مشارك في منافسة مميزون ( سوق اللمة للمواضيع )

فريد أبوفيصل

:: نجم اللمة::
إنضم
1 أوت 2008
المشاركات
6,389
النقاط
2,651
الجنس
ذكر

بسم الله يافتاح ياعليم يارزاق ياكريم .


سوق المواضيع في اللمة


مع الصباح بكري كي ندخل ديفوا للمة نلقاه يصفر مهجور الا من بعض التجار الناشطين اللي ينوضوا بكري الله غالب خلقوا في السوق وترباو عليه تلقاه الله يبارك عليه ينيطوايي في مواضيعوا ويمسح ويرش في الما بالملح بسم الله بسم الله يافتاح ياعليم عين الحسود لا تسود يا ربي بعد العين وتمشيلي السلعة اليوم ويبقى يفيريفي في مشاركاتو كاش واعجاباتو كاش حبة ناقصة كاش تنبيهات جديدة كاشما جماعة خلصت لكريدي في مواضيعي ولا ضربو النح . وساعة ساعة يطل عالشارع شكون اللي جا شكون اللي سجل الدخول . وهكذا ...
حتى يطلع النهار مليح وتزقزق العصافير اللي في منتدى الترحيب ويبداو الزبائن يدورو في سوق اللمة
يشوفو اسكو السوق طالع ولا هابط اليوم كاش رخى كاش ماطاح كاش جديد نشرو ولا نتفرجو ونروحو
احيانا تشوف واحد يشري وعشرة يتفرجو .
اللي يروح ديريكت لصاحبو يشري ويقلع وكاين اللي ينشنش مليح قبل مايشري وكاين اللي ماعاندو حتى صالحة يدور يدور ومن بعد يخرج .
وساعة على ساعة تسمع او جا الكونطروووو ل
منين ؟
شفتوا يدور في في جيهت مطبخ اللمة الرسمي كاشما صرى تسمم ثما قالولي وحدة طيبت بغرير بالمايوناز ودارت بلاكة حصري من مطبخي راهم يشمعولها في الموضوع .
واحد يقولو لالا شفتوا يتعارك مع عضو في السياسي يبيع فالمحارق .
اللاخر يقلو مكانش منها واحد مابان منهم اليوم دردشو دردشو متخافوش .

ونهار يجي صح الضو التشيني يضرب السما .
بعدها تشوف التجار مستفين لابسين الطابليات ملايكة وكل واحد حاكم موضوعو ينش عليه في الذبان يبينوا المشاركات المليحة يحطوها من الفوق والعيانة يخبوها حتى يفوت الكونطرول برحمة ربي .

المشترية كاين اللي يجي نايض فايق مستعد السلعة الزينة يديها هو بصحتو مطبق الشعار ارقد بكري تنوض بكري تكتب موضوع مع الدخلة وتروح تقضي .

وكاين اللي يجي وهو راقد يمشي بالقمر الصناعي كيما الطائرة بدون طيار نعسان ميت وشعروا نابت للفوق ويتثاوب وثمثم تلقاه راقد على جيهة في كاشما موضوع حتى كي يفطن يسجل الخروج ويرجع للدار .. ماكان واااالو ااااه في السوق حوستو كامل السلعة متعجبش وفارغ مافيه حد ويرمي القفة فوق الطابلة راني ن..ع ساااان تعبت .. خخ خخ خخ عالعام .

وكاين الحلو اللسان حتى والسلعة عيانة تلقاه يقول موضوع في القمة .. موضوع رائع ... ومن الاخير باه يتسرسب ويقلع بالشوية يقلو .. تقبل مروري مع السلامة .

وكاين اللي شاعلة فيه التريسيتي .. وشحال هاذي شكرا ... هاذي وشحال دارت شكرا ..، كاين ولا مكانش شكرا . شغل محتمين عليه شكرا مع كاش مصروف ويفرغ فيها هنا ولهيه المهم يتخلص منها .

