مهما كانت نواياك و تصريحاتك و درجة المواطنة متاعك ما تنجم تكون في نظر الزبطية كان نعجة و إذا كان تتصور روحك تعمل قرون ( موش قرون الطحين بالطبيعة) توللي من النوع اللي ينعتوهم بالسفهاء و المفسدين في الأرض و المشاغبين و الصيادين في الماء العكر
و إذا لزم ينوضو عليك بالذخيرة الحية ينوضو ما دام التنويض بالقانون
و هو آش معنتها ينوضو عليك بالذخيرة الحية
معنتها يتنقلو بيك من هيئة أدمي حي يرزق و يتنفس و عندو أحاسيس و مشاعر إلى هيئة الجيفة اللي ما تترفع كان بعد ما يجي آشكون بقلم و يثبت اللي الجيفة حقيقة و الا عيرية رامية سكـّانة
و آش يضر الجيفة من أنها تتسلخ و الا تتسحل و الا تنتن و الا تتدفن بعد ما مولاها فارق الحيين و اللي نوض عليها لا حس برجفة في فرايصه وقت اللي جبد على القرص و لا اترعد وقت اتكلمت الكابسونة و لا عينيه زغللت بادموع وقت اللي ناشت الحبة هدفها و مرقت بين الضلوع و ربما فترشت طرف من الضلعة و الا سلسول الظهر و نقبت الرية و مزلتها و قتقت العروق المليانة
الدم الأحمر ---------------------------------
------
الدم الأحمر ---------------------------------
الدم الأحمر ---------------------------------
الدم الأحمر ---------------------------------
أعتذر عن هذا الإنقطاع الناجم عن فيضان الأودية و السواقي و البحيرات و السباخ و المجاري و كل ما يحويه سائل بتدفق من الدماء التي غمرتنا و غمرت حواسبنا و لوحات مفاتيحها إلى أن تلونت أناملنا دما دما
يا قاتل الروح وين تروح و عاطي الأمر بقتل الروح وين تروح و مزكي أمر قتلان الروح وين تروح و يامخبي على الأسماع موت الروح وين تروح...هدت جواديركم على بيوتنا نهبتها