أحلآمُ مستقبليةَ ~ حلمُ قيدَ التحقيـقْ {2} مع الضَيْف حَكيم ستُوري

[لؤلؤة قسنطينة]

السلام عليكم و رحمة الله تعالى و بركاته
واسعد الله أوقاتكـــم
~بطلب من أختي الغالية عاشقة الجنة سأطرح هذا الموضوع المتميز نيابة عنها~

فبعد ما عرضنا عليكم فكرة جديدة تحت عنوان : { جديد } : أحلآمُ مستقبليةَ ~ حلمُ قيدَ التحقيـقْ
و التي لم تلقى تفــــــآعل كما يجب لكن اهم الاعضاء و المشرفين و الادرايين تفاعلو مع الفكرة
نرجو أن تجد التفاعل اللازم من خلال هذا العدد

نلتقي معكم في الجزء الثاني من هذه الفعالية مع الضيف الثاني و هو الاخ hakim story و بالتأكيد هو عضو غني عن التعريف
لكن مع كل عام ومع كل ساعة اضافية في حياتنا تتجدد طموحاتنا واحلامنا وآمالنا
وسنحاول من خلال هذا العدد ان نتعرف على أحلام هذا الأخ و طموحاته و تطلعاته التي نسأل الله ان يوفقه فيها

واليوم بعد ظهور نتائج التصويت كان من ضمن الفائزين العضو @hakim story

و هو ثاني ضيف في فعالية أحلآمُ مستقبليةَ ~ حلمُ قيدَ التحقيـقْ

بعد الاخ skor m@k

كما طرحنا سابقا فكرة الموضوع تدور حول

التعرف على طموحات العضو و اهدافه و احلامه المستقبلية
سواء التي قيد التحقيق او التي لازالت مجهولة

و اليوم سنتعرف على نظرة العضو لحياته المستقبلية اهم المشاريع التي يعمل على تحقيقها مستقبلا
ماذا يعني المستقبل له { تكوين اسرة . الحصول على عمل . السفر . الدراسة . الحج ........ الخ }

فتفضلوا يا اعضاء
اطرحوا اي اسئلة شئتم على ثآني ضيف لـــهذا العدد و هو من اهم أعضاء اللمة الأخ حكيم ستوري


في امـــــــــــــــآن الله
بالتوفيق

​

 

[Hakan]

وعليكم السلام بارك الله فيكم على الاستظافة ان شااء الله نكونو خفاف عليكم واي اسئلة مستعد نجاوب عليها ان شااء الله
​

 

[طموحة]

السلا م عليكم
أسأل الله أن يعين الأخ حكيم على تحقيق طموحاته مسبقا
وبداية أسأل هل يؤمن الأخ بأن صفحة طموحات قابلة للتجديد يعني أن يرى لنفسه طريقا غير الذي بدأ فيه ان علم أنه أحسن أو لظروف معينة
وهل أثناء تلقيك صعوبات تكون طموحاتك حافز للمقاومة أم أنها تثقل كاهلك حيث تراها بعيدة
أكتفي بهذا القدر في الوقت الحالي

 

[AmiR@RoRo]

السلآم عليكم
هادي اول مشاركة ليا فهاد السلسة تاع احلام مستقبلية كاش غلطه فوتوها برك ههه
مرحبا خويا حكيم ان شا الله تكون بخير
بصفتك تدرس بيطرة اسكو تخمم تفتح عيادة خاصة ؟
عندك استعداد تكمل دراستك بالخارج ؟
ادا جاتك فرصة خدمة خارج اطار دراستك وتكون بمواصفات يُحلم بها تقدر تخلي دراستك وتلتحق بها ؟
الهدف لي حاطو بين عينيك واش هو ؟ وهل داير برنامج خاص للوصول اليه ؟
اهدافك في الحياة ككل باختصار ؟
قعدة موفقة خويا حكيم
الله يعاونك

 

[لؤلؤة قسنطينة]