وكاين الله الله يحكي مليح مع التاجر .. السلام عليكم .. ياسيدي توحشتك ... وشراك وشراهم الدار الذراري لاباس ..... وكي يجي يروح يقلو التاجر كاشما تدي السلعة راها موافقة اليوم يقلو الله يبارك ديما مواضيعك مليحة بلا منشوفها المهم انت راك لاباس ؟

وكاين الناس اللي تعرف للسوق يشري قضيان انتاع سمانة ولا شهر ويخليلك مشاركات ويزيدك بقشيش .. اها خلي عندك الصرف كاين الخير نحمدو ربي
النهار اللي تلقاه في موضوعك يفرجك الله يبارك وتفيد منو بزاف ربي يكثر من امثالهم .

نجوا للتجار .
التجار انواع وتكتيكات
كاين الحشام مايعرفش الناس بزاف ولا مايتخالطش تلقاه يبيع في مواضيع حتى وتكون مليحة بصح الناس متشريش يبقى يقابل طول النهار بلافايدة . ياخويا حلي سلعتك الابتسامة في وجه اخيك صدقة كون اجتماعي تمشيلك السلعة الناس تحب الانسان البشوش .
الناش تعلق بمشاركة طويلة عريضة وهو يبقى يخزر فيك واذا ملح يرد .. صحا .

وكاين اللي شوية يزغد ويعرض للناس في الطريق ارواح خويا تذوق البنة ذوق متشاركش دير اعجاب برك وروح فرح لوليدات وتلقاه ديما ههههه خخخخخخ في مواضيعوا هذا شويا نهار يبيع ونهار لالا على حساب مورال الشاري .

وكاين الناس الفاهمة والعارفة بخبايا السوق محنكين الله يبارك يحط سلعتوا اونكوموند ومبيوعة ديجا سلعتوا ماشاء الله ديما باهية والبوتيكة ماشاء الله ديجا تشوف عنوانها يعجبك بلاما تدخل . بصحتكم ربي يزيدكم .

وكاين اللي يبرح ومقلب الدنيا بالتبراح على موضوعو ايا موضوع ساهل مختصر مفيد ايا و اياو موضوع حصري وخفيف المشاركة باطل يا مواطن دير مشاركة ونعطيك زوج من عندي . حل باه تولي . قريب يبعثلنا ميساجات صوتية في البورتابل يصدعنا بيه . وتشوفو يحكم على واحد اسمع انت شايفك موالف تشري من عندي ؟ بعثتلك ميساج ولا مبعتلكش ؟

وكاين اللي يبيع ربعة بعشرالاف مخلطها القديم مع الجديد الحاشي مع الراشي السلعة اصلا متتشمش بيها مخلطة و يعجبك الرخى يدهش والكثرة والربا .

وكاين اللي يبيعوا في الزنق والكوتيات جماعة الموس والكابوس ارواح تخدم في شركة كذا وكذا اربح هاتف نقال معانا فيزا لكندا باطل نحوسو على وكلاء وبياعين ... الخ ارواح متندمش وهوا غير تغفل ياكلك انت بميكروك .

وكاين المسكين اللي الله غالب لا سلعة لا منتوج كبير يشري شوية مواضيع منا ومنهيه منقول ومقروء يحطها في الارض ويقابلها من بعيد ديفوا ينسى روحو بلي راه يبيع حتى تجي تشري متعرفش شكون صاحبها وتبقى تسقسي في الناس ياجماعة هذا الموضوع شكون صاحبو وين راه مولاه ومن لاخر تروح وتخليه .

هذا سوق اللمة للمواضيع وهاذو تجارها ومشتريها
خويا العزيز سلعتك موضوعك وربحك ردودنا وكلنا المليح تفيد وتبيع وعاملنا بالزينة ومتكونش قبيح .
وانت اخي المواطن اختي المواطنة من اي صنف ؟ ولا عندك تكتيك سري ؟
 
آخر تعديل بواسطة المشرف:

الامين محمد

:: أمين اللمة الجزائرية ::
طاقم الإدارة
إنضم
7 أفريل 2015
المشاركات
12,689
النقاط
2,061
محل الإقامة
الجزائر الحبيبة
هههههههههههههههههههه الله يهديك أستاذنا و هاذا موضوع سلعته مليحة
و من الخارج و السومة فيكسي إدي و لا خلي ما تكسرليش راسي بالمقاشحة ههههههههههه
أنا نخدم كونترول تابع لوزارة اللمة مرة على مرة نرفد كاطابي و نعمل دورة كاش سلعة بيريمي او مخالفة
و نحجز عليها ههههههههههههههههه
انت رااااااااااااائع يا أستاذي
 

