالنيميرو وعيطتلو لصقني ولا يقولي حتى عيدك مبروك هههه ما امنتش واش تفاهة هادي قريب رجعني ملافامي
والي تقتلني كي كانو يبيبيولي بالماسكي هديك عفسة تنذر بانو راهم يشوفو فيك وراهم يدرونجيو ويوفو لا غياكسيون
والله تفاهات
مهم رحمة ربي درك تيليفون ساكت اش 24
يصوني غي رافاي
دك يجي نهار ويسكت بورتابلك اي فترة برك تاع ديرونجمون وتفووووووت

ايه الحمد لله ربي يدوم ان شاء الله غاليتي
حتى انا رحمة ربي تهنيت عندي عام و الحمد لله اخر مرة قبل 4 شهر نظن و الله اعلم تاع هداك حبيبك و مديت الرقم لخطيبي و هو دبر راسو
بارك الله فيكي و جزاكي خيرا غاليتي لمروركي العطر و كلامكي الطيب
تحياتي احترامي و تقديري
:regards01::regards01::regards01:

​

وعليكم السلام انا نفشل كي نشوف ناس مازالت بهاد المستوى

رانا في 2016 ارتقوا قليلا

تبا ههههههههههههه مازالو برك بعقلية يتعرفو على طفلة في البورتابل

وانا لي حبستلي راسي مرة عيط واحد في الفيكس هزيت قالي صونيا تم

العفسة تاع عام الروز شكون مازال يحكي بالفيكس خخخخخخخخخخخخخ

ناس مهما في بالها اطورت مازالها بزاف بعيدة

انا رقم منعرفوش منهزش عليه ولي تعود وحدة تعرفني تبعث ميساج

يعطيك الصحة اختي على الموضوع

مرحبا بيك في واش راك تهدر

ايه و الله يا اختي الغالية يحبس مخك و كل شيء فيك ماتلقاي واش تديري ولا واش تقولي
ترحب بيكي الجنة ان شاء الله اختي الكريمة
و الله يسلمك و يعافيكي يارب
بارك الله فيكي لمروركي العطر و كلامكي الطيب الغالي نورتي
تحياتي احترامي و تقديري لشخصكم الكريم
:regards01::regards01::regards01:

و آسفة على الرد المتأخر دلك بسبب ظروف فقط ارجو منكم المعذرة
و ايضا اسفة على الرد دون ترتيب هدا بسبب خلل ما عندي
​

 

[أم أُنٌَيسة]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

سـلآمّ ..

منقدروا نقولوا غي هدي صوالح تصرآ لـنآس كآمل
مي لي يتمسخر ولي ورآ لحكآية شكون ؟؟
ربي يهدي ما خلق
ويعطيكّ الصحة حنونة ^^​

​

و عليكم السلام و رحمة الله و بركاته
الله يخليكي ويعافيكي حبيبتي
مانحبش نفهم المهم يخطيوني برك
بارك الله فيكي لمروركي العطر و كلامكي الطيب غاليتي
تحياتي احترامي و تقديري
:regards01::regards01::regards01:

​

السلام عليكم ورحمة الله تعالى و بركاته
آهلا بملك له ( يعجبني اسمك هه)
والله يا اختي طليتي على قلبي
وحد النهار عيط واحد رديت قتله الو قالي كمال سكت شوية قتله راك غالط قلت واقيلا صوتي كيما صوت الراجل خخخ
عاود رديت آلو قالي آختي نحوس على كمال هنا الشك راح تماما من راسي و رجتلي الروح أن صوتي آنثوي ههه قتله راك غالط خويا و كوبيت منبعد بدا يعيط و يعيط و يعيط كي عيطلي المسيو قتله هاك هذا من صباح راه كمال كمال و كل ساعة يجيب نيميرو جديد و أنا هبلت المهم عيطله قاله سامحني و حكاله قصة حياته بالتفصيل و حلو المشكلة أن ميزيدش يعيط راه نيميرو نتاع وحدة متزوجة راكم عارفين بالحكايات هذو لمهم عشت في سعادة و هناء و لكن بعد شهور يتعاود نفس السيناريو كمال و صاحبه و راه يحس عليه تفارقوا عندهم مدة و طيريطي وووو و عاودنا فهمناه و قال سمحونا منعاودش و لكن تعاودت نفس الهدرة و هنا كنا الهجوم الصارم ني سلام ني خويا راك غالط تزيد تعيط إذ لقيت روحك تشرع نورمال ' دخلنا المخابرات و الشرطة أسلوب التخويف هه ' و تهنينا منه و لدرك نسى الحكاية
مش ارف هذي المخلوقات كي تفهم أنت تقولي غالط و هو يلصق سيرتو لسمع صوت شيرة آهي آهي يفرح يبغي يطير و مرة ثاني صراتلي في تلفون دارنا رديت قالي فلان قتله غالط قالي صوتك يهبل كوبيت عليه قعد شوية و عاود مبغيتش نرد آنا ملا رد خويا قاله آلوووووووو كوبا هههه كي سمع صوت راجل
تبان ليا لي كيما هاك معندهمش ذرة تربية و تبان ليا كيما تقولو جبورة مازال ميرتاقو للمستوى المطلوب شعب تافه نتاع الصح
سمحيلي طولت عليك ههه يعطيك الصحة و هذا الشعب يستاهل غير التخويف و العياط ميبغوش نتاع راك غالط خويا

و عليكم السلام و رحمة الله تعالى و بركاته
ترحب بيكي الجنة ان شاء الله اختي الغالية
ايه والله يا اختي ماتلقاي كيفاه تحكي معاه ، تحكي بالعقل على اساس تربيتك يلصق فيك يقلك عجبتني طريقة كلامك تسبوا و تبهدلوا يلصق فيك كدلك عيب عليك و لا ادري مادا حتى نولي نطلب في السماح احيانا و من بعد نفيق مع روحي كالبهلولة ههههههههه
ماكاش سماح بين الاخوات اختي الغالية ، و الموضوع موضوعك فرغي واش كاين في قلبك اختي الكريمة
الله يسلمك و يعافيكي غاليتي
بارك الله فيكي و جزاكي خيرا لمروركي العطر و كلامكي الطيب
تحياتي احترامي و تقديري
:regards01::regards01::regards01:

​

السلاام عليكم
اهلا بالاخت الكريمة والله يااختي ما يحدث لك يحدث مع الكثيرات
ونااس فاارغة شغل مي ملااحظة بكري ماشي كيما ضركاا بكري كان غير التيليفون
لكن منين جات 3g هاذي خلااص النااس رجعت تحكي بالفايسبووك
ويضيع وقتو لتم
انا كانو شي بنات يعيطولي في التيليفون ويحكيو معاياا
سااعات انا نبهدلهم حتى يروحو يعفوني لكن لا حيااة لمن تنادي
دركا تجيني حااجة عادية تعيطلي طفلة نحكي مع المخلووقة نورماال نخليها تفرغ قلبها ومن بعد لاليست بلوكي وانتهى كل شيء
تعاود تعيطلي من بعد نفهمها بكل ادب بلي هاداك مااشي مليح
وخلاااص ومنين بدلت لابوس نتاعي والنيميرو نتااعي تهنيت كنت نستعمل دجيزي يعرفوه خلق ربي كاامل
وعندو تقريبا من 2011 وقديم دركاا عندي عاام شريت موبيليس تهنيت من وجع الرااس
وجاامي خممت نغلط ونحكي مع وحدة
ربي يعفو علينا وانت ساعفي هادو العبااد كي يعيطلك فهميه بالعقل بلي اللشي عيب
ومتاكد رايح يقنع واذا ماكانش عيطي لولي امرك ولا زوجك او خطيبك ولا خوك بااش يحكيو معااه وتفر ان شااء الله
سلاام وشكراا على الموضوع ..​

و عليكم السلام و رحمة الله و بركاته
انتم كل الكرم و الجود اخي الكريم ، اعلم دلك و لدا فتحت هدا الموضوع باه كل واحد يفرغ قلبوا
ايه ربي يهدي من خلق ان شاء الله ، و الله ماتلقا واش تحكي معاهم
اللهم آمين يارب اخي الكريم نحن و كل المؤمنين
كنت قبل مانتخبط نفهمهم بالعقل و نقللهم اتقوا مولاكم و كانت الاجابة تاعهم ماراناش نديروا في حاجة حرام و لا عيب يعني مامتربيينش يا اخي مايفيذ معاهم والوا
ماعنديش اخ و ابي مانقدرش نمدلوا لظروف خاصة و خطيبي اجل اكيد
لا شكر على واجب ان شاء الله تعالى
بارك الله فيك و جزاك خيرا للمرور العطر و الكلام الطيب اخي الكريم
تحياتي احترامي و تقديري
:regards01::regards01::regards01:
و عليكم السلام