السلام عليكم
شكرا على الاعتماد اولا
واهلا بيك خويا حكيم كضيف معنا في هذه الاستضافة الطيبة
ان شاء الله تكون اسئلتنا خفيفة ظريفة وتكون مرتاح معانا
وكافتتاح رايحة نسألك الاسئلة لي سالتها على الغالية سكون الفجر
ولي عودة عودة ان شاء الله بمزيد من الاسئلة
بسم الله
عندما تتبادر كلمة حلم لذهن خونا حكيم ماهو اول حلم او فكرة تجي في بالك مباشرة؟
وماهو اكبر طموح لدى خونا حكيم؟
وهل خونا حكيم يهتم بتحقيق احلامو اولا او بتحقيق أحلام احبائه قبل احلامه سواء كانو عائلة او اصدقاء
مجرد اسئلة بسيطة لي عودة ان شاء الله
بالتوفيق
​

 

[Hakan]

السلا م عليكم
أسأل الله أن يعين الأخ حكيم على تحقيق طموحاته مسبقا
وبداية أسأل هل يؤمن الأخ بأن صفحة طموحات قابلة للتجديد يعني أن يرى لنفسه طريقا غير الذي بدأ فيه ان علم أنه أحسن أو لظروف معينة
وهل أثناء تلقيك صعوبات تكون طموحاتك حافز للمقاومة أم أنها تثقل كاهلك حيث تراها بعيدة
أكتفي بهذا القدر في الوقت الحالي

وعليكم السلام الطموحة تسئل عن الطموح
اولا نعرفو شويا الطموح واللي هو صناعة الحافز لبلوغ القوة يعني يطمح انسان انو يكون رئيس العالم او انو يكون رب اسرة وتختلف طموحات الناس على حساب مقومات شخصية الانسان
واجابة على سؤال توجد صفحة او مجموعة من الاشياء يطمح اليها الانسان يستطيع الابقاء فيها على البعض كما يستطيع حذف الآخرى منها لانو ممكن يتغير الطموح سواء بضعف الهمة او متغيرات الحياة اليومية
اللي ممكن يستسلم لها الانسان ..
نعم كثيرة هي الطموحات الخاصة بي لكن قليلة التي تم انجازاها بسبب غياب القوة والدافع الداخلي وكذا ايضا العامل النفسي الذي يتأثر بالعامل الخارجي المكن من الاسرة والمجتمع ككل
لكن حذف بعض الطموحات لا يعني عدم عودتها الى القائمة لانو مادام النسان يتنفس فبوسعه الانطلاقة ولو بقي من العمر ايام بارك الله فيك
اما الشطر الاخير فقد اجبت انو يمكن ان تكون الصعوبات حاجز للتوقف عن الحلم او العمل عليه لكن لا يمكن ان تكون عائق دائم فقط يجب التمهل وعادة التفكير ثم الانطلاقة من جديد
لانو بعض الصعوبات تفتح عينيك للنظر من زاوية اخرى ​

 

[Hakan]

السلآم عليكم
هادي اول مشاركة ليا فهاد السلسة تاع احلام مستقبلية كاش غلطه فوتوها برك ههه
مرحبا خويا حكيم ان شا الله تكون بخير
بصفتك تدرس بيطرة اسكو تخمم تفتح عيادة خاصة ؟
عندك استعداد تكمل دراستك بالخارج ؟
ادا جاتك فرصة خدمة خارج اطار دراستك وتكون بمواصفات يُحلم بها تقدر تخلي دراستك وتلتحق بها ؟
الهدف لي حاطو بين عينيك واش هو ؟ وهل داير برنامج خاص للوصول اليه ؟
اهدافك في الحياة ككل باختصار ؟
قعدة موفقة خويا حكيم
الله يعاونك

