هذي حياتي،،،التعيسة طبعا

ليليا مرام

:: عضو بارز ::
أحباب اللمة
إنضم
16 جوان 2009
المشاركات
9,759
نقاط التفاعل
29,218
النقاط
1,656
محل الإقامة
اللمة
الجنس
أنثى
السلام عليكم جميعا اهل اللمة
رمضانكم مبارك ولو متأخرة لكن تعرفو كلكم الظروف
اليوم حبيت نحكيلكم كل شي صار معايا فأجزاء عندي أسباب تخليني نحكيلكم
أول شيء حابة كل واحد منكم يتعلم يحمد ربي ويصبر ويشكرو ومهما كان الضيق اللي فيه والهم ممكن يتفكر المرضى راح يهون عليه
ثاني شي تعرفو وضع المستشفيات في بلادنا ووين وصل بينا الحال ويشهد ربي كل كلمة راح نكتبها كيما صرات تفضلو مع الجزء الاول

الجزء الاول
لومبيلونس ....... اكريها والا اشريها

راح تفهمو علاه سميت اول جزء هكذا
نبدا منين حبست حطيت موضوع اللماويون واللماويات حضرت برنامج سهرات رمضان اتفقت مع خويا حكيم واختي الورد مهم كنت شوي تعبانه لانو ذاك النهار صباح رحت نحي الضرسة اللي كسرها دونتيست وما حبتش لانو مشكل فعظم الفك قالي ديري راديو وكملي دوا اسبوع ارجعي نحوها مهم العشية بعدما كملت كل شي وراكم عارفين كنت بالعكازات لانو اصلا كانت رجلي مكسورة
لحق المغرب حبيت نتوضا قاتلي أمي خلي نجيبلك حجرة تيمم ما تظليش واقفة قتلها لالا ما نستناش حتى لغدوة نصلي اليوم وغدوة جيبيلي ورحت للدوش نتوضا

توضيت عادي لما بقاو رجليا حاشاكم ما نقدرش نغسلهم بالقعاد قلت نرمي الما وربي راه شاهد جيت نجبد الما زلق بيا عكاز وتقدرو تتخيلو الطيحة عيطت لربي اللي خلقني يمى جات من الكوزينة تبكي وتعيط بلاما حتى تشوفني وصلت عندي رجلي طبقت والات عند جنابي للفوق وانا نعيط ونقولها صحتي راحت يا يمى راني تشللت يا يمى يمى تقولي استغفري استغفري تجبدلي فرجلي هبطت شوي خرجت برا تعيط وانا نعيط ونبكي لأنو كنت نخمم فاللي جاي فالي راح نشوفو لانو هو نفسو اللي عشتو من 17 سنة اول من دخلت كانت جارتي قتلها اعطيني حجاب لبسيني وفعلا لبستني جارتي سترتني ربي يسترها وغطاتلي شعري كل الجيران دخلو ليجون ولادهم حاولو يرفدوني لكن محال ما نخليهمش يمسوني لانو العظم كلو مقسوم ويتحرك عيطو للحماية المدنية وبعد مدة جاو
معاناة باه يرفدوني وساعفوني واش نقولكم دارنا رجعت كالجنازة غاشي كبير والحق كامل يتعاونو مع الحماية وصلت اختي دارت حالة لانو تخلعت يمى قاتلها رجلها طارت خلعتها
مهم رفدوني بشق النفس داوني لسبيطار الاقرب ليا وورايا سيارة زوج اختي واخرى فيها خالاتي جاو ووليد خالي بالصدفة كان رايح للستاد وسمع
كل ما تمشي الاسعاف انا نعيط لانو كل حركة انا قلبي يتقسم بيها ونستغفر ونقرا فالقرآن وصلوني للسبيطار وهو مش نتاع العظم وقتلهم ماىيشدونيش قالو حنا لازم نجيبوك هنا مهم نزلوني بالعذاب وجا الطبيب واحكيلو الحكاية ايا ديرولها راديو واش يصبرني فذاك الراديو مهم افراد الحماية ربي يفرحهم قعدو حتى رفدوني هوما فوق طابلة الراديو وعاونوني خاطر يعرفو كيفاه يرفدو المريض دارو ذاك الراديو العياط اللي عيطتو زعزع الدنيا هناك الله غالب الوجع ماكانش كيما هو
بعدها قالو دويرة والحماية قالو دورنا هنا يخلاص ما عندناش الحق نخرجو من 42 لازم اسعاف السبيطار فالسيطار الكارثة الكبرى قالك ما عندناش لومبيلونس خرجت بعيد معناها ادوها فطونوبيل خاصة نتاعكم والا اكرو اموبيلونس بريفي ايه سمعتو اكروها معناها المريض يطيح فالدار يكون مخبي حق الكرية نتاع لومبيلونس والا يشري وحدة ويخليها احتياط هذا علاه سميتلكم الجزء الاول بهذا الاسم
مهم دارت معاهم يمى حالة فالاخير راجل اختي قالها ما نضيعوش الوقت ندوها فالسيارة ونتاع الحماية كانو ما راحوش قعدو خلاولي ذاك الجهاز اللي دارولي رجلي فيه كان مريحني شوي وقالو معليش غدوة جيبوهونا ركبوني فالسيارة وركبت امي معابا شدتني لصدرها وهبطوني لدويرة
راح نكملكم فالجزء الجاي اللي صار
شكرا بارك الله فيكم ودعولي معاكم
 