​

السلام عليكم و رحمة الله و بركاته ....
اختي واش نقولك ؟ موضوع متميز و شائع جدا ... و ربي عالم اذا يديروها بلعاني و لا غلطات انا بالنسبة لي هادوك كلهم بهاليل و تافهين ... يقعدوا يفوتوا الوقت بالناس ( حاشا لي مايستاهلش )
بالنسبة لسؤالك : اجل ، انا وحدة من بزااف الغاشي اللي يصرالهمم هاكا
و نعطيك خدعة فعالة شوفي كي يعطواك بنيميرو غالط و يقعدوا فير يعاودوا ارفدي بصح غطي التيليفون بمخدة و لا كاش حاجة .... تعرفي علاه ؟ باه تاكليلهم لي زونيتي و تاني باش ما يعاودوش يدوروا بيك ... مجربة من قبلي
عاد لوكان نقولك ... خالتي تقولي هادوك لي يغلطو و كي ترفدي عليهم يعرفوا بلي انت بنت ... راحت عليك اللعبة يقعدوا غير يعاودوا بدون كلل و لا ملل
المهم_ في الاخير الله يهديهم و يهدي امثالهم
شكرا لك يا اختاه للموضوع المتالق ...في امان الله

و عليكم السلام و رحمة الله و بركاته
انتم كل التميز والله اختي الكريمة
اللي غلطات راهو باين راهو يعتذر مايعاودش هدا ادا كان متربي
الحمد لله اختي ماعادوش يقلقوني من نهار غيرت شريحتي و حتى و لو هاتفي الان فيه لاليست نوار يعني الحمد لله
لا شكر على واجب ان شاء الله تعالى اختي الكريمة الغالية
بارك الله فيكي و جزاكي خيرا لمروركي العطر و كلامكي الطيب
تحيات احترامي و تقديري
:regards01::regards01::regards01:
في امان الله و حفظه

​

أنا شحال مرة صراتلي ،كي نلقى نيمرو غالط تعرفو واش نديرنرفد و نخليه يتكلم وحده حتى يقطع وإدا عاود ندير كيما المرة الاولى حتى يكره وما يعاودش .

ايه صدقتيلهم و الله يا خالتي
لكن درت مرة لواحد العبد هكداك و الله تقول قاعدة نحكي معاه ماش نعبي عليه و نخليه يمشي في الفيد مايكرهش ابد
ربي يهدينا و يثبتنا ان شاء الله يارب
بارك الله فيكي خالتي و جزاكي خيرا لمروركي العطر و كلامكي الطيب
تحياتي احترامي و تقديري لشخصكم الكريم
:regards01::regards01::regards01:
​

 

[أم أُنٌَيسة]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

المرة الجاية مين يعيطو ردي عليهم وقارعي لا طفل ولا طفلة لا طفل خشني صوتك و العبيها راجل انا دايمن تنفع معايا حتى نسمع طيط طيط طيييط

:d:d:d:bravo01::bravo01::thumb_up02::thumb_up02:
بارك الله فيكي اختي الغالية وجزاكي خيرا للمرور الطيب و الكلام العطر و النصيحة الغالية
تحياتي احترامي و تقديري لشخصكم الكريم
:regards01::regards01::regards01:

​

السلام عليكم
و الله صح انا تسرالي و يقولولي راني غالط ومباعدا يعاودو يقولوا عبتنا لفوا
علابالكم نموت بالضحك و نكوبي
ههههههههههههههههههههههههه

و عليكم السلام و رحمة الله تعالى و بركاته
ربي يبارك فيكي ان شاء الله
ماشاء الله ربي يدوم الضحكة و يزيد ان شاء الله يارب
بارك الله فيكي للمرور العطر و الكلام الطيب اختي الكريمة
تحياتي احترامي و تقديري
:regards01::regards01::regards01:
​