Hakan

:: مشرف ::
منتدى واش راك تهدر+فرغ قلبك
ركن المحاولات القصصية للأعضاء+بوح القلم
طاقم المشرفين
إنضم
10 أوت 2013
المشاركات
9,814
النقاط
2,201
الجنس
ذكر
ههههه موضوع في قمة الرووعة هههه الله يزيدك فرح نورتنا ا عمي وينك هذا ياخويا انا نصنف روحي من الجماعة الفور خخخخ

وكاين الناس الفاهمة والعارفة بخبايا السوق محنكين الله يبارك يحط سلعتوا اونكوموند ومبيوعة ديجا سلعتوا ماشاء الله ديما باهية والبوتيكة ماشاء الله ديجا تشوف عنوانها يعجبك بلاما تدخل . بصحتكم ربي يزيدكم .

؟
وشنهي كي نكتب موضوع نرش عليه شويا ملح قلك يبعد العين
ومن بعد نرقل الحالة هي بينانا السلعة نتاعي ماهيش مزوقة ومافيهاش الالوان نتاع الجيل هذا بصح ا خويا
دوريجين ههه ماهيش لاشين وحصرية ديما
علابيها رانا الحمد لله نعرفو للسوووق بصح النهارات اللي فاتو الطابلة نتاعي ماهيش مليحة عاينوني راني اللي يجي يشري من عندي
نخسرها معااه ويسمحولي الزبائن الكراام
لكن الصراحة انا نخدم في الاسبوع مرة والنهارات الباقية ندورو على الطوابل منا ومنا ونشوفو الحوانت والبازارات
كشما نقضوي والحمد لله ديما نلقاو الاستقبال مليح
ولا واش قالو يالتجاار هه الله يهنيك ويحفظلك الوليدات
 

لؤلؤة قسنطينة

:: مراقبة عامة ::
طاقم المراقبين
إنضم
13 أفريل 2013
المشاركات
14,621
النقاط
2,251
العمر
27
محل الإقامة
قسنطينة
الجنس
أنثى
السلام عليكم
ههههههههه والله موضوع في القمة تاع القمة ههههه عجبني بالبزاف يعطيك الصحة
والله صح رانا في سوق وسوق هايل بالبزاف، انا تاجرة ومشترية في نفس الوقت هههه
ساعة ساعة نجيب سلعة جديدة نعرضها في مناطق محببة للزبائن باه ناتيريهم هههه ونستيكي السلعة مليح
ولازم نسقسي على الاحوال نشوف الزبون تاعي اذا جاي مهموم نخليلو دعوة عند باب الحانوت بالاك تفرج عليه
ونرحب بيهم كيما يلزم الحمد لله وأنا لي نسلكهم ماش هوما لي يسلكوني ههههه قادر يمدولي ألف فرنك حق السلعة
ونمدلهم السلعة ومعاها 50 ألف دعاوي ههههه هيا وكي تخلصلي السلعة ندورها مشتري هاني ندور من ومن والحق يعني
والله مانحب ندخل لكاش حانوت إلا وعندي الدراهم مانحبش ندخل نقول لمول الحانوت واش راك ومانشريش عليه
لازمني نشري شوي نفرحلو لوليدات، وأنا يدي كريمة صراحة من الناس لي يخليلك الصرف لي هدرت عليهم ههههه
نشري السلعة ونمد حقها وكن تعجبني حطة الحانوت قادرة نولي نزيد نحط دراهم حتى ولو ماشريتش سلعة يعني الحمد لله يدي كريمة هههه
واشوا فيا حاجة أني نحب نعربن ساعة ساعة يعني ندخل لحانوت تعجبني السلعة نخاف كاش زبون يجي من ولا من يحكم بلاصتي
هيا نحط عربون صغير بلي راني راجعة نشري ونولي من بعد ندي سلعتي ونمد الدراهم كما يلزم ههههه
وهكا راهي ماشية السوق وحنا نمشيو معاها
يعطيك الصحة سيدي الكريم على الموضوع الهايل بالتوفيق ان شاء الله
تحياتي
 

