مشاركتي في {مسابقة أحسن سرد لموقف مضحك}

لؤلؤة قسنطينة

:: عضو بارز ::
أحباب اللمة
إنضم
13 أفريل 2013
المشاركات
14,618
نقاط التفاعل
54,535
النقاط
1,756
العمر
31
محل الإقامة
قسنطينة
الجنس
أنثى
السلام عليكم ورحمة الله وبركاته
وأسعد الله أوقاتكم وملأها بركة
وربي يدوّم عليكم وعلينا الضحكة والفرحة والبهجة يـــارب
المهم ليوم حبيت نضحكم شوي، ونسرد عليكم أحد المواقف المضحكة لي مريت بيها، بصراحة حياتي كامل مواقف محرجة ومالقيتش واش نسرد
وواش نخلي هههه حوّست حوّست، قلت نحكيلكم على ولد خالتي وبعض المواقف الطريفة معاه، اليوم راهو يقرا سنة أولى ثانوي وهكاك مازال بريء
مازال يشوف العالم من زاوية جميلة وبريئة، عندو واحد الخرجات وواحد الأسئلة تخليك طايح بالضحك، تحسو نية بزاف رغم أنو ذكي
المهم هادي مرة من المرات في دار جدي قاعدين والأولاد دايرين بيا وقاعدة نحكيلهم على يوم القيامة، نقولهم الإنسان كيفاه ربي يكرمو بالجنة وكيفاه
يقدر يعاقبو بالنار وهوما خاشعين معايا، هيا مالا قتلهم شفتو العبد المذنب ربي يبعتلو يوم القيامة قريب 500 ملك أو كتر يهزوه
ويرميوه في النار، قتلهم أتخايلو عبد ضعيف يتلمو عليه 500 ملك ولا كتر والواحد فيهم برك كبييير بزاف، قتلهم لدرجة الملك الواحد كبير
كن يمشي الانسان من كتف الملك لأذنو (يعني شحمة الأذن) يقعد قريب 500 ألف سنة ولا هو طالع باه يلحق لدرجة كبير
مالا سقساني ولد خالتي هادا قالي كاينة حاجة مافهمتهاش، قتلو واش؟ قالي وهوما واش داهم لكتفو :LOL::LOL::LOL::LOL::LOL::LOL::LOL:
ونطرطق بالضحك أنا عدت نضحك بالدموع وهو يضحك، قتلو امشي عليا نتا وجهك ماش وجه مواعظ هههههه
والحكاية التانية ماصراتش معايا ولكن نفس الطفل، راح لجدي قعد معاه في الصالون ويحكي معاه، وجدي هادا قبييح واحد ما يتجرأ يقعد معاه
جاي من الناس تاع بكري لي دارو الثورة وحكمو عليهم بالإعدام ودخلو للحبس ومن بعد عفاو عليهم، مالا قعد معاه وقالو جدي
نتا درت الثورة؟ مالا احكيلي، وجدي يحب لما يحكي على الثورة هادا ما يحب هههه، مالا بدا يحكي ويحكي والطفل خاشع معاه
من بعد قالو يا ولدي لدرجة فرنسا عذبتنا دخلونا للحبس وحكمو علينا كامل بالإعدام، ولد خالتي واش قالو في رايكم؟
قالو جدي كي حكمو عليكم بالإعدام قتلوك ولا منعت؟ :LOL::LOL::LOL::LOL::LOL::LOL: قالو جدي هاك تشوف فيا قدامك كيفاه قتلوني باينة منعت ههههه
وحنا من البيت الثانية طايحين بالضحك كي سمعناه واش قالو قتلنا بالضحك
الطفل هاداك وحدو تقعد معاه تشبع ضحك وجاي على نياتو رغم أنو ذكي وعندو طموحات ربي يحفظو لأهلو إن شاء الله
نتمنى نكون دخلت الفرحة والسرور والضحكة عليكم وربي يدومها علينا أجمعين

تحياتي
 
آخر تعديل:
وعليكم السلام حبيبتي
والله احيانا نصادفو امور غير متوقعة خاصة واذا كالن الشخص بحد ذاتو هادئ
ويجيبلك هذاك السؤال الغريب على غفلة:ROFLMAO:

مانجي تفهمي منه ماتجيك تضحكي وهو حايب يفهم
:unsure::unsure:
موفقة غاليتي
 
آخر تعديل:
السلام عليكم ورحمه الله وبركاته
هههههههههههه والله هذا نية نتاع الصح كاينين هاذيك نيتهم والله وحنا نحسبوهم يتمسخرو
هذا صرالو كي بني اليوم جايبو من المدرسة التحضيري مع خواتاتو ڤالو بناتي للمعلمة بون ابيتي مدام (شهية طيبة زعما بوليتاس ههه) ڤالها هو زعما يعاند بونجوغ ههههه ضحكت المعلمة ڤاتلو بونجوغ هههه ماهو فارز فيها والو هههه

وخاصة نتاع جدو ڤاعد يحفر ويحكي ويعدل فيها وفالاخير أنهاها بواحد السؤال رائع خخخخ ربي يدوم لمتكم ويطرح السكينة على ڤعداتكم نشالله
بارك الله فيك وأضحك الله سنك نحيتيلنا على خواطرنا
إحترامي وتقديري
 
وعليكم السلام
والله احيانا نصادفو امور غير متوقعة خاصة واذا كالن الشخص بحد ذاتو هادئ
ويجيبلك هذاك السؤال الغريب على غفلة
مانجي تفهمي منه ماتجيك تضحكي وهو حايب يفهم

أهلا فطومة مساء الورد
صح هاديك هي كي يجيك السؤال على غفلة تحكمك الضحكة هههه
بصح درك الطفل هادا والفناه علابالنا يحكي على نيتو
ويحب يفهم بطريقتو والمشكل يضحك على روحو بعد هههه
شكرا حبيبتي على كرم مرورك
ان شاء الله نكون زرعت ولو البسمة على وجهك
تحياتي​
 
ههههههههه شكرا لك اختي
والله ضحكتيني مسكين مول النية دايما يطيح فيه
مواقف مضحكة ربي يبارك فيك اختي
وبالتوفيق
 
وعليكم السلام ورحمة الله وبركاته
ههههههههههههههه ربي يحفظو باين فيه يحب يضحك وديما كي يقعد معاه الواحد تحلى القعدة

وبعد جدك مسكين يحكي من قلبو وهو يقولو يادرا سلكت ولاماسلكتش خخخخخخخ
كي ماضربوش بالعصا للراس او مليح خخخخخخخ


مشكورة لمشاركتنا
 
هههههههههههههههه
والله يعجبوني الابرياء هههههههههههههه
بصح ساعات يقلقوني من الغباااء هههههههههههههههههههه
 
السلام عليكم ورحمه الله وبركاته
هههههههههههه والله هذا نية نتاع الصح كاينين هاذيك نيتهم والله وحنا نحسبوهم يتمسخرو
هذا صرالو كي بني اليوم جايبو من المدرسة التحضيري مع خواتاتو ڤالو بناتي للمعلمة بون ابيتي مدام (شهية طيبة زعما بوليتاس ههه) ڤالها هو زعما يعاند بونجوغ ههههه ضحكت المعلمة ڤاتلو بونجوغ هههه ماهو فارز فيها والو هههه

وخاصة نتاع جدو ڤاعد يحفر ويحكي ويعدل فيها وفالاخير أنهاها بواحد السؤال رائع خخخخ ربي يدوم لمتكم ويطرح السكينة على ڤعداتكم نشالله
بارك الله فيك وأضحك الله سنك نحيتيلنا على خواطرنا
إحترامي وتقديري

وعليكم السلام ورحمة الله وبركاته
أهلا بيك خويا حليم، سعيدة أنو القصة ضحكتكم ورسمت البسمة على وجوهكم ^^
ههههه مسكين، حب يكون لطيف مع المعلمة وفي بالو بونجور هي كلشي
تعجبني هاد البراءة في الأطفال تجي حلوة حتى وإن كانت خارج مجال التغطية هههه
ربي يحفظهولك ان شاء الله
وهادي هي لي قتلتنا بالضحك حنا من الغرفة الأاخرى هههه هداك السؤال غير المتوقع
اللهم آمين أجمعين، ولكم بالمثل ان شاء الله
وبارك فيك الرحمان، ربي يجعل أيامكم كلها ضحكة وفرحة وسعادة يارب
شكرا لكرم مرورك، جزاك الله خيرا
تحياتي​
 
ههههههههه شكرا لك اختي
والله ضحكتيني مسكين مول النية دايما يطيح فيه
مواقف مضحكة ربي يبارك فيك اختي
وبالتوفيق

أهلا بيك حبيبتي نورتيني
والعفو غاليتي، المهم ضحكتك، ربي يجعل ايامك كلها ضحكة
وفرحة وسعادة ويبعد عليك ربي الأحزان
وسعيدة جدا أنو هاد المواقف قد نالت إعجابكم ورسمت على وجوهكم البسمة
ربي يدومها يارب
شكرا لكرم مرورك عزيزتي، بارك الله فيك
تحياتي​
 
وعليكم السلام ورحمة الله وبركاته
ههههههههههههههه ربي يحفظو باين فيه يحب يضحك وديما كي يقعد معاه الواحد تحلى القعدة

وبعد جدك مسكين يحكي من قلبو وهو يقولو يادرا سلكت ولاماسلكتش خخخخخخخ
كي ماضربوش بالعصا للراس او مليح خخخخخخخ