 

[zagane]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم و رحمة الله تعالى و بركاته

اسعد الله اوقاتكم و ملاها يمنا وبركة ان شاء الله تعالى يارب
واش حوالكم ان شاء الله تكونوا بالف خير يارب؟
سايسونيي برك هدا اول موضوع لي هنا ، ان شاء الله يكون في المستوى
و على بركة الله نبدا :
شوفي يا خوتي و الله العلي العظيم كاينة وحد الظاهرة حبستلي مخي صدقوني مالقيت واش ندير و مالقيتش الحل ، ربي يقدرني و يصبري ان شاء الله
و اللي هو : الديرونجمو في التيليفون
ياو شحال من مرة يغلطوا في الرقم ، هيه ماعليهش مبصح لما تقلوا راك غالط كاينين اللي ولاد ناس متربيين ماشاء الله مايزيدش يدخل الرقم ديالهم ابدا
لكن كايني يعاودوا و لما نقللهم خير يقولولي عجبنا صوتك ؟؟؟؟؟؟؟؟؟(زعمة تقولولي حوحو يشكر روحو:$:$:$كن والله كيما نقللكم )
ياو يا خوتي و الله العظيم نبقى بلا راس و مانلقا واش نقول ولما نفيق نقول اتقي الله يا اخي و من فضلك ماتزيدش تعاود
كاينين اللي يفهموا و كاينين يقولولي وعلاه حنا نديرو في حاجة عيب ولا حرام ؟؟؟؟؟؟؟؟؟؟؟؟؟؟
واش نحكي مع هدوا درك قولولي برك:s:s:s:s
و اكيد نتوما تقولوا علاه تعبي على رقم ماتعرفيهش ، اني نجاوبكم لانو نمد رقمي و تيليفوني كان ديما مقفل و يبقى في البيت و انا نروح لعند العائلة و لا صحباتي و نمدلهم رقمي من عند امي نقول ربما وحدة من صحاباتي ولا من العائلة اللي مديتلهم رقميو انا ماعنديش رقمهم
ماعليهش ، و مرة يا خوتي عبيت على وحد الرقم قلتلوا: السلام عليكم و رحمة الله تعالى وبركاته ،شكون معاي ؟
والله العظيم بالحرف الواحد قاللي: حبيبك (و انا وليت هكدا:-o:-o:-o:-o:s:s:s)
ياو من الشوكاج نحيت التيليفون من ودني و بقيت نشوف معاه قلت بالاك سمعت غالط
رديتوا لودني وقلتلوا: عفوا واش قلت ؟ قاللي: راني حبيبك :-o:-o:-o:-o:s:s
قلتلوا :اتقي الله و كوبيت في وجهوا و حطيتوا في لاليست بلوكي
و مرة عيطلي وحد المخلوق في نص ليل قلتلوا :السلام عليكم شكون معاي ؟
قاللي: انتي نوال ؟
قلتلوا: لا لا خويا راك غالط ، قاللي: مايهمش نحوس على طفلة وخلاه
و في هداك الوقت تيليفوني مافيهش السيلونص و مافيهش لاليست بلوكي
قلتلوا :اتقي الله يا اخي ،
قاللي: علاه راني ندير في حاجة غالطة ؟
وليت انا كيما المهبولة من الشوكاج:-o:-o:-o:-o:-o
انا نكوبي و هو يعاود ولاني كنت نسنتنى في صحبتي تعيطلي تحتاجني مابلعتوش لانو كنت نبلعوا بالشهورة حتى ابي ديما يبهدلني يقللي :(علاه راني مدايرلك تيليفون ههههههههههههههههههه جيبيه هنا نكسروا واش تديري بيه :d:d:d:d)
المهم نرجع للموضوع ، لما قلقني قلتلوا يا اخي ماتزيدش تعاود راني مخطوبة
قاللي: حتى انا متزوج :-o:-o:-o:-o:s:s:s:s:s
صدقوني يا خوتي حليت عينيا على طول، و من بعد قلتلوا ولما متزوج علاه تعيطلي روح احكي مع مرتك؟
قاللي: كرهت منها
قلتلوا وانا واش دخلني علاه تديرونجي في بنات الناس ؟
قاللي: اصلا راهي في دارهم و حبيت نعيط لوحدة نحكي معاها ،
قلتلوا شوف يا اخي حكيت معاك باللمليحة ولكن باين انت مامتربيش و ماتخافش ربي انا والله العظيم والله العظيم والله العظيم ثلاث مرات كون يزيد يدخلني رقمك نمدوا لخطيبي ولا لابي و من بعد حل روحك
و السلام عليكم و رحمة الله تعالى و بركاته
(و بيناتنا في هداك الوقت ماكنتش مخبوطة ههههههههههههههههههههههههههههههههههههه)
مازادش دخلني الرقم هداك و لما هاتفتني صديقتي بلعتوا ست شهور هههههههههههه كالعادة و العوايد
المهم : شكون اللي تصرالها كيفي ؟
و مانحكيش على البنات فقط و حتى الشباب
هل الشباب ايضا يعانون من ازعاجات البنات لهم في الهاتف ؟