حلم كبير

:: نجم اللمة ::
إنضم
24 ديسمبر 2016
المشاركات
5,061
النقاط
2,751
العمر
35
محل الإقامة
فرنسا الجزائر وطني
السلام عليكم ورحمة الله تعالى وبركاته

بارك الله فيك أخي الكريم على الموضوع الرائع والذي يسلط الضوء بطريقة رائعة على المواضيع وأصحابها

أما أنا فأحيانا أضع سلعة يمدحها الشاري ويشتري ويسر بها ،وأقول إن الشاري في هذه السوق هو البايع في نفس الوقت
فاليوم هو بائع وغدا يحضر ليشتري
ولكنني تاجر هادئ ،يعرض سلعته ولا يثير ضجة أحيانا أثير ضجة لكن في أغلب الاوقات هادئ
حتى لو قلب علي المشتري الطاولة ألملم سلعتي وابتسم واغادر
لانني دخلت متوقعا كل شيء من هذه السوق
وفي النهاية مكسبي الوحيد هو رضا الرحمان ،وإفادة واحد أو إثنان أو عشرة ممن اشترى سلعتنا
هذا هو التاجر حلم كبير
بارك الله فيك أخي الكريم
موضوع في القمة
إحترامي وتقديري
حلم كبير
 

السلطانة

:: المديرة التنفيذية ::
طاقم الإدارة
إنضم
19 سبتمبر 2009
المشاركات
47,319
النقاط
821
محل الإقامة
الشرق-الوسط
الجنس
أنثى
وعليكم السلام
اهلا عمي فريد راك رجعتلنا بقوة
مالا انت هو مول السوق لي كنت وادر هههه

انا نقولك الصح نحب نبيع سلعة النسا في عالم المرأة الخدمة ماشية ههههه
ونبيع المطلوع والقاطو في كوزينة اللمة
ومتفاهمة مع جماعة الكونترول يوقفو معايا @آمِيْرَتُه تضال تخدم معايا وتخدملي في الصابون وانا نبيع
ومرة عمرة نسربس سلعة مغشوشة
ياك البنات والنسا قولهم صولد برك يشرو بلاما يراعو
تحياتي
 

فريد أبوفيصل

:: نجم اللمة::
إنضم
1 أوت 2008
المشاركات
6,389
النقاط
2,651
الجنس
ذكر
الله يبارك كبار التجار في دكاني البسيط مرحبا بيكم .
تكتيكات نموذجية لكل واحد منكم لازم الاعضاء يتعلموا منها ويقتبسوا عليها .
وين راهم البقية ولا خايفين على سرهم يتكشف ;) متخافوش رانا نتعلموا من بعضانا .
كيما انا نخدم الكابة وسلعتي من وقت لوقت ديفوا نغيب وديفوا تغيبلي .
يعطيكم الصحة على المشاركات من ذهب .
 

ماغيكاي تشان

:: مشرفة :: نجمة اللمة
منتدى التنمية البشرية
ركن التوعية الدينية النسائية
طاقم المشرفات
إنضم
27 جويلية 2013
المشاركات
13,068
النقاط
2,256
الجنس
أنثى
السلام عليكم ورحمة الله وبركاته
اسعد الله اوقاتكم وملاها يمنا وبركة
اهلا بيك عمي فريد ،تغيب تغيب وترجع بمواضيع ماشاء الله
ماشاء الله ولا قوة الا بالله تبارك الدي بيده الملك
بارك الله فيك وجزاك كل خير وجعل كل حرف خطته يمناك في موازين حسناتك
لا اعلم من اي صنف من التجار انا ،ساترك الامر لكم
لا يمكنني أن احكم على نفسي
كل مايهمني ان افيذ واستفيذ باذن الله عز وجل ،فتلك غايتي ان شاء الله
لدا اتمنى اني كنت مفيذة وان استمر في دلك باذن الله ،وان لم اكن فآسفة للتقصير
ارجو تقبل مروري عمي الكريم
تحياتي احترامي وتقديري
في امان الله وحفظه​
 

