ولادنا لازم يتعلمو فرونسي قبل العربية ..

[أم منيــــــر]

السلام عليكم
واش احوالكم لاباس؟ ان شاء الله تكونوكامل بخير
اليوم حبيت ندير زيارة خفيفة لهاد القسم باش نحكي على موضوع هدرنا عليه بزاف و مازال نزيدونهدرو
احنا الجزايريين و عشقنا للغة الفرنسية في حياتنا اليومية
انا من متتبعات قنوات اليوتوب لكامل واش يخص الدار و سيرتو الطبخ
البارح وحدة من هاد القنوات مولاتها دارت دردشة على المباشر مع معجباتها باش يسقسيوها على امور تخص الكوزينة و الطياب
كانت بنتها حاضرة معاها و هي عمرها 6 سنوات راكم تقولو نورمال واش فيها ؟
من خلال الدردشة وحدة سقساتها على بنتها
قالتلها راها حاضرة معايا و هاهي تقولكم كلمة
لمرا كانت تهدر بالعربية مخلطة شويا بالفرنسية نورمال والفنا هاد الامور في هدرتنا احنا لجزايريين
كي جات تسقسي بنتها تقول جاكلين راها تسقسي فغونسواز لفرونسي خباط من الف للياء و البنت تجاوب بالفرنسية ولا كلمة عربية
ايو واش هادا ؟؟مازال في التحضيري تهدر هكدا بالفرنسية ؟
سقساتها وحدة قالت لها كفاش قدرتي تعلمي بنتك لفرونسي انا حاولت مع ولدي و ما قدرتش!!!!
علم كبير هادا راهم يتنافسو عليه لو كان يديرو على الامور الدينية هكدا شكون كيفنا
الجواب نتاعها صدمني
قالت لها الطفل كما الاسفنجة كي تحطيها في الما تشرب كامل الما
و انا حبيت نعلم بنتي الفرونسي ما دامها صغيرة باش تمتريزيها مليح
قالت لها ما نكذبش عليك قلت العربية درك تخرج للشارع و تدخل للمدرسة و تتعلمها
تهدر على العربية شغل حاجة زيادة و ما يهمهاش الامر خلاص و الفرونسي هو الاساس
وتهدر بطريقه احتقار وواستهزاء شغل
و قالت هادا رايي و لازم تحتارموه
ياو ما نحتارموش مالغري انت حرة فيه
حبيت نسقسيكم ولادنا لي ما علمناهمش لفرونسي في الدار ما تعلموهش في المدرسة؟
تعلموه و تعلمو الانجليزية و يتحكمو فيهم مليح مليح وين راه المشكل؟
المشكل راه في هاد المعقدين لي يضنو انو لفرونسي علامة من علامات التحضر و اصلا هاد اللغة كي تخرجي من محيط فرنسا تلقاي الانجليزية تمشي بزاف لاخاطر لغة عالمية و لفرونسي ورثوهلنا الفرنسيين من بعد الاستعمار و احنا رانا مخلوعين فيه و مجبورين نتعلموه قبل الانجليزية
كامل نعرفو نهدرو بالفرونسي ونتحكمو فيه مليح بصح نعرفو وقتاش نستعملوه
حبيت نفهم هاد الاخت و لي كيفها يعلمو ولادهم يقولو باسم الله كي يجو ياكلو و الحمد لله كي يشبعو ويعلموهم الشهادتين و يهيؤوهم لحفظ القرآن؟؟ول هاد الامر مايعنيهمش
اياياياي
يا ناس العربية هي لغة القرآن و لازم نعتز بيها و نفتخر بيها لانو هي الاصل
اللغات الاجنبية نتعلموها باش نستعملوها وقت الضرورة ماشي باش نتفاخرو بيها على بعضانا
التحضر بالتكنولوجيا و العلوم و البحوث ماشي كي نهدر بلفرونسي يا الاخت و لي يشبهولك
سامحوني يلا طولت عليكم بصح قلبي وجعني و ما قدرتش نصرطها
تحياتي و سلام
ما تنساوش ذكر الله في هاد الايام المباركة
اللهم بارك لنا فيشعبان و بلغنا رمضان ​

 

[أم منيــــــر]

السلام عليكم
شكرا على الاعتماد
راني نستنى فيكم

 

[aljentel]

اللهم بارك لنا في شعبان وبلغنا رمضان راضين مرضيين يارب العالمين ...