مشكورة لمشاركتنا

أهلا بيك أختي السلطانة نورتيني
ههههه والله ضح يموت على الضحك والقعدات والحكايات، مازال مادخلوش تفكير
الشباب الطائش هاداك، مازال نية مسكين ههه
شفتي :LOL::LOL: وهاديك هي الضربة الكبيرة تكون تحكي من قلبك
وتلقى لي قدامك خارج مجال التغطية ههههه
ستر ربي ما عطاهش بضربة للراس هههه
شكرا حبيبتي لكرم مرورك وربي يدوم عليكم الضحكة والفرحة يارب
تحياتي​
 
هههههههههههههههه
والله يعجبوني الابرياء هههههههههههههه
بصح ساعات يقلقوني من الغباااء هههههههههههههههههههه

أهلا بك أخي الأمين نورتني بمرورك
وربي يدوم الضحكة ان شاء الله ويجعل أيامكم كلها سعادة وفرح
وبالفعل البراءة شيء جميل، سورتو كي يتكلّم الإنسان بنيتو
تجي حلوة هههه
وهادا صراحة ماش غبي بالعكس تلقاه ذكي يحب يفهم كلشي
لكن عندو خرجات وحدهم ههههه الفضول يلحقو لهاد الاسئلة
شكرا لكرم مرورك خويا الأامين بارك الله فيك
وربي يرزقك سعادة دائمة وفرح دائم يارب
تحياتي​
 

أهلا فطومة مساء الورد
صح هاديك هي كي يجيك السؤال على غفلة تحكمك الضحكة هههه
بصح درك الطفل هادا والفناه علابالنا يحكي على نيتو
ويحب يفهم بطريقتو والمشكل يضحك على روحو بعد هههه
شكرا حبيبتي على كرم مرورك
ان شاء الله نكون زرعت ولو البسمة على وجهك
تحياتي​
ولك مني اجمل تحية غاليتي اسعد الله اوقاتك ودامت الابتسامة على شفتيك حبيبتي
 

ههههههههه
اضحك الله سنك عزيزتى
شفتى هداك اللى قالك دير النية تربح
هههههههه
هاهو ربح
كى ضحكتووو اكل
موقف جميل
 

ههههههههه
اضحك الله سنك عزيزتى
شفتى هداك اللى قالك دير النية تربح
هههههههه
هاهو ربح
كى ضحكتووو اكل
موقف جميل

اهلا بيك حبيبتي وربي يدوم الضحكة والفرحة عليك يارب :)
سعيدة أنو الموقف ضحكك وزرع البسمة على وجوهكم
ادعيو لمولاها بالخير برك ههههه
وهاديك هي صح دير النية تربح، ماكانش قد النية وقد البراءة
شكرا عزيزتي على كرم المرور نورتيني وأسعدتيني بتواجدك
ربي يحعل ايامك كلها فرحة يارب
تحياتي​
 
مالا سقساني ولد خالتي هادا قالي كاينة حاجة مافهمتهاش، قتلو واش؟ قالي وهوما واش داهم لكتفو
والله غير عندو الحق ميم انا كون احكيتيلي نقولك واش اداهم لكتفو:ROFLMAO::LOL::ROFLMAO::LOL::ROFLMAO::LOL:
والله غير صحكني هد البريئ ضرسة العقل بانت
سيرتو تاع انا منعت فكرتني بالحكاية تاع السبع و الفيل نهار قالو انا كلاوني :ROFLMAO::ROFLMAO::ROFLMAO:
ادام الله افراحكم وانار طريقكم
 
مالا سقساني ولد خالتي هادا قالي كاينة حاجة مافهمتهاش، قتلو واش؟ قالي وهوما واش داهم لكتفو
والله غير عندو الحق ميم انا كون احكيتيلي نقولك واش اداهم لكتفو:ROFLMAO::LOL::ROFLMAO::LOL::ROFLMAO::LOL:
والله غير صحكني هد البريئ ضرسة العقل بانت
سيرتو تاع انا منعت فكرتني بالحكاية تاع السبع و الفيل نهار قالو انا كلاوني :ROFLMAO::ROFLMAO::ROFLMAO:
ادام الله افراحكم وانار طريقكم

أهلا بيك أخي نورتنا بحضورك
هههه انا مركزة على الحجم وهو مركزلي على الفعل
لوكان يفيق بيا صاحب القصة بلي درتو تمسخيرة في اللمة يهبل ههههه
وسعيدة أنو القصة ضحكتكم، ربي يدومها ان شاء الله :)
هادا هو هدف الموضوع انو ننشرو الضحكة والبسمة وان شاء الله تكون وصلت للجميع
واللهم آمين أجمعين، ربي يدومها عليكم كذلك
شكرا لكرم المرور
تحياتي
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top