الصحافية الساخرة

:: نجمة اللمة ::
إنضم
5 جانفي 2017
المشاركات
3,486
النقاط
1,441
العمر
25
محل الإقامة
Jijel
الجنس
أنثى
السلام عليكم و رحمة الله

هههههههههههه موضوع رااائع ^^ يعطيك الصحة

يا خويا واش حبيت نقولك السوق يدخلوها غير الرجال هههههه والسلعة تاعي نتعب باش نخرجها ، منحبش كوبي كولي هههه من راسي نفرز الفكرة ونحطها تم تم منستناش .. يعني جامي تلقا حاجة مقلدة توجور من صنع الصحافية الساخرة ^^ .. بكل وضوح أحيانا تلقا السلعة نظيفة و جديدة و انتيك و تجذب الشاري و ساعات واش نقولك معرف الناس تولي هاربة حتى مني هههههههههه .. و طبعا الابتسامة و المرح باش هكذا ما نزرعوش الخوف فالناس هههههه اضرب طلة و روح نورمال تحب تدي ولا تخلي أنت حر ما نظلش نغني في راسك هههههه

هذه هي التاجرة :cool: فطوم ،، اووه :censored: جديدة عليا كلمة تاجرة مي فاللمة برك ماشي برى هههههه

مرسي على الموضوع المميز ،، موفق ان شاء الله
 

أم أحمــــد يــسّ

:: نجمة اللمة ::*أستاذة*
إنضم
22 فيفري 2014
المشاركات
2,294
النقاط
411
محل الإقامة
أرض الخير
الجنس
أنثى
السلام عليكم...
موضوع جميل...
جعلني اتساؤل اين انا من اصناف تجارك؟؟ أم انني مجرد مشترية ولا افقه شيئاً عن البيع هاهنا؟؟
ام انّ اللسوق الالكتروني فرض البُوار لسلعة استوردها مباشرة من بنات افكاري...لطالما كرهت التقليد في السلع ونظرت الى بعضها فآلمني ..لكن عرفت مؤخرا ان تقليدهم صار هو السلعة ( الماشية)
وصارت ( تفاهة بعض السلع) هي الأصل وبعض الجيّد تقليد ( تقليد للتخلف ورجعية الأفكار )..
لم اعد اعلم تلكم السلع التي طرحتها للبيع يوما ماذا كانت وأي علامة اعطوها في سوقهم ذاك،
وحقيقة اخرى اكتشفها انه كما قلت هناك من فقِه اللعبة على اصولها وصارت تجارته مقصودة رغم ردائتها...
سمِها غيرة الكترونية او ماشئت لكنني شخصياً ندمت على بعض ما قدمت يوماً فان كان تافها أسأل الله المغفرة وان كان جيدا فقد نصبت مجزرته قبل ميلاده..
وكذلك بعض السلع ادخل لأشتريها فاجدها تسر الناظرين لكن جملة( صنع في بنات افكاري) او ( صنع من واقعي ) تحتاج نظرا قبل تداولها ..لايهمني من يبيع بقدر ماسيبيع لي ..
شكرا لكم
 

آمِيْرَتُه

:: أستاذة:: عضو شرفي
إنضم
13 جوان 2011
المشاركات
14,360
النقاط
971
محل الإقامة
: ♥ قلب عسكوري ♥
الجنس
أنثى
وعليكم السلام
اهلا عمي فريد راك رجعتلنا بقوة
مالا انت هو مول السوق لي كنت وادر هههه

انا نقولك الصح نحب نبيع سلعة النسا في عالم المرأة الخدمة ماشية ههههه
ونبيع المطلوع والقاطو في كوزينة اللمة
ومتفاهمة مع جماعة الكونترول يوقفو معايا @آمِيْرَتُه تضال تخدم معايا وتخدملي في الصابون وانا نبيع
ومرة عمرة نسربس سلعة مغشوشة
ياك البنات والنسا قولهم صولد برك يشرو بلاما يراعو
تحياتي
السلام عليك
ههههه فكرتيني في الصابون شافتني وحدة قاتلي وجهك ديما صافي ني حبوب ني والو قتلها شفتي كثر خير الصابون لصنعاته يديا وحياة عينيا خخخخ
السلعة غير اليوم وماشي كل يوم دغري ليهم دغري
 
Top