السلام عليك
صحة رمضانك آختي
طمنينا عليك ؟
هذه هي حالة المسكين في بلادنا الحقرة من كل جهة عليه
ربي يكون معاه وخلاص
شاغادي نقول لآختي نصبرو رواحنا بالمومن مصاب و بعد الصبر يأتي الفرج
ربي يشافيك آختي ويمدلك الصبر أضعاف
 
والله ليسطوما ناضت تسطر، لا حول ولا قوة إلا بالله وحسبنا الله ونعم الوكيل .. حسبنا الله ونعم الوكيل .. حسبنا االله ونعم الوكيل
والله عجزت مالقيتش واش نرد، الحمد لله على كل حال .. الحمد لله على واش مدلنا ربي سبحانو
والله يا ختي ليليا مالقيت مانقول كل كلمة نقراها وبين عينيا المشهد لي كنتي فيه وقلبي يتقسم مع كل حرف
والله الانسان يقرا هاد المشاهد برك قلبو يولي يبكي ماش حتى عينيه وين لي عاش الظرف لحظة بلحظة
ان شاء الله يكون كل عذاب مريتي بيه تخفاف ذنوب ليك يارب، وربي يكون في عونك
انا قبل 6سنوات درت عملية جراحية وماش خطيرة وفيها المعريفة زعما وتمرمدت لدرجة لانيستيزي قالك ماعندناش جيبوها معاكم
كلي بطاطا ولا طماطم، يعني كارثة وهكاك نقول حاجة بسيطة وين نتي لي تعب كبير وحالة حساسة كيما تاعك
يعني ربي يعطيك الصبر وربي يجازيك على صبرك ويعوضك بيه في الجنة ان شاء الله
فقط طمنينا مازالك في المستشفى ولا خرجتي راكي في الدار؟
وفي الاخير واش نقولك ختي، في الصلاة ولا في الدعاء والله نتي اللولة لي نبدا بيك وربي شاهد وكل يوم نعاود ونكرر نفس الدعوات
ربي ان شاء الله يشفيك ويعافيك ويقويك ويرزقك كل مامتمنية بما فيها زيارة بيت الله الحرام
ربي يكون معاك ختي، وراني ننتظر الجزء الجاي ماش لاني مستمتعة بالقصة ولا بالعكس والله قلبي يتقسم مع كل حرف
واشوا مليح للانسان يتعلم من غيرو ويتربى شوي ويحمد ربي على واش عطاه من نعم، وزيد مادابيا نحس بختي ونسمع واش صرالها
خاطر هاديك الليلة والله عدات علينا كحلة بالاك ماعانيناش كيما عانيتي ولو بنسبة قليلة جدا بصح والله خلعنا عليك
المهم ختي ربي يكون في عونك ان شاء الله وربي يفرج عليك ويفتحلك بيبان الخير يارب
وصح فطورك حبيبتي
 
لا اله الا الله
واشنقول ليك أختي ربي وحده يعلم مدى حزني عليك
و الله أتألم لأجلك أختي
خليني ساكت أحسن أختي و الله يعلم اللي في القلب
 