 

[Mademoiselle carbone]

السلام عليكم
والله موضوع هايل
صح تعليم اللغات الأجنبية مليح و مليح بزاف
بصح العربية لغتنا و نبقاو نتعاملو بيها و هذا لا نقاش فيه
بصح اذا واحد معندوش شخصية يعلم في ولدو اللغة باش يهدر بيها قدام العرب هاذي مجياش

 

[حلم كبير]

السلام عليكم و رحمه الله تعالى وبركاته.

أختي الكريمة شكرا على الموضوع القيم بارك الله فيك.

أيييييه يا ختي راهم حابين يمحيو لغتنا يحطو في بلاصتها الفرنسية ،وكيما قلت ونعاود علمو اولادكم العربية ولغة القرآن تسهل عليهم قرايتهم وحياتهم .
حنا من صغرنا تعلمنا العربية في الجامع وقرينا الكتب العربية ، ووصلنا حتى الجامعة وحنا فخورين بعربيتنا ،صح لقينا صعوبات ،وهاذ الصعوبات هوما السبب فيها لأنهم ما ترجموش كتب علمية بالعربية ،وخلاو كلشي بالفرونسي نتاع الهم .

هنا في فرنسا كي يشوفو ولادي يهدرو عربي معانا اتخيلي يقولو : الله أكبر يهدرو عربي
وكأنهم شافو كائنات غريبة من كوكب اخر مع أنهم عرب كيما حنا بصح ما يتعبوش رواحهم ويعلمو أولادهم ولا يهدرو معاهم بالعربية .
صح كاين اللي الله يهديه ماهوش عارف بلي العربية اهم لغة نعلموها لولادنا .
اختي الفاضلة بارك الله فيك على الموضوع الرائع
تقبلي مروري مع فائق الاحترام والتقدير
حلم كبير​

 

[أم منيــــــر]

السلام عليكم و رحمه الله تعالى وبركاته.

أختي الكريمة شكرا على الموضوع القيم بارك الله فيك.

أيييييه يا ختي راهم حابين يمحيو لغتنا يحطو في بلاصتها الفرنسية ،وكيما قلت ونعاود علمو اولادكم العربية ولغة القرآن تسهل عليهم قرايتهم وحياتهم .
حنا من صغرنا تعلمنا العربية في الجامع وقرينا الكتب العربية ، ووصلنا حتى الجامعة وحنا فخورين بعربيتنا ،صح لقينا صعوبات ،وهاذ الصعوبات هوما السبب فيها لأنهم ما ترجموش كتب علمية بالعربية ،وخلاو كلشي بالفرونسي نتاع الهم .

هنا في فرنسا كي يشوفو ولادي يهدرو عربي معانا اتخيلي يقولو : الله أكبر يهدرو عربي
وكأنهم شافو كائنات غريبة من كوكب اخر مع أنهم عرب كيما حنا بصح ما يتعبوش رواحهم ويعلمو أولادهم ولا يهدرو معاهم بالعربية .
صح كاين اللي الله يهديه ماهوش عارف بلي العربية اهم لغة نعلموها لولادنا .
اختي الفاضلة بارك الله فيك على الموضوع الرائع
تقبلي مروري مع فائق الاحترام والتقدير
حلم كبير​

و عليكم السلام و رحمة الله و بركاته اخي الكريم
الله يجازيك كل خير
شوف و الله نستعرف بيك انت في فرنسا و درت مجهودك باش تعلم ولادك العربية
و الله حاجة مليحة و عندك اجر كبير
مع انك في وسط كلو فرنسية واصريت باش تعلمهم العربية في الوقت لي كاين مهاجرين ولادهم ما يعرفوش حرف عربية
و الله بارك الله فيك اما هاد الناس لي استغربو الامر خليهم في حالهم ما دامك على حق
هنا بلاد العربية وراهم يعلمو ولادهم الفرنسية قبل العربية ويفتاخرو بيها شغل انجاز كبير
هادا هو المشكل اللغة العربية كنز يكفي انها لغة القرآن و الناس تتجاهلها الله يهديهم و يصلح احوال الجميع
ربي يحفظلك وليداتك من كل مكروه و مشكور على المرور القيم و الطيب​

 

[أم منيــــــر]

السلام عليكم
والله موضوع هايل
صح تعليم اللغات الأجنبية مليح و مليح بزاف
بصح العربية لغتنا و نبقاو نتعاملو بيها و هذا لا نقاش فيه
بصح اذا واحد معندوش شخصية يعلم في ولدو اللغة باش يهدر بيها قدام العرب هاذي مجياش

و عليكم السلام و رحمة الله تعالى و بركاته
بارك الله فيك
ايه صح تعلم اللغات الاجنبية حاجة مليحة بصح في وقتها
عندك الحق ضعاف الشخصية هما لي يفكرو هاد التفكير و يظهر لهم هاد من التحضر
مشكورة على المرور​

 

[أم منيــــــر]

اللهم بارك لنا في شعبان وبلغنا رمضان راضين مرضيين يارب العالمين ...

