واش رايكم في واش دارت قناة النهار بشرف بناتنا

[أمــ وليــد الجزائرية]

واش راكم يا حباب اللمة لعزيزة

مدة مكتبتش هنا و صح هاني توحشتكم بزااف

و توحشت نكتب

المرة هذي جيتكم و قلبي واجعني

سمعتو كامل بالكارثة الي حطتها قناة النهار عل بنات الجامعة

و الي خلا اكل يتهول و يندب و يقول بناتنا بعثناهم يقراو

و لا بعثناهم لحاجة اخرى

علبالنا كامل انو هذا الشيء مش صحيح و تهمة باطلة :-o مي الناس ماتفهمش

كاين الي لقاها سبة باه يزيد يوسخبناتهم و كاين و كاين

و الي يقطع القلب هذا العنوان الي حطاتو القناة في التصريح ديالها


"عندما تتحول طالبات العلم لطالبات الهوى"

لمن لم يشاهد ربورتاج النهار:

ميعرفوش انو هنا هدرو على شرف لبنات الجمعيات اكل :-o

علاه مخموش في الي خلاو ديارهم و تحملو التمرميدة تاع البرد و الماكلة مكانش و لعذاب و المزيرية و مساكن تحملو و قالو المهم نكملو و نخرجو شوفو واش لقاو

درك نقولو كاين عينة خامجة مثلا هذا ميعنيش يجملوهم كامل

علاه ميحوسوش يدرسو القضية بصمت و يحوسو اين هو الخلل ؟ ويعالجوه

علاه ميقولوش وين راهم المسؤولين ؟

نعرفو كامل انو درك في الاقامات الجامعية وحدة عمرها مقرات تدخل لثماك

و حتى انو محكاوش بصفة عامة

علاه حتى يقولو اسم الاقامة ؟ و يشوهو سمعة لبنات كامل؟

درك هذي القضية ادات انو بعض العائلات تجي تدي بناتهم نهائيا من الجامعة

خاصة ناس الصحرا الي شافو الاعلان و قالو بناتنا درناهم يقراو و هوما في مزبلة ؟

علاه ديما الفضائح كما هذو الي يخمجو لبلاد ؟

وعلاه منحوسوش نصلحو علاه ديما نفسدو و نخلقو فتن بيننا ؟


واش رايكم يا ناس اللمة ؟

و لا نتوما ثانيك صدقتو الي راه ملفق على بناتنا ؟ و رحتو في الخط معاهم ؟


ربي يهدينا اقبل مايدينا

و ربي يجيب ساعة الخير

و ربي يرجع حق كل مظلوم في هذي الدنيا

تهلاو في روحتيكم


كانت معاكم

mlina4algeria

​

 

[Ma$Ter]

رد: واش رايكم في واش دارت قناة النهار بشرف بناتنا

السلام عليكم ورحمة الله وبركاته
اختى هذاك الفيديو فقط لجلب المشاهدين على حساب شرف الجزائريات
وكيما قلتى انتى
'كاين عينة خامجة مثلا هذا ميعنيش يجملوهم كامل '
الجامعة منذ الازل معروفة فيها الصالح والطالح ويصرا فيها العجب
والكوارث كامل
بصح مشكلة القناة هاذى انها تبين الا ف الجزء السلبي
وتكلمت على البنات والخمر وو فقط لانها مادة دسمة اعلاميا
ربى يجيب الخير وخلاص
بارك الله فيك اختى على موضوعك المميز وطرحك الرائع
بالتوفيق

​

 

[Ma$Ter]

رد: واش رايكم في واش دارت قناة النهار بشرف بناتنا

شوفى رد قناة النهار فى الفايس

​

 

[zagane]

رد: واش رايكم في واش دارت قناة النهار بشرف بناتنا

السلام عليكم

هادا واقع الجامعات والصور والفيديوهات راهي تملا النت مشي حتى جي النهار وتوري الدليل
لكن لا يمنع وجود محترمات ولكنهم قليلات ربي يحفظهم من الانحراف

 

[فتاة حساسة]