السلام عليكم
صح رمضانك اختي ليليا
واش نقولك ولله كنت نقرا وقلبي يوجع
الله غالب العين بصيرة واليد قصيرة
ربي معاك حنونة ماكاش خير من ربي
اكثري من الاستغفار و الدعاء في هذو
الايام من الشهر الفضيل و وكلي أمرك لله سبحانو
 
السلام عليكم و رحمه الله تعالى وبركاته
ياااااااه يا ختي. صعيب واش فتي عليه
ربي يصبرك ويعطيك صبر ايوب على طبتنا وعلى مرضك
الله يعينك ويشفيك آآآآآآآآآمين
ربي يشفي كل مريض ويفرج عليه
 
السلام عليك
صحة رمضانك آختي
طمنينا عليك ؟
هذه هي حالة المسكين في بلادنا الحقرة من كل جهة عليه
ربي يكون معاه وخلاص
شاغادي نقول لآختي نصبرو رواحنا بالمومن مصاب و بعد الصبر يأتي الفرج
ربي يشافيك آختي ويمدلك الصبر أضعاف
السلام عليكم اهلا اختي
الحمد لله اختي راني كيما يحب ربي الحمد لله
ايه بلادنا فيها يحقرو الزوالي وزيد اللي مريض لاحول ولا قوة له وتشوفي السبيطارات واش فيهم العجب
لينا ربي سبحانو
بارك الله فيك اختي
 
والله ليسطوما ناضت تسطر، لا حول ولا قوة إلا بالله وحسبنا الله ونعم الوكيل .. حسبنا الله ونعم الوكيل .. حسبنا االله ونعم الوكيل
السلام عليكم اختي مريومة ان شاء الله أمورك بخير
هذي الجملة اللي لازم تتقال حسبي الله ونعم الوكيل

والله عجزت مالقيتش واش نرد، الحمد لله على كل حال .. الحمد لله على واش مدلنا ربي سبحانو
والله يا ختي ليليا مالقيت مانقول كل كلمة نقراها وبين عينيا المشهد لي كنتي فيه وقلبي يتقسم مع كل حرف
والله الانسان يقرا هاد المشاهد برك قلبو يولي يبكي ماش حتى عينيه وين لي عاش الظرف لحظة بلحظة
ان شاء الله يكون كل عذاب مريتي بيه تخفاف ذنوب ليك يارب، وربي يكون في عونك

آمين اختي انا جزء من المرضى هذي عينة خلي مرضى السرطان وخلي وخلي أمر الله ما يغيضش الحال منو الحمد لله المشكل فاللي مسؤولين علينا قدام ربي
انا قبل 6سنوات درت عملية جراحية وماش خطيرة وفيها المعريفة زعما وتمرمدت لدرجة لانيستيزي قالك ماعندناش جيبوها معاكم
كلي بطاطا ولا طماطم، يعني كارثة وهكاك نقول حاجة بسيطة وين نتي لي تعب كبير وحالة حساسة كيما تاعك

نقولك فالاجزاء الجاية نحكي تحلي فمك واش صاري وربي شاهد العجب شفتو هذا حال الصحة فبلادنا هي مريضة
يعني ربي يعطيك الصبر وربي يجازيك على صبرك ويعوضك بيه في الجنة ان شاء الله
فقط طمنينا مازالك في المستشفى ولا خرجتي راكي في الدار؟

راني فالدار طبيبة قالت مازال باه تخرج وطبيبي جا قالهم خرجوها زوج ورقات مدوهملي وايا لداركم هاني فالدار الحمد لله
وفي الاخير واش نقولك ختي، في الصلاة ولا في الدعاء والله نتي اللولة لي نبدا بيك وربي شاهد وكل يوم نعاود ونكرر نفس الدعوات
ربي ان شاء الله يشفيك ويعافيك ويقويك ويرزقك كل مامتمنية بما فيها زيارة بيت الله الحرام
ربي يكون معاك ختي، وراني ننتظر الجزء الجاي ماش لاني مستمتعة بالقصة ولا بالعكس والله قلبي يتقسم مع كل حرف
واشوا مليح للانسان يتعلم من غيرو ويتربى شوي ويحمد ربي على واش عطاه من نعم، وزيد مادابيا نحس بختي ونسمع واش صرالها
خاطر هاديك الليلة والله عدات علينا كحلة بالاك ماعانيناش كيما عانيتي ولو بنسبة قليلة جدا بصح والله خلعنا عليك
المهم ختي ربي يكون في عونك ان شاء الله وربي يفرج عليك ويفتحلك بيبان الخير يارب
وصح فطورك حبيبتي
ربي يحفظك مريومة و يخليك والله عارفة تخلعتو واسمحولي
ربي يتقبل منك ومنا
صحا فطورك
 