اللهم آمين يا رب العالمين
بارك الله فيك

 

[حلم كبير]

و عليكم السلام و رحمة الله و بركاته اخي الكريم
الله يجازيك كل خير
شوف و الله نستعرف بيك انت في فرنسا و درت مجهودك باش تعلم ولادك العربية
و الله حاجة مليحة و عندك اجر كبير
مع انك في وسط كلو فرنسية واصريت باش تعلمهم العربية في الوقت لي كاين مهاجرين ولادهم ما يعرفوش حرف عربية
و الله بارك الله فيك اما هاد الناس لي استغربو الامر خليهم في حالهم ما دامك على حق
هنا بلاد العربية وراهم يعلمو ولادهم الفرنسية قبل العربية ويفتاخرو بيها شغل انجاز كبير
هادا هو المشكل اللغة العربية كنز يكفي انها لغة القرآن و الناس تتجاهلها الله يهديهم و يصلح احوال الجميع
ربي يحفظلك وليداتك من كل مكروه و مشكور على المرور القيم و الطيب​

وفيك بارك الرحمان على الرد الجميل
احترامي وتقديري سيدتي

 

[Salah eddin]

السلام عليكم
و الله يا اختي او سيديتي راكي حطيتي يدك على الجرح
و الله يجيب الخير
كي شقل هذا راه التطور و العصرنة كي تعلم بنتها الفرونسي
انا نقلك وحد اللقطة هاهي وين
صح حنا الجزايريين نخلطوها شوي فرونسي و عربي
لكن كاين مناطق من مناطق ...مثلا
مع احتراماتي لسكان كل مناطق الجزائر الحبيبية
الا انو من الملحوظ ان سكان لجنوب و الوسط متمسكين بالعربية تاعهم
اما لو نلحظ سكان الشمال من العاصمة و ضواحيها ...نلقاو حاجة اخرى ..و اجدد * مع احترامي لكل السكان في هذي المناطق *
ممكن لانهم متاثرين ياسر بالمغتربين او لقربهم من فرسنا او ...لظنهم ان هذا هو التطور ...و الله يستر
ثاني كاين حاجة اخرى ....و هذي و الله ق خلاتني نحير صح
عندنا اللاعب اسلام سليماني و العربي سوداني ...واحد في الانجليز و الاخر في كرواتيا بصح كي يهدرو في الصحافة يهدرو بالعربية و نستعرف بيهم لانهم معتزين بلغتهم
و كاين لاعبين هنا في دزاير مثلا في المولودية و لا في لياسما و لا في سطيف و كي يهدرو في التلفزيون يهدرو بالفرونسية ...مش مخلطة عربي و فرونسي ..لالا فرونسي تاع لهيه
ههه
و الله يحير الواحد مع هذون ...ناس لا علاقة خلاو العزة تاعهم و يجرو ورا فرانسا الخبيثة
لا حول و لا قوة الا بالله
الله يجيب الخير و خلاص
مشكورة يا اختي على الطرح
بارك الله فيك ​

 

[Only me]

والله يا أختي هاذي لي قالك يفعل الجهل بصاحبه مالا يفعله العدو بعدوه
تلقايهم ماشيين في الطريق الخطأ ويحاولو يقنعوك بلي هوما متحضرين ومثقفين، طفلة 6 سنوات علميها تقول باسم الله قبل الماكلة قبل
أخي حلم كبير ربما يشفي هذا الموضوع غليلك أو قد يزيد من توترك هههه متابعة طيبة​

 

[أم منيــــــر]