رد: واش رايكم في واش دارت قناة النهار بشرف بناتنا

اهلا ميلينا واش راكي ...سبقتيني فالموضوع ..
شفتي شفتي ..دارو حالة ..والله بصح عيب عليهم ..ماش قاع بنات القامة فالجامعة ماش ملاح ..
علاه ماراحوش نعتو الحوايج اللي ملاح ..كيما تحكيلي ختي كاين فالاقانة اللي يروحو باه يحفظا القران مع بعض وكاين اللي يتسبقو للمصلى ...
كاين بززاف حوايج ملاح ..والشي الي هدروره تاع قناة النهار راهم غير ينعتو فالحوايج اللي ماش ملاح ..وكامل كنا علابالنا باللشي هادا الي يصرا فالاقامات ..
انا بالنسبة ليا كل واحدة يجبدها أصلها ..والله يا لوكان يبعثوها للاوكسفورد ..
شفتي اوليو اللي يلقاو الحل راحو زادو الطين بلة ..
ربي يحفظنا ويسترنا وربي يهديهم هادا ماكان ...
لا حول ولا قوة الا بالله ..
​

 

[ملكًة الاحسآس]

رد: واش رايكم في واش دارت قناة النهار بشرف بناتنا

وعليكم السلآآآم
أهلآآ بملينآ الي جآت وجآبت
شخصيآ ماشفتش الروبورتآج ، مع النت مكآنتش عندي قعدت خآرج مجال التغطية
والبآرح عيطت لاختي الي تقرى في جآمعة خآرج ولآيتي
يعني حتى هي فالاقآمة بقينآ نحكيو قالتلي شفتي النهآر وآش دآرت ووآش قآلت
وحكآتلي على الروبورتآج هدآ ، قالتلي البنآت كآمل يهدرو غير على السوجي هدآ
قلتلهآ الاعلآم هدآ هكدآ منين يلقآو نقطة مش مليحة يسلطوو الضوء عليهآ والكآرثة يعمموهآ
ونسآو بلي بالروبورتآج هدآكـ رآيح يخلق مشآكل لبنآت سوغثو للي أهلهم مش متفهمين
ومتشددين شويآ
كآمل نعرفوو التخلآط الي يصرى فالجآمعة وفالاقآمآت خآصة وتقريبآ في كل pــآvـيون
نلقآو شآمبرآ ولآ زوج تآع هآد النوع من البنآت ، هدآ يعني أنه الاقآمة كآمل هكدا ؟؟
المسألة مسألة تربية ووعي هدآ مآكآن الطفلة الي مربية ووآعية يآلوكآن يحطوهآ في شآمبرآ وحده معآهم
تبقى هي هي مش رآيحة تتبدل لآ فالقامة لآ في بلآصة أخرى
والوآلدين الي يعرفوو بنتهم ويعرفوو تربيتهم كفآه دآيرة ثقتهم ببنآتهم مش رآيحة تتهز بروبورتآج كمآ هدآكـ
ربي يستر على خوتآتنآ وبنآتنآ وكآمل بنآت المسلمين يآربي

​

 

[جولان]

رد: واش رايكم في واش دارت قناة النهار بشرف بناتنا

سلام
أنا اقيم بالحي الجامعي بولاية البليدة و الحمد لله ماكاش مرة في هاد الثلاث سنوات صادفت واش شفنا في قناة النهار
صح كاين بنات يتكيفو الدخان بصح هادو جاو من ديارهم هاك كاين شي ولايات في الوطن عندهم هاد الامر عادي
وزيد الحمد لله كاين مصلى داخل الاقامة وين نصلوا و نقراو القرآن و نشاطات كثيرة تقوم بيها لجنة المسجد في جلب الائمة وباش يوعيو البنات
وزيد لي حابا تشرب و دير حوايج عيانين علاش حتى تبقى داخل الاقامة دخرج برا وين كاين هاد الشي و بمتعة اكبر
وزيد مانكذبوش على رواحنا كاين آجو يقر بواش راهو يدير لصحفية ماتتمسخروش بينا...........
و البنت مادام كانت شادا في دينها و في أخلاقها في دار باباها ما ينخافش عليها
وبعد الشي لي صرا درك واحد ولو كان يثيق في بنتو يخاف يبعثها تقرا بعد شيء لي شافو .......
المرة الجاية المفروض يحكيو ثان على الشيء المليح لي كاين في الاقامات
و حتى لو حبينا ننتقدوا و نغطوا النقائص ماشي بهاذ الطريقة
ماتروجوش للقناة باللعب بشرف البنات
ولي حابا ولا حاب يعرف أي شيء جيد و لا يقدر يسقسيني و نجاوبوا عادي ............