-اهلا بك اخت اميرة تعرفي يعني للصراحة وتعرفيني صريح شحال توحشت نشوف مشاركاتك او بالاحرى توحشت نتلاى بيك في كاش موضوع ههه ايا معليه ربي يسهلك :
يعني بخصوص دراستي يعني اي واحد يدرس بيطرة الا ويخمم في عيادة خااصة بيه خاصة خاصة اذا كان محترف شويا في دراستو وكذالك لازملو شويا صبر ..
-بالنسبة للدراسة في الخارج مااهيش قضية استعداد انما هي قضية امكانيات وكذا ايضا مستوى الانسان حاليا نقدر نقولو انو راني بعيد عن الدراسة في الخارج لكن ايضا
ما نقولش انو من بين اهدافي الدراسة في الخارج او بالاحرى العمل في الخارج كرهنا الدراسة خيتو ههه
- العمل شيء والدراسة شيء يعني جربت وعرض علي العمل وبراتب مليح لكن ماتخليتش على الدراسة نتاعي لانو لازم يكون عندك شهادة تحتجيها
لكن اذا مثلا عرض علي عمل خارج الدراسة نتاعي بعد الدراسة ممكن نروح نعمل ونتخلى جزئيا عن العمل البيطري كطبيب لكن كمشاريع بيطرية مثلا تربية ابقار او اغنام او دجاج وغيرها من المشاريع
يعني ان شااء الله ما نخليهاش لانو احلامي ضمن هذه المشاريع
-يعني هدف حاطو بين عينيا وهو انو نكون رجل عندو وزن في المجتمع نتاعو والحمد لله لحد الآن رانا لاباس ونخدمو على هذا الشيء ..
- يعني عندي اهداف متعددة مشاريع خاصة بالدراسة نتاعي كيما قتلك تربية الحيوانات
هدف شخصي وهو زوجة صالحة تشبهلي في العقلية ههه برك واهداف أخرى خليناها لما هو قادم ربي يطول في عمرك وعمري
-ربي يهنيك صراحة فكرتيني في اول جلسة ليا كرسي الاعتراف لا تشفاي عليه ههه ايه ايامات لا تنسى ربي يهنيك ختي وبارك الله فيك ​

 

[Hakan]

السلام عليكم
شكرا على الاعتماد اولا
واهلا بيك خويا حكيم كضيف معنا في هذه الاستضافة الطيبة
ان شاء الله تكون اسئلتنا خفيفة ظريفة وتكون مرتاح معانا
وكافتتاح رايحة نسألك الاسئلة لي سالتها على الغالية سكون الفجر
ولي عودة عودة ان شاء الله بمزيد من الاسئلة
بسم الله
عندما تتبادر كلمة حلم لذهن خونا حكيم ماهو اول حلم او فكرة تجي في بالك مباشرة؟
وماهو اكبر طموح لدى خونا حكيم؟
وهل خونا حكيم يهتم بتحقيق احلامو اولا او بتحقيق أحلام احبائه قبل احلامه سواء كانو عائلة او اصدقاء
مجرد اسئلة بسيطة لي عودة ان شاء الله
بالتوفيق
​

امم اهلا بالانيقة مريم وبارك الله فيك على هاذ الموضوع خخخ
اوكي نجاوبو على الاسئلة مع انو نفضل مكانش كوبي كولي وش حابة تلبسيني واش تلبس سكون الفجر ههه
الحلم هو حلم الطفولة واللي كان انو نصبح طبيب لكن طبيب نتاع عباد حققت شطر واللي نحمد ربي عليه وهو انو اصبحت طبيب بيطري لانو
كل يوم نكتشف اشياء جديدة في هذا المجال ..
اكبر طموح ليا هو انو نكمل حفظ كتاب الله عز وجل ومن ثم طموح انو نرفع قيمة والديا عاليا بين الناس كامل
وعندي طموحات مالية بعد التخرج نعيشولها ان شااء الله ..
احلام الاهل والاحباب تدخل ضمن المساعدة فقط يعني نعاونهم باش يحققو احلامهم نحفزهم باش يعيشوها
اما انو نتخلى على احلامي شويا صعيبة ههه الا اذا كان الامر صح صعيب عليهم مممكن نأجل احلامي لكن لا الغيها ابدا ..بارك الله فيك
انتظر رجوعكن ودخول الرجال نتاع اللمة .​

 

[لؤلؤة قسنطينة]

هههه هاداك الافتتاح متشابه برك من بعد نبدلو الاسئلة
اممم نقدمو اسئلة اخرى مختلفة ان شاء الله
هل الأخ حكيم انسان متفاءل بغد جميل؟ يعني التفاؤل تاعو مرتفع النسبة
إذا نعم، من اين يستمد الاخ حكيم التفاؤل تاعو؟ مثلا من كتب يطالعها او من اشخاص او من نفسو؟
وهل التفاؤل هذا باطني وظاهري ام ظاهري فقط
مثلا نلاحظو في مجال التعامل انسان متفائل لكن الكتابات تميل للجانب الحزين نوعا ما
هل هي مجرد حالة للتعبير عن النفس بين الحين والآخر ام انو خونا حكيم يحب يظهر عكس مشاعرو الداخلية
هادا اذا قلت نعم اذا قلت لا يروحو الاسئلة كامل هههه
المهم اذا لا قولنا السبب لي خلاك تنزع التفاؤل من حياتك هل هي ظواهر ما اجتماعية او ثقافية
ام بسبب ظروف؟
بصراحة ماعلاباليش اذا الاسئلة هادي عندها علاقة بالموضوع هههه
المهم لي عودة ان شاء الله
بالتوفيق

