اسعد الله مسائكن حبيباتي في الله
ههه منسقسيكمش واش راكم
باسكو كل ما نحط موضوع فالمقدمة نقلكم واش راكم ههه ماكاش لي تخبرني كي تحط التعليق هه:p:p المهم اتمنى انكن بخير:-r
المدلوك او المسمن او الملوي كل منطقة وكيفاه يسموه
على حد ما اعرف ان المسمن اللي يطيب فالزيت
والصنف الاخر يطيب على الطابونة المهم هذيك المدورة الكبيرة المهم ما تتقلاش ههه
فالحقيقة نسا زمان ربي يحفظهن ولي توفاو ربي يرحمهن كانو يديرو السميد وحدو ويعجنوه
انا نستعمل السميد ومخلط مع الفرينة
الى المقادير البسيطة
3 كيلات فرينة
3 كيلات سميد رطب
ملح
رشة سكر
ماء دافىء ممزوج بكاس صغير من الحليب
طريقتي فالدليك اي العجن
كي نلم العجينة منكثرش الماء نستغل هذاك الماء اثناء العجن مرة نعجن ومرة نبل يدي /مترفديش الماء برك شمخي يدك / هكذا باه العجينة تشبع من الدليك والماء بوقت متساو
نبدا برك بالبونيا ههه مليقتش وش نسميها لمدة 5 دقايق ومن بعد نريحها 10 دقايق ومنبعد نرجع نعجن ثم نريحها وهكذا
حتى تولي العجيني تع الصح طرييية وكي تبداي تسمعي فالفرقعات معناها راكي وصلتي نتيجة مليحة كيما هكذا
تغطي عليهم بالبابي فيلم وتخليهم مدة ربع ساعة هكذا المهم باه ينزلو شويا يعني يزيدو يطراو
ثم تبداي بالوحدة
تحطي قدامك غرفية فيها زيت
وغرفيه فيها زبدة ذايبة
وتحلي بالزيت براحة اليد تظغطي وتدوري يدك على الحبة وهي تبدا تحل ومنبعد تحطي يديك بزوج تحت العجينة من الجوانب وتبداي تجبدي بشويا باه تزيد توساع
تبداي الثني من الاسفل حتى للنص تع الحبة وترشي عليها شويا زيدة ومن بعد تثني من الجهة العليا حتى تغطي بيها على الطبقة الاولى الي درتيها
ثم تثني من الجهة اليمنى واليسرى
وتخليها بجيهة ترتاح شويا ثم رجعي ظعطي عليها بيديك باه توسعيها شويا وارميها طيب فوق طابونة ويكون مرشوش بالزيت هذاك الي طيبي عليه ههه منعرفش وسمو:s / لالا ماشي طاجين /
بالصحة والهناء:thumb_up02:
من لديها اضافات حول طريقة عمل المدلوك او المسمن او الملوي ومن تعرف الفرق بينهم فتتفضل مشكورة لتشرح لنا
من لديها اضافات حول طريقة عمل المدلوك او المسمن او الملوي ومن تعرف الفرق بينهم فتتفضل مشكورة لتشرح لنا
آخر تعديل:
