عاونوني او ساعدوني

[نجمة ساطعة]

سلام واشش هو سر نجاح خبز دار نتع فرنية اه حاب كيما نتع حانوت

 

[ندى الورود]

شوفي اختي خبز الدار تاع برا يخلطو فرينة + سميد
وثاني يحطو محسن الخبز تحطي غير ربع مغيرفة صغيرة منو
يدير مفعول عجيب للخبز يجي رائع
​

 

[كوثر الوهرانية]

مساء الخيرات و البركات
شوفي هدي الوصفة راني مجربتها مرار و تكرارا و تجيني هايلة
https://www.4algeria.com/forum/t/277760
اتمنى ان ان اكون قد افدتكي

 

[نجمة ساطعة]

انا نديروا بصح قاع ماجيش مليح

 

[ندى الورود]

شوفي هاذي طريقتي تاع خبز الدار
1 كلغ سميد أو تخلطي نص سميد ونص فرينة
كاس تاي زيت
كاس حليب دافئ
2 مغارف قهوة ملح
مغرفة كبيرة سكر
1 مغرفة كبيرة خميرة فورية
ربع مغرفة قهوة محسن الخبز ( يباع في المحلات) 100غ ب 50 دج
ماء عادي دافئ
بيضة
2 ملاعق ماء زهر
التحضير :
أولا نحطو السميد أو الفرينة + السميد نزيدو السكر والمحسن والخميرة والملح ونخلط
ثم نضيف الزيت ونبسس مليح ناخد البيضة نخلطها مع كاس حليب دافئ + ماء الزهر
ونضيفه للخليط الأول ونخلط ونكملو بالماء العادي حتى نتحصل على عجينة متماسكة
ماشي جارية نغطيها بقطعة قماش نظيفة ونخليها تختمر لنصف ساعة أو أكثر
ضرك بارد الحال يلزملها أكثر من نص ساعة ممكن ساعة
وبعدها أعجنيها لمدة 15 دقيقة بعد 15 دقيقة ابداي ضييفي الماء دافئ بشوي
حتى تتحصلي على عجينة طرية بزاف ندهن العجينة بشوي زيت ونحطها في قصعة
ونغطيها بنيلون ونخليها تختمر مرة ثانية لنصف ساعة بعدها رايح يتضاعف حجمها
نحاول نهبطها بشوي ونقسم العجينة إلى قسمين
نجيبو صينتين الي نطيبو فيهم ندهنوهم بشوي زيت ونبسط العجينة فيهم
على شكل أقراص ونغطي الصينتين بنيلون ونخليها تخمر مرة ثالثة
حتى يتضاعف الحجم تقريبا نص ساعة
وبعدها نأخد صفار بيضة نخلط معاها شوي حليب وندهن السطح
وندردر جلجلان مع سانوج من فوق ونحاول نعمل ثقوب بعود أسنان من فوق
باش ما تتنفخش الخبزة كي نطيبوها
ونكونو سخنا الفرن على 200 درجة وندخل الصينية في الرف الاوسط
ونخلي الخبز يطيب تقريبا لمدة 20 إلى 25 دقيقة انت راقبي الطياب تاعو
ولا رايح يتحرق كي تشوفي السطح حمار شوي
طفي الفرن من تحت وشعلي من فوق لفترة قصيرة
باش برك يحمار الخبز من فوق بلا ما تخليه يتحرق لازم تقعدي بحداه او بالخف يحمار
وتراقبي وبعدها نحيه وخليه شوي وانزعيه من الصينية
ان شاء الله تجربيه ويجيك مليح




​

 

[ندى الورود]

تمت المساعدة يغلق الموضوع
​