​

 

[Hakan]

هههه هاداك الافتتاح متشابه برك من بعد نبدلو الاسئلة
اممم نقدمو اسئلة اخرى مختلفة ان شاء الله
اهلا بيك من جديد اخت ميرهام على قول فيولا
هل الأخ حكيم انسان متفاءل بغد جميل؟ يعني التفاؤل تاعو مرتفع النسبة
الحمد لله التفاؤل من الايمان يعني اي مسلم يعرف قيمة ربي سبحانو وقيمة قضاءو وقدرو لازم يتفائل
لانو النبي عليه الصلاة والسلام وقصته في غزوة الاحزاب وتفاؤلو بالنصر رغم انو يتعرض للحصار
كذالك انا الحمد لله متفائل بانو كل شيء رايح يكون مليح لكن متى هذي هي اللي تحدد نسبة التفاؤل نتاع الانسان
إذا نعم، من اين يستمد الاخ حكيم التفاؤل تاعو؟ مثلا من كتب يطالعها او من اشخاص او من نفسو؟
لا التفاؤل حاجة روحانية وتستمد من علاقة الانسان بربو عز وجل لانو اليائس انسان قانط من رحمة ربي
وهل التفاؤل هذا باطني وظاهري ام ظاهري فقط
الحمد لله تفاؤلي باطني وظاهر في علامات وجهي لانو الحمد لله قليل وين تلقايني مقبش الوجه نتاعي
او حتى في الهدرة نتاعي وتعاملي مع الناس مانيش من النوع التشاؤمي
مثلا نلاحظو في مجال التعامل انسان متفائل لكن الكتابات تميل للجانب الحزين نوعا ما
الكتابات شيء خاص بميولات الانسان لانو صراحة مثلا انا اذا ما حاولتش نتذكر اللحظات الحزينة ما نقدرش نكتب لانو نكتب لما نعيش الحزن
اما الفرح فهو لايستحق الكتابة بقدر ما يستحق ان تعيش لحظاته
هل هي مجرد حالة للتعبير عن النفس بين الحين والآخر ام انو خونا حكيم يحب يظهر عكس مشاعرو الداخلية
في كتاباتي نحب نظهر عكس مشاعري او حتى عقليتي فقط لانو الحزن جزء من كتاباتي والستايل بنتاعي خخخ
هادا اذا قلت نعم اذا قلت لا يروحو الاسئلة كامل هههه
المهم اذا لا قولنا السبب لي خلاك تنزع التفاؤل من حياتك هل هي ظواهر ما اجتماعية او ثقافية
ام بسبب ظروف؟
بصراحة ماعلاباليش اذا الاسئلة هادي عندها علاقة بالموضوع هههه
اي سؤال مرحب بيه سواء كان لميولات الانسان مشاعر الانسان لانو المستقبل نتاع الانسان واحلامو تصنعها مشاعرو وميولاتو
المهم لي عودة ان شاء الله
بالتوفيق

​

بارك الله فيك ونقلك تصبحي بخير انت وكامل الاعضاء نلتقي في موعد آخر لكن تقدرو تخليو الاسئلة باش نجاوب عليها من بعد
​

 

[AmiR@RoRo]