لا اله الا الله
واشنقول ليك أختي ربي وحده يعلم مدى حزني عليك
و الله أتألم لأجلك أختي
خليني ساكت أحسن أختي و الله يعلم اللي في القلب
سلام عليكم الأمين
ربي يحفظك ويشفيك يا رب ويفرج عليك وعليا
شكرا صحا فطورك
 
السلام عليكم
صح رمضانك اختي ليليا
واش نقولك ولله كنت نقرا وقلبي يوجع
الله غالب العين بصيرة واليد قصيرة
ربي معاك حنونة ماكاش خير من ربي
اكثري من الاستغفار و الدعاء في هذو
الايام من الشهر الفضيل و وكلي أمرك لله سبحانو
السلام عليكم
اهلا اختي سلامة قلبك ربي يحفظك
اكيد الشدة فربي سبحانو وراني طامعة بيه يجيني الفرج ونداوي على ربي سبحانو
شكرا ودعائكم ليا راه يفتح ابواب
بارك الله فيك
 
سلام اختي صح رمضانك
ملقيت مانقول هاذي هي بلادالحgرة المهم
ربي يكون معاك اختي ويحفظك
سلام عليكم اختي
ايه نقولو ربي وكيلهم ونخلوهم لربي
آمين ربي يكون مع كل مهموم وكل مريض
شكرا
 
السلام عليكم و رحمه الله تعالى وبركاته
ياااااااه يا ختي. صعيب واش فتي عليه
ربي يصبرك ويعطيك صبر ايوب على طبتنا وعلى مرضك
الله يعينك ويشفيك آآآآآآآآآمين
ربي يشفي كل مريض ويفرج عليه
السلام عليكم اخي حليم
آمين خويا ربي يتقبل منك ومن الاخوة الصبر باه نتحمل والفرج باه نداوي هذا واش نحتاج
ربي يخليك يا رب ويحفظك صحا فطورك
 
السلام عليكم
اييه حال لبلاد وين وصل .وكيلهم ربي برك
ربي يصبرك ويقدرك ياغالية ربي يخفف عليك ويفرجها عليك في اقرب وقت ان شاء الله
 
السلام عليكم ورحمة من الله و بركاته
كان الله معكم في مصابكم
انها الدنيا الدنيئة بدناءة أمثالهم
لو كانت الدنيا التي اتينا اليها بهجة لما
بكينا في اول ظهور لنا فيها او ليس الذي
لايبكي حين خرزجه من بطن امه يموت ؟
نعم يموت ... لا يبكي لانه راحل الى الجنة
من ها هنا نحن .
كان الله معك .. تقبلي مروري
متابع بصمت
 
السلام عليكم
واش نقلك يا مرام
الله يجعل في قضاه اللطف
و الله يسلك وحلك
...
ترددت قدام لنرد عليك هنا
لانو صراحة راني حاس بلي رانا نزيدو عليك اكثر كي نردو عليك
لانو نفس الكلام نعاودو فيه
بصح الله غالب ...هذي لي نقدرو عليها
و اسمحيلنا ...
 
قريت ووجعني قلبي
وحمدت ربي سبحانو على نعمة الصحة
ياأختي ليليا سمحيلي نكررها لك ربي راهو حاسس بيك
متقطعيش الياس
هاذي حالة السبيطارات فبلادنا كل وحدة دخلت السبيطار عندها حكايتها
ولكن لوقتاه ؟
نتخيلك ياليليا نتي تكوني من الناس اللي يدخلوا الجنة يوم القيامة بغير حساب
و تقولي الحمد لله الذي ابتلاني في الدنيا بعد ما تشوفي هذاك الخير
اللهم يارحمان إنها دعوة في أواخر الليل أن تفرج عن أختي كربتها عاجلا غير آجل يارب
اللهم إنها أمتك ولارب لها سواك
اللهم لاحول ولا قوة لها إلا بك
اللهم إن لم تشفها فلارب سواك يشفيها
اللهم أجب دعائي يارب
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top