safouane batna
:: عضو مُشارك ::
- إنضم
- 1 فيفري 2016
- المشاركات
- 304
- نقاط التفاعل
- 843
- النقاط
- 21
السلام عليكم ورحمة الله وبركاته: اليوم حبيت نحكي على الناس لي ديما تهدر على الغرب ويقولك هوما خير منا وخاصهم الشهادة يسبقونا فالجنة وما إلى ذلك.
رانا نفتحو الفايسبوك نلقاو دايرين صورة طبيب امريكي يبكي لأجل ماتتلو وحدة ماقدرش يمنعها، وصورة لرئيس دولة غربية دارولو بروصي، وصورة ممثلة تتبرع للافارقة ، وصور لشرطة يساعدو مواطنيهم، وزيد وزيد.
ونلقاو الجزائريين نتاعنا يعجبهم الحال ويبداو يمنشرو فالطبيب الجزائري والشرطي والموظف نتاعنا والعجيب حتى الشعب نتاعنا ويقولك حنا علاه ماناش كيفهم؟
ياسيدي حاب نفهم: علاه كي تمشي فالطريق تحرق السطوب وكي تروح للخارج تولي طبق فالقانون حرفيا، وعلاه كي تدخل للسبيطار فالجزائر تلعبها رجلة وكي تخرج حتى لتونس برك ماشي حتى للغرب تسلك دراهم ودير الصف كي لولاد نتاع الابتدائي، وعلاه فالخارج طبق القانون ويعجبك الشعب نتاعهم فالنظام وكي تجي هنا باه تولي كيفهم وتلتزم ترجع فرعون؟؟؟ تلقى الجزائري يسوق ويحرق الضوء الاحمر وفي نفس الوقت يقول: والله في السويد وحدو فالطريق ويستنى الضوءالاخضر باه يفوت ناس مربيين نتاع الصح.
والحاجة لي قلقتني بزاف ومافهمتش الشعب كيفاه يخمم: علاه رانا نشوفو فالغرب عالم مثالي وعلاه ننشرو الامور الباهية عندهم؟ علاه مانشوفوش المناكر لي عندهم؟ علاه مانشوفوش المعتقدات نتاعهم ؟ علاش هوما مايسرقوش؟ ومايقتلوش؟ ومايزنيوش؟ وماعندهمش زواج المثليين؟ ماكانوش سبب في الحروب والفتن؟ ماستعمروش بلاد الناس؟ السبب لأنو هوما مايظهروش هاذ الحوايج للناس وحنا غير نتبعو وعاجبنا حالهم هوما سياستهم واضحة استعطاف الناس لي كيما حنا باه نقولو مربيين وخصهم يشهدو برك.
صح فيه فروقات لكن ماشي لدرجة نصوروهم ناس قمة فالاخلاق والتربية وحنا مانسواوش ، العكس الا حبينا نوليو كيفهم كل واحد يخدم خدمتو لأنو حنا اعزنا ربي بالاسلام والاسلام رسملنا الحدود لي نتبعوها.
وفي الأخير عندي اشارة بخصوص نقطة استغلها الغرب باه يبينو للمسلمين انهم دول نتاع حق وهي قضية اللاجئين السوريين ياخاوتي فهموني شكون لي ر اه يحارب فسوريا وشكون لي راه يقصف ماشي هوما؟ يقتلوهم منا ويستقبلو اللاجئين منا وحنا نقولو برافو والله يعطيهم الصحة يتهلاو فيهم مساكن وحنا العرب نسيناهم. الغرب هو سبب الحروب وهو لي يقتل المسلمين وهو لي شردهم ومن بعد يدعي الانسانية . المهم اسمحولي على الاطالة والله تقلقت من كثرة ما نسمع كل يوم في شكر للناس هاذو لي حب يتربى ويتخلق يتربى فبلادو ماشي فبلاد الناس نترباو بالهراوة وكي نجيو هنا نتفرعنو. والموضوع ليكم للنقاش والسلام عليكم ورحمة الله وبركاته.
آخر تعديل بواسطة المشرف:
