مشكلتي في طريقي للإكتئاب

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم سأدخل مباشرة في الموضوع
بالاك تشوفوها حاجة تافهة mais vraiment راهي مأثرة على نفسيتي بزاف الموضوع متعلق بشكلي انا طفلة عندي 21 عام لكن شكلي يبين كأقصى حد 18 سنة بالاك بزاف منكم يشوفها حاجة مليحة mais انا لالا وصلت وين تعقدت من هدرة الناس حتى الجامعة كرهتها وكرهت نروحلها كرهت الناس وكرهت روحي surtout أنو كامل لي صغار عليا في عائلتي الله يبارك جايبين رواحهم غير انا تصورو 21 سنة عندي 157 متر طول و 50 كلغ وزن هههه أعتقد راكم تتصورو في شكلي الان حتى اللبسة كرهت نلبس كرهت نشري للعلم نلبس حجابات ماشي سراول ومازاد الطين بلة وحدة من العائلة جداا نحترمها ونقدرها كنت نهدر انا وهي قلتلها شفت نتاع باك هذو دايرين مكياج شغل نتاع عرس بحكم انا ماندير والو في وجهي قاتلي راكي غير انت كي لعجوز كامل يعدلو وش فيها من ذاك النهار وانا صح مصدومة ذرك لي تكون محجبة وماتتزينش تكون عجوز والا كيفاه والله جربت مانسمعش لهدرة الناس لكن تغلق وذنيك على 10 يخرجو 20 هذا يقولي راكي رقيقة وهذه تقولي علاه ماتمكييش وهذه تقولي لازم تجيبي روحك يعني وش ندير انا نظل ناكل مانزيدش يالوكان بغرام درت تحاليل ماعندي والو أعطوني حل والا ادعولي لانو نفسيتي صح تعبت وعييييت من هدرة الناس حتى كاين بنات صحاباتي ولاو يعلقو بنفس الطريقة للعلم اني قدام الناس مانبينش كامل بلي وجعتني هدرتهم والا تأثرت
وحتى الزواج خفت منو خفت مايكونش شخص نعجبو شخص يشوفني كيما هذو الناس صغيرة بزاف ومانيش جايبة روحي نتمنى تفيدوني وبارك الله فيكم
 
قد استعجل كثيرامن حكم عليك بهذا الحكم بل وظلمكي حين حكم فأنت من النوع الذي لا يشيخ ولا تبدو عليه معالم الشيخوخة في زمن شيخوة بنات جيلك فهناك من الثمار من تينع في فصلها وهناك من تتأخر إلى اخار نهايةالفصل وهي الاطيب وعليها الطلب والحديث قياس
عين البصر كفيفة ان غابت عليها عين البصيرة (فمابرك عليك هذه الميزة ) اتمنى ان تتذكري هذا الكلام حين يصبح واقعا لديك و ان انال من دعاءك لي ولآهلي بالعفو والعافية في الدارين
 
وعليكم السلام ورحمة الله وبركاته
اسعد الله اوقاتكم وملاها يمنا وبرك
اختي الغالية، هل انت تريدين ارضاء الله ام ارضاء الناس؟
ارضاء الله غاية لا تترك وارضاء الناس غاية لا تدرك، فادركي ما لا يترك واتركي مالا يدرك
ان اكرمكم عند الله اتقاكم
ولا فرق بين عربي ولا اعجمي الا بالتقوى
ولما ترينهم، قولي الحمد لله الذي غافاني مما ابتلاهم وفضلني على كثير ممن خلق تفضيلا كثيرا، والحمد لله الذي اشغلهم بي واشغلني عنهم
شكلك ليس خيارك وايضا اشكالهم هم، فانما يعيبون خلق الله وتحسبونه هين وهو عند الله عظيم
اما ناحية الماكياج والتزين، قوليلهم خليتهولكم ليكم وانا عجوزة وافتخر وموش اللي يروح للواد نلحقو وندير كيفو
يا غاليتي، خليكي منهم.. وهل زادو او نقصو فيك حاجة لما قالو كلامهم؟ لا ابدا واللي يغير ميقول الخير تان...
لا شيء يدعو للكآبة والاكتآب الا ترك الصلاة والابتعاد عن الله عز وجل.. اما الناس والبشر كلامهم لا يسمن ولا يغني من جوع
اسال الله ان يريح بالك وان يثبت قلبك اختي الغالية
ومرحبك بك ان اردت التواصل معي في الخاص
تحياتي القلبية
 
السلام عليكم و رحمة الله و بركاته
اهلا بك ربي يسرلك أمورك حبيبتي
لا عليك بمعايير الناس
اذا كان الحجاب الشرعي للعجوز فأكرم بالعجائز
متخليش الشيطان يدخلك من هذا الباب
و البنات الجيل بالغن في الاهتمام بالمظاهر و المعلوم أن المرأة تحب التزين لكن في حدود الشرع وبدون مبالغة وان يصبح ذلك شغلها الشاغل و اهتمامها الأول
على النحافة لا أظن أنك بتلك النحافة بمأن طولك متناسب مع وزنك
ولكن ان كان زيادة الوزن رغبتك أنت لا رغبة غيرك فمارسي الرياضة في البيت و كلي جيدا و لا تفكري في الأمر كثيرا ....أما ان كانت رغبة غيرك (فأخطيك ) بكري كان الجمال للمرأة السمينة وكانو ينظرون للمرأة النحيفة على أنها مهمومة و تعيش الضنك! بعدها دخلت المعايير الأوروبية و أصبح الجمال في النحافة فكل النساء يركضن نحوها ...و الآن أراهم عادوا للأول
في رأيك المرأة تتبقى هكذا !
الله سبحانه خلقنا فأحسن خلقنا و هو حكيم في خلقه ثم يأتي العاجز عن خلق الذباب و يتكبر بما أنعم الله عليه و يصف غيره بغير المناسب !
الخلل فيهم حبيبتي الجمال اولا جمال الباطن ثم جمال المنطق ثم يأتي الجمال الظاهري و أهمه النظافة ثم يلبس الانسان ما يناسبه حتما سيبدو جميل
نعود لمسألة خوفك من الخطبة الرجل الذي يرفضك لمثل هذه المعايير و ان كان له حق في ذلك فانا أرى ان الله أكرمك برفضه ..البيوت لا تبنى على هذا فالظاهر لا يدوم و سيأخذ منه الزمن ما يأخذ ثم هذا الذي يختار على هذا الأساس هل تأمن من تزوجته ان لا يصيبها مكروه فيم اختارها لأجله هل يطلق حينئذ !
فلا تخافي حبيبتي عادي ان تقدم من ترضين دينه و خلقه استخيري وفي النهاية في نظرة شرعية قد ترفضين أنت و قد يرفض هو وقد تقبلان
و في النهاية أقول لك ما قال الأخ الفاضل بقايا انسان هاته ميزة و معلوم هذا الأمر و مشاهد للنحافة دور في المظهر الشبابي و لكل سن رونقه الخاص فعيشي سنك برونقه الجميل و انظري لنفسك بأعين الفراشة ترى كل ما هو جميل لا بأعين الذبابة
كما أن أمنا عائشة رضي الله عنها لم يفرقوا بين وجودها من عدمه في الهودج لخفتها فهل منع ذلك أنها أفضل نساء الأمة !
 
آخر تعديل:
وعليكم السلام ورحمة الله وبركاته
شكرا لوضعك الثقة فينا
حبيبتي راكي مادة للناس اكثر من قيمتهم ودخلتيهم بزاف في حياتك واثروا عليك
في حين انك انسانة طبيعية جدا
وزنك وطولك عادي
سلفتي توزن 40ومهيش دايرة منها شغلة!
اولا خرجي هاذ الناس بيهم بدبايرهم بتعليقاتهم من راسك يلا out
برا اقنعني روحك بلي هدرتهم متعنيش
اشحني نفسك بالثقة وكوني قوية
لي تقولك راكي ضعيفة قولها عاجبتني روحي
ماهو السمينات يديرو في الريجيم عجال هاذ الجسم! واضحكي متتاثريش
ال baby face كلهم يحوسو عليه اواشبيك انتي الواحد يفرح كي يقولولو تبان قل من عمرك وسورتو المرا وانتي تتغشي!
اما الحجاب والماكياج هاذي قناعات شخصية
اواه لازم تتعلمي مهارة الرد والقصف
وتفكري بلي راي الناس ميزيد مينقص
مالا علاه تقلقي في روحك بيهم
هدرتهم السلبية رديها ايجابية وعيشي حياتك
ومتعمريش راسك بكومة ناس فارغين
دمتي بخير
 
لي عودة
 
قرات الموضوع فتهت بين نقطتين
هل حزنك انكي تباني صغيرة ام انك تباني كبيرة
المهم في كلتا الحالتين امرك لايؤدي لا الى الاحباط ولا الى الانطواء ولا الى اي شيء
اسمعيني جيدا حالتك النفسية التي انتي عليها الان مردها لخطا فادح ترتكبينه ويرتكبه معظم الناس وهو ان نجعل من الناس معيارا لحياتنا يعني لو حبيتي تشري لبسة تشريها باش تعجب الناس وانتي تعلمي ان الناس مايرضيهم العجب ولا الصيام في رجب وزيدي حزنك انبثق من التي كلمتك على الماكياج ياستي يلعن بو الماكياج ويلعن يماه لانك لو فكرتي شوية لواه تحطي ماكياج يعني باش تعجبي الناس اوكي اذن الناس الي تعجبيهم بالماكياج ادفعيهم للدوك-الدوك هو مخزن القمح- وماتعطيهمش قيمش لن اعجابهم سيبدا في الصباح وينتهي يعد زوال الماكياج ثم الاصل ان يغجب بالانسان بتكوينه واخلاقه وتحظره لا بالقشور التي تغطيه
اقولك شيء الي نقداتك وقاتلك راكي كي العجوز لانك ماتحطي ماكياج راهي غيرانة منك والدليل انك كنت على قدر من الجمال حتى بدون ماكياج
اكتبي على كلراس المحاظرة ما يلي -من يريد الضياع والفشل في حياته فليجعل من الناس معيارا للانتقاد ولبناء شخصيته
كوني بخير
 
واه لازم تتعلمي مهارة الرد والقصف
الله اكبر السلطانة تستعمل مصطلحات تليق ببعض البشر
اعجبتني كلمة القصف
استعملي ياصاحبة المشكلة مبدا القصف
 
واحد ما خدم شكلو وواحد ما كان عندو رأي في التقويم تاعو..
لكن حياتك و كيفاش تمشيها انت تقرريها.. كاين واحد الممثل مثل في سلسلة game of thrones.. قصير القامة وين تباني معاه بصح الشخصية تاعو كانت خرافية لحد بعيد جدا..
رجلاوي برك ممثل في القمة متزوج ولاباس عليه.. شكلك تقدري تتحكمي في الجزء لي تقدري عليها سواء بالرياضة او تتهلاي في روحك والزينة حرام برا مي جايزة في دار.. كامل الشباب عندهم قناعة تحت الماكياج كاين مخلوق ضعيف شخصية يبحث عن الحب والاهتمام والطفلة لي ما ديرش ماكياج نشوفو عندها ثقة في نفسها..
انت مازالك صغيرة واذا كتبلك ربي تعيشي مطولا رايحة تشوفي مصير لي بدات تماكيي بمستحضرات تجميل مقلدة ماشي حتى أصلية تشريها من السوق ماعلابالهاش بالاضرار تاعها..
خطينا من الماكياج وينو الإكتئاب هنا، الايموجي تاع الضحك هذاك يكفي ويزيد
كاين زوج حوايج ديرهم كي تشوفي المرايا.. دعاء نتاع اللهم حسن خلقي كما حسنت خلقي.. واضحكي مع روحك وانت خارجة للجامعة ولا للعمل، الثقة بالنفس راكي محتاجتها بزاف.. طوري من المهارات تاعك في شتى الميادين في علمك وفي أدبك.. الرجال ما يخطبوش بنات السراويل الضيقة والماىلات كاينة حاجة اسمها بنت فاميلية.. واذا قلتي راهم يتزوجوا بنات الماكياج نقلك يتزوجوا برجال الكيراتين.. في سنك كاين بنات راهم في مستشفيات السرطان لا شعر لا حواجب كلش راحلهم و هكاك تلاقيهم ديما مبتسمين ونزيد نقلك حاجة يا اختي كلش بالمكتوب زواج ولا عمل ولا اي شيء راهو بيد ربي.. ورانا جربنا نحوسو على مكتوبنا بالحرام ربي سلط علينا الذل والهوان.. الاكتئاب يبدا نهار تلومي نفسك في حاجة انت ما تقدريش تكمليها ولا تحسنيها.. ربي يفتح عليك.
 
أنا كنت ضعيفة نوزن 55برك بالرغم كان في عمري23سنة وعادي جدا عاجبتني روحي ومعلباليش قاع بهدرة الناس بصح في صيف2019ازاد وزني مافهمتش كيفاش حتی وليت نوزن ضرك قريب70 هههههه نقلك من لاخر ريحي بالك تربحي صحتك هادي هدي ومعلبالكش بالناس ولو يهدرو خليهم لازم تولي عندك ثقة في روحك وتولي انسانة قوية وماش اي شخص ينتقدك تتقلقي وتتعقدي
 
يا حبيبتي اللي يجي يعلق على شكلك و لا صحتك قوليله و الله عاجبتني روحي
ونتي لاااازم تتقبلي ذاتك و تتصالحي مع ذاتك و كخطوة ثانية تحاولي تعدلي قد ما تقدري ليس ارضاءا للغير و انما حبا لذاتك
نتي راكي تقولي 50 كيلو و تعقدتي
انا كيتزوجت كان ميزاني 45, و الكارثة كانت عاجبتني روحي 😂😂😂😂😂
و جامي قلت منيش شابة خخخخ و بعد الإنجاب لحقت للوزن المثالي في نظري هذا اذا كان مثالي
بالنسبة للطول مزال تزيدي ديري سبور راح تطوالي
حابة نقولك أحبي عيوبك
أنا و بكل روح رياضية عندي الجبهة و شحال من خترة نقولها نورمال بحيث لازم نغطيها شوي بالشعر مالڨري فالواقع متبانش بزاف مصح فالصور كارثة ابن عمي خصوصا و لا كانت صورة جانبية
علابالك كنكون قدام المراية واش نقول 😂😂😂😂😂
جبهتي المحبوبة 😂😂😂😂😂😂
تصاااااالحي مع ذاتك
بالنسبة للماكياج يابنتي أنا نشري الماركة و جامي نستعمل المقلد و نماكيي خترة و لا زوج فالسمانة مام الا ماكييت اكثر حاجة خفيفة مكانش كريمات
بيسك اللي يماكيو بزاف البشرة تاعم تتعب قبل الوقت و الحل هو البديل الطبيعي و الاستعمال العقلاني و بالاك يغروك فسن المراهقة روحي شوفيهم كي يلحقو لثلاثين سنة برك منيش نعيبهم ولكن للعبرة
و ساعات نكون معروضة في بلاصة مثلا نروح من غير ما نحط حاجة في وجهي نلبس سامبل و نروح و ساعات العكس تماما
لأنو عندي قناعة جامي نستنى نعجب شخص و لا تغيضني اذا عابني
و نزيدلك وحدة ككنت بالحمل ميزاني زاد ماللڨري مش بزاف مي راجلي كان يشوفها بيزار و يقولي البطة
عادي وليت نسمي روحي البطة بيسك حاجة مش بيدي جامي تغيضني
مي تغيضني كنكون أنا السبة في حاجة
و لو كان تلاحظي هنالك نساء عاديات لهن ممكن أزواج وسيمون و تلقاه يمووووووت فيها و يبغيها مالڨري كاين حواليه اللي راهي شابة خير منها
و السر تلقايها واثقة من روحها متقبلة لذاتها
و أحيانا قد يحدث أن تلتقي مع فاتنة و تلقايها و مع ذلك مش متقبلة روحها
أما لو جمعة بين الجمال و السلام الداخلي فتلك نعمة
انتي درك ديري واش تقدري
ديري سپور الرياضة تزيدلك فالطول و ممكن تسماني شوي
طهلاي ببشرتك و شعرك بطرق طبيعية
و كل ذلك من مبدأ حب الذات
راني حاولت قدر المستطاع ننصحك و نشالله تكوني غيرتي نظرتك
و الحمد لله أولا و أخيرا على نعمة الصحة
 
يا يما شدوني عليها ٢١ عام راح تدخل فالاكتئاب علاخاطر نحيفة و تبان صغيرة بزاف و اللبسة تجيها عريضة
المشكل مش فالقصة لي حكيتيها
المشكل فالمصائب اللي جايينك لي ما تقدريش تتجاوزيهم كان بقيتي تخمي هاك
مش شكلك لي صغير تفكيرك لي صغير و هنا الكارثة تقلقتي وقتاش تكبري
الدنيا اصعب مما تتصوري و كان تبيني عقليتك هادي لناس سيئين راح يستغلوك
مالا اكبري فعقلك هادا امر تافه يدخلك للاكتئاب
الاكتئاب رآه اخطر مرض نفسي واشبيك الملايين ينتحرو بسببه نتي تدخليلو علاجال حاجة تافهة ناس يشوفوك صغيرةًو لا كبيرة
الدنيا مافيهاش الرحمة إذا بقيتي تحوسي نظرة الناس ليك يأكلوك لحم و يخلوك عظم و يرموك فقبرك من البعيد كي شغل حكمك كورونا و زيد ما يصلوش عليك و يقولوا حرام نترحموا عليها ماتت كافرة كي انتحرت
هادو هما الناس لي تحوسي تكتأبي عليهم و أنتي خيري
كان جيتي تعرفي معنى الاكتئاب و الله ما تقدري حتى تكتبي
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top