مساء الخير
عدنـــــا
والله خويا حكيم تصدق بمجرد ما شفتك هنا تفكرت ايام كرسي التعارف والجماعه ربي يدكرهم بخير. ههه كانت توصل عشرين صفحه فاليوم وعادي جدا ههه يامات شابين صح
درك خلينا من الذكريات ونرجعو للصح
قلت اي بيطري يخمم يفتح عياده خاصه ادا كان محترف شويا ،، هل تعتبر نفسك من " المحترفين شويا " ههه ؟
ادا طرح عليك مشروع شراكة في تخصصك لنفرض تربية مواشي متل ماقلت تقبل ولا تفضل مشروك لوحدك ؟ وعلاش ؟
في اجابتك لمريم قلت انو تكتب للحززن بينما الفرح لا يستحق الكتابه الا تظن ان بكتابتك للحزن والاطناب فيه يخليك تدور في حلقه لا مخرج منها ؟ حتى الا وليتلها شي مرة تزيد تعكر مزاجك ويرجع جو الحزن ؟
بينما الا كتبت على لحظات فرح عشتها ادا رجعتلها لاحقا وقريتها ترجع فيك الروح ولو شويا ؟؟واش قلت ؟!
(بالرغم انو نعرفو كلنا فالحزن يجو افكار بالالاف ههه بصح فالفرح كلش يطير ههه)
حكيم من هواة مطالعة الروايات على حد علمي ،، ماجاش في بالك ولا مرة تدير كتيب ولا رواية ما ؟!ادا نعم ممكن نشوفو اسم حكيم في كتاب في احد الايام
قلت انو فكتاباتك تحب تظهر عكس عقليتك ومشاعرك الا تصنف هذا ضمن التصنع ؟
ممكن ماشي سؤالين على المستقبل بصح معلش فضول ههه
اول خطوة خممت تبدا فيها بعد التخرج واش هي ؟
راني كترت كاش ما تفكرت نزيد نجي
ســــــــــلام​

 

[سكون الفجر]

السلام عليكم ورحمة الله
اهلاً بكم أخي الكريم
اتمنى لكم اقامة طيبه
1- ماذا تعني لك كلمة حلم؟
2- هل ترى أنك أحلامك تتحقق او تحقق جزء منها؟
يكفيني هذا القدر من الأسئلة
بالتوفيق لك اخي

 

[Hakan]

مساء الخير
عدنـــــا
هلا وغلا
والله خويا حكيم تصدق بمجرد ما شفتك هنا تفكرت ايام كرسي التعارف والجماعه ربي يدكرهم بخير. ههه كانت توصل عشرين صفحه فاليوم وعادي جدا ههه يامات شابين صح
درك خلينا من الذكريات ونرجعو للصح
انعم احلى ذكريات ايامات روعة بديت نكبي خخخ
قلت اي بيطري يخمم يفتح عياده خاصه ادا كان محترف شويا ،، هل تعتبر نفسك من " المحترفين شويا " ههه ؟
اخاه على هذا السؤال المحرج لا يااختي لا نعتبر روحي محترف حاليا لانو تعرفي الجامعة نتاعنا وامور الامكانيات لكن مستقبلا علاش لالا
فقط لازم يخرج الانسان للتيران او الميدان باش يتعلم ويكتسب خبرة فقط
ادا طرح عليك مشروع شراكة في تخصصك لنفرض تربية مواشي متل ماقلت تقبل ولا تفضل مشروك لوحدك ؟ وعلاش ؟
لا الشراكة حاجة عادية واي مشروع خاصة المشاريع اللي فيها رأس مال كبير لازملها شريك وقليل وين تقدر تنجز الامر وحدك
لكن اذا كانت السيولة كاينة نفضل العمل وحيدا احسن
في اجابتك لمريم قلت انو تكتب للحززن بينما الفرح لا يستحق الكتابه الا تظن ان بكتابتك للحزن والاطناب فيه يخليك تدور في حلقه لا مخرج منها ؟ حتى الا وليتلها شي مرة تزيد تعكر مزاجك ويرجع جو الحزن ؟
امم حقيقة هذا واش راهو يصرى لكن ممكن تروح كل هاته المشاعر بكبزة يد من فتاة الحلم بحول الله وضني كبير في ربي سبحانو
بينما الا كتبت على لحظات فرح عشتها ادا رجعتلها لاحقا وقريتها ترجع فيك الروح ولو شويا ؟؟واش قلت ؟!
انعم ولو اني نفضل لحظات الفرق تبقى على هيئة صور او مقطوعات فيديو لانو صراحة لحظات الفرح ما تقدريش تكتبيها اصلا ما نعرفوش نكتبو للفرح خخخ سامطة
(بالرغم انو نعرفو كلنا فالحزن يجو افكار بالالاف ههه بصح فالفرح كلش يطير ههه)
ههه ها شفتي خيتي
حكيم من هواة مطالعة الروايات على حد علمي ،، ماجاش في بالك ولا مرة تدير كتيب ولا رواية ما ؟!ادا نعم ممكن نشوفو اسم حكيم في كتاب في احد الايام
سي جاتني افكار مي صراحة مستواي اللغوي حايا نقدر نقول انو ضعيف لا يخولني اني نكتب شيء او نألف حاجة كبيرة ترقى الى كتاب لكن مستقبلا ان شااء الله
قلت انو فكتاباتك تحب تظهر عكس عقليتك ومشاعرك الا تصنف هذا ضمن التصنع ؟
لا ما نقولوش تصنع لانو التصنع يدخل ضمن الكبر والحمد لله ربي بعدنا على مثل هذا الخلق
لكن قتلك انو العقلية شيء والمشاعر الباطنية شيء بيناتنا اسكو نهار تزعفي لازم تبيني زعافك
او نهار تغيضك عمرك لازم تبيني مشاعرك اكيد لا ومن المستحسن الاشياء الداخلية تبقى بينك وبين ربي سبحانو
اما تعاملاتك مع الناس وواش يشوفو منك لازم يكون مقيد باخلاق الرسول وفقط
ممكن ماشي سؤالين على المستقبل بصح معلش فضول ههه
اول خطوة خممت تبدا فيها بعد التخرج واش هي ؟
اول خطوة هي نسلك روحي من الخدمة الوطنية خخخ المعريفة مكانش
ومن بعد ننطلق مباشرة في العمل
راني كترت كاش ما تفكرت نزيد نجي
ســــــــــلام​

بارك الله فيك اخت اميرة والله كيما عودتنيني نهارات كرسي التعارف وكيفاش كنت تحطي الاسئلة وكنت نقولك غير حطي الاسئلة المحرجة ههه راكي تشفاي ايام زوينة ربي يهنيك ​

 

[Hakan]

السلام عليكم ورحمة الله
اهلاً بكم أخي الكريم
اتمنى لكم اقامة طيبه
وعليكم السلام اخت سكون الفجر خخخ كتبت اسمك ومن بعد محيتو ههه
1- ماذا تعني لك كلمة حلم؟
كلمة حلم تعني اسمى امنية يبذل لها الانسان كل وقته وطاقاته وماله وكل شيء من اجل ان تتحقق
2- هل ترى أنك أحلامك تتحقق او تحقق جزء منها؟
نعم تحقق جزء منها ولم تتحقق الغالبية لكن الله خير من كل ذالك اضافة الى انو الانسان لا يزال لديه الحق في الحلم من جديد مادام على قيد الحياة
يكفيني هذا القدر من الأسئلة
بالتوفيق لك اخي

بارك الله فيك اختي على هذه الزيارة ان شااء الله نشوفك مرة اخرى
​

 

[لؤلؤة قسنطينة]

السلام عليكم
ما أجملها من طموحات وما أجملها من أحلام
نرجو من الله ان تتحقق في القريب العاجل بما أن صاحبها يملك العزيمة والاصرار
اممم واش نسألو
بما أنو حبيبتي أميرة تكلمت على الجانب المهني رايحة نتكلم على الشق الثاني من حياتك المستقبلية ولا من احلامك
ولي هي حلم طبيعي وبديهي لكل شاب او شابة ألا وهو الزواج
بغض النظر عن اختيار شريكة الحياة والامور الشخصية التي لا تتطلب اسئلة او انو نعرفو جوابها مسبقا لكثرة معرفتنا بخونا حكيم
رايحة نتكلم على أهم نقطة في الزواج وهي تربية الأطفال وتربية جيل واعي ومثقف
هل خونا حكيم واضع مثلا مخططات لتربية ابناءو مستقبلا؟ إذا كانت نعم
في ماذا تتمثل هذه المخططات ؟ وهل هذه المخططات تتطلب جهد كبير لازم تبذلو قبل ما تفكر في زواج واسرة؟
ولا تشوف نفسك ماتحتاج والو يعني قادر 100 بالمائة تتبنى هاد الفكرة او هاد المهمة
اكتفي بهاد الاسئلة ولي عودة ان شاء الله
بالتوفيق خويا


​

 

[Hakan]