 

[شجـ الروح ـون]

رد: واش رايكم في واش دارت قناة النهار بشرف بناتنا

السلام عليكم ورحمة الله تعالى وبركاته
ماش راح نعلق عالموضوع في حد ذاتو
برك عندي تعليق من جانب آخر
أنا دخلت الاقامة وعمري ماش لاحق 17 سنة
ماكنتش ملتزمة بأمور الدين وابسط شيء الصلاة مئة بالمئة
كنت ناخر ونجمع ووو ونوصل حتى ننسى أعوذ بالله
تعلمت فالاقامة انو الصلاة اولى من كلشي
تعلمت نصلي الفجر فالمصلى
تعلمت نحضر الحلقات والخطب والمحاضرات الدينية
كنت أنانية نوعا ما وجابدة روحي
تعلمت كيفاش نكون اجتماعية كيفاش نعيش مع الناس
كيفاش نتقاسمو اللي كاينة بلا حسابات
تعلمت حرف وأشغال يدوية عديدة من بنات الاقامة
تعلمت الطبخ بانواعه
تعلمت الحلويات
دخلت ماش ملتزمة كليا بالحجاب
غرت من البنات ولبست الحجاب الشرعي
ووو هذا جانب بسيـــــــــــــــــــــط من واش هزيت من الوقت اللي عديتو فالاقامة
والحمد لله تفوقت في الدراسة الى جانب هاذ الشي الكل
هذي شهادة مقيمة سابقة بحي جامعي
كيف اللي حكا عليه الروبورتاج
واللي بسبب تعميمو قلبو مرتع لفساد الأخلاق
وتسبب في حرمان العشرات من البنات يكملو قرايتهم
فلا حول ولا قوة الا بالله العلي العظيم
شكرا ميلينا
ربي يحميك ويحمي بناتنا الكل
​

 

[FATIMA 19]

رد: واش رايكم في واش دارت قناة النهار بشرف بناتنا

السلااااااام عليكم
أنا لحقت روطار بالخبر حتان جات ليا واحدة قاتلي الجامعاتفسدو البنات فسدو و ................كي استفسرت على المصدر قاتلي النهار.
أنا من بكري ديما نسمع على الجامعات و البنات و نظن ماهيش حاجة جديدة علينا .
وكنت ديما نسمعهم يقولو الاقامات موسخين مي انا راني مدايرة الاقامة و الحمد لله جامي شفت حاجة مش مليحة.
وأكيد لازم كاينين البنات اللي منحرفات مي مالازمش يجمعو علينا كاملـــــ.
وانا نقول مادام كاين في الدنيا الشر كاين الخير وكاين الصالح و الفاسد وكاين المنحرف و التقي.
ومادام زليخة كانت تحوس تفتن يوسف عليه السلااااااااام في زماننا هذا ثاني كاينة بزااااااف كيما زليخة
و مريم عليها السلام قالت كيفاش نجيب ولد ولم يمسسني بشر في وقتنا ثاني بنات عذراوات كيما مريم.
و أنا الحمد لله نتاع دارنا متفهمين وخاوتي كامل قراو في الجامعة وعلابالهم واش كاين فيها وماعندهمش حتى مشكل كي نقرا في الجامعة
لأنهم علابالهم بلي متربية و واحد ما يلعبها عليا
وان شاء الله ربي يستر البنات كاملـــــ
واللي يهدر عليهم بسوء راه يلحق.
وسلاااااااااااااااااااااام.

​

 

[احلامdz]

رد: واش رايكم في واش دارت قناة النهار بشرف بناتنا

اسكتي برك ياختي كنت رح نكتب على هاد الموضوع لقيتك سبقتيني كان تشوفي البارح انا نتفرجت التقرير بالتخبية على داارنا لخرا اختي شافتو وراحت للكوزينة قالتلهم عليه من بعد خاوتي حلفو فيا قاتلي ماما قالولك والله يا المدرسة العليا تع الجزائر يلا تروحيلها غير تقراي هنا في البويرة ومع الاسف تبخخخخخخخخخخخخخخخخر حلمي وهو ان اصبح استاذة تع العلوم الطبيعية ومع الاسف في البويرة كاينة غير الشعب الادبية +البيولوجيا وانا منيش حابة نقراااااااااااااااااااااهااااااااااااااا راني في حالة كان تشوفي يالختي والله ماني نكذب عليكم

 

[serinee]

رد: واش رايكم في واش دارت قناة النهار بشرف بناتنا

أهلا ملينا مشكورة على الموضوع
صرااااحة الموضوع ما عجبنيش كامل ما عرفوش كيفاش ينقاشه و كيفاش يعالجه و هذا القناة فقدت مصدقياتها
و الضحية بنات فاميلية راحو في الخط
وعلاش ما حوسوش يعالجو الموضوع من زاوية اخرى
هذا العفايس ماشي شرط تكون في الاقامة باش تخرج و دير هكذا
رانا نشوفو بنات قاعدين في الدار و دايررين رايهم القضية قضية أخلاق و تربية
​

 

[الزهرة الحمراء]

رد: واش رايكم في واش دارت قناة النهار بشرف بناتنا

السلام عليكم اختي
صح كيما قال خويا ماستر قبلي داروها باه يجيبوا نسبة مشاهدة كبيرة هذا ماكان وصح ماشي كاما بنات كيفكيف
وزيد اختي تاني قالك ان لم تستحي فافعل ماشئت كاين بنات هردوها ادير في حوايج العوج وزيد تفضح في روحها
ونشفالها مرة انو فالنهار مرة دارو حصة على الاجهاض وبداو يحكوا يعني مولاتش قناة عائلية حتى دخل بابا لقاني نضوف انا ويما واختي هدر مع يما وقالها حبيتي تشوفي روحي لشومبرة تاعك وشوفي انا حشمت ملقيتش وين نخبي وجهي
ربييهدينا ويصلحنا لحوال
تقبلي مروري

 

[روز]

رد: واش رايكم في واش دارت قناة النهار بشرف بناتنا




الأمر مشبك فعلا
قناة غير ناضجة تتكلم في أمور أكبر من تاريخها المهني
كان يلزمها مهنية أكبر باش تدخل وتحكي على سوجي كما هذا
لأنه فيه مؤيد وفيه معارض
المؤيد عندو الدليل والمعارض عندو الدليل

في لي استنكر هذ الشي لأنو لانو ضيع مستقبل بنات وأحلام وطموحات
وفي لي أيدو لانو فعلا لازم يتحط حد لهاذ المهازل وانو لي يصير حقيقي حتى لو قناة النهار كذبت
رانا قرينا في الجامعة وشفنا هذ النوع من البنات

المشكلة كلها في طريقة تناول القناة لهذ الموضوع
ولي أثبت عدم مهنيتها وأنها مازالت صغيرة على موضوع كما هذا
لأني أنا شخصيا لو نشوف هاديك المناظر وتكون عندي بنتي تم نطلب منها ترجع فورا

نرجع ونقول طريقة طرح ومعالجة الآفة خاطئة جدا جدا
وطاقم عمل الروبورتاج هدفه عمل ضجة على حساب أشياء كثيرة بما فيها سمعة القناة

 

[majnouna mery]

رد: واش رايكم في واش دارت قناة النهار بشرف بناتنا

قناة النهار واش ورات عندها الحق حبت برك توري للناس واش راه ساري و للوالدين بالذات .النهار مقالتش كامل لبنات مي قالت البعض و من عندي انا عندهم الحق كي دارو هاذي الحصة احنا مانقولوش بلي هادي النهار راهي تجبد من عندها خلينا نقولو هادي الحصة حصة توعية للبنات و الاهالي فقط​

 

[✿أسيـل✿]

رد: واش رايكم في واش دارت قناة النهار بشرف بناتنا

السـلام عليكم
ياو رانا علبانا وش راه صاري فالجاميعـات مش حتى تجي نهار وتورينا
من حق الناس تعرف وش راه صاري فالجاميعـــــــات

رانا نشوفو لعجـب لمعجـب والله كارثــة كارثـة بنات يدخنو ويشربو ويسهرو وين راحت لحشمــــة والديها حاسبين بنتهم اي تقرا رح تجيبلهم ديبلوم بفففففففففففففففففففففففففففففففف على بنات درك لهوا لي يجي يديهم
اي كاين بنات أصل ومحترمات ويخافو ربي بصح قـلال ربي يحفظهم ويسترهم
تجي عينيها مغمضين غير تدخل للجاميعة ينحلو
مكاش رقابــــة .. كيفاش ولاد ماعندهمش علاقة فالجاميعة يدخلو للإقـــــــامة تاع بنات ..
كيفاش يسهرو معاهم ..
انا عن نفسي ماقدرتش نشوف تبهديلــــــــة


ربي يبعد علينا ولاد لحـرام
والله يسترنا
​

 

[AmiR@RoRo]

رد: واش رايكم في واش دارت قناة النهار بشرف بناتنا

انا مفهمتش وعلاه راكم زعفانين ياخي يقولك الي ما في كرشو تبن ما يخاف مالنار وهذه حقبقة مش كذب لانو هاد الشي سمعنا عليه بزاف قبل ما تجيبه قناة النهار بنات يقراو يحكيو لنل العجب واش صاري في الجامعات وانت تحوسي تقنعينا انو هاد الشي كذب
وهما قالو فالاخير واكدو انو هذه عينة وليس الكل وانتما ما حبيتوش تفهمو اذا راكي متاكدة انو كذب وتلفيق هاتي الدليل
وانا نعرف كل من ازعجه هذا الموضوع فيها ان والفاهم يفهم
الله يهديك ويهدينا جميع دايما الحقيقة توجع ونقولك وناكدلك ان مقدمة الحصة اكدت كم من مرة ان هناك بنات عائلات وماشي كلهم كيف كيف كما قالو هما الي زرع الورد يلقى الورد والي زرع الشوك يلقى الشوك​

 

[♥♥سارة♥♥]

رد: واش رايكم في واش دارت قناة النهار بشرف بناتنا

كلامك كله صحيح و لكن هذا واقع مر نعيشه و الفضل يعود الى السلطات التي لم تقم بدورها كما يجب و الله القلب يحزن لسماعنا مثل هذه الامور و لا يجب على قناة النهار نشر مثل هذه الامور لتشويه صمعة الجزائريات و لتشويه صورة الجزائر كان يجب حل المشكل بكل سرية و اضيف امرا ان هذا كله صحيح و المتورطون في هذه الامور لديهم ايدي في السلطة لهذا آل الامل الى هذا الانحطاط كله و انا سمعت الكثير من ابنة عمتي التي بدورها تقيم في سكن جامعي و الله ان الامر لا يصدق تظن انك تعيشين في كابوس
كلمة الاخيرة لو قامو بتطبيق منهج الرسول لما وصلنا الى كل هذه المشاكل الغرب بدوره وجد الحل في الاسلام و بدا في تطبيق منهجه و نحن الان نتبع مجرد فضلاتهم
و اخيرا الله يستر هذا البلد و يهدي شبابه الى الصراط المستقيم

 

[AmiR@RoRo]

رد: واش رايكم في واش دارت قناة النهار بشرف بناتنا

بارك الله فيك على هذا الرد يا سارة

 

[larose]