السلام عليكم
و الله يا اختي او سيديتي راكي حطيتي يدك على الجرح
و الله يجيب الخير
كي شقل هذا راه التطور و العصرنة كي تعلم بنتها الفرونسي
انا نقلك وحد اللقطة هاهي وين
صح حنا الجزايريين نخلطوها شوي فرونسي و عربي
لكن كاين مناطق من مناطق ...مثلا
مع احتراماتي لسكان كل مناطق الجزائر الحبيبية
الا انو من الملحوظ ان سكان لجنوب و الوسط متمسكين بالعربية تاعهم
اما لو نلحظ سكان الشمال من العاصمة و ضواحيها ...نلقاو حاجة اخرى ..و اجدد * مع احترامي لكل السكان في هذي المناطق *
ممكن لانهم متاثرين ياسر بالمغتربين او لقربهم من فرسنا او ...لظنهم ان هذا هو التطور ...و الله يستر
ثاني كاين حاجة اخرى ....و هذي و الله ق خلاتني نحير صح
عندنا اللاعب اسلام سليماني و العربي سوداني ...واحد في الانجليز و الاخر في كرواتيا بصح كي يهدرو في الصحافة يهدرو بالعربية و نستعرف بيهم لانهم معتزين بلغتهم
و كاين لاعبين هنا في دزاير مثلا في المولودية و لا في لياسما و لا في سطيف و كي يهدرو في التلفزيون يهدرو بالفرونسية ...مش مخلطة عربي و فرونسي ..لالا فرونسي تاع لهيه
ههه
و الله يحير الواحد مع هذون ...ناس لا علاقة خلاو العزة تاعهم و يجرو ورا فرانسا الخبيثة
لا حول و لا قوة الا بالله
الله يجيب الخير و خلاص
مشكورة يا اختي على الطرح
بارك الله فيك ​

و الله يا اخي الكريم كلامك كلوصواب راك زدت على واش قلت و عندك الحق
صح كنا نشوفوهاد الظاهرة في العاصمة و نواحيها درك راها تتعمم و خاصة في المدن الكبرى
اما على اللاعبين عندنا حتى انا شفتهم يا ودي كاين لي ما يعرفش حتى يهدر بيها و المهم عندو ان يخلطها و قال راني حتى انا نهدر فرونسي
كاين شي كلمات داخلين في هدرتنا والفناهم و نهدروهم هكدا تلقائيا ماشي متعمدين ورانا نديرو مجهودنا باش ننساوهم
هادو راهم يتعمدو و يعتزو بهاد الشي
ياو التحضر ماشي هاكدا
يعطيك الصحة خويا وبارك الله فيك​

 

[أم منيــــــر]

والله يا أختي هاذي لي قالك يفعل الجهل بصاحبه مالا يفعله العدو بعدوه
تلقايهم ماشيين في الطريق الخطأ ويحاولو يقنعوك بلي هوما متحضرين ومثقفين، طفلة 6 سنوات علميها تقول باسم الله قبل الماكلة قبل

أخي حلم كبير ربما يشفي هذا الموضوع غليلك أو قد يزيد من توترك هههه متابعة طيبة​

هاد المثل في بلاصتو يعطيك الصحة
ايه هادا هوالمشكل يحسبوارواحهم متحضرين و يشوفو فيك متخلف و بعيد على التحضر
و الاطفال محتاجين يكبرو على دينهم و لغتهم قبل اي حاجة اخرى
مشكور على المرور ​

 

[@R@ZIK]

السلام عليكم
بارك الله فيك اختي أم منير مميزة بمواضيعك القيمة
هاجس اللغة الفرنسية طغى على اللغة العربية عند كل شخص فأصبحنا نتكلم بها في المنزل والعمل والشارع
رغم أن لها سلبيات وايجابيات
لكن المشكل يكمن في مجتمعنا الذي أعطى أهمية كبرى لها فمثلا اذا ذهبت لمقابلة أو عمل أو .. تجدين اللغة الفرنسية هي المتصدرة في الكلام
مثلا كانت عندي فورماسيو(تكوين) كل المحاضرة باللغة الفرنسية وكان اذا حد سأل باللغة العربية الجواب باللغة الفرنسية
فعلا من الجيد تعلم لغات جديدة لكن دون المساس باللغة العربية
ربي يستر
يعطيك الصحة
تقبلي مروري
​

 

[السلطانة]

وعليكم السلام زعم يحطو ولادهم في مدارس خاصة باه يتعلمو الفرونسي قبل العربية كون حفظوهم 60حزب في سن صغيرة كنا نقولو صح الله يبارك مي لي يتخلع بالفرونسي غير الناقص لي ميعرفش قيمة لغتو

 

[Malika Tlm]