ربي يخليكم و يبارك فيكم للمتابعة و اتمنى انو الموضوع يكون في المستوى و يعجبكم ان شاء الله
بارك الله فيكم و جزاكم خيرا
تحياتي و ماتضربونيش برك :p:p:p:$
اختكم في الله ملك له
:regards01::regards01::regards01::regards01:​

السلام عليكم
اول رد ليا بعد غياب سنة او اكثر

اللي يغلط ما يعاودش الاتصال الا ادا كان دئب وشاف فريسة

 

[أم أُنٌَيسة]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم
اول رد ليا بعد غياب سنة او اكثر

اللي يغلط ما يعاودش الاتصال الا ادا كان دئب وشاف فريسة

و عليكم السلام و رحمة الله و بركاته
دلك يشرفني اخي الكريم
سلمت يمناك اخي ، كلامك صحيح
ماعلينا سوى طلب الهداية لنا و لكل المؤمنين
عودة ميمونة اخي عسى غيابك فيه خير ان شاء الله
بارك الله فيك و جزاك خيرا للمرور العطر و الكلام الطيب
تحياتي احترامي و تقديري
:regards01::regards01:
​

 

[ريحـان]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

والله يا اختي تصرا ........انا واح نيمرو. يعيطلي فالعشية وانا خطرات منشوفش
لابال تخيلي للان ما عرفتش شكون هذا وعيطلي مرتين برك ..
ومانعرف المرة الثالثةونتا

 

[@R@ZIK]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم
من قبيل وانا نكتب وكي كملت باه نبعث الرد النت راحلي
كرهت



من بعد نرجع ونرد
شكرا​

 

[saho souhila]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

وي ديما تصرالي

و الله رانا كيف كيف نفس الشي نديره



تحياتي

 

[الزهرة الحمراء]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم غاليتي
يعطيك الصحة على موضوعك
راني نشوف بلي راني روطار بزاااف بزااف معليش روطار خير من مانجيش
صراحة انا فالهاتف تاعي نيميرو مانعرفوش مانريبونديش كامل لاني عندي نيميرو تع كامل لبنات وكي نشوف نيميرو دخلني مانعرفوش نصبر ونشوف اذا عيط مرة وخلاص الله يسهل عليه واذا قعد يصر نقول بالاك نعرفهم وراهم قاعدين يصروا باه نرفد عليهم نريبوندي ونقعد ساكتة اذا سمعت صوت طفلة نحكي معاها واذا صوت طفل مايشقاش لانو حتى ويكون غالط غير يسمع صوت طفلة يولي يبسل ويعيط كل شوية حتى على عفسة باسلة وهاذي وليت نديرها بعد ماصرالي موقف واحد غالط قالي فلان قتلو راك غالط زاد عيط قالي راكي متأكدة راني غالط من ثم وصيت لبنات قتلهم لي تعيطلي بنيميرو ومانريبونديش عليها تبعثلي ميساج وتقولي راني فلانة
فالاخير نقولو ربي يهدينا ويصلح احوالنا
دمتي في رعاية الله وحفظه​

 