رد: واش رايكم في واش دارت قناة النهار بشرف بناتنا

ربي يجيب اللي فيه الخير القناة مكدبتش قالت الصح و الحق ف لبنات هدو و ايضا ف العايلة اللي مخليا الطفلة مصورة وعندها قائئمة الممنوعات ف الدار متروحيش مديريش متخرجيش ووووو القائمة مفتوحة ب ما ما ما . المهم حنا منحطوش الحق عل لبنات و لا العايلة فقط مي حتى المسؤولين اللي هما الكارتة صدقوني انا كنت ف اقامة جامعية لبنات هدو يديرو ف لحوايج توصل بالبنات الفاميليا انهم يشكو للمدير غير انه لا حياة لمن تنادي الدير ف صفهم الى من رحم ربي و اللي عندو اعتراض يتفدل مي هدي هي الحقيقة ادا شاف المدير انو خلات يرج لبنات هدو سمانة و يرجعو وخلي وخلي شفت بعيني مش واحد اللي قالي
كل واحد و دروفو و لبنات هدو لقاو الظروف مناسبة ف الاقامات امالا واش يستناو ....المشكل لكبير راه ف الدراهم اي وي الدراهم اللي دارو المنكر هدا ايضا الرجال او لولاد مفتفهمونيش غلط مي هدي هي الحقيقة يشوفو واحدة مسكينة على اد حالها يستغلوها يا التروويج للمخدرات او يحوسو على طفلة معينة ينتقمو منها اواو
وكلش يرجع للتربية و الاخلاق الاقامة كيما فيها الطالح فيها الصالح و مكان لاه يفوفو ف بنات الاقامة خاصة بعين واحدة
مي اللي داراتو النهار واقع اليم لمسلمات عربيات ولكن التكنولوجيا هبلت الناس واحد مايلوم واحد و لكن هناك خلل في العنوان اللي هو ف هد داتو تبهديلة و هدو هما الاقامات و الجامعات انا و ختي الحمد لله كنا نحكيو لدارنا و اش صاري متفهمين شوي مي .... روحو تشوفو الخليج تنساو حكاية النهار
ربي يستر بناتنا و اخواتنا وربي ينتقم من كل اتم

 

[shahrazad]

رد: واش رايكم في واش دارت قناة النهار بشرف بناتنا

سلام عليكم
البارح شفت هاد الروبورتاج فاليل صدقيني تقلقت وماقدرتش نرقد
استفزوني لدرجة كبيرة
فعلا هاد القناة ماعندها حتى مبادىء ولا اخلاق اعلامية ولا حتى مستوى
بنات صغار يعالجو موضوع كيما هدا بطريقة غير احترافية
انا عشت فالاقامة الجامعية فالبليدة 4 سنوات وصح كاين هاد الظاهرة مناش نقولو مكاش لكن الطريقة الي ورات بيها النهار الاقامة الجامعية خاطئة 100 بل100 بينت بلي كل البنات الاقامة هكدا وماتقولوش قالت البعض لااا قالت البعض راهم محترمات يعني الاغلبية منحرفات !!!
وهذا خطأ كل البنات الي عاشو فالاقامة يعرفو بلي كاين 3 او 4 غرف في الاقامة كلها الي تحمل الاف من الجامعيات فيها هاد الظاهرة
يعني الاقلية وانا نعني مليح كي نقول الاقلية
علاش ماوراتش الجانب الاجابي من الاقامة الجامعية؟؟من مصلى ومكتبات ومحاضرات دينية وتربوية ومن مهرجانات ثقافية ومن حملات لتوعية الفتيات وشراء حجابات للبنات وحتى كاين الي دخلو الاسلام في الاقامات الجامعية
علاش معظم تصويرها كان يبين انو البنات راهم في سكنات مشبوهة وليست اقامات جامعية !!
كل بنت تخرج من سيارة يصوروها على انها خامجة ويركزو عليها التصوير وين علابالهم هدا خوها هدا بوها هدا راجلها خطيبها
انا كان يوصلني بابا ولا خويا يعني لو جات صورت النهار كانت صورتني وبينتي منحرفة !
فعلااا مالقيت واش نقول
وزيد وين راهي الاخلاق ياصحفيات ونتوما تتجولو فالاقامة وتصورو بنات لا علاقة لهم بالظاهرة وبدون علمهم
وين راهي الاخلاق ونتوما تقولو احتراما للمشاهد مصورناش لانو البنات كانو لابسين كدا وكدا ؟؟ واش حبيتو لبنات يلبسو وهما وحدهم؟؟
اه اسمحولهم ماعلابلهمش بلي كاين اشباه صحفيات ممكن يدخلو ويصورو
لوكان نكمل نهدر والله منحبس
ياصحفيات بهذا الطرح الصبياني نتاعكم لهده الظاهرة راح تتسبو في فقدان ثقة بين الاهل وبناتهم الي ساكنين فالاقامة رايحين تتسببو في ضياع بزاف بنات رايحين يبطلوهم اهليهم من الجامعات لانو انا لو ماشفتش الاقامة وشفت هاد الروبورتاج رايحة نخلع ونقول صح
انا في رأيي لازم يشارعو هاد القناة على هاد العمل الغير اخلاقي

وكيما قالت روز بينت قناة النهار بلي راهي صغيرة بزاف على طرح هاد المواضيع
​