نورتي الركن اختي ام منير هذي غيبة
واش نقولك جهل كبير راهم عايشين فيه كشغل اللغة الفرنسية شنعة يحكيو ولادهم بيها
وتشفاي علي لي تلاقيناها فالمكتبة تحسبي رانا فاوروبا وعلاش ميحكيوش عربية مفهمتش والله والمصيبة يتعاملوا معاهم بيها فالدار
واسم نقولك الله يجيب ساعة الخير
الله يهدي عبادوا
مشكورة اختي علي الموضوع الراقي

 

[أم منيــــــر]

السلام عليكم
بارك الله فيك اختي أم منير مميزة بمواضيعك القيمة
هاجس اللغة الفرنسية طغى على اللغة العربية عند كل شخص فأصبحنا نتكلم بها في المنزل والعمل والشارع
رغم أن لها سلبيات وايجابيات
لكن المشكل يكمن في مجتمعنا الذي أعطى أهمية كبرى لها فمثلا اذا ذهبت لمقابلة أو عمل أو .. تجدين اللغة الفرنسية هي المتصدرة في الكلام
مثلا كانت عندي فورماسيو(تكوين) كل المحاضرة باللغة الفرنسية وكان اذا حد سأل باللغة العربية الجواب باللغة الفرنسية
فعلا من الجيد تعلم لغات جديدة لكن دون المساس باللغة العربية
ربي يستر
يعطيك الصحة
تقبلي مروري
​

اهلا بيك حبيبتي رزيقة اللمة تنورت برجوعك
احنا دولة فرونكوفونية
بدايها من الوزراء و رواحي كامل يهدرو بالفرنسية تقول شي دولة اوروبية
بصح هاد الامر والفناه بحجة انو الاجيال لي فاتت تعلمت الفرنسية اكثر من العربية والاستعمار و كدا و كدا
حتى بعض الوثائق ما يقبلوهاش بالعربية و الله حاجة توجع القلب بلاد عربية ادارتها فرنسية
لكن المشكل لكبير لي راهم يديروه بعض الوالدين كي يسبقو لفرنسي على لعربية
و تقولك لازم نعلمها باش تتحكم فيها مليح علاش راها ماشية تجاهد في اللغة ول واش؟
ما نعرف و خلاص
يعطيك الصحة رزيقة على المرور​

 

[أم منيــــــر]

وعليكم السلام زعم يحطو ولادهم في مدارس خاصة باه يتعلمو الفرونسي قبل العربية كون حفظوهم 60حزب في سن صغيرة كنا نقولو صح الله يبارك مي لي يتخلع بالفرونسي غير الناقص لي ميعرفش قيمة لغتو

المشكل هما يضنو انهم يديرو حاجة مليحة وكما قلت لو كان حفظ القرآن تتباهى بيها و تجي عليها
بصح شخصية ضعيفة تفرح باشياء تافهة وتنخلع فيها
مشكورة على المرور ام ياسمين​

 

[أم منيــــــر]

نورتي الركن اختي ام منير هذي غيبة
واش نقولك جهل كبير راهم عايشين فيه كشغل اللغة الفرنسية شنعة يحكيو ولادهم بيها
وتشفاي علي لي تلاقيناها فالمكتبة تحسبي رانا فاوروبا وعلاش ميحكيوش عربية مفهمتش والله والمصيبة يتعاملوا معاهم بيها فالدار
واسم نقولك الله يجيب ساعة الخير
الله يهدي عبادوا
مشكورة اختي علي الموضوع الراقي

الله ينورك تيكا
اوووو هما راهم يشوفو فينا احنا جاهلين ههه
هاديك تقولي قاورية حتى طريقة المشي و الهدرة وحاسبة منها ماكانش اجسام بغال و عقول عصافير كما يقولو
آمين الله يهدينا و يهديهم
وانت مشكورة على طيب المرور​

 

[زاد الرحيل]

ما شاء الله على موضوعك و تفكيرك الراقي ،هذوك ميهتموش للدين هو ثانوي عندهم كيعاد ينساو الموت و لازم الفرنسية باش يكو نوا راقيين و معك الحق الفرنسية خارج فرنسا ما تعني والوا ،تلقاي الغربيين المسلمين يحبوا العربية بزاف و يحب القرأن و يتعلموه و يقدسه و انتاعنا يتخلاو عليه و هذا هو التخلف انتاع الصح و هذو هما اليحافضوا على بقايا الاستعمار