[*أوراق أمل *]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

وي و الله كيما قلتي قبالا تكرهي حياتك ههه
كيما انا وحد المرة عيطلي واحد ، في نيميرو تاعي
وهاذا النيميرو درتو جديد كي غير
قالي انت فلان قتلو لالا قالي هاذا نيميروه
قوتلو لالا خويا واقيل بلوكاوهولو و كي شريتو ولا تاعي
قلي سمحيلي و منا وكدا
ربع ساعة عاود
صحا واش تسحق
قلي حبيت نسقسيك برك
انتي من الشرق ولا ؟ قتلو علاش تحوس
قالي هكا برك نسقسي
قتلو ايا خويا ما تسقسينيش تعرفني حتى تسقسيني
قالي انتي تقراي و لا تخدمي و بدا يسقسي فيا
قتلو روح اخويا اني مخطوبه
و مبعد قالي اه سمحيلي اختي و ربي يخليهولك
vraiment tbehlil

 

[~ غيث ~]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

عليكم السلام ورحمة الله وبركاته
ربي يجازيك أختي على الطّرح
تصرا في أرقى الأماكن كيما يقولوا ...أنا مرات نرفد لإنّه نخاف حاجة طارئة، الإنسان ماشي دايما يلقى كريدي من الهاتف ديالوا ، بصح هاذ النّوعية من الناس يكرهولك حياتك، لذلك عندك خيارين، إما ما ترفديش رقم ما تعرفيهش وخلاص، وإمّا حاجة أخرى ارفدي وما تهدريش حتان تسمع الصّوت إذا رجل كوبي ديركت ...وإذا غلطتي وجاوبتي وخرجلك واحد من هاذ النّوعية، مدي الهاتف لباباك ولا خوك يفريها إن شاء الله...
ربي يحفظنا من الفتن
صحيتي على الطّرح

 

[GI Joe]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

men 9abl jamais sratli,
fi rassi makanch menha jayhin mazalhom ydirou had le3fayess

MAIS mara seleft telephone l wahda 3aytet NORMALMENT l sahbetha, Lila hadik bdaw par hasard yedokhlou bzef les num kaamel ghaltin li yhawess 3la nawel li assma ;;; w le piiiire c wahed 3ayet f nhar nrml j ai repondu gali leh ma3ayetilich ani nestena fik gotlou rak ghalet , gali nn 3tali l univ li na9ra fiha, la ville li rani fiha, la residence, l bloc, l etage
vrm tchokit, sema zaama diri khair fi wahda en besoin tweli tahessli, khoft chwia, mba3da j ai appelai la police w sa9ssit, nrml je px porter pleinte
ki kemel derangement fahemtou que la zad y3ayet une autre fois mayhemnich kel num raha nporti pleinte, prc sinn tweli agression physique mich par telephone
fhaaaam gali essemhili
w wahd 1 mois apres 3awdou d autre num ki tfout 23h !!!
dert appli blokage d appel, w f la fin d année bedelt la puce
w men dik TRANQUIIIL
li
eeeeh hkit 9issat hyati
خلاصة القول
lebnet we"reeeet, w chibh rjal na9ssin hanan w tarbia, jamais la ndir confiance, l hmdl jatni fi hadi bark

 