السلام عليكم
ما أجملها من طموحات وما أجملها من أحلام
خخخ يعني راكي تنتقمي وتحشمي فيا
نرجو من الله ان تتحقق في القريب العاجل بما أن صاحبها يملك العزيمة والاصرار
احي في هذا الشق اسمحيلي راكي زودتي فيها ضركا نذوب بالحشمة ههه
اممم واش نسألو
بما أنو حبيبتي أميرة تكلمت على الجانب المهني رايحة نتكلم على الشق الثاني من حياتك المستقبلية ولا من احلامك
ولي هي حلم طبيعي وبديهي لكل شاب او شابة ألا وهو الزواج
بغض النظر عن اختيار شريكة الحياة والامور الشخصية التي لا تتطلب اسئلة او انو نعرفو جوابها مسبقا لكثرة معرفتنا بخونا حكيم
ياخاه وقيلا راني فاضح روحي ههه
رايحة نتكلم على أهم نقطة في الزواج وهي تربية الأطفال وتربية جيل واعي ومثقف
هل خونا حكيم واضع مثلا مخططات لتربية ابناءو مستقبلا؟ إذا كانت نعم
في ماذا تتمثل هذه المخططات ؟ وهل هذه المخططات تتطلب جهد كبير لازم تبذلو قبل ما تفكر في زواج واسرة؟
يا بن عمي سلال وما يطرحوش عليه الاسئلة هذي دفعة واحدة
اولا اختي مانكذبش عليك الزواج بالمرأة الطيبة وشريكة الحياة اللي راهي في راسي هو من اولياتي منذ بديت نعرف صلاحي وتعلمت صلاتي
وان شااء الله ربي ما يخيبنيش في هاذ المسعى اما الاطفال تصدقي قبيل كنت نصلي في الجامع العشاء
شفت واحد السيد مع وليدو وكان الطفيل هذا يصلي في الزهر ههه شحال تمنيت في هذيك اللحظة انو يكون عندي وليد كيفو
اما عن تربيتهم والله ثلاثا انو احسن تربية هي تربية محيط الاسرة يعني لازم تكون متأكد انو الاسرة نتاعك تربي في ولادك
من الجد اللي هوما والديا الى الاخوة نتاعي والاخوات نتاعي
حتى اخوة واخوات الزوجة لازم يختارو على احسن شكل بحول الله
كمخططات يعني لازم الاولاد نتاعي يلتحقو بالمدارس القرىانية ابتداءا من سن العامين
لا حضانة لاهم يحزنون
ثانيا لازم الوالدة اللي هي الزوجة تكون انسانة مثقفة باش تقدر للمهة وتقدر تربي على الاتم والمعنى الصحيح
اما كخطوات وكيفاش هذي تطلب معايشة وكذالك نوع الطفل لانو الاطفال ماراهمش كيف كيف
ولا تشوف نفسك ماتحتاج والو يعني قادر 100 بالمائة تتبنى هاد الفكرة او هاد المهمة
لا كيما قتلك الاب وحدو ما يصنع اي شيء لازم كامل الاسرة تحتوي الطفل باش ما يضيعش
اكتفي بهاد الاسئلة ولي عودة ان شاء الله
بالتوفيق خويا


​

بارك الله فيك على الاسئلة الجميلة انتظر عودتك مرة اخرى خخخ مازال ما شبعناش من الاسئلة
​

 

[طموحة]

السلام عليكم
بمأنك بيطري المستقبل وعلى حساب معلوماتي البسيطة عن هذا المجال أنو مجال فيه تطو مستمر
هل أنت على اطلاع بشخصيات بارزة في هذا المجال و أضافت االكثير له و متخذ منهم قدوة و تحاول الاستفادة من تجرابهم راجيا أنك تكون أحدهم مستقبلا ولما لا أحسسن
وفي المقابل ككل مجال يوجد أشخاص خرجو ومادارو والو هل تدرس هذه الحالات و تحاول تفادي اخطائها ولا تحب تبني تجربتك الشخصية بعيدا عن كل التجارب السابقة
كذلك التنافس شيء لا بد منو فهو الحافز و الدافع للاستمرار للنهوظ بعد كل سقوط للابداع ... ماهي أساليب الأخ حكيم ليحافظ على تنافس شريف بعيد عن الحقد و البغض الذي هو شيء ضروري يعزز الطاقة الايجابية ويقرب من التميز خاصة كي يكون تقارب بينك و بين منافسك ونحو أهداف متقاربة
أعتذر على الاطالة

 

[Hakan]

