بنتي و خويا

[sanaya]

سلام عليكم وشرااااكم
توحشت هاذ القسم بزاااااااف
البارح قريت موضوع @Andy_Delort عن الأطفال الحقودين تفكرت حكاية بنتي مع خويا
بون حنا الأمهات نخافو على بناتنا و ولادنا وقتنا صعيب و النت سرقت براءة الكثير من الاطفال و فسدت الشباب الا من رحم الله❤❤❤
و كما تربينا حنا نحبو نربوهم ومنين تكبر الطفلة نعلمولها ترسم حدود بينها و بين ولاد الخالة و العم وووووو و الكثير من القواعد اللي لاااازم تتبعهم
وحدة من القواعد ممنوع تحضني وليد خالتك ولا عمك راكم كبار بعد و غدوة تبداي الصلاة متقابليه أملا من درك تعلمي وووووو......
أيا خترة جا عندي خويا قالي قلتي لبنتك متحضنيش خالك
قتله نن جامي مي ولاد خالتها و عمتها نوصيهم يباعدو و مش أي لعبة يلعبوها
(علابالي بزاف راح تبانلهم هذا تعقيد)
قالي بنتك دارتلي تبهديلة منعرفش نزعف و لا نضحك
بون خويا صغير عليا بثلاث سنوات و الكل يحسبوه أكبر مني
طويل عريض سيريو منارفي ميهدرش بزاف و يبان فوجهو عبد واعر مي فالصح حنين بزاف ❤❤❤❤❤
المهم كان مسافر مدة طويلة و رجع تلاقى بنتي في حي شعبي ومن مدة مشافها أيا بدا يضحك ليها و فتح ليها يديه يحضنها و يعيطلها باسمها و هي واش دارت كلحقت عندو
شافتو فتح يديه راحت كللي متعرفوش
الغاشي بداو يشوفو معاه
حكاهالي مت بالضحك قتله سير راهم يقولو بهلول حاب يحضن ولاد الناس
واللي قتلتني اكثر هو سيريو بزاف باش يلحق و يدير جاست هذاك برا و يفرح هكذاك لطفلة صغيرة حاجة كبيرة و فالأخير تروح و تخليه و متسلمش عليه مامبا كشغل متعرفوش
ضحكتو ياك
علابالي
زيدو ضحكونا فالتعليقات.

 

[space-cowboy]

كما تضامنت سابقا مع ديلورت. اسجل تضامني مع اخيك وكل من خانتهم رقة قلوبهم مع الوحوش الصغيرة.

إليكم قصة الحُضن المحرم. في ليلة سمرية من ليالي شهر آب, نزلت ضيفا ووالداي على دار اخوالي. اهل أمي تطفو عليهم روح الدُعابة والعفوية المطلقة وعدم التكلف في الكلام على خلاف اهل أبي حيث يطغى عليهم طابع الإنضباط والخطوط الحمراء والصفراء التي لا يجرأ ان يتخطاها احد. تناولنا وجبة العشاء وبدأت البتروكولات تتلاشى شيئا فشيئا حتى اختلطت الغرفة رجالا ونساء واطفالا. كثرت القهقهات والنكات إلى أن تعب الجميع ووصلنا للحظة فراغ temps mort, وعادة ما يستغل الجمع طفلا ليملأ هذا الفراغ بطلب عجيب منه كأن يسأله ان يصرف فعل pondre للمضارع ليضحك عليه الكبار بشكل سادي عندما يقول je ponds. هذه المرة سأل احد اخوالي ابنت خال التي تصغرني بسنة بأن تخبر الجميع أيهم اكثر شخص تحبه بين الجمع. بدأت ابنت خالي تقترب من صف الرجال وتتفحص ملامح كل رجل حتى تدلي برأيها. تقدمت ببطئ إلى ان وصلت إلي وقالت "أنا نبغي عبد الرحيم" وارتمت في احضاني فانتابني شعور الذعر والخجل واحمر وجهي وانا احاول صدها. انفجر الجميع بالضحك وانا في حالة غثيان. من يومها ووالداي يُلاطفاني بالموضوع ويقولان أنك ستتزوج فلانة عندما تكبر وأنا اغضب من كلامهم. كنت ارد دائما "شفتوني ماشي زين عليها بغيتو تزوجوني لفلانة". الواقع ابنة خالي كانت مشاكسة وطائشة وبها شيء في عقلها ولكنها كانت شديدة الجمال. تكررت محاولات التحرش منها في محطات اخرى كدعوتها لتبادل القبلات ولكنني كنت ارفض دائما واتهرب منها. عندما كبرت اصبحَت اكثر جمالا وانضج عقلا واضحت صفقة الزواج اقرب للجد من الهزل حتى انقطعت الــأنظار بيننا منذ اكثر من 19 سنة.

 

[إلياس]

لي عودة ان شاء الله للموضوع

 

[Andy_Delort]

/
ههههههههه
خوك احد ضحايا الارهاب تسمى هههههه
طلعتيلي المورال من جهة لاني منيش وحدي المقصوف ... المهم والواعرة هنا خوك كي كان حاكم سيريو وضرباتو برونفوا ههههههه
ايا لهنا نقولو بلي في وقتنا الحالي كاين حالات كثيرة تمثل ردة العل اع الاطفال بهذا الكيف ... وغالبا تكون سببها تحذير المستمر من الاباء لابنائهم ... . وهي على كل حال حاجة مليحة مالم تتخطى جانب تقليل الادب او شيء من داك القبيل ... لحين يبلغ الطفل من الكبر ما يؤهله لتميز الخطأ من الصواب وبين الاشخاص والاقارب وحتى الغرباء وردات الفعل وهكدا ...

مشكورة اختي سناء كلعادة مبدع ومتأقلة .. ربي يخليلك ولادم وتربيهم فالعز ان شاء الله ...​

 

[الامين محمد]

هههههههه اختي مريم مهبولة و بنتها اهبل منها هههههههه
و الخال اخذ الدرس في الشارع

ربي يبارك ليك في البنوتة و في اولادك و ربي يحفظهم و يسعدهم