[ضيوف وسـنغادر]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم اختي
لست الوحيدة ولم ولن تكوني ربي يهدي شبابنا النائم
الحمد لله راهي كاينة الليست بلوكي مرات كي مانحبش نكسر راسي اي نيميرو مانعرفوش فالليست بلوكي//وظلمت نااس بززاف ظهرو صحاباتي ومرات من لافامي تاني ههه//
ومرات نقول خلي نعبي بلاك نعرفهم كي نعبي ونلقاه راجل نكوبي ولا مرات نحب نضيعلهم ليزينتي ههه نحط القران ونخليهم يسمعوا ولا مرات نعبي ومانهدرش المهم//لازم لازم نخسرهم هههه هادي كي نكون حيلية ونافحتلي//مي الاغلبية راهم فالليست بلوكي
ويا لبنات نقولكم اي نيميرو ماتعرفيهش مديه لبوك ولا لخوك وشوفي اذا زاد عيطلك//وكم من مرة عيطيليو صحاباتي وتفجعو بصوت بابا ولا خوي هههه//
مي وحد المرة تشوكيت في نص الليل كنت نخربش في برتابلي نلقاك نيمرو يعيط انا تجرات وعبيت وتلك كانت اول واخر مرة في حياتي نعبي في نص الليل المهم نا كالعادة ساكتة نلقالك الطفلة هادي تقول االو شكون معايا ؟...وانا نتما تشوكيت قلتلها يا مخلوقة روحي ترقدي على روحك..خافي ربي وكوبيت..مازادتش عيطت
مي انا اغلبية قصصي راهي في المساجات
مرة بعتتلي وحدة توصفلي في روحها وتقولي انا هك وهك من البلاسة الفلانية...انا كنت فالليسي وتالمو فالراحة قلت خلي نريبونديلها يا مخلوقة راكي قد ماما غير اخطي الطريق وخافي ربي..المكتوب بيدو
ووحدة خلاف بعتتلي ميساج تع فليكسي انا عيطتلها بيسك النميبرو راه تع صاحبتي وهي عندها قريب شهور ماحلتوش مبعد ظهر بلي البيس تغلقتلها وداتها وحد اخرى
عيطتلها وقلتلها انت فلانة قالتلي لالا ماتزيديش تقلقيني انا هنا طلعلي لاكريز حكيت معها بالحسنى وهي اللي بعتتلي ميساج تقولي افليكسيلي وتقولي ماتتقلقينيش ارواحي لاهن يا بنت لحلال
قلتلها اسمعي مليح لالة راكي انتي قاعدة تقيمي في روحك ماش انا..وديجا كي تحبي الناس مايقلقوكش اتعلمي انت ماتبعتيلهمش ميساجات فيهم تقوليلهم افليكسيولي
ههههه تبا جامي كتبت جريدة كيما اليوم
على كل حال ربي يهدي شبابنا وان شاء الله يمس التقشف شركات الاتصال تع الهواتف كاش ما تاب البعض
سلامي​

 

["Màrià"]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

و الله مهزلة !
الغاشي هاذا فارغ شغل ..يالاه لي Ybipi بالماسكي !!<
أنا قررت نعيش عصر حجري و حجري
لا تيليفون _لا فايس بوك _ لا والو

لي يسحقني يجي عندي ولا نروحلو


سلام ^^
​

 

[مسك وعنبر]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

السلام عليكم ورحمة الله والله الموضوع جدير بالإهتمام وفيه ما يقال بالفعل كاين ناس فارغين شغل وباش يجوزو الوقت يتمسخرو في التليفونات نصيحة لكل وحدة ماترفدوش على رقم ماتعرفوهش مهما يكون وإذا كان هداك الشخص يعرفكم يبعت ميساج يقول بلي أنا فولان أو فلانة هذا ليس بالحل الدائم ولكن يبقى فعال في غالب الأحيان على خاطر كاين شي عباد ربي يهديهم غير يسمع صوت طفلة يولي لاصق كيما الليستا ههههههه وعليه من الأفضل مانعطوهمش الفرصة كامل مشكورة على الموضوع أختي مرحبا بيك معانا ودمتم سالمين :up:

 

[مشاركة]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

صح تصري بزاف المهم ربي يهديهم ان شاء الله

 

[الورد الأحمر]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

أهلا شيماء
عليك وعلى Ajouter à la liste de rejet وانيت تهنيتي
حتى الماسكي تقدري تحطيه في القائمة السوداء مي ما تصلحش في الموبايلات الكل
عموما ربي يهدي الناس دخل علينا الـ 2016 ومازالو كاين ناس Ybipiw بالماسكي !!
نشـفى كانت تصرا في الـ 2007 مي توصل تمتد ليومنا هذا سي Grave ... !
سلآمي ’

 

[loca]

رد: قولولي برك ، يصرا هدا الشي معاكم ولا انا برك ؟؟؟؟؟؟؟؟

هههههههه مسكينة مسكينة ربي يكون في لعون
نحكي ع روحي انا قاع ميغلطوش فيا وكان غي يغلطو معليش منريبونديش غي نشوف تيليفوني يصوني دنيا و مافيها ههههه اني نضحك ختوووو عيني بارد ة على روحي انا معنديش هاد بروبلام و مهنيية و كلش ههه
شكرا على موضوع و ان شاء الله ميكونش تالي​