السلام عليكم
وعليكم السلام اهلا بالاخت طوحة ان شااء الله امورك بخير وشكرا مسبقا على الرجوع
بمأنك بيطري المستقبل وعلى حساب معلوماتي البسيطة عن هذا المجال أنو مجال فيه تطو مستمر
صح مجال فيه تطور لكن في بلادنا شويا مازال روطار لكن الانسان ماينتظرش الدولة او الناس
هل أنت على اطلاع بشخصيات بارزة في هذا المجال و أضافت االكثير له و متخذ منهم قدوة و تحاول الاستفادة من تجرابهم راجيا أنك تكون أحدهم مستقبلا ولما لا أحسسن
في الحقيقة نقدر نقول انو الدراسة في الجامعة ونسبة الاحباط فيها ما تخليش الانسان يركز على المبدعين لكن صراحة كاين بياطرة مبدعين في الجزائر نتبع فيهم
اما الاجانب نقدر نقول لا
اما الناجحين نحالو نتعلمو منهم ونستفيدو من تجاربهم لانو صح المجال وااسع لسعة الحالات وتنوع العالم الحيواني في بلادنا
وفي المقابل ككل مجال يوجد أشخاص خرجو ومادارو والو هل تدرس هذه الحالات و تحاول تفادي اخطائها ولا تحب تبني تجربتك الشخصية بعيدا عن كل التجارب السابقة
اكيد الناس المثبطين يجيؤون في قائمة التحفيزات لانو منهم تقدر تشوف الحفر اللي كاينة في الطريق لكن ابدا ما نشوفش ليهم لانو صراحة المجال الطبي يعتمد على قوة الشخصية
وتعاملك مع الناس وتعاملك مع المهنة وبناء التجربة الشخصية يعتمد بالدرجة الاولى على تجارب الناس الآخرين لكنهم ليسو كل شيء
كذلك التنافس شيء لا بد منو فهو الحافز و الدافع للاستمرار للنهوظ بعد كل سقوط للابداع ... ماهي أساليب الأخ حكيم ليحافظ على تنافس شريف بعيد عن الحقد و البغض الذي هو شيء ضروري يعزز الطاقة الايجابية ويقرب من التميز خاصة كي يكون تقارب بينك و بين منافسك ونحو أهداف متقاربة
المنافسة الشريفة تعتمد بالدرجة على اخلاقك واخلاق منافسك واي انسان لازم يشوفلو منافس وفي الحقيقة يعني في المجال الدراسي قبل لا نطلع الجامعة كان المنافس نتاعي فتاة لانو صراحة نكره تتقدم عليا طفلة حتى في الجامعة مالغري نطلع عامي كي الغاشي لكن نكره نهار نشوف بنت في المقدمة لكن على العموم بدات تنقص هذي العقلية
أعتذر على الاطالة

بارك الله فيك وشكرا لك على المشاركة ان شااء الله تكون الاجابة في مستوى التطلعات ​

 

[طموحة]

عادت الأخت طوحة على قولتك لتطرح أسئلة مجددا هههه
أولا ما شاء الله على الأفكارالمطروحة ماشي غير على أسئلتي ولكن على اسئلة الأخوات أيضا و نسأل الله التوفيق
كلنا نعلم أن الهمة تزيد و تنقص كيف لا والايمان الذي هو بالله تعالى خاضع لذلك كيف يتعامل الاخ حكيم مع نقص همته التي قد تعرقل نوعا ما المضي نحو الأهداف
ما هي العبارة التي عندما تسمعها تشحن همة قد تكون شعر قد تكون حكمة .قرآن ....
وشكرا

 

[لؤلؤة قسنطينة]

هههههههه عجبتني فاضح روحي الله يهديك
لكن تقابلنا في عدة مواضيع من هاد النوع على هادي نعرفو تقريبا تفكير خونا حكيم
مالا إليك الجزء الثاني من اسئلة سلال هههه
اجوبتك خلاتني نكتشف اسئلة جدد (على طريقة اميرة هههه)
نتا أكدت في جاوبك أنو المرأة او الزوجة بعبارة اخرى لازم تكون مثقفة بالإضافة لتربية الأهل كالجد وغيرهم
مع أنو الجد والاهل كاين فيهم لي غير مثقف يعني يشتاركو في نفس الهدف وهو تربية الطفل
ولكن بمستويات مختلفة، في رايك التربية تحتاج ثقافة (اي بمستويات عليا؟) أو تحتاج تجربة حتى من دون مستويات عليا؟
وايضا في جوابك أكدت على الأم والاهل كما سبق وذكرت ولكن أين دورك كأب في هذه المهمة؟
لواش يطمح خونا حكيم مثلا أنو يوفر لولادو أو يعلم ولادو مستقبلا طبعا بعد المدرسة القرآنية
بالتوفيق ان شاء الله​